Bɔfoi Lɛ Anitsumɔi 6:1-15
6 Agbɛnɛ, nakai gbii lɛ amli, be ni kaselɔi lɛ ayi faa lɛ, Yudafoi ni wieɔ Greek lɛ wie amɛshi Yudafoi ni wieɔ Hebri lɛ, ejaakɛ akuɔ hiɛ ashwieɔ amɛyei okulafoi lɛ anɔ yɛ nii ni ajaa daa gbi lɛ mli.+
2 No hewɔ lɛ, Mɛi Nyɔŋma Kɛ Enyɔ lɛ tsɛ kaselɔi lɛ fɛɛ kɛkpe ni amɛkɛɛ: “Ejaaa* akɛ wɔshiɔ Nyɔŋmɔ wiemɔ lɛ ni wɔyajaa niyenii yɛ okpɔlɔi ahe.+
3 No hewɔ lɛ, nyɛmimɛi, nyɛ diɛŋtsɛ nyɛhalaa nyɛteŋ hii kpawo ni yɔɔ gbɛ́i kpakpa,*+ ni mumɔ kɛ hiɛshikamɔ eyi amɛ obɔ,+ koni wɔkɛ amɛ ato nitsumɔ ni he hiaa nɛɛ nɔ;+
4 shi wɔ lɛ, wɔbaahiɛ sɔlemɔ kɛ wiemɔ lɛ he sɔɔmɔ lɛ mli.”
5 Nɔ ni amɛwie lɛ sa kaselɔi lɛ fɛɛ ahiɛ, ni amɛhala Stefano, nuu ko ni hemɔkɛyeli kɛ mumɔ krɔŋkrɔŋ eyi lɛ obɔ lɛ, kɛ Filipo,+ kɛ Prokoro, kɛ Nikanora, kɛ Timon, kɛ Parmena, kɛ Nikolao, mɔ ni jɛ Antiokia ni ebatsɔ Yudanyo lɛ.
6 Amɛkɛ amɛ ba bɔfoi lɛ aŋɔɔ, ni be ni bɔfoi lɛ sɔle amɛgbe naa lɛ, amɛkɛ amɛniji ŋmɛlɛ amɛnɔ.+
7 Ni Nyɔŋmɔ wiemɔ lɛ tee nɔ egbɛ eshwã,+ ni kaselɔi lɛ ayibɔ tee nɔ eku ebɔ he babaoo+ yɛ Yerusalem; ni osɔfoi lɛ ateŋ mɛi babaoo bɔi hemɔkɛyeli lɛ nɔkpɛlɛmɔ.+
8 Agbɛnɛ, Stefano ni Nyɔŋmɔ dromɔ kɛ hewalɛ eyi lɛ obɔ lɛ fee naakpɛɛ nii kɛ okadii wuji yɛ mɛi lɛ ateŋ.
9 Shi hii komɛi ni ji kuu ko ni atsɛɔ lɛ Mɛi Ni Eye Amɛhe Kpeehe lɛ mli bii lɛ kɛ mɛi komɛi ni ji Kirenebii kɛ Aleksandriabii, kɛ mɛi komɛi ni jɛ Kilikia kɛ Asia lɛ ba koni amɛkɛ Stefano abataa naa.
10 Shi amɛnyɛɛɛ hiɛshikamɔ kɛ mumɔ ni ekɛwieɔ lɛ naa amɛdamɔ.+
11 Kɛkɛ ni amɛyawo hii komɛi ayiŋ yɛ teemɔŋ koni amɛkɛɛ akɛ: “Wɔnu ni eewie eeshi Mose kɛ Nyɔŋmɔ.”
12 Ni amɛwo maŋbii lɛ, kɛ onukpai lɛ, kɛ woloŋmalɔi lɛ ayiŋ, ni amɛba enɔ trukaa, ni amɛmɔ lɛ ekãa naa ni amɛkɛ lɛ tee Sanhedrin* lɛ hiɛ.
13 Ni amɛkɛ amale odasefoi ba, ni amɛbakɛɛ akɛ: “Nuu nɛɛ wieɔ eshiɔ he krɔŋkrɔŋ nɛɛ kɛ Mla lɛ ni ekpaaa.
14 Akɛ nɔkwɛmɔnɔ lɛ, wɔnu ni eekɛɛ akɛ nɛkɛ Yesu, Nazaretnyo nɛɛ baakumɔ biɛ nɛɛ eshwie shi ni ebaatsake kusumii ni Mose shi ehã wɔ lɛ.”
15 Ni be ni mɛi ni tara Sanhedrin lɛ mli lɛ kwɛɔ lɛ gãa lɛ, amɛna ehiɛ tamɔ ŋwɛibɔfo hiɛ.
Shishigbɛ Niŋmaa
^ Greek sht. ŋm., “Esaaa.”
^ Loo “hii kpawo ni awieɔ amɛhe ekpakpa.”
^ Sanhedrin lɛ ji Yudafoi asaneyelihe wulu lɛ.
