Hɛɛ! Ejaakɛ yelikɛbuamɔ ni fe fɛɛ lɛ jɛɔ “Nyɔŋmɔ, mɔ ni shɛjeɔ mɛi ni tsui ekumɔ lɛ amii lɛ” lɛ ŋɔɔ.—2 Korintobii 7:6.

•   Hewalɛ. Nyɔŋmɔ ejieee onaagbai lɛ fɛɛ yɛ onɔ koni ‘ekɛshɛje omii,’ moŋ lɛ, eboɔ sɔlemɔ ni osɔleɔ akɛ ehã bo nyɛmɔ ni okɛkpee naagbai lɛ anaa lɛ toi, ni etsuɔ he nii. (Filipibii 4:13) Ná nɔmimaa akɛ Nyɔŋmɔ efee klalo akɛ ebaabo bo toi, ejaakɛ Biblia lɛ kɛɔ akɛ: ‘Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.’ (Lala 34:18) Anɔkwa, kɛ́ oleee bɔ ni obaafee ojaje bɔ ni onuɔ he ohãa po lɛ, Nyɔŋmɔ baanyɛ anu nɔ ni otaoɔ okɛɛ lɛ shishi.—Romabii 8:26, 27.

•   Mɛi ni fee nɔkwɛmɔnɔ kpakpa. Biblia ŋmalɔ ko sɔle ekɛɛ Nyɔŋmɔ akɛ: “Yehowa, bu kwɔŋkwɔŋ lɛ mli mibolɔɔ mitsɛɔ bo kɛjɛɔ.” Gbɛ nɔ ni mɔ ni ŋma sane nɛɛ tsɔ etsu enaagba lɛ he nii ji akɛ, ekai ehe akɛ Nyɔŋmɔ efee klalo akɛ ekɛ wɔtɔmɔi lɛ baake wɔ. No hewɔ lɛ, ekɛɛ Nyɔŋmɔ akɛ: “Ao Yehowa, kɛji okɛɛ ooodi wɔnishaianii lɛ asɛɛ lɛ, Nuŋtsɔ, namɔ po aaaŋɔ ehe eye? Shi bo odɛŋ eshaifaa yɔɔ, bɔ ni afee ni ashe bo gbeyei.”—Lala 130:1, 3, 4.

•   Hiɛnɔkamɔ. Nyɔŋmɔ shɛjeɔ wɔmii amrɔ nɛɛ, ni ewo shi hu akɛ ebaajie naagbai fɛɛ ni hãa wɔtsui kumɔɔ lɛ kɛje shihilɛ mli. Kɛ́ eye eshiwoo nɛɛ nɔ lɛ, “akaiŋ tsutsu nii [ni jwɛŋmɔŋ naagba hu fata he] lɛ dɔŋŋ, ni asaŋ ebaŋ jwɛŋmɔ mli dɔŋŋ.”—Yesaia 65:17.

 Kadimɔ: Yehowa Odasefoi heɔ amɛyeɔ akɛ Nyɔŋmɔ yeɔ ebuaa wɔ moŋ, kɛ̃lɛ, kɛ́ wɔye helai tamɔ jwɛŋmɔŋ naagbai lɛ, wɔyaa helatsamɔhe kɛhã tsamɔ. (Marko 2:17) Kɛ̃lɛ, wɔjieee helatsamɔ gbɛ pɔtɛɛ ko yi; wɔsusuɔ akɛ esa akɛ mɔ fɛɛ mɔ akpɛ lɛ diɛŋtsɛ eyiŋ yɛ saji ni tamɔ enɛɛmɛi lɛ ahe.