Adam kɛ Hawa ji klɛŋklɛŋ adesai ni fee esha. Be ni amɛye “ekpakpa kɛ efɔŋ lee tso lɛ” nɔ yibii lɛ amɛgbo Nyɔŋmɔ nɔ toi, ni no ji esha ni amɛfee lɛ. a (1 Mose 2:16, 17; 3:6; Romabii 5:19) Esaaa akɛ Adam kɛ Hawa yeɔ nakai tso lɛ nɔ yibii lɛ ejaakɛ edamɔ shi kɛhã hegbɛ ni Nyɔŋmɔ yɔɔ akɛ etsɔɔ adesai nɔ ni ja kɛ nɔ ni ejaaa. Tso lɛ nɔ yibii lɛ eko ni Adam kɛ Hawa ye lɛ tsɔɔ akɛ amɛhala akɛ amɛ diɛŋtsɛ amɛbaakpɛ yiŋ yɛ nɔ ni ja kɛ nɔ ni ejaaa he, ni eji nɔ ko ni amɛbɛ hegbɛ akɛ amɛfeɔ. Nakai ni amɛfee lɛ tsɔɔ akɛ amɛkpoo hegbɛ ni Nyɔŋmɔ yɔɔ yɛ amɛnɔ lɛ.

•  Te esha ni Adam kɛ Hawa fee lɛ sa amɛhe ehã tɛŋŋ?

•  Te esha ni Adam kɛ Hawa fee lɛ saa wɔhe ehãa tɛŋŋ?

•  Ani wɔbaanyɛ wɔye wɔhe kɛje esha ni Adam kɛ Hawa fee lɛ he?

•  Susumɔ ni ejaaa ni ahiɛ yɛ esha ni Adam kɛ Hawa fee lɛ he

 Akɛni Adam kɛ Hawa fee esha hewɔ lɛ, amɛgbɔlɔ ni amɛgboi. Amɛfite naanyobɔɔ ni kã amɛ kɛ Nyɔŋmɔ teŋ lɛ, ni hiɛnɔkamɔ akɛ amɛbaahi shi kɛya naanɔ ni hela mɔŋ amɛ ni amɛgbɔlɔŋ hu lɛ ŋmɛɛ amɛ.—1 Mose 3:19.

 Adam kɛ Hawa kɛ amɛhe esha lɛ tsɛŋe amɛseshibii fɛɛ. Abaanyɛ akɛ enɛ ato bɔ ni feɔ ni bii naa helai kɛjɛɔ amɛfɔlɔi aŋɔɔ lɛ he. (Romabii 5:12) No hewɔ lɛ, afɔ adesai fɛɛ “yɛ esha mli,” b enɛ tsɔɔ akɛ wɔyeee emuu, no hewɔ lɛ, ewaaa akɛ wɔbaatɔ̃.—Lala 51:5; Efesobii 2:3.

 Akɛni akɛ esha fɔ wɔ, loo afɔ wɔ ni wɔyeee emuu hewɔ lɛ, hela mɔmɔɔ wɔ, wɔgbɔlɔɔ, ni wɔgboɔ. (Romabii 6:23) Agbɛnɛ hu wɔdiɛŋtsɛ wɔtɔ̃mɔi kɛ mɛi krokomɛi atɔ̃mɔi hewɔ lɛ, wɔnaa nɔ.—Jajelɔ 8:9; Yakobo 3:2.

 Hɛɛ. Biblia lɛ kɛɛ Yesu gbo “akɛ kpatamɔ afɔle yɛ wɔhe eshai lɛ ahewɔ.” (1 Yohane 4:10.) Yesu afɔleshãa lɛ baanyɛ ahã wɔye wɔhe kɛjɛ esha ni Adam kɛ Hawa kɛtsɛŋe wɔ lɛ ahe koni wɔnine ashɛ nɔ ni ŋmɛɛ amɛ lɛ nɔ, no ji hiɛnɔkamɔ akɛ wɔbaahi shi kɛya naanɔ ni hela mɔŋ wɔ ni wɔgbɔlɔŋ hu.—Yohane 3:16. c

 Susumɔ ni ejaaa: Yɛ esha ni Adam kɛ Hawa fee lɛ hewɔ lɛ, wekukpaa kpakpa nyɛŋ ahi wɔ kɛ Nyɔŋmɔ teŋ kɔkɔɔkɔ.

 Anɔkwa Sane: Nyɔŋmɔ shwaaa wɔ yɛ esha ni Adam kɛ Hawa fee lɛ hewɔ. Ele akɛ wɔyeee emuu, ni ekpaaa babaoo gbɛ kɛjɛɛɛ wɔdɛŋ. (Lala 103:14) Eyɛ mli akɛ esha ni Adam kɛ Hawa fee lɛ hãa wɔpiŋɔ moŋ, shi wɔyɛ hegbɛ akɛ wɔhãa wekukpaa kpakpa hiɔ wɔ kɛ Nyɔŋmɔ teŋ.—Abɛi 3:32.

 Susumɔ ni ejaaa: Baptisimɔ hãa mɔ yeɔ ehe kɛjeɔ esha ni Adam kɛ Hawa fee lɛ he, no hewɔ lɛ, esa akɛ abaptisi gbekɛbii.

 Anɔkwa Sane: Eyɛ mli akɛ esa akɛ wɔhã abaptisi wɔ dani ahere wɔyiwala moŋ, shi hemɔkɛyeli ni wɔbaaná yɛ Yesu kpɔmɔ afɔle lɛ mli lɛ pɛ ji nɔ ni hãa wɔhe tseɔ kɛjeɔ esha he. (1 Petro 3:21; 1 Yohane 1:7) Akɛni anɔkwa hemɔkɛyeli damɔ nilee nɔ hewɔ lɛ, abifabii nyɛŋ aná hemɔkɛyeli. No hewɔ lɛ, Biblia lɛ fĩii sɛɛ ni abaptisi abifabii. Ni enɛ fee faŋŋ yɛ mra beiaŋ Kristofoi lɛ abeiaŋ. Amɛbaptisiii abifabii, amɛbaptisi mɛi ni he Nyɔŋmɔ nɔ amɛye, ni ji “hii kɛ yei” ni ná hemɔkɛyeli yɛ Nyɔŋmɔ Wiemɔ lɛ mli.—Bɔfoi 2:41; 8:12.

 Susumɔ ni ejaaa: Nyɔŋmɔ lomɔ yei, ejaakɛ Hawa ji mɔ klɛŋklɛŋ ni ye yibii ni akɛɛ amɛkaye lɛ.

 Anɔkwa Sane: Nyɔŋmɔ lomɔɔɔ yei, moŋ lɛ, elomɔ “blema onufu lɛ, ni atsɛɔ lɛ Abonsam kɛ Satan,” mɔ ni laka Hawa ni efee esha lɛ. (Kpojiemɔ 12:9; 1 Mose 3:14) Kɛfata he lɛ, Nyɔŋmɔ kɛ sɔ̃ ni jɛ esha ni Adam kɛ Hawa fee lɛ mli kɛba lɛ fɔ̃ Adam nɔ titri, jeee Hawa.—Romabii 5:12.

 Mɛni hewɔ ni Nyɔŋmɔ kɛɛ akɛ Adam baaye eŋa lɛ nɔ? (1 Mose 3:16) Nɔ ni Nyɔŋmɔ kɛɛ nɛɛ etsɔɔɔ akɛ eefĩ nakai su lɛ sɛɛ. Moŋ lɛ, eetsɔɔ bɔ ni esha baasa wekukpaa ni baahi hii kɛ yei ateŋ lɛ he ehã. Nyɔŋmɔ miikpa gbɛ akɛ nuu baasumɔ eŋa ni ekɛ woo ahã lɛ, ni ejie bulɛ ni mli kwɔ kpo etsɔɔ yei fɛɛ.—Efesobii 5:25; 1 Petro 3:7.

 Susumɔ ni ejaaa: Esha ni Adam kɛ Hawa fee lɛ ji bɔlɛ ni amɛná lɛ.

 Anɔkwa Sane: Yiŋtoi ni nyiɛ sɛɛ nɛɛ ahewɔ lɛ, anyɛŋ akɛɛ akɛ esha ni amɛfee lɛ ji bɔlɛ ni amɛná:

•   Be ni Nyɔŋmɔ fã Adam akɛ ekaye ekpakpa kɛ efɔŋ lee tso lɛ nɔ yibii lɛ eko lɛ, no mli lɛ, ekome pɛ eyɔɔ ni ebɛ ŋa.—1 Mose 2:17, 18.

•   Nyɔŋmɔ kɛɛ Adam kɛ Hawa akɛ ‘amɛfɔ ní amɛyi afa.’ (1 Mose 1:28) No hewɔ lɛ, kɛ́ Nyɔŋmɔ gbala Adam kɛ Hawa toi yɛ nɔ ni lɛ diɛŋtsɛ efã amɛ akɛ amɛfee lɛ he lɛ, no lɛ, abaanyɛ akɛɛ akɛ Nyɔŋmɔ yitsoŋ wa.

•   Adam kɛ Hawa efeee esha lɛ yɛ be kome too mli—Hawa klɛŋklɛŋ fee esha lɛ, no sɛɛ dani Adam hu fee.—1 Mose 3:6.

•   Biblia lɛ hãa wɔleɔ akɛ ejeee tɔmɔ akɛ wu kɛ eŋa baaná bɔlɛ.—Abɛi 5:18, 19; 1 Korintobii 7:3.