Agbɛnɛ hii lɛ fee dioo. Ekolɛ, gbɛɛmɔ ni anuɔ nɔŋŋ ji kɔɔyɔɔ ni tswaa kɛjɛɔ Arabia shia ŋa lɛ nɔ lɛ. Sane naataamɔ lɛ ehã etɔ Hiob, ni ebɛ nɔ ko ni ebaawie dɔŋŋ. Feemɔ Hiob he mfoniri ni emli efu kɛmiikwɛ enanemɛi etɛ ni ji, Elifaz, Bildad, kɛ Zofar​—oookɛɛ nɔ ni eekɛɛ amɛ akɛ, ‘nyɛyaa nɔ nyɛwiea.’ Shi amɛkwɛɛɛ lɛ po, amɛmli efu waa ejaakɛ, amɛmiina akɛ, wiemɔi “foji” ni amɛwie yɛ Hiob he lɛ hãaa Hiob nijiaŋ aje wui. (Hiob 16:3) Nɔ ni nɔŋŋ ni kã Hiob tsui nɔ ji bɔ ni ebaafee ehiɛ enɔkwayeli lɛ mli.

Ekolɛ, Hiob nu he akɛ anɔkwa ni ebaaye Nyɔŋmɔ lɛ ji nɔ titri ni esa akɛ ehe ahia lɛ fe fɛɛ. Enibii fɛɛ eŋmɛɛ lɛ, ebii nyɔŋma lɛ fɛɛ egboi, enanemɛi kɛ ekutsoŋbii ebuuu lɛ ni amɛyeee amɛbuaaa lɛ, agbɛnɛ hu, hela emɔ lɛ. Hela lɛ hã ehewolo nɔ dĩ, ni ehe fɛɛ yi kɛ faji ni hiɛ emɔmɔ akakai, ni ewo gɔgɔmi. Emumɔ po miije fu. (Hiob 7:5; 19:17; 30:30) Kɛ̃lɛ, nibii gbohii ni hii etɛ nɛɛ wie lɛ hã Hiob mli fu waa. Etswa efai shi akɛ ebaahã ana akɛ ejeee eshafeelɔ tamɔ bɔ ni amɛwie lɛ. Hiob naagbee wiemɔ lɛ hã hii lɛ fee dioo agbɛnɛ. Amɛwie saji gbohii babaoo amɛshi lɛ aahu akɛ, nɔ ko bɛ ni amɛbaawie dɔŋŋ. Kɛ̃lɛ, Hiob kã he eepiŋ lolo. Yelikɛbuamɔ he miihia lɛ waa diɛŋtsɛ!

Enɛ hãa wɔnaa nɔ hewɔ ni Hiob ná jwɛŋmɔ ni ejaaa yɛ esane lɛ he lɛ. Ehe bahia ni ená gbɛtsɔɔmɔ, ni ajaje ejwɛŋmɔ. Ehe bahia ni ashɛje emii, ni no ji nɔ ni kulɛ esa akɛ enanemɛi etɛ lɛ afee amɛhã lɛ, shi amɛfeee lɛ. Ani oyaje shihilɛ ko mli ni onu he akɛ esa akɛ aye abua bo ni ashɛje omii pɛŋ? Ani mɛi komɛi ni osusuɔ akɛ amɛji onanemɛi efee nɔ ko ni edɔ bo waa pɛŋ? Kɛ́ oná ole bɔ ni Yehowa Nyɔŋmɔ ye ebua etsulɔ Hiob kɛ bɔ ni Hiob kɛ yelikɛbuamɔ ni akɛhã lɛ lɛ tsu nii lɛ, ebaaye ebua bo ni oná hiɛnɔkamɔ.

No sɛɛ lɛ, wɔna nɔ ko yɛ Hiob sane nɛɛ mli ni wɔkpaaa gbɛ kwraa. Oblanyo ko ni atsɛɔ lɛ Elihu hu ta jɛmɛ. Be ni hii onukpai lɛ wieɔ lɛ fɛɛ lɛ, eta jɛmɛ ni efee dioo eebo amɛ toi. Ni saji ni enu lɛ hãaa emii ashɛ ehe kwraa.

Elihu mli fu Hiob. Edɔ lɛ akɛ anɔkwafo Hiob ŋmɛ gbɛ ni awie ashi lɛ aahu akɛ agbɛnɛ “eetao etsɔɔ akɛ, lɛ moŋ esane ja fe Nyɔŋmɔ.” Kɛ̃lɛ, Hiob nii fee Elihu mɔbɔ waa, ena akɛ Hiob miipiŋ waa, ni gbɛtsɔɔmɔ kɛ miishɛjemɔ he miihia lɛ waa. Ebɛ naakpɛɛ akɛ Elihu mli fu Hiob nanemɛi etɛ lɛ! Enu ni amɛmiiwie nibii gbohii amɛmiishi Hiob, amɛmiibɔ mɔdɛŋ koni amɛhã ehemɔkɛyeli lɛ mli agbɔjɔ, amɛgbe ehe guɔ koni ekwa Nyɔŋmɔ. Nɔ ni fite sane lɛ kwraa ji akɛ, amɛwie nibii komɛi ni fee tamɔ nɔ ni Nyɔŋmɔ yitsoŋ wa. Be ni Elihu nu saji fɛɛ ni amɛwie lɛ, enu he akɛ, esa akɛ ewie nɔ ko!​—Hiob 32:2-4, 18.

Ewie akɛ: “Gbekɛ ji mi, ni nyɛ lɛ, hiimeji ji nyɛ. No hewɔ lɛ, mijɛ bulɛ mli mifee diŋŋ dã, ni mikaaa akɛ makɛɛ nyɛ nɔ ni mile.” Shi eyanyɛɛɛ efee diŋŋ dɔŋŋ. Ewie kɛfata he akɛ: “Dalɛ kɛkɛ hãaa mɔ atsɔ hiɛshikalɔ, ni jeee hiimeji pɛ le nɔ ni ja.” (Hiob 32:6, 9) Kɛkɛ ni Elihu wie kakadaŋŋ kɛtsɔɔ akɛ nakai wiemɔi lɛ ji anɔkwale. Bɔ ni ekɛ Hiob wie lɛ yɛ srɔto kwraa yɛ bɔ ni Elifaz, Bildad, kɛ Zofar kɛ lɛ wie lɛ he. Elihu hã Hiob le akɛ, ekɛ lɛ ewieŋ bɔ ni esaaa, ni ewieŋ nɔ ko hu ni baahã esane lɛ mli awo wu. Agbɛnɛ hu, ekɛ Hiob ye yɛ bulɛ mli, no ji, etsɛ egbɛ́i ni ekpɛlɛ nɔ akɛ bɔ ni hii lɛ kɛ lɛ wie lɛ ehiii. * Ejɛ bulɛ mli ewie akɛ: “Agbɛnɛ, Hiob, ofainɛ bo miwiemɔi lɛ toi.”​—Hiob 33:1, 7; 34:7.

Elihu wo Hiob ŋaa ni eshiuuu nɔ ko nɔ, ekɛɛ akɛ: “Owie ni minu, . . . ‘Miyɛ krɔŋŋ, ni mitɔ̃ko mla ko; mihe tse, ni tɔmɔ ko bɛ mihe. Shi Nyɔŋmɔ taoɔ nibii ni eeedamɔ nɔ ete shi ewo mi.’” Elihu wie nɔ tuuntu ni gbaa Hiob naa lɛ he, ebi lɛ akɛ: “Ani oheɔ oyeɔ akɛ osane ja aahu akɛ okɛɔ akɛ, ‘mija fe Nyɔŋmɔ’?” Elihu nyɛɛɛ afee diŋŋ dɔŋŋ ni Hiob aya nɔ asusu nii ahe yɛ nakai gbɛ nɔ. Ekɛɛ lɛ akɛ “nɔ ni owie nɛɛ, ejaaa.” (Hiob 33:8-12; 35:2) Elihu le akɛ, Hiob nibii ni eŋmɛɛ lɛ lɛ kɛ bɔ ni enanemɛi etɛ lɛ kɛ lɛ ye ehã lɛ egba Hiob naa waa. Shi Elihu bɔ Hiob kɔkɔ akɛ: “Kwɛmɔ jogbaŋŋ ní mlifu ni naa wa akahã ofee nɔ ko gbonyo.”​—Hiob 36:18.

Nɔ ni fe fɛɛ lɛ, Elihu fã Yehowa Nyɔŋmɔ he. Ewie wiemɔ kuku ko ni he hiaa waa kɛgbala anɔkwa sane ko mli, ekɛɛ akɛ: “Ebaŋ lɛ kɔkɔɔkɔ akɛ anɔkwa Nyɔŋmɔ lɛ baafee nɔ fɔŋ, aloo akɛ, Ofe lɛ baafee nɔ ni ejaaa! . . . Ofe lɛ tsɔɔɔ jalɛ sane hiɛ ebuuu shi.” (Hiob 34:10, 12) Elihu ye ebua Hiob ni ena akɛ Yehowa naa mɔbɔ ni eyeɔ jalɛ sane. Ejaakɛ akɛni no mli lɛ Hiob miifo lɛ pɛ enɔ mli hewɔ lɛ, ewie nibii komɛi eshi Nyɔŋmɔ. Kulɛ Yehowa baanyɛ agbala Hiob toi yɛ no hewɔ, shi efeee nakai. (Hiob 35:13-15) Nɔ najiaŋ ni Elihu baafee tamɔ nɔ ni ele nɔ fɛɛ nɔ yɛ Nyɔŋmɔ he lɛ, ejɛ heshibaa mli ewie akɛ: “Nyɔŋmɔ da fe bɔ ni wɔɔnyɛ wɔle.”​—Hiob 36:26.

Eyɛ mli akɛ Elihu wo Hiob ŋaa ni eshiuuu nɔ ko nɔ moŋ, shi ejie mlihilɛ kpo. Ewie hiɛnɔkamɔ ko ni nɔ bɛ he kɛtsɔɔ akɛ be ko baaba ni Yehowa baahã Hiob aná gbɔmɔtsoŋ hewalɛ ekoŋŋ. Nyɔŋmɔ baakɛɛ etsulɔ ni yeɔ lɛ anɔkwa lɛ akɛ: “Eheloo lɛ afee frɔŋ fe gbekɛ nɔ; eku sɛɛ ená eblahiiaŋ hewalɛ lɛ ekoŋŋ.” Elihu fee nɔ kroko hu kɛtsɔɔ akɛ emli hi, no ji, nɔ najiaŋ ni lɛ sɔŋŋ ebaawie kɛtsɔɔ Hiob lɛ, ejɛ mlihilɛ mli ehã Hiob hu wie kɛjie enaa. Ekɛɛ akɛ: “Wiemɔ, ejaakɛ miitao mahã ona akɛ osane ja.” (Hiob 33:25, 32) Shi Hiob ewieee. Ekolɛ, nɔ ni Elihu wie lɛ ta etsuiŋ waa ni ewo lɛ hewalɛ hu, no hewɔ lɛ, enuuu he akɛ esa akɛ ejie enaa. Ekolɛ, be ni eyɔse akɛ Elihu susuɔ ehe waa lɛ, efó.

Wɔbaanyɛ wɔkase nibii babaoo kɛjɛ hii anɔkwafoi enyɔ nɛɛ adɛŋ. Wɔbaanyɛ wɔkase bɔ ni awoɔ mɔ ŋaa kɛ bɔ ni ashɛjeɔ mɔ mii kɛjɛ Elihu dɛŋ. Kɛ́ naanyo kpakpa yɔse akɛ oyɛ naagba wulu ko lɛ ebaakɛɛ bo, ni kɛ́ ena akɛ ootao ofee nɔ ko ni ehiii lɛ, ebaabɔ bo kɔkɔ kɛ́ efeemɔ wa kɛhã lɛ po. (Abɛi 27:6) Wɔmiisumɔ ni wɔfee wɔhe nanemɛi tamɔ nakai ni wɔya nɔ wɔjɛ mlihilɛ mli wɔwo mɛi ni hewalɛwoo he miihia amɛ lɛ hewalɛ kɛ́ amɛwie nibii ni ejaaa po. Ni kɛ́ wɔ hu wɔyaje shihilɛ ko mli ni ŋaawoo tamɔ nakai he miihia wɔ lɛ, Hiob nɔkwɛmɔnɔ lɛ baanyɛ aye abua wɔ ni wɔjɛ heshibaa mli wɔbo ŋaawoo toi moŋ fe ni wɔbaakpoo. Ŋaawoo kɛ jajemɔ he miihia wɔ fɛɛ. Kɛ́ wɔmɔ mli lɛ, ebaanyɛ ehere wɔyiwala.​—Abɛi 4:13.

Be ni Elihu wieɔ lɛ, etsĩ kɔɔyɔɔ, atatu, nugbɔshiimɔ, kɛ srawa tã. Ewie Yehowa he akɛ: “Nyɛboa bɔ ni egbee shiɔ waa” lɛ toi. No sɛɛ etsɛɛɛ nɔŋŋ lɛ, Elihu wie “ahum ni tswaa” he. (Hiob 37:2, 9) Etamɔ nɔ ni be ni ewieɔ lɛ, ahum ko miitswa kɛmiiba, ni be ni eeba lɛ, belɛ enaa miiwa. Be ni ebashɛ shi lɛ, enaa bawa waa. Kɛkɛ ni nɔ ko ni yɔɔ naakpɛɛ waa ba. Yehowa wie!​—Hiob 38:1.

Kɛ́ ookane Hiob wolo lɛ ni oshɛ yitsei ni Yehowa kɛ Hiob wie yɛ mli lɛ anɔ lɛ, onáa miishɛɛ waa. Onuɔ he tamɔ nɔ ni anɔkwale ko ni tamɔ ahum ni miitswa lɛ ewó nakai wiemɔi foji ni nilee bɛ mli ni Elifaz, Bildad, kɛ Zofar wie lɛ kɛmiiya. Yehowa kɛ nakai hii lɛ ewieee nɔŋŋ, sɛɛ mli kwraa dani ekɛ amɛ wie. Ekɛ ejwɛŋmɔ ma Hiob pɛ nɔ; ekɛ hiɛdɔɔ jaje etsulɔ ni esumɔɔ esane waa nɛɛ, tamɔ bɔ ni tsɛ jajeɔ ebi lɛ.

Yehowa le akɛ Hiob miipiŋ waa. Ni bɔ ni Yehowa nuɔ he ehãa be fɛɛ be kɛ́ etsuji ni esumɔɔ amɛsane waa lɛ miipiŋ lɛ, nakai ji bɔ ni enu he ehã Hiob. (Yesaia 63:9; Zakaria 2:8) Shi ele hu akɛ saji komɛi “ní nilee bɛ mli” ni Hiob wie lɛ ehã eshihilɛ lɛ mli ewo wu. No hewɔ lɛ, Yehowa bibii Hiob saji babaoo kɛjaje lɛ. Ebi lɛ akɛ: “Be ni mito shikpɔŋ lɛ shishi lɛ, nɛgbɛ oyɔɔ? Kɛji osusuɔ akɛ ole lɛ, kɛɛmɔ mi.” Be ni abɔ ade lɛ, “leebi ŋulamii lɛ,” ni ji Nyɔŋmɔ bihii lɛ fɛɛ bolɔ kɛ miishɛɛ yɛ bɔ ni adebɔɔ nibii lɛ yɔɔ naakpɛɛ lɛ hewɔ. (Hiob 38:2, 4, 7) Anɔkwa, Hiob nyɛɛɛ ahã nakai sanebimɔi lɛ ahetoo ejaakɛ eleee he nɔ ko.

Yehowa tee nɔ ewie nibii ni ebɔ lɛ ahe etsɔɔ Hiob. Yehowa gbala adebɔɔ nibii ahe saji fioo ko mli etsɔɔ Hiob, ni ewie ŋulamii, kooloi, gbɔmɛi, tsei, shikpɔŋ kɛ emli nibii, hulu, la, gbɛɛmɔi kɛ adebɔɔ nibii krokomɛi hu ahe etsɔɔ lɛ. Yehowa wie kooloi babaoo ni no mli lɛ amɛyɔɔ he ni Hiob hi lɛ niiaŋ gbɛ lɛ ahe titri​—ekomɛi ji jata, kwaakwaalabite, gɔji anɔ abotia, ŋa mli teji, ŋa mli tsina, duguma, okpɔŋɔ, akroma, okropɔŋ, Behemot (eeenyɛ efee akɛ hipopotemɔs), kɛ Leviatan (eeenyɛ efee akɛ baa). Mɛɛ hegbɛ wulu po eji nɛkɛ akɛ jeŋ muu fɛɛ Bɔlɔ lɛ diɛŋtsɛ baatsɔɔ bo adebɔɔ nibii ahe nii! *

Mɛni no mli lɛ Yehowa taoɔ etsɔɔ Hiob lɛ? Ekã shi faŋŋ akɛ ehe bahia ni Hiob aba ehe shi waa. Hiob wiemɔi tsɔɔ akɛ Yehowa kɛ lɛ yeee jogbaŋŋ, ni kulɛ ekɛ enɛ miifite wekukpaa ni kã ekɛ e-Tsɛ ni yɔɔ suɔmɔ lɛ teŋ lɛ, ni no hã eshihilɛ lɛ mli wo wu moŋ. No hewɔ lɛ, Yehowa bi Hiob shii abɔ ni ekɛɛ lɛ he ni lɛ Hiob lɛ eyɔɔ be ni adebɔɔ nibii nɛɛ fɛɛ ba shihilɛ mli lɛ, ni agbɛnɛ hu ebi lɛ koni etsɔɔ kɛji ebaanyɛ elɛ adebɔɔ nibii nɛɛ, ekudɔ amɛ, loo ejɔɔ amɛhe. Kɛ́ Hiob nyɛɛɛ akudɔ nibii po ni Yehowa ebɔ lɛ, ani ebaanyɛ ekɛɛ akɛ eyɛ hegbɛ ni etsɔɔ nɔ ni esa akɛ Bɔlɔ lɛ afee? Ani Yehowa gbɛi kɛ ejwɛŋmɔi lɛ anɔ kwɔɔɔ kwraa fe Hiob susumɔ ni husu yɔɔ he lɛ?

Nibii fɛɛ ni Yehowa wie lɛ tsɔɔ akɛ esumɔɔ Hiob waa. Etamɔ nɔ ni Yehowa kɛ Hiob miisusu nii ahe ni eekɛɛ lɛ akɛ: ‘Mibi, kɛ́ manyɛ mafee nibii nɛɛ fɛɛ ni makwɛ fɛɛ jogbaŋŋ lɛ, kɛ́ okwɛ lɛ ani minyɛŋ makwɛ bo? Ani makwa bo, magbe obii lɛ, mahã nibii fɛɛ ni baahã onu he akɛ oyɛ shweshweeshwe lɛ aŋmɛɛ bo, ni mahã hela hu amɔ bo? Ani jeee mi pɛ manyɛ mahã onine ashɛ onibii fɛɛ ni eŋmɛɛ bo lɛ anɔ ekoŋŋ, ni baahã ohela ni hãa opiŋɔ waa lɛ sɛɛ afo?’

Yehowa bi saji nɛɛ koni ekɛye ebua Hiob koni esusu nii ahe jogbaŋŋ, Hiob nyɛ ejie saji nɛɛ ateŋ enyɔ pɛ naa. Ekɛ Yehowa etaaa saji anaa ni ejieee enaa hu. Ejɛ heshibaa mli ekpɛlɛ nɔ akɛ eleee nɔ ko kwraa, eshwa ehe yɛ wiemɔi komɛi ni esaaa ni ewie lɛ ahewɔ. (Hiob 40:4, 5; 42:1-6) Enɛ hãa wɔnaa akɛ esa akɛ wɔkase Hiob hemɔkɛyeli lɛ. Yɛ naagbai nɛɛ ni ekɛkpe lɛ fɛɛ sɛɛ lɛ, etee nɔ ejie hemɔkɛyeli ni mli wa kpo yɛ Yehowa mli. Ekpɛlɛ tsɔsemɔ ni Yehowa kɛhã lɛ lɛ nɔ ni etsake esusumɔ. Esa akɛ enɛ atsirɛ wɔ ni wɔbi wɔhe akɛ, ‘Kɛ́ ajaje mi loo awo mi ŋaa lɛ, ani mijɛɔ heshibaa mli mikpɛlɛɔ nɔ?’ Ŋaawoo he miihia wɔ fɛɛ. Kɛ́ ajaje wɔ loo awo wɔ ŋaa ni wɔkpɛlɛ nɔ lɛ, etsɔɔ akɛ wɔmiikase Hiob hemɔkɛyeli lɛ.

Yehowa na akɛ Hiob miina nɔ, no hewɔ lɛ efee nɔ ko kɛshɛje emii. Yehowa kɛ Elifaz, ni eeenyɛ efee akɛ lɛ ji mɛi etɛ ni kwa amɛkɛɛ amɛmiishɛje Hiob mii lɛ ateŋ onukpa lɛ wie akɛ: “Mimli ewo la waa ewo bo kɛ onanemɛi enyɔ lɛ, ejaakɛ nyɛwieee mihe anɔkwale tamɔ mitsulɔ Hiob fee lɛ.” (Hiob 42:7) Susumɔ nakai wiemɔi lɛ ahe okwɛ. Ani no mli lɛ, Yehowa miitsɔɔ akɛ nɔ fɛɛ nɔ kwraa ni hii etɛ lɛ wie lɛ jeee anɔkwale, loo akɛ nɔ fɛɛ nɔ ni Hiob wie lɛ ja? Dabi kwraa. * Kɛ̃lɛ, srɔto agbo kã Hiob kɛ mɛi etɛ ni wie amɛshi lɛ lɛ teŋ. No mli lɛ, Hiob tsui ekumɔ, eeye awerɛho, ni enijiaŋ eje wui yɛ enaa ni afolɔ lɛ hewɔ. No hewɔ lɛ, ekolɛ no baahã bei komɛi lɛ ewie ni esusuuu he. Shi no mli lɛ, nɔ ko kwraa bɛ ni miigba Elifaz kɛ enanemɛi enyɔ lɛ anaa. Amɛhiɛ kã he ni amɛwie nibii gbohii nɛɛ amɛshi Hiob lɛ, ejaakɛ amɛwoɔ amɛhe nɔ, ni hemɔkɛyeli ni amɛyɔɔ yɛ Nyɔŋmɔ mli lɛ egbɔjɔ. Jeee Hiob ni efeko nɔ ko lɛ pɛ amɛwie amɛshi, nɔ ni fite sane lɛ fe fɛɛ ji akɛ amɛgbe Yehowa he guɔ akɛ eji Nyɔŋmɔ ni enaaa mɔbɔ, ni yitsoŋ wa!

No hewɔ lɛ, ebɛ naakpɛɛ akɛ Yehowa bi koni hii nɛɛ kɛ nibii ni jara wala ashã afɔle. Ebi koni amɛkɛ tsinahii kpawo kɛ gwantɛŋhii kpawo ashã afɔle​—enɛ jeee nɔ ko bibioo, ejaakɛ sɛɛ mli lɛ, atsɔɔ yɛ Mose Mla lɛ mli akɛ kɛ́ osɔfonukpa lɛ fee esha ko ni no hã maŋ muu lɛ fɛɛ ye fɔ lɛ, esa akɛ ekɛ tsinanuu ashã afɔle. (3 Mose 4:3) No ji kooloo ni Mose Mla lɛ bi ni akɛshã afɔle lɛ ateŋ nɔ ni jara wa fe fɛɛ. Kɛfata he lɛ, Yehowa kɛɛ akɛ dani ebaakpɛlɛ hii ni folɔ Hiob naa nɛɛ afɔlei lɛ anɔ lɛ, ja Hiob esɔle ehã amɛ dã. * (Hiob 42:8) Kwɛ bɔ ni enɛ baahã Hiob tsui anyɔ emli ahã akɛ e-Nyɔŋmɔ lɛ ehã ana akɛ efeko nɔ fɔŋ ko, ni ehã aye jalɛ sane!

Yehowa yɛ nɔmimaa akɛ Hiob baafee nɔ ni ekɛɛ lɛ lɛ, no ji ni ekɛ hii ni folɔ enaa ni no hã edɔ lɛ waa lɛ ahe ake amɛ. Ni Hiob wooo e-Tsɛ lɛ hiɛgbele. (Hiob 42:9) Hiob nifeemɔ tsɔɔ akɛ eyeɔ Yehowa anɔkwa, fe bɔ ni kulɛ ekɛ ewiemɔ baatsɔɔ. Akɛni Hiob bo Yehowa toi hewɔ lɛ, Yehowa jɔɔ lɛ waa diɛŋtsɛ.

Yehowa musuŋ tsɔ lɛ waa yɛ Hiob he, ni ena lɛ mɔbɔ hu. (Yakobo 5:11) Mɛɛ gbɛ nɔ? Yehowa tsa Hiob. Feemɔ bɔ ni Hiob nu he ehã be ni ena akɛ ‘eheloo lɛ efee frɔŋ fe gbekɛ nɔ’ tamɔ bɔ ni Elihu gba lɛ he mfoniri okwɛ! Eweku lɛ kɛ enanemɛi lɛ ye amɛbua lɛ agbɛnɛ, amɛye lɛ ŋkɔmɔ ni amɛke lɛ nii hu. Yehowa hã Hiob ná hewalɛ ekoŋŋ, ni ehã enibii ni ŋmɛɛ lɛ lɛ ku ebɔ he toi enyɔ. Ni mɛni Yehowa fee kɛye ebua Hiob yɛ ehaomɔ ni fe fɛɛ lɛ​—ni ji ebii ni gboi lɛ he? Ashɛje Hiob kɛ eŋa lɛ mii yɛ gbɛ ko nɔ, no ji ahã amɛfɔ bii nyɔŋma krokomɛi! Ni Yehowa tsɔ naakpɛɛ gbɛ nɔ ehã Hiob hi shi afii babaoo. Yɛ enaagbai lɛ sɛɛ lɛ, ehi shi afii 140 sɔŋŋ, ni no hã enyɛ ena eseshibii kɛyashi yinɔ ni ji ejwɛ nɔ. Wɔkaneɔ yɛ Biblia lɛ mli akɛ: “Naagbee lɛ, Hiob gbo be ni ehi shi afii babaoo ní etsui enyɔ emli.” (Hiob 42:10-17) Ni Hiob kɛ eŋa ni esumɔɔ lɛ waa lɛ kɛ amɛweku lɛ, ni amɛbii nyɔŋma ni Satan gbe lɛ baahi shi ekoŋŋ yɛ Paradeiso.​—Yohane 5:28, 29.

Mɛni hewɔ Yehowa jɔɔ Hiob waa nakai lɛ? Biblia lɛ hãa hetoo akɛ: “Nyɛnu Hiob shifimɔ lɛ he.” (Yakobo 5:11) Amanehulu ni Hiob kɛkpe lɛ naa wa kwraa fe bɔ ni wɔjwɛŋmɔ baanyɛ ashɛ he. Wiemɔ ni ji “shifimɔ” ni akɛtsu nii lɛ hãa wɔnaa akɛ jeee kai lɛ anaa kɛkɛ Hiob kpee. Moŋ lɛ, be ni ekai lɛ ba naagbee lɛ, hemɔkɛyeli kɛ suɔmɔ ni eyɔɔ kɛhã Yehowa lɛ mli wa lolo. Nɔ najiaŋ ni emli baafu mɛi ni folɔ enaa lɛ ni eto amɛ najiaŋ lɛ, ejɛ etsui mli ekɛ amɛhe ke amɛ. Ni eŋmɛɛɛ ehiɛnɔkamɔ ni eshwɛɛɛ he, ni ji enɔkwayeli lɛ, he kɔkɔɔkɔ.​—Hiob 27:5.

Shifimɔ he miihia wɔteŋ mɔ fɛɛ mɔ. Bɔ fɛɛ bɔ ni fee lɛ Satan baabɔ mɔdɛŋ eje wɔnijiaŋ wui tamɔ efee Hiob lɛ. Shi kɛ́ wɔfĩ shi yɛ wɔhemɔkɛyeli lɛ mli, wɔtee nɔ wɔba wɔhe shi, wɔjɛ wɔtsui mli wɔkɛ mɛi ahe ke amɛ, ni wɔtswa wɔfai shi akɛ wɔhãŋ nɔ ko nɔ ko afite wɔnɔkwayeli lɛ, wɔ hu wɔbaahiɛ wɔhiɛnɔkamɔ ni wɔshwɛɛɛ he lɛ mli kpɛŋŋ. (Hebribii 10:36) Kɛ́ wɔye Yehowa anɔkwa tamɔ Hiob fee lɛ Satan mli baafu waa, ni Yehowa, mɔ ni sumɔɔ wɔ waa lɛ mii baashɛ ehe waa!