Fɔlɔi komɛi ni tsuɔ nii lɛ kpɛɔ amɛyiŋ akɛ amɛkɛ amɛbii ni shɛko skulyaa lɛ baaya day-care center​—ni ji he ko ni tsuɔ nii tamɔ klasrum nɔŋŋ lɛ. Ani esa akɛ okɛ obi aya day-care center?

•  Saji ni esa akɛ obi

•  Nɔ ni obaanyɛ ofee

 Kɛ́ mikɛ mibi lɛ tee day care lɛ, ani ebaasa wekukpaa loo suɔmɔ ni yɔɔ mikɛ mibi lɛ teŋ lɛ he? Hɛɛ ebaanyɛ. Kɛ́ afɔ bi lɛ, yɛ eklɛŋklɛŋ afii fioo lɛ amli lɛ, ejwɛŋmɔ lɛ mɔɔ nii oya yɛ bɔ ni ekɛ mɛi yeɔ ehãa lɛ gbɛfaŋ. Bɔɔ mɔdɛŋ ni oná be ni sa ohã obi lɛ yɛ be ni he hiaa waa ni baanyɛ asa eshihilɛ he ewala gbii abɔ fɛɛ nɛɛ mli.​—5 Mose 6:6, 7.

•    Esa akɛ fɔlɔi ni miitao ni amɛkɛ amɛbii aya day care lɛ akwɛ gbɛ ni amɛbaatsɔ nɔ amɛhã suɔmɔ kɛ wekukpaa ni baakã amɛkɛ amɛbi lɛ teŋ lɛ ahi shi be fɛɛ be.

 Ani day care baanyɛ asa hewalɛ ni oyɔɔ yɛ obi lɛ nɔ lɛ he? Hɛɛ ebaanyɛ. Wolo ko ni ji Hold On to Your Kids lɛ wie akɛ, “Babaoo ni gbekɛbii ni yɔɔ day care center lɛ kɛ amɛhe sharaa lɛ, babaoo ni amɛnanemɛi lɛ náa amɛnɔ hewalɛ ji no.”

•    Esa akɛ fɔlɔi ni miitao amɛkɛ amɛbii aya day care lɛ abi amɛhe akɛ, ‘Ani wɔbaanyɛ wɔya nɔ wɔfee mɛi titri ni yɔɔ wɔbii lɛ anɔ hewalɛ?’

 Ani day care baanyɛ ahã nikasemɔ afee mlɛo ahã obi lɛ kɛ́ ebɔi skulyaa? Mɛi komɛi hãa hetoo akɛ, hɛɛ. Mɛi komɛi hu kɛɛ day care náaa gbekɛbii lɛ anɔ hewalɛ tsɔ kɛ eba lɛ nikasemɔ gbɛfaŋ. Ekɔɔɔ he eko hetoi nɛɛ ateŋ nɔ ni oheɔ oyeɔ lɛ, Penelope Leach ni ekase gbekɛbii ahe nii lɛ ŋma akɛ: “Kaasusu akɛ nɔ ni gbekɛbii kaseɔ yɛ skul lɛ ji nɔ titri ni yeɔ ebuaa amɛ yɛ shihilɛ mli, ni kaasusu akɛ be fɛɛ be ni ehi akɛ gbekɛ baaje skul shishi mra. Kɛ́ osusu nakai lɛ, belɛ, ekolɛ, oyɔseko bɔ ni obi lɛ ená tsɔsemɔi fɛɛ ni okɛhã lɛ kɛjɛ be ni ofɔ lɛ lɛ he sɛɛ ehã.”

•   Esa akɛ fɔlɔi ni miitao amɛkɛ amɛbii aya day care lɛ abi amɛhe akɛ, ‘Ani ehe miihia kwraa ni mikɛ lɛ aya, ni sɛɛnamɔ yɛ he po?’

 Ani ebaahi akɛ bo loo ohefatalɔ lɛ baahi shĩa ni ekwɛ gbekɛ lɛ moŋ fe ni ebaayatsu nii? Yɛ shihilɛi komɛi amli lɛ, fɔlɔi enyɔ lɛ fɛɛ tsuɔ nii bɔ ni afee ni amɛná heloonaa nibii loo shika pii, shi jeee ni amɛbɛ amɛhiamɔ nii hewɔ. Ani sɛɛnamɔ yɛ enɛ he fe obi lɛ?

•   Esa akɛ fɔlɔi ni miitao amɛkɛ amɛbi aya day care lɛ agbɔ bɔ ni amɛfiteɔ shika amɛhãa lɛ nɔ, loo amɛhã amɛshihilɛ afee mlɛo koni amɛteŋ mɔ kome ahi shĩa kɛkwɛ gbekɛ lɛ.

 Esa akɛ nyɛsusu sɛɛnamɔi kɛ naagbai ni baanyɛ ajɛ mli kɛba lɛ he jogbaŋŋ dani nyɛmu sane naa akɛ, nyɛkɛ nyɛbi baaya day-care center. Kɛ́ nyɛsusu nii ahe jogbaŋŋ nyɛgbe naa, ni nyɛmu sane naa akɛ day care hi kɛhã nyɛbi lɛ lɛ, mɛni ebaabi ni nyɛfee?

 Biblia lɛ kɛɛ akɛ, “hiɛtɛ̃lɔ kwɛɔ enajifaamɔi jogbaŋŋ.” (Abɛi 14:15) Be ni shishitoo mla nɛɛ yɔɔ nyɛjwɛŋmɔ mli lɛ, nyɛsusua nii ahe jogbaŋŋ dani nyɛhala day care henɔi lɛ ateŋ nɔ ni baahi ehã nyɛ.

 Esa akɛ nyɛle henɔi ni nyɛbaahala lɛ he saji

•   Fɔlɔi komɛi halaa akɛ amɛkɛ amɛbii lɛ baaya day care ko ni yɔɔ mɔ ko shĩa ni mɔ ko loo mɛi fioo ko kwɛɔ gbekɛbii lɛ anɔ, ni gbekɛbii lɛ hu ayi faaa tsɔ.

•   Fɔlɔi komɛi hu hãa amɛwekunyo loo mɔ ko bahiɔ amɛŋɔɔ kɛkwɛɔ gbekɛ lɛ.

 Gbɛi srɔtoi nɛɛ ateŋ eko fɛɛ eko ni obaakɔ lɛ kɛ ehe sɛɛnamɔi kɛ naagbai. Mɛni hewɔ okɛ fɔlɔi krokomɛi ni kɛ gbɛi nɛɛ eko etsu nii lɛ egbaaa sane? Biblia lɛ kɛɔ akɛ: “Mɛi ni biɔ ŋaawoo lɛ, amɛhiɛ kã shi.”​—Abɛi 13:10.

 Kɛ́ ohala akɛ okɛ obi baaya day-care center lɛ, mɛni esa akɛ ofee? Kɛ́ eba lɛ nakai lɛ . . .

 Esa akɛ ole he ni okɛ lɛ baaya lɛ he sane

•   Ani maŋ lɛ mla eŋmɛ amɛ gbɛ ni amɛfee day-care center lɛ? Mɛɛ gbɛŋmɛɛ wolo amɛyɔɔ? Te ale amɛ ahã tɛŋŋ? Ni mɛɛ gbɛ́i amɛfee amɛhã amɛhe?

•   Ani jɛmɛ yɛ falefale kɛ shweshweeshwe?

•   Mɛɛ nibii afeɔ yɛ jɛmɛ? a

 Esa akɛ ole mɛi ni tsuɔ nii yɛ jɛmɛ lɛ ahe saji

•   Mɛɛ tsɔsemɔ amɛná? Ani amɛtee skul kɛhã mɛi ni tsɔseɔ gbekɛbii lɛ eko? Ani amɛkase first aid kɛ ehenɔi lɛ ahe nii?

•   Ani obaanyɛ otao nii amli kɛkwɛ akɛ mɛi ni baakwɛ obii lɛ ateŋ mɔ ko efee nɔ ko ni polisifonyo emɔ lɛ loo awo lɛ tsuŋ dã?

•   Ani afɔɔ nitsulɔi ni tsuɔ nii yɛ jɛmɛ lɛ tsakemɔ? Kɛ́ nakai lɛ, no lɛ, be fɛɛ be ni akɛ mɔ hee baaba lɛ, ehe baahia ni obi lɛ ale mɔ lɛ.

•   Gbekɛbii enyiɛ mɛi ni kwɛɔ gbekɛbii anɔ lɛ ateŋ mɔ fɛɛ mɔ kwɛɔ? Kɛ́ mɔ kome ni kwɛɔ gbekɛbii pii anɔ lɛ, nɔ ni baajɛ mli kɛba ji akɛ, anaŋ deka ahãŋ obi lɛ. Anɔkwa, bei abɔ ni ehe baahia ni aná ahã obi lɛ lɛ, baadamɔ afii abɔ ni eye kɛ enyɛmɔi anɔ.

•   Kɛ́ ona nɔ ko ni eyaaa lɛ jogbaŋŋ ni oowie lɛ lɛ, ani mɛi ni kwɛɔ gbekɛbii lɛ sumɔɔ ni amɛbo bo toi, ni kɛ́ amɛna nɔ fɔŋ hu lɛ, ani amɛsumɔɔ ni amɛkɛ bo awie he?