Mar atá foghlamtha agat sa bhróisiúr seo, tá go leor prionsabail sa Bhíobla a chabhróidh leat féin agus le do theaghlach. Tá Iehova ag iarraidh go mbeidh tú sona sásta. Geallann sé má thugann tú tús áite dá chuid adhartha go ‘dtabharfar na nithe sin uile daoibh chomh maith.’ (Matha 6:33) Is mór aige do chairdeas. Tapaigh gach deis chun do chairdeas leis a chothú. Is í seo an phribhléid is mó a d’fhéadfadh a bheith ag duine.—Matha 22:37, 38.

AN MÉID ATÁ RÁITE SA BHÍOBLA: “Beidh mé i m’athair agaibh agus beidh sibhse in bhur gclann mhac agus iníonacha agamsa.” (2 Corantaigh 6:18) Tá Dia ag iarraidh ort a bheith i do dhlúthchara aige. Bealach amháin chun é seo a dhéanamh ná trí ghuí. Tugann Iehova cuireadh duit a bheith “ag guí gan staonadh.” (1 Teasalónaigh 5:17) Tá an-fhonn air do chuid smaointe agus na rudaí atá ag déanamh imní duit a chloisteáil. (Filipigh 4:6) Nuair a ghuíonn tú le do theaghlach, déanann sé soiléir dóibhsean go gcreideann tusa go bhfuil Dia ann.

Ní mór duit éisteacht le Dia chomh maith, trí staidéar a dhéanamh ar a fhocal agus ar fhoilseacháin atá bunaithe ar an mBíobla. (Salm 1:1, 2) Déan machnamh ar an méid atá á fhoghlaim agat. (Salm 77:12, 13) Lena chois sin ní mór duit freastal go rialta ar chruinnithe Críostaí.—Salm 122:1-4.

Bealach tábhachtach eile chun do chaidreamh le Iehova a neartú ná labhairt le daoine eile faoi. Dá mhéad dá ndéanann tú é seo, is ea is mó a mhothóidh tú an ceangal atá agat leis.—Matha 28:19, 20.

AN RUD IS FÉIDIR LEAT A DHÉANAMH:

• Cuir am i leataobh gach lá chun an Bíobla a léamh agus chun guí a dhéanamh

• Mar chlann, tabhair tús áite do rudaí spioradálta thar siamsaíocht agus caitheamh aimsire

AN MÉID ATÁ RÁITE SA BHÍOBLA: “Druidigí i gcóngar Dé agus druidfidh Dia in bhur gcóngarsa.” (Séamas 4:8) Ní mór duit sceideal a bheith agat le haghaidh do sheisiún adhartha agus cloí leis go rialta. (Geineasas 18:19) Ach ní leor é sin. Ní mór do Dhia a bheith mar pháirt de do shaol laethúil. Neartaigh caidreamh do theaghlaigh le Dia trí a bheith ag labhairt faoi agus tú “i do shuí i do theach duit, nó ag siúl na slí, nó i do luí nó ag éirí duit.” ( Deotranaimí 6:6, 7) Bíodh sé mar sprioc agat aithris a dhéanamh ar Iósua, a dúirt: “Maidir liom féin agus le mo theaghlach, ámh, déanfaimid fónamh don Tiarna.”—Iósua 24:15.

AN RUD IS FÉIDIR LEAT A DHÉANAMH:

• Bíodh clár oiliúna rialta agat ina bhfuil riachtanais gach duine den teaghlach san áireamh