1 Maŋtsɛmɛi 22:1-53
22 Afii etɛ ho ni ta ko eyaaa nɔ yɛ Siria kɛ Israel teŋ.
2 Yɛ afi ni ji etɛ lɛ nɔ lɛ, Yuda maŋtsɛ Yehoshafat+ kpeleke shi kɛtee Israel maŋtsɛ lɛ ŋɔɔ.+
3 Kɛkɛ ni Israel maŋtsɛ lɛ kɛɛ etsuji lɛ akɛ: “Ani nyɛleee akɛ Ramot-gilead+ lɛ, wɔnɔ ni? Mɛni hewɔ mɔ ni wɔshashaoɔ shi akɛ wɔbaashɔ̃ yɛ Siria maŋtsɛ lɛ dɛŋ lɛ?”
4 Kɛkɛ ni ebi Yehoshafat akɛ: “Ani okɛ mi baaya Ramot-gilead ni wɔyawu?” Ni Yehoshafat kɛɛ Israel maŋtsɛ lɛ akɛ: “Mi kɛ bo fɛɛ lɛ, gbɔmɛi kome ji wɔ. Ni mimaŋbii lɛ kɛ omaŋbii lɛ hu lɛ, gbɔmɛi kome ni. Ni mikpɔŋɔi kɛ okpɔŋɔi lɛ fɛɛ lɛ, ekome ni.”+
5 Shi Yehoshafat kɛɛ Israel maŋtsɛ lɛ akɛ: “Shi ofainɛ, bi+ Yehowa nii dã.”+
6 No hewɔ lɛ, Israel maŋtsɛ lɛ bua gbalɔi lɛ anaa, aaafee hii 400, ni ebi amɛ akɛ: “Miya ni mikɛ Ramot-gilead ayawu, aloo mikaya?” Amɛkɛɛ lɛ akɛ: “Kwɔɔ kɛya, ejaakɛ Yehowa kɛ Ramot-gilead baawo maŋtsɛ dɛŋ.”
7 Kɛkɛ ni Yehoshafat bi akɛ: “Ani Yehowa gbalɔ ko bɛ biɛ dɔŋŋ? Hã wɔtsɔ lɛ hu enɔ wɔbi nii.”+
8 Kɛkɛ ni Israel maŋtsɛ lɛ kɛɛ Yehoshafat akɛ: “Eshwɛ mɔ kome ko ni wɔbaanyɛ wɔtsɔ enɔ wɔbi Yehowa nii;+ shi misumɔɔɔ esane,+ ejaakɛ egbako nɔ ko kpakpa yɛ mihe pɛŋ, efɔŋ pɛ egbaa yɛ mihe.+ Lɛ ji Mikaia, Imla binuu lɛ.” Shi Yehoshafat kɛɛ akɛ: “Maŋtsɛ akakɛɛ nakai.”
9 No hewɔ lɛ, Israel maŋtsɛ lɛ tsɛ maŋtsɛ shĩa onukpai lɛ eko ni ekɛɛ lɛ akɛ: “Yaatsɛ Mikaia, Imla binuu lɛ kɛba oya.”+
10 No mli lɛ, Israel maŋtsɛ lɛ kɛ Yuda maŋtsɛ Yehoshafat fɛɛ tara maŋtsɛ sɛii anɔ, ni amɛwo maŋtsɛ atadei, ni amɛtara shi yɛ ŋmaagbeemɔhe lɛ yɛ Samaria agbó lɛ naa, ni gbalɔi lɛ fɛɛ miigba yɛ amɛhiɛ.+
11 Kɛkɛ ni Zedekia, Kenaana binuu lɛ fee dade akolontoi ni ekɛɛ: “Nɔ ni Yehowa kɛɛ nɛ, ‘Enɛ okɛbaashimɔ Siriabii lɛ kɛyashi obaakpãtã amɛhiɛ kwraa.’”
12 Ni gbalɔi krokomɛi lɛ fɛɛ hu miigba nakai nɔŋŋ amɛmiikɛɛ: “Kwɔɔ kɛya Ramot-gilead, ni obaaye omanye; Yehowa kɛ maŋ lɛ baawo maŋtsɛ dɛŋ.”
13 Ni mɔ ni atsu ni eyatsɛ Mikaia lɛ kɛɛ lɛ akɛ: “Naa! Gbalɔi lɛ fɛɛ miigba nɔ ko kpakpa yɛ maŋtsɛ lɛ he. Ofainɛ, wiemɔ nɔ ko kpakpa tamɔ amɛwieɔ lɛ nɔŋŋ.”+
14 Shi Mikaia kɛɛ lɛ akɛ: “Gbii abɔ ni Yehowa hiɛ kã nɛɛ, nɔ fɛɛ nɔ ni Yehowa baakɛɛ mi lɛ, no mawie.”
15 Kɛkɛ ni eba maŋtsɛ lɛ hiɛ ni maŋtsɛ lɛ bi lɛ akɛ: “Mikaia, wɔya ni wɔkɛ Ramot-gilead ayawu, aloo wɔkaya?” Oya nɔŋŋ ni Mikaia kɛɛ akɛ: “Kwɔɔ kɛya, ni obaaye omanye; Yehowa kɛ maŋ lɛ baawo maŋtsɛ dɛŋ.”
16 Kɛkɛ ni maŋtsɛ lɛ kɛɛ lɛ akɛ: “Shii enyiɛ ni mahã okã mi kitã akɛ, okɛŋ mi nɔ ko nɔ ko akɛ ja anɔkwale lɛ pɛ yɛ Yehowa gbɛ́i mli?”
17 No hewɔ lɛ, Mikaia kɛɛ akɛ: “Miina Israelbii lɛ ni amɛgbɛ amɛshwã gɔji lɛ anɔ+ tamɔ gwantɛŋi ni bɛ kwɛlɔ. Yehowa kɛɛ akɛ: ‘Mɛnɛɛmɛi bɛ nuŋtsɔ ko dɔŋŋ. Amɛteŋ mɔ fɛɛ mɔ aku sɛɛ kɛya eshĩa yɛ toiŋjɔlɛ mli.’”
18 Kɛkɛ ni Israel maŋtsɛ lɛ kɛɛ Yehoshafat akɛ: “Ani mikɛɛɛ bo akɛ, ‘Egbaŋ nɔ kpakpa ko yɛ mihe, akɛ ja efɔŋ pɛ’?”+
19 Kɛkɛ ni Mikaia kɛɛ akɛ: “Agbɛnɛ, bo nɔ ni Yehowa kɛɛ lɛ toi: Mina Yehowa ta emaŋtsɛ sɛi+ lɛ nɔ, ni ŋwɛi asraafoi lɛ fɛɛ damɔ emasɛi, yɛ eninejurɔ kɛ ebɛku.+
20 Kɛkɛ ni Yehowa bi akɛ: ‘Namɔ baayalaka Ahab koni ekwɔ kɛya Ramot-gilead ni eyagbo?’ Ni mɔ nɛ miikɛɛ nɛkɛ, ni mɔ nɛ hu miikɛɛ nɔ kroko.
21 Ni ŋwɛibɔfo*+ ko ba ebadamɔ Yehowa hiɛ ni ekɛɛ, ‘Mayalaka lɛ.’ Ni Yehowa bi lɛ akɛ, ‘Te obaalaka lɛ ohã tɛŋŋ?’
22 Ekɛɛ akɛ, ‘Maya, ni mikɛ amale wiemɔi baayawo egbalɔi* lɛ fɛɛ anaa.’+ No hewɔ lɛ, Nyɔŋmɔ kɛɛ lɛ akɛ, ‘Obaalaka lɛ lɛɛlɛŋ, ni nɔ ni fe fɛɛ lɛ, obaaye omanye. Yaa ni oyafee nakai.’
23 No hewɔ lɛ, Yehowa kɛ amale wiemɔ* ewo ogbalɔi nɛɛ fɛɛ anaa,+ shi Yehowa ewie akɛ sane fɔŋ moŋ ni baaba onɔ.”+
24 Ni Zedekia, Kenaana binuu lɛ ba ni ebagbá Mikaia toiŋ ni ekɛɛ: “Mɛɛ be Yehowa mumɔ lɛ je minɔ ni ekɛ bo wie?”*+
25 Mikaia kɛɛ lɛ akɛ: “Naa! obaaná ole yɛ gbi nɔ ni obaajo foi oyatee ohe yɛ sɛɛtsu lɛ mli lɛ.”
26 Kɛkɛ ni Israel maŋtsɛ lɛ kɛɛ akɛ: “Nyɛmɔa Mikaia ni nyɛkɛ lɛ ayahãa Amon, maŋ lɛ nɔ onukpa lɛ, kɛ Yoash, maŋtsɛ lɛ binuu lɛ.
27 Ni nyɛkɛa amɛ akɛ, ‘Nɔ ni maŋtsɛ lɛ kɛɛ nɛ: “Nyɛwoa gbɔmɔ nɛɛ tsuŋ+ ni nyɛtsea niyenii* kɛ nu ni kulɛ nyɛbaahã lɛ lɛ nɔ kɛyashi maku misɛɛ maba yɛ toiŋjɔlɛ mli.”’”
28 Shi Mikaia kɛɛ akɛ: “Kɛ́ oku osɛɛ oba yɛ toiŋjɔlɛ mli lɛ, belɛ, jeee Yehowa ji mɔ ni tsɔ minɔ ewie lɛ.”+ Ni ekɛɛ hu akɛ: “Nyɛ fɛɛ nyɛkadia.”
29 No hewɔ lɛ, Israel maŋtsɛ lɛ kɛ Yehoshafat, Yuda maŋtsɛ lɛ kwɔ kɛtee Ramot-gilead.+
30 Kɛkɛ ni Israel maŋtsɛ lɛ kɛɛ Yehoshafat akɛ: “Matsake mihe koni akayoo mi ni maya ta lɛ naa, shi bo lɛ wo omaŋtsɛ atade lɛ.” No hewɔ lɛ, Israel maŋtsɛ lɛ tsake ehe+ koni akayoo lɛ ni etee ta lɛ naa.
31 No mli lɛ, Siria maŋtsɛ lɛ efã eshwiili tatsɛmɛi 32 lɛ akɛ:+ “Nyɛkɛ mɔ ko mɔ ko akawua, mɔ bibioo jio, mɔ wulu jio, akɛ ja Israel maŋtsɛ lɛ kɛkɛ.”
32 Be ni shwiili tatsɛmɛi lɛ na Yehoshafat nɔŋŋ lɛ, amɛwie yɛ amɛyitsoŋ akɛ: “Eyɛ faŋŋ akɛ Israel maŋtsɛ lɛ nɛ.” No hewɔ lɛ, amɛtsɔ amɛhe koni amɛkɛ lɛ awu; ni Yehoshafat bɔi bolɔmɔ koni abaye abua lɛ.
33 Be ni shwiili tatsɛmɛi lɛ yɔse akɛ jeee Israel maŋtsɛ lɛ ni lɛ, oya nɔŋŋ ni amɛkpa esɛɛnyiɛmɔ.
34 Shi nuu ko tsɛ̃ egãi kɛkɛ, ni eyatsu Israel maŋtsɛ lɛ yɛ edama lɛ tsamɔhei lɛ. No hewɔ lɛ, maŋtsɛ lɛ kɛɛ mɔ ni kudɔɔ eshwiili lɛ akɛ: “Dɔɔ ohe ni okɛ mi aje ta* lɛ naa, ejaakɛ mipila waa.”+
35 Awu ta lɛ nakai gbi lɛ fɛɛ, ni ahiɛ maŋtsɛ lɛ mli yɛ eshwiili lɛ mli, ni ehiɛ miikwɛ Siriabii lɛ. Lá tsere kɛjɛ he ni gãi lɛ tsu lɛ kɛshwie ta shwiili lɛ mli, ni egbo gbɛkɛnaashi mli.+
36 Aaafee hulushinyɔɔ mli lɛ, abo kɛnyiɛ nsara lɛ mli akɛ: “Mɔ fɛɛ mɔ aya emaŋ! Mɔ fɛɛ mɔ aya eshikpɔŋ nɔ!”+
37 No hewɔ lɛ, maŋtsɛ lɛ gbo ni akɛ lɛ ba Samaria; amɛfu maŋtsɛ lɛ yɛ Samaria.
38 Be ni amɛyafɔ ta shwiili lɛ mli yɛ Samaria kpaakpo lɛ naa lɛ, eba mli tamɔ bɔ ni Yehowa ewie lɛ pɛpɛɛpɛ akɛ, gbei lɛ lɛmɔ elá lɛ, ni ashawoi lɛ hu ju amɛhe yɛ jɛmɛ.*+
39 Shi Ahab shihilɛ mli saji krokomɛi fɛɛ, nibii fɛɛ ni efee kɛ maŋtsɛ shĩa ni ekɛ shwuɔ wu*+ ma lɛ kɛ maji fɛɛ ni eto lɛ, aŋmala yɛ Israel maŋtsɛmɛi lɛ ayinɔsaji awolo lɛ mli.
40 Kɛkɛ ni Ahab gbo;*+ ni ebinuu Ahazia+ baye maŋtsɛ yɛ esɛɛ.
41 Yehoshafat,+ Asa binuu lɛ batsɔ Yuda maŋtsɛ yɛ Israel maŋtsɛ Ahab nɔyeli afi ni ji ejwɛ lɛ nɔ.
42 Yehoshafat eye afii 35 be ni ebatsɔ maŋtsɛ lɛ, ni eye maŋtsɛ afii 25 yɛ Yerusalem. Emami gbɛ́i ji Azuba, Shilhi biyoo lɛ.
43 Etee nɔ enyiɛ epapa Asa+ gbɛ lɛ fɛɛ nɔ. Egbáaa afã kɛjeee bɔ ni epapa fee enii ehã lɛ he, ni efee nɔ ni ja yɛ Yehowa hiɛ.+ Shi ajieee hei grɔŋŋi lɛ, ni no mli lɛ, maŋbii lɛ miishã afɔlei kɛ lasu afɔlei yɛ hei grɔŋŋi lɛ lolo.+
44 Yehoshafat kɛ Israel maŋtsɛ lɛ hi shi yɛ toiŋjɔlɛ mli.+
45 Yehoshafat shihilɛ mli saji krokomɛi fɛɛ, enitsumɔi wuji lɛ kɛ bɔ ni ewu tai ehã lɛ, aŋmala yɛ Yuda maŋtsɛmɛi ayinɔsaji awolo lɛ mli.
46 Lɛ hu eshwie hii ni hãa hii krokomɛi kɛ amɛ náa bɔlɛ*+ yɛ jamɔhei lɛ ni shwɛ yɛ etsɛ Asa gbii lɛ amli lɛ yɛ shikpɔŋ lɛ nɔ.+
47 No mli lɛ, maŋtsɛ ko bɛ Edom;+ nɔkwɛlɔ ko ji mɔ ni kwɛɔ sɛɛ akɛ maŋtsɛ yɛ jɛmɛ.+
48 Yehoshafat fee Tarshish meelei* hu koni amɛyaloo shika tsuru kɛjɛ Ofir kɛba,+ shi meelei lɛ náaa aya, ejaakɛ amɛyafite yɛ Ezion-geber.+
49 Nakai beiaŋ lɛ, Ahazia, Ahab binuu lɛ kɛɛ Yehoshafat akɛ: “Hã mitsuji lɛ afata otsuji lɛ ahe yɛ meelei lɛ amli kɛya,” shi Yehoshafat eyakpɛlɛɛɛ nɔ.
50 Kɛkɛ ni Yehoshafat gbo*+ ni afu lɛ yɛ etsɛmɛi lɛ amasɛi yɛ etsɛ David Maŋ lɛ mli; ni ebinuu Yehoram+ baye maŋtsɛ yɛ esɛɛ.
51 Ahazia,+ Ahab binuu lɛ batsɔ Israel maŋtsɛ yɛ Samaria yɛ Yuda maŋtsɛ Yehoshafat nɔyeli afi ni ji 17 lɛ nɔ, ni eye Israel nɔ maŋtsɛ afii enyɔ.
52 Ni etee nɔ efee efɔŋ yɛ Yehowa hiɛ, ni etee nɔ enyiɛ yɛ epapa+ kɛ emami+ gbɛ lɛ, kɛ Yeroboam, Nebat binuu lɛ, mɔ ni hã Israel fee esha lɛ gbɛ lɛ nɔ.+
53 Etee nɔ esɔmɔ Baal+ ni ekoto lɛ ni etee nɔ ewo Yehowa, Israel Nyɔŋmɔ lɛ mli la,+ tamɔ bɔ ni epapa fee lɛ pɛpɛɛpɛ.
Shishigbɛ Niŋmaa
^ Loo “mumɔ.”
^ Hebri sht. ŋm., “Maya, ni matsɔ amale mumɔ yɛ egbalɔi.”
^ Hebri sht. ŋm., “mumɔ.”
^ Hebri sht. ŋm., “Nɛgbɛ Yehowa mumɔ lɛ tsɔ eje minɔ ni ekɛ bo bawie?”
^ Hebri sht. ŋm., “blodo.”
^ Hebri sht. ŋm., “nsara.”
^ Shishitsɔɔmɔi komɛi kɛɔ akɛ, “he ni tsutsu lɛ, ashawoi lɛ juɔ amɛhe yɛ lɛ, jɛmɛ gbei lɛ balɛmɔ elá lɛ yɛ, taakɛ Yehowa ewie lɛ pɛpɛɛpɛ.”
^ Loo “aivori.” Kwɛmɔ Wiemɔi Titrii Amligbalamɔ lɛ.
^ Loo “kɛ etsɛmɛi lɛ yawɔ.”
^ Loo “hii ni kɛ hii krokomɛi náa bɔlɛ.”
^ Kwɛmɔ Wiemɔi Titrii Amligbalamɔ lɛ.
^ Loo “kɛ etsɛmɛi lɛ yawɔ.”
