Awo Amɛ Tsuŋ Yɛ Amɛhemɔkɛyeli Lɛ Hewɔ
Russia nɔyeli lɛ kã he amɛmiiwa Yehowa Odasefoi ayi, ni nɔ ni amɛfeɔ lɛ tamɔ nɔ ni amɛfee yɛ Soviet Union beiaŋ lɛ pɛpɛɛpɛ. Be ni shɛɔ February 18, 2019 lɛ, awo Odasefoi 26 tsuŋ be ni ayeko amɛ sane, atsĩ mɛi 26 naa yɛ amɛ diɛŋtsɛ amɛshĩai, ni aŋmɛɛɛ mɛi 46 hu gbɛ ni amɛshi amɛmaŋ lɛ nɔ kɛya maŋ kroko nɔ yɛ Russia. Afolɔ amɛ fɛɛ amɛnaa akɛ amɛtse kuu ko ni feɔ yiwalɛ nii, loo amɛkɛ amɛhe edɔmɔ kuu lɛ, loo amɛkɛ amɛshika miifĩ nakai kuu lɛ sɛɛ. Amrɔ nɛɛ aata Odasefoi aaafee 140 adaaŋ akɛ abaaná amɛhe sane ko lo.
July 2018 lɛ, Omsk onukpai lɛ wo Odasefonyo yoo ko tsuŋ be ni ayeko esane, no ji klɛŋklɛŋ kwraa ni awo yoo tsuŋ nakai, ni enɛ baafee naagba waa. Eyɛ mli akɛ ajie lɛ ni amrɔ nɛɛ atsĩ enaa yɛ lɛ diɛŋtsɛ eshĩa moŋ, shi nyɔji fioo komɛi asɛɛ yɛ October 2018 mli lɛ, polisifoi ni yɔɔ Sychevka maŋ lɛ mli lɛ mɔmɔ Yehowa Odasefoi yei enyɔ krokomɛi. Amɛyɛ tsuŋwoohe lolo ni ayeko amɛsane, ni akpɛ mli akɛ ajieŋ amɛ kɛyashi May 19, 2019.
Maŋ onukpai lɛ ka akɛ amɛbaadamɔ sane ni aye yɛ April 2017 ashi Odasefoi lɛ ni atsĩ amɛnaa lɛ, kɛ maŋ lɛ mla ko (Article 282) ni akɛkojoɔ ojotswalɔi, shi amɛtsɔ hiɛ amɛbu shi lɛ nɔ amɛjie amɛnaa. Shi yɛ anɔkwale mli lɛ, amɛmiigbala Yehowa Odasefoi lɛ atoi yɛ amɛjamɔ ni bɛ basabasa lɛ hewɔ. Kɛ́ aye mɛi ni amɔmɔ nɛɛ sane ni amɛye fɔ lɛ, no lɛ, abaawo amɛteŋ mɛi komɛi Tsuŋ afii nyɔŋma sɔŋŋ.
Kɛjɛ February 2018 kɛbaa nɛɛ, polisifoi kɛ amɛhenɔi lɛ tsɔɔ gbɛ pɔtɛɛ ko nɔ amɛmɔmɔɔ Yehowa Odasefoi ni amɛwoɔ amɛ tsuŋ. Polisifoi ni hiɛ tui jwaa Odasefoi ashĩai ni amɛboteɔ mli, ni bei pii lɛ amɛkɛ tui lɛ yamamɔɔ shĩabii lɛ ahiɛ—gbekɛbii kɛ mɛi ni egbɔlɔ fɛɛ fata he—ni amɛnyɛɔ amɛnɔ koni amɛkamɔ shikpɔŋ. Polisifoi nɛɛ gbɛlɛɔ Odasefoi lɛ atsũi lɛ amli, ni amɛloɔ amɛnibii kɛyaa, ni amɛkɛ amɛteŋ mɛi komɛi yaa amɛyawoɔ amɛ tsuŋ be ni amɛta amɛdaaŋ sɛɛ. Mɛi ni taa Odasefoi lɛ adaaŋ lɛ folɔɔ amɛteŋ mɛi komɛi anaa akɛ amɛkɛ amɛhe miiwo yiwalɛ nifeemɔi amli, kɛkɛ lɛ amɛbi koni saneyelihe lɛ awo amɛ tsuŋ dani sɛɛ mli lɛ aye amɛ sane. Kɛ́ awo Odasefoi lɛ tsuŋ lɛ, sɛɛ mli lɛ, mɛi ni taoɔ sane lɛ mli lɛ biɔ ni saneyelihe lɛ ahã amɛya nɔ amɛhi jɛmɛ fioo, ni efɔɔ kaa akɛ saneyelihe lɛ kpɛlɛɔ amɛnibimɔ lɛ nɔ.
February 15, 2019 lɛ, sane ko ba yɛ Surgut ni ehiii kwraa, no ji akɛ polisifoi tee Odasefoi ni yɔɔ jɛmɛ lɛ ashĩai amli amɛyagbɛlɛ amɛnibii amli, ni no sɛɛ lɛ, amɛpiŋ amɛteŋ hii kpawo. Amɛjie hii nɛɛ ahe efolo, ahãaa amɛnyɛ amɛmu, akɛ nu shwie amɛpampam kɛsu amɛtsui, ayi amɛ, ni akɛ tui shilɛshilɛɛ amɛwamɔhei. Sane ni yɔɔ taŋ nɛɛ ba yɛ amralo lɛ ɔfis ko (Russian Investigative Committee) ni yɔɔ ŋwɛitsu ko nɔ yɛ Surgut lɛ. Aata Odasefoi 19 (ni yoo kome fata he) ni afolɔ amɛnaa akɛ amɛmiito yiwalɛ nifeemɔi ahe gbɛjianɔ lɛ adaaŋ. Awo hii ni apiŋ amɛ lɛ ateŋ mɛi etɛ tsuŋ be ni ayeko amɛsane.
Awo Dennis Christensen Tsuŋ Be Ni Efeko Nɔ Ko
Be ni akɛ nɔ ni miihe ashɛ afi sɔŋŋ eye Denmarknyo Dennis Christensen ni eye afii 46 lɛ sane yɛ saneyelihe nɔ ni fe shii 50 sɛɛ lɛ, saneyelihe lɛ bua akɛ awo lɛ tsuŋ afii ekpaa yɛ Yehowa Odasefonyo ni eji lɛ hewɔ. Yɛ February 6, 2019 lɛ, Kojolɔ Aleksey Rudnev ni sɔmɔɔ yɛ Zheleznodorozhniy District Court ni yɔɔ Oryol lɛ kane saneyelihe lɛ yiŋkpɛɛ ni tsɔɔ akɛ, awo Owula Christensen tsuŋ yɛ enaa ni afolɔ akɛ ‘eeto kuu ko ni feɔ yiwalɛ nii lɛ he gbɛjianɔ’ lɛ hewɔ, ni adamɔ Russia mla ko (Article 282.2(1)) ni akɛkojoɔ ojotswalɔi lɛ nɔ amu sane lɛ naa nakai. Elɔyafoi lɛ ebi koni akwɛ sane lɛ mli ekoŋŋ.
Yɛ May 25, 2017 lɛ, polisifoi ni jɛ Federal Security Services ni hiɛ tui kɛ tawuu nibii krokomɛi lɛ bafee basabasa yɛ Yehowa Odasefoi akpee ni amɛfeɔ lɛ daa otsi lɛ eko shishi yɛ Oryol ni amɛmɔ Owula Christensen. Kɛjɛ nakai beiaŋ kɛbaa nɛɛ ehi tsuŋwoohe ko (Detention Facility No. 1) ni yɔɔ Oryol kpokpaa lɛ nɔ lɛ.
Aabɔ Mɔdɛŋ Koni Afo Tsuŋ Ni Awoɔ Mɛi Ni Efeko Nɔ Ko Asɛɛ
Bɔ ni awaa Yehowa Odasefoi lɛ ayi waa yɛ Russia lɛ tsɔɔ akɛ, jeee Yehowa Odasefoi anitsumɔhe ni yɔɔ mla naa hegbɛ lɛ naa ni amɛtsĩ lɛ pɛ amɛtaoɔ, shi amɛmiitao amɛtsĩ amɛjamɔ lɛ hu naa kwraa. Kɛbashi bianɛ lɛ, Odasefoi ni efeko nɔ ko lɛ alɔyafoi lɛ ebɔ amɛhewɔ mɔdɛŋ shi loloolo lɛ, amɛnyɛko amɛhã afo tsuŋ ni awoɔ Odasefoi lɛ sɛɛ, no hewɔ lɛ, amɛŋmala enɛ he saji kɛhã kui ni ji UN Human Rights Committee kɛ UN Working Group on Arbitrary Detention, ni amɛbi hu koni Yuropabii Asaneyelihe Ni Yeɔ Hegbɛi Ni Adesai Yɔɔ Lɛ Ahe Saji lɛ akwɛ sane lɛ mli. Yehowa Odasefoi ni yɔɔ jeŋ fɛɛ lɛ heɔ amɛyeɔ akɛ, etsɛŋ ni saneyelihei ni kwɛɔ maŋsɛɛ saji amli lɛ baakwɛ koni Russia afo bɔ ni ewaa amɛnyɛmimɛi ni amɛkɛjáa Nyɔŋmɔ lɛ ayi lɛ sɛɛ.
Bei Liamɔ
February 18, 2019
Awo Odasefoi 26 tsuŋ.
February 15, 2019
Polisifoi yatutua shĩai yɛ Surgut kɛ Lyantor ni yɔɔ Khanty Mansi Autonomous Kpokpaa lɛ nɔ lɛ. Amɔmɔ Odasefoi hii etɛ ni awo amɛtsuŋ be ni ayeko amɛsane.
February 6, 2019
Polisifoi yatutua shĩai yɛ Uray. Amɔ Odasefonyo kome ni awo lɛ tsuŋ be ni ayeko esane.
Polisifoi yatutua shĩai yɛ Saransk. Amɔmɔ Odasefoi hii etɛ ni awo amɛtsuŋ be ni ayeko amɛsane.
Zheleznodorozhniy District Court lɛ ye Dennis Christensen sane ni amɛbu lɛ fɔ ni amɛbua akɛ abaawo lɛ tsuŋ afii ekpaa.
January 27, 2019
Polisifoi yatutua shĩai yɛ Ivanovo. Amɔ Odasefonyo kome ni awo lɛ tsuŋ be ni ayeko esane.
December 12, 2018
Be ni Odasefonyo nuu ko ni polisifoi sama lɛ lɛ tee Neftekumsk polis steshɛŋ lɛ koni eyabɔ emaniɛ lɛ, oya nɔŋŋ ni amɛwo lɛ tsuŋ.
December 9, 2018
Polisifoi yatutua shĩai yɛ Neftekumsk. Amɔmɔ Odasefoi hii enyɔ ni awo amɛ tsuŋ be ni ayeko amɛsane.
November 10, 2018
Polisifoi yatutua mɛi komɛi ni ebua amɛhe naa yɛ café ko. Amɔmɔ Odasefoi hii babaoo ni awo amɛ tsuŋ be ni ayeko amɛsane.
November 9, 2018
Polisifoi yatutua shĩai yɛ Novosibirsk ni amɛmɔ Odasefonyo kome ni amɛwo lɛ tsuŋ be ni ayeko esane.
October 18, 2018
Polisifoi yatutua shĩai yɛ Dyurtuli ni amɛmɔ Odasefonyo kome ni amɛwo lɛ tsuŋ be ni ayeko esane.
October 9, 2018
Polisifoi kɛ maŋ he bulɔi krokomɛi yatutua shĩai yɛ Kirov. Amɔmɔ Odasefoi hii babaoo ni Andrzej Oniszczuk ni jɛ Poland hu fata he lɛ ni awo amɛ tsuŋ be ni ayeko amɛsane.
October 7, 2018
Polisifoi kɛ maŋ he bulɔi krokomɛi yatutua shĩai yɛ Sychevka ni amɛmɔ Nataliya Sorokina kɛ Mariya Troshina. Awo yei enyɔ nɛɛ tsuŋ be ni ayeko amɛsane, amɛbaahi jɛmɛ kɛyashi February 19, 2019. Kɛ́ Anastasiya Polyakova ni amɔ lɛ yɛ July lɛ fata he lɛ, belɛ, awo Odasefoi yei etɛ tsuŋ yɛ Russia akɛ amɛkɛ amɛhe miiwo awuiyeli nifeemɔ mli.
August 2, 2018
Polisifoi kɛ FSB nitsulɔi komɛi yatutua shĩai yɛ Khabarovsk. Amɔ Odasefonyo kome ni awo lɛ tsuŋ be ni ayeko esane.
July 28, 2018
Polisifoi yatutua yoo onukpa ko ni ebi nuu ji Odasefonyo lɛ shĩa ni amɛmɔ ebi nuu lɛ. Awo lɛ tsuŋ be ni ayeko esane.
July 25, 2018
Polisifoi akuu ko (Special Rapid Response Unit of the Russian National Guard) ní aje gbɛ atsɔse amɛ yatutua shĩai yɛ Kostroma. Awo Odasefonyo kome tsuŋ be ni ayeko esane.
July 22, 2018
Polisifoi kɛ FSB nitsulɔi komɛi yatutua shĩai yɛ Berezovskiy. Amɔmɔ Odasefoi enyɔ ni awo amɛ tsuŋ be ni ayeko amɛsane.
July 15, 2018
Polisifoi tee Odasefoi babaoo ashĩai amli yɛ Penza ni amɛyagbɛlɛ jɛmɛ. Amɔ Odasefonyo kome ni awo lɛ tsuŋ be ni ayeko esane.
July 4, 2018
Polisifoi yatutua shĩai yɛ Omsk. Amɛmɔmɔ Sergey kɛ Anastasiya Polyakov ni amɛwo amɛ tsuŋ be ni ayeko amɛsane. Owulaŋa Polyakova ji Odasefonyo yoo klɛŋklɛŋ ni Russian Federation lɛ wo lɛ tsuŋ akɛ ekɛ ehe eyadɔmɔ kuu ko ni feɔ yiwalɛ nii.
July 3, 2018
Polisifoi mɔ Andrey Stupnikov yɛ kɔɔyɔɔ lɛjiadaamɔhe ko yɛ Krasnoyarsk ni awo lɛ tsuŋ be ni ayeko esane.
June 12, 2018
Polisifoi yatutua shĩai yɛ Saratov. Amɔmɔ Odasefoi hii babaoo ni awo amɛ tsuŋ be ni ayeko amɛsane.
Early June 2018
Polisifoi yatutua shĩai yɛ Tomsk kɛ Pskov. Amɔ Odasefonyo kome ni awo lɛ tsuŋ be ni ayeko esane.
May 2018
Polisifoi yatutua shĩai yɛ Orenburg, Birobidzhan, Perm, Naberezhnye Chelny, Magadan, kɛ Khabarovsk. Amɔmɔ Odasefoi hii nyɔŋma ni awo amɛ tsuŋ be ni ayeko amɛsane.
April 2018
Polisifoi yatutua shĩai yɛ Ufa, Polyarny, Vladivostok, kɛ Shuya. Amɔmɔ Odasefoi hii babaoo ni awo amɛ tsuŋ be ni ayeko amɛsane.
February 19, 2018
Aje Dennis Christensen sane lɛ shishi yɛ Zheleznodorozhniy District Court lɛ, ni Kojolɔ Aleksey Rudnev ji mɔ ni kwɛ sane lɛ.
July 20, 2017–November 2018
Atsi Dennis Christensen sane lɛ ato shii abɔ, he klɛŋklɛŋ ni atsi ato yɛ ji Sovietskiy District Court lɛ, no sɛɛ lɛ, Zheleznodorozhniy District Court lɛ hu.
May 26, 2017
Sovietskiy District Court ni yɔɔ Oryol lɛ hã awo Dennis Christensen tsuŋ nyɔji enyɔ be ni ayeko esane.
May 25, 2017
Polisifoi yagbɛ Odasefoi akpee yɛ Oryol ni amɔ Dennis Christensen.
Kɛ́ ootao ona Yehowa Odasefoi fɛɛ ni awo amɛ tsuŋ amrɔ nɛɛ yɛ amɛhemɔkɛyeli lɛ hewɔ yɛ Russia lɛ, klilimɔ link ni yɔɔ shishigbɛ lɛ.