Wolo Ni Ji Enyɔ Ni Akɛmaje Timoteo 4:1-22
4 Mikɛ hiɛdɔɔ miifã bo yɛ Nyɔŋmɔ kɛ Kristo Yesu, mɔ ni baakojo+ hiɛkãalɔi kɛ gbohii lɛ ahiɛ,+ kɛ agbɛnɛ hu, kɛtsɔ ekpojiemɔ+ kɛ e-Maŋtsɛyeli lɛ nɔ akɛ:+
2 Shiɛmɔ wiemɔ lɛ;+ ohe afee oya kɛtsu be fɛɛ be, bei ni hi jio, bei ni mli wa jio; jajemɔ mɛi,+ kã hiɛ, wiemɔ otsɔɔ, yɛ tsuishitoo kɛ nitsɔɔmɔ he ŋaa fɛɛ mli.+
3 Ejaakɛ be ko baaba ni amɛnáŋ tsɔɔmɔ ni hãa mɔ náa hewalɛ* lɛ he tsui,+ shi moŋ, amɛbaabua tsɔɔlɔi anaa amɛwo amɛhe yɛ amɛ diɛŋtsɛ amɛkɔnɔi lɛ anaa koni ata amɛtoiiaŋ ahã amɛ.*+
4 Amɛbaakpa anɔkwale lɛ toiboo, ni amɛkɛ amɛjwɛŋmɔ baaya adesãi moŋ anɔ.
5 Shi bo lɛ, hã ohiɛ ahi ohe nɔ yɛ nibii fɛɛ amli, fi shi yɛ shihilɛ ni mli wa mli,+ tsu sane kpakpa shiɛlɔ nitsumɔ lɛ,* tsu osɔɔmɔ lɛ he nii pɛpɛɛpɛ.+
6 Ejaakɛ mi lɛ, aafɔse mi tamɔ dãa afɔle aashwie shi momo,+ ni be ni akɛbaajie mi+ lɛ eshɛ etã.
7 Ta kpakpa lɛ, miwu;+ foidamɔ lɛ, mida migbe naa;+ hemɔkɛyeli lɛ, mihiɛ mli.
8 Kɛjɛ be nɛɛ nɔ kɛyaa lɛ, nɔ ni eshwɛ ni kã shi hã mi ji jalɛ akekere lɛ,+ nɔ ni Nuŋtsɔ lɛ, jalɛ kojolɔ lɛ,+ kɛbaahã mi akɛ jweremɔnɔ yɛ nakai gbi lɛ nɔ lɛ,+ shi jeee mi pɛ ekɛbaahã, shi moŋ mɛi fɛɛ ni sumɔɔ ekpojiemɔ lɛ hu.
9 Bɔɔ mɔdɛŋ fɛɛ ni ooonyɛ ni oba miŋɔɔ oya.
10 Ejaakɛ Dema+ eshi mi etee Tesalonika, akɛni esumɔɔ jeŋ ni yɔɔ amrɔ nɛɛ* hewɔ, Kreske etee Galatia, ni Tito etee Dalmatia.
11 Luka pɛ kɛ mi yɔɔ. Ŋɔɔ Marko ofata ohe kɛba, ejaakɛ eyeɔ ebuaa mi yɛ sɔɔmɔ lɛ mli.
12 Shi Tihiko+ lɛ, mitsu lɛ Efeso.
13 Kɛ́ ooba lɛ, kɔ fɛ̃i beiaŋ mama ni mishi yɛ Troia yɛ Karpo ŋɔɔ lɛ kɛba, kɛ wolokpoi* lɛ hu, titri lɛ, nɔ ni akɛ kooloi ahewoji fee lɛ.*
14 Aleksanda, akɔɔble sɔ̃lɔ lɛ, ye mi awui waa. Yehowa* baato lɛ najiaŋ yɛ enitsumɔi lɛ anaa.+
15 Bo hu, esa akɛ okwɛ ohe nɔ jogbaŋŋ yɛ ehe, ejaakɛ ete shi ewo wɔsane lɛ waa diɛŋtsɛ.
16 Miklɛŋklɛŋ naajiemɔ lɛ mli lɛ, mɔ ko mɔ ko eyawaaa mi, shi moŋ amɛ fɛɛ amɛshi mi—akabu enɛ afɔ̃ amɛnɔ.
17 Shi Nuŋtsɔ lɛ damɔ mimasɛi ni ewo mi hewalɛ, koni atsɔ minɔ atsu shiɛmɔ nitsumɔ lɛ kɛmɔ shi kwraa, ni jeŋmaji lɛ fɛɛ anu;+ ni ajie mi yɛ jata lɛ daaŋ.+
18 Nuŋtsɔ lɛ baajie mi kɛjɛ nitsumɔ fɔŋ fɛɛ nitsumɔ fɔŋ mli, ni ebaahere miyiwala kɛya eŋwɛi Maŋtsɛyeli lɛ mli.+ Lɛ akɛ anunyam ahã kɛya naanɔi anaanɔ. Amen.
19 Ŋa Priska kɛ Akwila+ kɛ Onesiforo shĩabii lɛ ohã mi.+
20 Erasto+ yɛ Korinto lolo, shi Trofimo+ lɛ, mishi lɛ yɛ Mileto, no mli lɛ, ebɛ hewalɛ.
21 Bɔɔ mɔdɛŋ fɛɛ ni ooonyɛ ni oba dani fɛ̃i be lɛ ashɛ.
Eubulo miiŋa bo, ni Pude kɛ Lino kɛ Klaudia kɛ nyɛmimɛi lɛ fɛɛ hu miiŋa bo.
22 Nuŋtsɔ lɛ kɛ mumɔ ni ojieɔ lɛ kpo lɛ ahi shi. Edromɔ lɛ kɛ nyɛ ahia shi.
Shishigbɛ Niŋmaa
^ Loo “ni tsaa mɔ; ni sɛɛnamɔ yɔɔ he.”
^ Loo “koni akɛɛ amɛ nɔ ni amɛtaoɔ amɛnu.”
^ Loo “yaa nɔ oshiɛ sane kpakpa lɛ.”
^ Loo “yinɔ ni yɔɔ amrɔ nɛɛ; shihilɛ gbɛjianɔtoo ni yɔɔ amrɔ nɛɛ.” Kwɛmɔ Wiemɔi Titrii Amligbalamɔ lɛ.
^ Woji kakadaji ni akotaa awoɔ tso he.
^ Ni ji, wolokpoi ni akɛ kooloi ahewoji fee lɛ.
^ Kwɛmɔ Saji Krokomɛi A5 lɛ.
