1 Mose 21:1-34
21 Yehowa gbala ejwɛŋmɔ kɛba Sara nɔ tamɔ bɔ ni ekɛɛ lɛ, ni Yehowa fee nɔ ni ewo shi+ eto lɛ ehã Sara.
2 No hewɔ lɛ, Sara ná musu+ ni efɔ binuu ehã Abraham yɛ Abraham gbɔlɛ beiaŋ, yɛ be ni Nyɔŋmɔ ewo lɛ shi eto lɛ mli.+
3 Abraham wo ebi* ŋmɔŋ lɛ, mɔ ni Sara fɔ hã lɛ lɛ gbɛ́i akɛ Isak.+
4 Ni Abraham fo ebinuu Isak ketia be ni eye gbii kpaanyɔ lɛ, tamɔ bɔ ni Nyɔŋmɔ fã lɛ lɛ.+
5 Abraham eye afii 100 be ni afɔ ebinuu Isak ahã lɛ lɛ.
6 Kɛkɛ ni Sara kɛɛ: “Nyɔŋmɔ ewo minaa ŋmɔlɔ; mɔ fɛɛ mɔ ni baanu enɛ he lɛ kɛ mi baaŋmɔ.”*
7 Ni ekɛɛ kɛfata he akɛ: “Kulɛ, namɔ aaakɛɛ Abraham akɛ, ‘Bɔ fɛɛ bɔ ni fee lɛ, Sara baahã bii afufɔ?’ Kɛ̃lɛ, mifɔ binuu mihã lɛ yɛ egbɔlɛ beiaŋ.”
8 Agbɛnɛ, gbekɛ lɛ bada ni atse lɛ fufɔ, ni gbi nɔ ni atse Isak fufɔ lɛ, Abraham ŋmɛ okpɔlɔ wulu ko.
9 Shi Sara na akɛ binuu ní Hagar,+ Ejiptnyo lɛ fɔ ehã Abraham lɛ yeɔ Isak he fɛo.+
10 No hewɔ lɛ, ekɛɛ Abraham akɛ: “Shwiemɔ nyɔŋ yoo nɛɛ kɛ ebinuu lɛ, ejaakɛ nyɔŋ yoo nɛɛ binuu lɛ fataŋ mibinuu Isak he kɛyeŋ gboshinii lɛ!”+
11 Shi Abraham náaa nɔ ni Sara wie yɛ ebinuu lɛ he lɛ he miishɛɛ kwraa.+
12 Kɛkɛ ni Nyɔŋmɔ kɛɛ Abraham akɛ: “Kaahã nɔ ni Sara kɛ bo wie yɛ gbekɛ nuu lɛ kɛ onyɔŋ yoo lɛ he lɛ miigba onaa. Bo lɛ toi,* ejaakɛ mɔ ni abaatsɛ lɛ oseshi lɛ, Isak mli ebaajɛ kɛba.+
13 Shi nyɔŋ yoo lɛ binuu lɛ,+ mahã lɛ hu etsɔ jeŋmaŋ,+ ejaakɛ oseshi ni.”
14 No hewɔ lɛ, Abraham te shi leebi maŋkpa, ni eŋɔ blodo kɛ kooloo hewolo tɔ ní nu yɔɔ mli ni ekɛhã Hagar. Ekɛ nibii nɛɛ ma Hagar kɔɔŋ nɔ, ni ewo lɛ kɛ gbekɛ nuu lɛ gbɛ.+ No hewɔ lɛ, Hagar shi ni eyatsomlo yɛ Beer-sheba+ ŋa lɛ nɔ.
15 Naagbee lɛ, nu ni yɔɔ kooloo hewolo tɔ lɛ mli lɛ tã, ni etsi gbekɛ nuu lɛ ewo jwɛi kusui lɛ ekome shishi.
16 Ni ekome too etee eyata shi yɛ he ko, aaafee gãitsɛ̃mɔ jekɛmɔ, ejaakɛ ekɛɛ: “Misumɔŋ ni makwɛ ni gbekɛ nuu lɛ miigbo.” No hewɔ lɛ, eyata sɛɛ fɛlɛŋŋ ni ebɔi bolɔmɔ kɛ yaafo.
17 Kɛkɛ ni Nyɔŋmɔ nu gbekɛ nuu lɛ gbee,+ ni Nyɔŋmɔ bɔfo jɛ ŋwɛi etsɛ Hagar ni ekɛɛ lɛ akɛ:+ “Mɛni feɔ bo, Hagar? Kaashe gbeyei, ejaakɛ Nyɔŋmɔ enu gbekɛ nuu lɛ gbee yɛ he ni ekã lɛ.
18 Tee shi, wó gbekɛ nuu lɛ nɔ, ní omɔ emli jogbaŋŋ, ejaakɛ mahã etsɔ jeŋmaŋ kpeteŋkpele.”+
19 Ni Nyɔŋmɔ gbele ehiŋmɛii ni ena nubu ko ní nu yɔɔ mli, ni etee eyayɛ nu ewo kooloo hewolo tɔ lɛ mli obɔ, ni ehã gbekɛ nuu lɛ eko enu.
20 Ni Nyɔŋmɔ kɛ gbekɛ nuu+ lɛ hi shi be ni edaa lɛ. Ehi ŋa lɛ nɔ, ni ebatsɔ gaitsɛ̃lɔ.
21 Eyahi Paran ŋa lɛ nɔ,+ ni enyɛ yaŋɔ yoo kɛjɛ Ejipt shikpɔŋ lɛ nɔ ebahã lɛ akɛ eŋa.
22 Nakai beiaŋ lɛ, Abimelek kɛ etatsɛ Fikol kɛɛ Abraham akɛ: “Nyɔŋmɔ kɛ bo yɛ, yɛ nɔ fɛɛ nɔ ni ofeɔ lɛ mli.+
23 No hewɔ lɛ, agbɛnɛ kã mi kitã yɛ biɛ yɛ Nyɔŋmɔ hiɛ, akɛ obaaye mi kɛ mibii kɛ miseshibii lɛ anɔkwa, ni akɛ, bɔ ni mijie suɔmɔ ni tsakeee kpo mitsɔɔ bo lɛ, okɛ mi kɛ shikpɔŋ ni oyɔɔ nɔ nɛɛ nɔ bii lɛ baaye nakai nɔŋŋ.”+
24 No hewɔ lɛ, Abraham kɛɛ: “Mikã kitã lɛ.”
25 Shi Abraham wie nubu ní Abimelek tsuji lɛ shɔ̃+ ekãa naa yɛ edɛŋ lɛ he etsɔɔ Abimelek.
26 Abimelek kɛɛ lɛ akɛ: “Mileee mɔ ni fee enɛ; bo hu okɛɛɛ mi he nɔ ko, ni minuko nɔ ko yɛ he kɛbashi ŋmɛnɛ.”
27 Kɛkɛ ni Abraham ŋɔ gwantɛŋi kɛ tsinai ni ekɛhã Abimelek, ni amɛyi enyɔ lɛ fɛɛ amɛkpaŋ.
28 Be ni Abraham jie gwantɛŋ biyei kpawo kɛjɛ tooku lɛ teŋ eto afã lɛ,
29 Abimelek kɛɛ Abraham akɛ: “Mɛni hewɔ ojie gwantɛŋ biyei kpawo nɛɛ oto afã yɛ biɛ lɛ?”
30 Kɛkɛ ni ekɛɛ: “Hemɔ gwantɛŋ biyei kpawo nɛɛ yɛ midɛŋ, koni no afee odaseyeli akɛ mi mitsa* nubu nɛɛ.”
31 No hewɔ ni etsɛ jɛmɛ akɛ Beer-sheba*+ lɛ, ejaakɛ jɛmɛ amɛyi enyɔ lɛ fɛɛ amɛkamɔ kitã yɛ.
32 No hewɔ lɛ, amɛkpaŋ+ yɛ Beer-sheba, ni no sɛɛ lɛ, Abimelek kɛ etatsɛ Fikol fɛɛ te shi ni amɛku amɛsɛɛ kɛtee Filistibii+ lɛ ashikpɔŋ lɛ nɔ.
33 No sɛɛ lɛ, edu* tamariske tso yɛ Beer-sheba, ni etsɛ Yehowa,+ naanɔ Nyɔŋmɔ+ lɛ gbɛ́i yɛ jɛmɛ.
34 Ni Abraham hi* Filistibii lɛ ashikpɔŋ lɛ nɔ be kplaŋŋ.*+
Shishigbɛ Niŋmaa
^ Loo “ebinuu.”
^ Shishitsɔɔmɔi komɛi kɛɔ akɛ, “baaŋmɔ mi.”
^ Hebri sht. ŋm., “Bo egbee toi.”
^ Loo “mije.”
^ Eeenyɛ efee akɛ, eshishi ji “Kitãkamɔ Nubu” loo “Kpawo Nubu.”
^ Loo “etɛo.”
^ Loo “yato gbɔ yɛ.”
^ Hebri sht. ŋm., “gbii babaoo.”
