2 Mose 18:1-27
18 Agbɛnɛ, Yetro, Midian osɔfo lɛ ni ji Mose shaanuu lɛ,+ nu nibii fɛɛ ni Nyɔŋmɔ efee ehã Mose, kɛ emaŋ Israel lɛ, kɛ bɔ ni Yehowa ejie Israelbii lɛ kɛje Ejipt lɛ he.+
2 Be ni Mose hã eŋa Zipora ku esɛɛ kɛtee Yetro, ni ji Mose shaanuu lɛ ŋɔɔ lɛ, Yetro ji mɔ ni kwɛ Mose ŋa lɛ,
3 kɛ ebihii enyɔ lɛ.+ Mɔ kome gbɛ́i ji Gershom,*+ ejaakɛ Mose kɛɛ, “Mitsɔ gbɔ yɛ maŋsɛɛ shikpɔŋ nɔ,”
4 ni mɔ kroko lɛ gbɛ́i ji Eliezer,* ejaakɛ ekɛɛ, “Mitsɛ Nyɔŋmɔ lɛ ji miyelikɛbualɔ, lɛ ejie mi kɛje Farao klante lɛ naa.”+
5 No hewɔ lɛ, Yetro, ni ji Mose shaanuu lɛ, kɛ Mose bihii lɛ kɛ eŋa lɛ ba Mose ŋɔɔ yɛ ŋa lɛ nɔ, he ni ebɔ nsara yɛ, yɛ anɔkwa Nyɔŋmɔ lɛ gɔŋ lɛ he lɛ.+
6 Kɛkɛ ni etsu ayakɛɛ Mose akɛ: “Mi, oshaanuu Yetro,+ mikɛ oŋa kɛ obihii enyɔ lɛ miiba oŋɔɔ.”
7 Amrɔ nɔŋŋ lɛ, Mose je kpo ni ekɛ eshaanuu lɛ yakpe, ni ekoto lɛ ni eshɔ enaa. Amɛteŋ mɔ fɛɛ mɔ bi bɔ ni mɔ kroko lɛ yɔɔ, ni no sɛɛ lɛ, amɛtee mama tsũ lɛ mli.
8 Mose gba eshaanuu lɛ nibii fɛɛ ni Yehowa fee Farao kɛ Ejiptbii lɛ yɛ Israelbii lɛ ahewɔ,+ kɛ shihilɛi ni mli wawai fɛɛ ni amɛkɛkpe yɛ amɛgbɛnyiɛmɔ lɛ mli+ kɛ bɔ ni Yehowa jie amɛ lɛ.
9 Yetro ná miishɛɛ waa yɛ nibii kpakpai fɛɛ ni Yehowa efee ehã Israelbii lɛ hewɔ, akɛ ejie amɛ kɛje Ejiptbii lɛ adɛŋ.
10 Kɛkɛ ni Yetro kɛɛ akɛ: “Ajie Yehowa yi, lɛ mɔ ni ejie bo kɛje Ejipt kɛ Farao dɛŋ, ni ejie emaŋ lɛ hu kɛje Ejiptbii lɛ adɛŋ lɛ.
11 Kpaako miná mile akɛ Yehowa fe nyɔŋmɔi krokomɛi fɛɛ+ yɛ nɔ ni efee mɛi ni wó amɛhe nɔ yɛ emaŋ lɛ nɔ lɛ hewɔ.”
12 Kɛkɛ ni Yetro, Mose shaanuu lɛ, kɛ shãa afɔle kɛ afɔlei krokomɛi bahã Nyɔŋmɔ, ni Aaron kɛ Israel onukpai lɛ fɛɛ ba koni amɛkɛ Mose shaanuu lɛ abaye nii yɛ anɔkwa Nyɔŋmɔ lɛ hiɛ.
13 Enɔ jetsɛremɔ lɛ, Mose ho eta shi tamɔ bɔ ni efeɔ daa lɛ, koni eye maŋbii lɛ ateŋ saji ehã amɛ, ni maŋbii lɛ tee nɔ amɛdamɔ Mose nɔ kɛjɛ leebi kɛyashi gbɛkɛ.
14 Be ni Mose shaanuu lɛ na nibii fɛɛ ni Mose feɔ ehãa maŋbii lɛ, ekɛɛ akɛ: “Mɛni hewɔ ofeɔ enɛ nɛɛ? Mɛni hewɔ okome too ota shi otsuɔ enɛ, ni maŋbii lɛ fɛɛ damɔ onɔ kɛjɛ leebi kɛyashi gbɛkɛ lɛ?”
15 Mose kɛɛ eshaanuu lɛ akɛ: “Ejaakɛ maŋbii lɛ baa miŋɔɔ amɛbabiɔ Nyɔŋmɔ nii.
16 Kɛ́ sane ko te shi yɛ mɛi enyɔ teŋ lɛ, akɛbaa miŋɔɔ, ni mi miyeɔ sane lɛ mihãa amɛ, ni mitsɔɔ amɛ anɔkwa Nyɔŋmɔ lɛ yiŋkpɛi kɛ emlai.”+
17 Mose shaanuu lɛ kɛɛ lɛ akɛ: “Jeee nɛkɛ ji bɔ ni sa akɛ otsu saji ahe nii.
18 Ebaatɔ bo kɛ maŋbii nɛɛ ni fata ohe lɛ fɛɛ, ejaakɛ jatsu nɛɛ tsii kwraa tsɔ kɛhã bo, ni okome too onyɛŋ otere.
19 No hewɔ lɛ, bo mi toi. Mawo bo ŋaa ko, ni Nyɔŋmɔ baaye abua bo.*+ Bo daamɔ maŋbii lɛ anajiaŋ ni okɛ anɔkwa Nyɔŋmɔ lɛ awie ohã amɛ,+ koni okɛ saji lɛ fɛɛ aba anɔkwa Nyɔŋmɔ lɛ hiɛ.+
20 Hã amɛle taomɔ nii lɛ kɛ mlai lɛ,+ ni otsɔɔ amɛ gbɛ ni sa akɛ amɛtsɔ nɔ kɛ nɔ ni esa akɛ amɛfee.
21 Shi halamɔ maŋbii lɛ ateŋ hii ni sheɔ Nyɔŋmɔ gbeyei ni baanyɛ atsu nitsumɔ ni akɛbaawo amɛdɛŋ lɛ he nii jogbaŋŋ,+ hii ni amuɔ afɔ̃ɔ amɛnɔ, ni sumɔɔɔ ni amɛyeɔ mɛi ahe nii,+ ni ohã hii nɛɛ asɔmɔ akɛ mɛi akpe nɔkwɛlɔi kɛ mɛi oha nɔkwɛlɔi kɛ mɛi nyɔŋmai enumɔ nɔkwɛlɔi kɛ mɛi nyɔŋma nɔkwɛlɔi.+
22 Ni ohã amɛye saji ni baate shi yɛ maŋbii lɛ ateŋ,* ni amɛkɛ saji wuji lɛ aba oŋɔɔ,+ shi amɛtsu saji bibii lɛ ahe nii. Okɛ amɛ aja nitsumɔ lɛ bɔ ni afee ni efee mlɛo ehã bo.+
23 Kɛ́ ofee enɛ, ni nakai ji bɔ ni Nyɔŋmɔ efã bo lɛ, no lɛ, obaanyɛ otsu nitsumɔ nɛɛ ni etɔɔɔ bo, ni mɔ fɛɛ mɔ baaya shĩa kɛ miishɛɛ.”
24 Mose bo eshaanuu lɛ toi amrɔ nɔŋŋ, ni efee nibii fɛɛ ni ekɛɛ lɛ lɛ.
25 Mose hala hii ni baanyɛ atsu nitsumɔ ni akɛbaawo amɛdɛŋ lɛ he nii jogbaŋŋ lɛ kɛjɛ Israelbii lɛ fɛɛ ateŋ, ni ehã hii nɛɛ sɔmɔ akɛ mɛi akpe nɔkwɛlɔi kɛ mɛi oha nɔkwɛlɔi kɛ mɛi nyɔŋmai enumɔ nɔkwɛlɔi kɛ mɛi nyɔŋma nɔkwɛlɔi.
26 No hewɔ lɛ, amɛye saji ni te shi yɛ maŋbii lɛ ateŋ lɛ. Amɛkɛ saji wuji lɛ bahãa Mose,+ ni saji bibii fɛɛ lɛ, amɛ amɛyeɔ.
27 Enɛɛmɛi asɛɛ lɛ, Mose yajie eshaanuu lɛ gbɛ,+ ni eshaanuu lɛ tee emaŋ.*
Shishigbɛ Niŋmaa
^ Eshishi ji, “Mɔ Ko Ní Eyato Gbɔ Yɛ Jɛmɛ.”
^ Eshishi ji, “Mi-Nyɔŋmɔ Lɛ Ji Yelikɛbualɔ.”
^ Loo “ni Nyɔŋmɔ baafata ohe.”
^ Hebri sht. ŋm., “ohã amɛkojo maŋ lɛ be fɛɛ be.”
^ Loo “eshikpɔŋ nɔ.”
