TOƁERE 3
Raabi hoolino Yahuwah
Miijitoɗen wano hiɗen e nder saare Yeerikoo. Nden saare ko e nder leydi Kanaana nde woni. Yimɓe wonunooɓe ton ɓen hinaa rewooɓe Yahuwah. Debbo innetenooɗo Raabi ko e nder nden saare o wonunoo.
Fewndo ko Raabi wonunoo jiwo, ɓe sifanino mo honno annabi Muusaa walliri banii Isra’iila no ɓe hettori e leydi Misira. E honno o fecciri baharu on fii no ɓe feƴƴira. Ɓe sifanino mo kadi honno Yahuwah walliri ɓe no ɓe foolira ayɓe maɓɓe ɓen ka gere. Jooni non, o nanii banii Isra’iila’en no daakii takko Yeerikoo.
Raabi dannduno alkitaaɓe ɓen ɓayri himo hoolinoo Yahuwah.
Kiikiiɗeere goo, alkitaaɓe ɗiɗo ɓe banii Isra’iila ari ndaarugol saare nden. Ɓe ari ka suudu Raabi. O werni ɓe. E nder jemma on, lanɗo Yeerikoo on nani alkitaaɓe naatii ka nder saare e hiɓe hoɗi ka suudu Raabi. Onsay lanɗo on nuli suufaaɓe makko ɓen yo ɓe nanngoy ɓe. Raabi suuɗi alkitaaɓe ɓen ɗiɗo ka hoore niwre suudu makko. O yeetii suufaaɓe ɓen : « Alkitaaɓe ɓen hari hiɓe ɗoo, kono ɓe yalti saare nden. Si on jokkitii ɓe jooni on waaway ɓe nanngude ! » Hiɗon anndi fii honɗun Raabi danndi alkitaaɓe ɓen ? — Ko fii himo hoolinoo Yahuwah e himo annduno o jonnoyay banii Isra’iila’en leydi Kanaana.
Ɗoo yo alkitaaɓe ɓen yaltude suudu Raabi ndun, ɓe foduno mo kanko e ɓeynguure makko nden daɗoyay si saare Yeerikoo lancoyaama. Hiɗon anndi ko ɓe haalani mo yo o waɗu ? — Ɓe wi’i : « Ƴettu ngol ɓogol boɗewol, yowaa ngol ka ɓaawo fineteeri ma. Si a waɗii ɗun, wonuɓe ka nder suudu maa ɓen fow daɗoyay. » Ko ɓe yeetii Raabi kon, ko ɗun tigi o waɗi. Hiɗon anndi honɗun feƴƴi ɓaawo ɗun ? —
Yahuwah dannduno Raabi e ɓe o wondunoo ɓen.
Balɗe seeɗa feƴƴi, banii Isra’iila’en fuɗɗi taaraade saare nden hiɓe deƴƴi. E nder balɗe jeego’o hiɓe taaraade saare nden, ɲallal kala nde wootere. Kono ɲallaande jeeɗiɗaɓere nden, ɓe taari saare nden nde laabi jeeɗiɗi. Ontuma ɓe haaci moƴƴa. Yahuwah waɗi maadi taariindi saare nden e cuuɗi ɗin yani. Kono suudu ka ɓogol boɗewol ngol woni ka ɓaawo fineteeri yanaali. On yi’ii suudu ndun ka fotoo ɗoo ? — Raabi e ɓee ɓe o wondunoo ɓen fow daɗuno !
Ko honɗun taariika Raabi on janni on ? — Raabi hoolino Yahuwah sabu piiji moƴƴuɗi buy ko o sifanaa kon fii makko. Onon kadi hiɗon janngude fii piiji moƴƴuɗi buy ko Yahuwah waɗi kon. Hiɗon hoolii mo wano Raabi hoolornoo mo non ? — Meɗen anndi hiɗon hoolii mo !
