Nuu niiatsɛ lɛ kɛ Lazaro jeee gbɔmɛi ni hi shi diɛŋtsɛ, moŋ lɛ eji nɔkwɛmɔnɔ ko ni Yesu kɛtsu nii yɛ ewiemɔ lɛ eko mli. (Luka 16:19-31) Yɛ abɛbua lɛ mli lɛ, hii enyɔ nɛɛ damɔ shi kɛhã gbɔmɛi akui enyɔ: (1) Yudafoi ajamɔŋ hiɛnyiɛlɔi henɔwolɔi ni hi shi yɛ Yesu beiaŋ lɛ kɛ (2) mɛi ni Yudafoi lɛ ebuuu amɛ, shi amɛyeɔ anɔkwa ni amɛbo Yesu toi lɛ.

Nɔ ni abaasusu he yɛ sane nɛɛ mli

•  Mɛni Yesu wie yɛ Nuu niiatsɛ lɛ kɛ Lazaro he?

•  Ani sane nɛɛ ba diɛŋtsɛ?

•  Ani sane nɛɛ fiɔ hɛl la tsɔɔmɔ lɛ sɛɛ?

•  Mɛni nuu niiatsɛ lɛ kɛ Lazaro abɛbua lɛ tsɔɔ?

 Yɛ Luka yitso 16 lɛ, Yesu wie hii enyɔ komɛi ni tsakemɔi wuji ba amɛshihilɛ mli lɛ ahe.

 Naa abɛbua ni Yesu gba lɛ mli otii: Nuu niiatsɛ ko hi ogbɔjɔshihilɛ mli. Akɛ nibalɔ ko ni ni atsɛɔ lɛ Lazaro lɛ fɔɔ egbó lɛ naa ŋmɛɛ; nibalɔ lɛ shweɔ ni ená nibii ni shwieɔ shi kɛjɛɔ nuu niiatsɛ lɛ okpɔlɔ lɛ nɔ lɛ eko eye. Be ni be shwie mli lɛ, Lazaro gbo, ni ŋwɛibɔfoi bawó lɛ kɛtee Abraham masɛi. Nuu niiatsɛ lɛ hu gbo ni afu lɛ. Yɛ abɛbua lɛ mli lɛ, awie hii enyɔ lɛ fɛɛ ahe akɛ amɛhiɛ kamɔ yɛ amɛgbele sɛɛ. No mli lɛ, nuu niiatsɛ ni egbo lɛ miipiŋ yɛ la ni naa wa ko mli, ni ebi ni Abraham atsu Lazaro koni Lazaro kɛ ewao naa atsɔ nu mli ni ekɛbajɔɔ [lɛ nuu niiatsɛ lɛ] lilɛi he. Abraham kpoo nuu niiatsɛ lɛ nibimɔ lɛ, ni ewie akɛ hii enyɔ lɛ fɛɛ ashihilɛ etsake kwraa amrɔ nɛɛ, no ji akɛ ohiafo lɛ ebatsɔ niiatsɛ, ni niiatsɛ lɛ ebatsɔ ohiafo, ni ákɛ, akɛ jɔɔ voo ko ni anyɛŋ atɛke efo amɛteŋ.

 Dabi. Eji abɛbua ko ni Yesu kɛtsu nii kɛtsɔɔ sane ko naa. Nilelɔi kpɛlɛɔ nɔ akɛ sane nɛɛ ji abɛbua. Akɛ nɔkwɛmɔnɔ lɛ, saneyitso ko ni yɔɔ Luther’s Bible ni afee yɛ 1912 lɛ mli lɛ maa nɔ mi akɛ enɛ ji abɛbua. Agbɛnɛ hu, Jerusalem Bible ni Katolikbii fee lɛ shishigbɛ niŋmaa ko tsɔɔ akɛ, enɛ ji “abɛbua ko ni tamɔ adesã, ni gbɛ́i ni atsĩ tã yɛ mli lɛ jeee mɛi ni hi shi diɛŋtsɛ.”

 Ani no mli lɛ, Yesu miitsɔɔ shihilɛ ni mɛi yajeɔ mli yɛ gbele sɛɛ lɛ he nii? Ani no mli lɛ, Yesu miitsɔɔ akɛ mɛi komɛi piŋɔ yɛ hɛl la mli kɛ́ amɛgboi, ni akɛ no mli lɛ Abraham kɛ Lazaro yɛ ŋwɛi? Odaseyelii pii hãa wɔnaa akɛ, enyɛŋ efee nakai.

 Akɛ nɔkwɛmɔnɔ lɛ:

•   Eji nuu niiatsɛ lɛ miipiŋ yɛ la ko diɛŋtsɛ ni naa wa mli kulɛ, ani la lɛ hãŋ nu ni yɔɔ Lazaro wao naa lɛ agbi?

•   Kɛ́ nu lɛ gbiii po lɛ, ni nuu lɛ miipiŋ yɛ la diɛŋtsɛ mli lɛ, ani nu kuli kome ni baasa nuu niiatsɛ lɛ lilɛi nɔ lɛ baahã ehe ajɔ lɛ kwraa?

•   Dani Yesu baagba abɛbua nɛɛ, no mli lɛ etsɔ hiɛ ewie faŋŋ be ko akɛ mɔ ko ekwɔko kɛyako ŋwɛi pɛŋ, no hewɔ lɛ, te feɔ tɛŋŋ ni Abraham hiɔ wala mli yɛ ŋwɛi lɛ?​—Yohane 3:13.

 Dabi. Eyɛ mli akɛ sane nɛɛ jeee shihilɛ ko ni ba diɛŋtsɛ moŋ, shi mɛi komɛi tsɔɔ akɛ edamɔ shi kɛhã susumɔ ni ahiɛ akɛ mɛi kpakpai yaa ŋwɛi, ni agbalaa mɛi fɔji atoi yɛ hɛl la mli lɛ. a

 Ani nilee yɛ nakai susumɔ lɛ mli? Dabi.

 Hɛl la tsɔɔmɔ lɛ kɛ nɔ ni Biblia lɛ tsɔɔ yɛ shihilɛ mli ni gbohii lɛ yajeɔ lɛ he lɛ kpãaa gbee kwraa. Akɛ nɔkwɛmɔnɔ lɛ, Biblia lɛ etsɔɔɔ akɛ mɛi kpakpai fɛɛ ni gboiɔ lɛ yaa ŋwɛi ni amɛyahiɔ shi yɛ miishɛɛ mli, loo akɛ awaa mɛi fɔji ayi yɛ hɛl la mli. Moŋ lɛ, Biblia lɛ hãa wɔleɔ faŋŋ akɛ: “Mɛi ni hiɛ kamɔ lɛ le akɛ amɛbaagboi, shi mɛi ni egboi lɛ leee nɔ ko nɔ ko kwraa.”​—Jajelɔ 9:5.

 Wɔnaa yɛ abɛbua nɛɛ mli akɛ, tsakemɔ kpele ko baaba gbɔmɛi akui enyɔ komɛi ashihilɛ mli.

 Eyɛ faŋŋ akɛ, nuu niiatsɛ lɛ damɔ shi kɛhã Yudafoi ajamɔŋ hiɛnyiɛlɔi, “ni ji shikasuɔlɔi lɛ.” (Luka 16:14) Amɛbo Yesu toi be ni ewieɔ lɛ, shi amɛte shi amɛwo saji ni ewie lɛ. Jamɔŋ hiɛnyiɛlɔi nɛɛ ebuuu maŋbii lɛ amɛhãaa nɔ ko.​—Yohane 7:49.

 Lazaro damɔ shi kɛhã mɛi ni Yudafoi ajamɔŋ hiɛnyiɛlɔi lɛ buɔ amɛ akɛ mɛi foji shi amɛkpɛlɛ Yesu tsɔɔmɔi lɛ anɔ lɛ.

 Tsakemɔi ni ba kui enyɔ nɛɛ ashihilɛ mli lɛ da waa.

•   Yudafoi ajamɔŋ hiɛnyiɛlɔi lɛ yasusu akɛ Nyɔŋmɔ yɛ amɛhe miishɛɛ. Shi, be ni Nyɔŋmɔ kpoo amɛ kɛ amɛjamɔ lɛ akɛni amɛkpɛlɛɛɛ Yesu tsɔɔmɔi lɛ anɔ lɛ hewɔ lɛ, ebafee tamɔ amɛgboi. Agbɛnɛ hu, saji ni Yesu kɛ esɛɛnyiɛlɔi lɛ shiɛ lɛ bafee tamɔ nɔ ko ni miipiŋ amɛ.​—Mateo 23:29, 30; Bɔfoi 5:29-33.

•   Agbɛnɛ, mɛi ni jamɔŋ hiɛnyiɛlɔi lɛ bu amɛ akɛ mɛi foji, ni amɛkɛ afii abɔ ekpoo amɛ lɛ, baná Nyɔŋmɔ hiɛ dromɔ. Mɛi babaoo kpɛlɛ Biblia mli anɔkwalei lɛ ni Yesu tsɔɔ lɛ nɔ ni amɛná he sɛɛ. Agbɛnɛ, hegbɛ gbele kɛhã amɛ akɛ abaaná Nyɔŋmɔ hiɛ dromɔ kɛya naanɔ.​—Yohane 17:3.