1 Mose 41:1-57
41 Afii muji enyɔ sɛɛ lɛ, Farao la+ ní edamɔ Nilo Faa lɛ naa.
2 Ni naa, tsinayei fɛfɛji kpawo ní eshwishwii miije kpo kɛmiijɛ faa lɛ mli kɛmiiba, kɛkɛ ni amɛyakpe jwɛi yɛ Nilo lɛ naa.+
3 Ni tsinayei kpawo krokomɛi hu ní he yɔɔ taŋ, ní amɛtãra loo miije kpo kɛmiijɛ Nilo lɛ mli kɛmiiba yɛ amɛsɛɛ, ni amɛbadamɔ tsinayei ní eshwishwii lɛ amasɛi yɛ Nilo lɛ naa.
4 Ni tsinayei ni he yɔɔ taŋ, ní amɛtãra loo lɛ bɔi tsinayei fɛfɛji kpawo ní eshwishwii lɛ yeli. Kɛkɛ ni Farao hiɛ tsɛ̃.
5 Ni esaa ewɔ ekoŋŋ, ni ela nɔ ni ji shii enyɔ nɔ. Ni ena ŋmaa* kushai kpawo ní eba ŋmaa tso kome yi, ŋmaa kpakpai ní nii yɔɔ amɛhe jogbaŋŋ ni.+
6 Ni amɛsɛɛ lɛ, ŋmaa kushai kpawo ní yɔɔ legelege, ní bokã kɔɔyɔɔ lɛ ehã amɛgbigbii lɛ hu ba.
7 Ni ŋmaa kushai ni efee legelege lɛ bɔi ŋmaa kpakpai kpawo ní nii yɔɔ amɛhe jogbaŋŋ lɛ mii. Kɛkɛ ni Farao hiɛ tsɛ̃, ni ena akɛ lamɔ ni.
8 Shi enɔ leebi lɛ, ehao waa. No hewɔ lɛ, etsu ayatsɛ Ejipt majikfeelɔi lɛ kɛ hiɛshikalɔi lɛ fɛɛ kɛba. Farao gba amɛ elamɔi lɛ, shi amɛteŋ mɔ ko mɔ ko nyɛɛɛ atsɔɔ lɛ shishi.
9 Kɛkɛ ni dãawolɔnukpa lɛ kɛɛ Farao akɛ: “Miijaje mihe eshai ŋmɛnɛ.
10 Farao mli fu etsuji lɛ. No hewɔ lɛ, eyawo mi tsuŋ yɛ tsuŋwoohe ni yɔɔ bulɔi lɛ anɔ onukpa lɛ shĩa lɛ, mi kɛ nishãlɔnukpa lɛ fɛɛ.+
11 No sɛɛ lɛ, wɔteŋ mɔ fɛɛ mɔ la lamɔ ko yɛ gbɛkɛ kome too mli. Mi kɛ lɛ fɛɛ la, ni lamɔ lɛ eko fɛɛ eko kɛ eshishitsɔɔmɔ.+
12 Ni oblanyo Hebrinyo ko, ni ji bulɔi lɛ anɔ onukpa+ lɛ tsulɔ lɛ kɛ wɔ yɔɔ jɛmɛ. Be ni wɔgba lɛ wɔlamɔi lɛ,+ etsɔɔ wɔteŋ mɔ fɛɛ mɔ elamɔ lɛ shishi.
13 Bɔ ni etsɔɔ wɔ shishi lɛ, nakai pɛpɛɛpɛ eba mli. Akɛ migbɛnaa lɛ hã mi ekoŋŋ, shi nuu kroko lɛ, asɛŋ lɛ.”+
14 No hewɔ lɛ, Farao tsu ní ayatsɛ Yosef,+ kɛkɛ ni ayajie lɛ kɛjɛ tsuŋwoohe lɛ*+ kɛba oya nɔŋŋ. Eshɛ etsɛŋ* ni etsake etadei lɛ, ni etee Farao ŋɔɔ.
15 Ni Farao kɛɛ Yosef akɛ: “Mila lamɔ ko, shi mɔ ko mɔ ko bɛ ní baatsɔɔ shishi. Agbɛnɛ, minu ní akɛɛ yɛ ohe akɛ kɛ́ onu lamɔ ko lɛ onyɛɔ otsɔɔ shishi.”+
16 Kɛkɛ ni Yosef hã Farao hetoo akɛ: “Mi lɛ, jeee mɔ ko ji mi! Nyɔŋmɔ ji mɔ ni kɛ shishitsɔɔmɔ ni sa jogbaŋŋ baahã Farao.”+
17 Farao tsa nɔ ekɛɛ Yosef akɛ: “Milamɔ lɛ mli lɛ, naa, midamɔ Nilo Faa lɛ naa.
18 Ni tsinayei fɛfɛji kpawo ní eshwishwii miije kpo kɛmiijɛ Nilo lɛ mli kɛmiiba, kɛkɛ ni amɛbɔi jwɛi ní yɔɔ Nilo lɛ naa lɛ kpemɔ.+
19 Ni amɛsɛɛ lɛ, tsinayei kpawo krokomɛi hu ní yɔɔ wudɔwudɔ ní he yɔɔ taŋ, ní amɛtãra loo je kpo kɛba. Minako tsinayei ní he yɔɔ taŋ tamɔ nakai pɛŋ yɛ Ejipt shikpɔŋ lɛ nɔ fɛɛ.
20 Ni tsinayei ní etãra loo ní he yɔɔ taŋ lɛ bɔi klɛŋklɛŋ tsinayei kpawo ní eshwishwii lɛ yeli.
21 Shi be ni amɛye amɛ lɛ, mɔ ko mɔ ko enaaa akɛ amɛye amɛ, ejaakɛ amɛkã he amɛtãra loo ni amɛhe yɛ taŋ tamɔ tsutsu lɛ nɔŋŋ. Kɛkɛ ni mihiɛ tsɛ̃.
22 “No sɛɛ lɛ, yɛ milamɔ lɛ mli lɛ, mina ŋmaa kushai kpawo ní eba ŋmaa tso kome yi, ŋmaa kpakpai ní nii yɔɔ he jogbaŋŋ ni.+
23 Ni amɛsɛɛ lɛ, ŋmaa kushai kpawo ní mli nu fɛɛ etã, ní yɔɔ legelege, ní bokã kɔɔyɔɔ lɛ ehã amɛgbigbii lɛ hu ba.
24 Kɛkɛ ni ŋmaa kushai ni efee legelege lɛ bɔi ŋmaa kpakpai kpawo ní nii yɔɔ amɛhe jogbaŋŋ lɛ mii. No hewɔ lɛ, migba majikfeelɔi+ lɛ, shi amɛteŋ mɔ ko mɔ ko nyɛɛɛ atsɔɔ mi shishi.”+
25 Kɛkɛ ni Yosef kɛɛ Farao akɛ: “Farao lamɔi lɛ fɛɛ hiɛ shishitsɔɔmɔ kome. Anɔkwa Nyɔŋmɔ lɛ ehã Farao ele nɔ ni ebaafee.*+
26 Tsinayei kpakpai kpawo lɛ, afii kpawo ni. Nakai nɔŋŋ ŋmaa kushai kpawo lɛ ji afii kpawo. Lamɔi lɛ fɛɛ hiɛ shishitsɔɔmɔ kome.
27 Tsinayei kpawo ní etãra loo ní he yɔɔ taŋ ní ba yɛ amɛsɛɛ lɛ ji afii kpawo, ni ŋmaa kushai kpawo ní nɔ ko bɛ yi, ní bokã kɔɔyɔɔ lɛ ehã amɛgbigbii lɛ, baafee hɔmɔ afii kpawo.
28 Enɛ nɔŋŋ ji nɔ ni mikɛɛ Farao lɛ: Anɔkwa Nyɔŋmɔ lɛ ehã Farao ena nɔ ni ebaafee.*
29 “Afii kpawo baaba ni niyenii baabu babaoo diɛŋtsɛ yɛ Ejipt shikpɔŋ lɛ nɔ fɛɛ.
30 Shi bɔ fɛɛ bɔ ni fee lɛ, hɔmɔ afii kpawo baaba yɛ afii nɛɛ asɛɛ, ni mɛi ahiɛ baakpa niyenii babaoo ní aná yɛ Ejipt shikpɔŋ lɛ nɔ lɛ nɔ, ni hɔmɔ lɛ baakpãtã shikpɔŋ lɛ hiɛ.+
31 Ni hɔmɔ ní baanyiɛ sɛɛ aba lɛ hewɔ lɛ, akaiŋ niyenii babaoo ní tsutsu lɛ ayɔɔ lɛ, ejaakɛ hɔmɔ lɛ naa baawa waa diɛŋtsɛ.
32 Ahã Farao la lamɔ lɛ shii enyɔ, ejaakɛ anɔkwa Nyɔŋmɔ lɛ ekpɛ mli akɛ ebaafee nakai lɛɛlɛŋ, ni etsɛŋ kwraa, anɔkwa Nyɔŋmɔ lɛ baatsu he nii.
33 “No hewɔ lɛ, agbɛnɛ, hã Farao atao nuu ko ni le nii ní hiɛ kã shi, ní ehã ekwɛ Ejipt shikpɔŋ lɛ nɔ.
34 Hã Farao afee he nɔ ko, ní ehole nɔkwɛlɔi yɛ shikpɔŋ lɛ nɔ, ní ehe Ejipt shikpɔŋ lɛ nɔ niyenii lɛ amlijai enumɔ mli ekome eto yɛ afii kpawo ní niyenii baabu lɛ mli.+
35 Ni hã amɛbua niyenii lɛ fɛɛ naa yɛ afii kpakpai ní baaba nɛɛ amli, ní amɛbua ŋmaa naa amɛwo Farao nitoohei lɛ, koni no afee niyenii ní akɛto yɛ maji lɛ amli, ní abaa yi yɛ jɛmɛ.+
36 Niyenii lɛ ji nɔ ni akɛbaahã gbɔmɛi kɛ kooloi* lɛ yɛ hɔmɔ afii kpawo ní baaba Ejipt shikpɔŋ lɛ nɔ lɛ mli, koni hɔmɔ lɛ akakpãtã shikpɔŋ lɛ hiɛ.”+
37 Wiemɔ nɛɛ sa Farao kɛ etsuji lɛ fɛɛ ahiɛ.
38 No hewɔ lɛ, Farao kɛɛ etsuji lɛ akɛ: “Ani abaanyɛ aná mɔ kroko ní Nyɔŋmɔ mumɔ lɛ yɔɔ emli tamɔ mɔ nɛ?”
39 Kɛkɛ ni Farao kɛɛ Yosef akɛ: “Akɛni Nyɔŋmɔ ehã ole enɛɛmɛi fɛɛ hewɔ lɛ, mɔ ko mɔ ko bɛ ní le nii, ní hiɛ kã shi tamɔ bo.
40 Bo ji mɔ ni baakwɛ mishĩa lɛ nɔ, ni mimaŋbii lɛ fɛɛ baabo bo toi yɛ nɔ fɛɛ nɔ mli.+ Maŋtsɛ ní miji* lɛ gbɛfaŋ pɛ mafe bo yɛ.”
41 Ni Farao kɛfata he hã Yosef akɛ: “Naa, miiwó bo Ejipt shikpɔŋ lɛ fɛɛ nɔkwɛlɔ.”+
42 Kɛkɛ ni Farao jie eniianaasɔomɔ ga lɛ yɛ lɛ diɛŋtsɛ enine, ni ekɛwo Yosef nine, ni ewo lɛ klala kpakpa atadei, ni ekɛ shika tsuru kuɛnii wo ekuɛ.
43 Agbɛnɛ hu, ehã eta maŋtsɛ lɛ shwiili ni ji enyɔ lɛ mli, ni ehã abolɔ kɛnyiɛ ehiɛ akɛ, “Avrék!”* No hewɔ lɛ, ewó lɛ Ejipt shikpɔŋ lɛ fɛɛ nɔkwɛlɔ.
44 Farao tsa nɔ ekɛɛ Yosef akɛ: “Miji Farao moŋ, shi kɛ́ bo ohãko hegbɛ yɛ nɔ ko he lɛ, mɔ ko mɔ ko efeŋ nɔ ko nɔ ko* yɛ Ejipt shikpɔŋ lɛ fɛɛ nɔ.”+
45 Enɛ sɛɛ lɛ, Farao wo Yosef gbɛ́i akɛ Zafenat-panea, ni ekɛ Asenat,+ ni ji On* osɔfo Potifera biyoo lɛ hã lɛ akɛ eŋa. Ni Yosef batsɔ Ejipt shikpɔŋ lɛ nɔkwɛlɔ.*+
46 Yosef eye afii 30+ be ni eyadamɔ Farao, Ejipt maŋtsɛ lɛ hiɛ* lɛ.
Kɛkɛ ni Yosef je Farao hiɛ, ni eyakpa Ejipt shikpɔŋ lɛ fɛɛ nɔ.
47 Ni afii kpawo ní niyenii bu lɛ amli lɛ, shikpɔŋ lɛ tee nɔ eba nii babaoo diɛŋtsɛ.*
48 Ni Yosef tee nɔ ehe niyenii fɛɛ ni ba yɛ afii kpawo lɛ mli yɛ Ejipt shikpɔŋ lɛ nɔ lɛ eto, ni ebuaa niyenii lɛ naa etoɔ yɛ maji lɛ amli. Ekɛ niyenii ní aná yɛ shikpɔji ni bɔle maŋ fɛɛ maŋ he lɛ anɔ lɛ toɔ nakai maŋ lɛ mli.
49 Yosef tee nɔ ebua ŋmaa babaoo diɛŋtsɛ naa eto, tamɔ ŋshɔnaa shia, kɛyashi be ni amɛkpa niyenii lɛ falɛ lɛ susumɔ, ejaakɛ anyɛɛɛ asusu.
50 Afɔ bihii enyɔ ahã Yosef+ dani hɔmɔ afii lɛ ba; ekɛ Asenat, ni ji On* osɔfo Potifera biyoo lɛ fɔ bihii nɛɛ.
51 Yosef wo kromɔbi lɛ Manase,*+ ejaakɛ ekɛɛ: “Nyɔŋmɔ ehã mihiɛ ekpa mihaomɔ lɛ fɛɛ kɛ mitsɛ shĩa lɛ fɛɛ nɔ.”
52 Ni ewo mɔ ni ji enyɔ lɛ Efraim,*+ ejaakɛ ekɛɛ: “Nyɔŋmɔ ehã miwo shwiei yɛ mimanehulu shikpɔŋ lɛ nɔ.”+
53 Kɛkɛ ni afii kpawo ní niyenii bu yɛ Ejipt shikpɔŋ lɛ nɔ lɛ ba naagbee,+
54 ni hɔmɔ afii kpawo lɛ je shishi, tamɔ bɔ ni Yosef kɛɛ lɛ pɛpɛɛpɛ.+ Hɔmɔ lɛ ba yɛ shikpɔji lɛ fɛɛ anɔ, shi niyenii* yɛ Ejipt shikpɔŋ lɛ nɔ fɛɛ.+
55 Naagbee lɛ, hɔmɔ lɛ sa Ejipt shikpɔŋ lɛ fɛɛ he, ni maŋbii lɛ bɔi bolɔmɔ kɛ Farao tsɛmɔ koni ehã amɛ niyenii.*+ Ni Farao kɛɛ Ejiptbii lɛ fɛɛ akɛ: “Nyɛyaa Yosef ŋɔɔ, ni nɔ fɛɛ nɔ ni ebaakɛɛ nyɛ lɛ, nyɛfea.”+
56 Hɔmɔ lɛ tee nɔ eye mɛi yɛ shikpɔŋ lɛ nɔ fɛɛ.+ Kɛkɛ ni Yosef gbele nitoohei ni yɔɔ amɛteŋ lɛ fɛɛ anaa, ni ebɔi ŋmaa lɛ hɔɔmɔ kɛ Ejiptbii lɛ hãmɔ,+ ejaakɛ hɔmɔ lɛ naa wa waa yɛ Ejipt shikpɔŋ lɛ nɔ.
57 Agbɛnɛ hu, mɛi ni jɛ shikpɔŋ lɛ nɔ fɛɛ lɛ ba Ejipt koni amɛbahé niyenii yɛ Yosef dɛŋ, ejaakɛ hɔmɔ lɛ naa wa waa yɛ shikpɔŋ lɛ nɔ fɛɛ.+
Shishigbɛ Niŋmaa
^ Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Hebri sht. ŋm., “bu ní akɛtoɔ nu lɛ mli; bu lɛ mli.”
^ Hebri wiemɔ ní akɛtsu nii yɛ biɛ lɛ baanyɛ atsɔɔ akɛ eshɛ etsɛŋ kɛ eyi fɛɛ.
^ Ni ji, Nyɔŋmɔ.
^ Ni ji, Nyɔŋmɔ.
^ Loo “akɛbaahã shikpɔŋ.”
^ Loo “Maŋtsɛ sɛi.”
^ Eeenyɛ efee akɛ, eji wiemɔ ko ní biɔ ní akɛ woo kɛ bulɛ ahã mɔ ko.
^ Hebri sht. ŋm., “mɔ ko mɔ ko wóŋ enine loo enane nɔ.”
^ Ni ji, Hiliopolis.
^ Loo “Yosef yakpa Ejipt shikpɔŋ lɛ nɔ.”
^ Loo “be ni ebɔi Farao, Ejipt maŋtsɛ lɛ sɔɔmɔ.”
^ Hebri sht. ŋm., “eba nii dɛ̃ kɔkɔ obɔbɔ.”
^ Ni ji, Hiliopolis.
^ Eshishi ji, “Mɔ Ni Hãa Hiɛ Kpaa Nii Anɔ.”
^ Eshishi ji, “Shwiei Enyɔ; Ye Omanye Shii Enyɔ.”
^ Hebri sht. ŋm., “blodo.”
^ Hebri sht. ŋm., “blodo.”
