Daniel 10:1-21
10 Persia maŋtsɛ Koresh+ nɔyeli afi ni ji etɛ lɛ mli lɛ, ajie sane ko kpo atsɔɔ Daniel, mɔ ni atsɛ lɛ Belteshazar+ lɛ; ni sane lɛ yɛ mli anɔkwale, ni ekɔɔ nɔmɔ kpele ko he. Ni enu sane lɛ shishi, ni ahã enu nɔ ni ena lɛ shishi.
2 Yɛ nakai gbii lɛ amli lɛ, mi, Daniel, miye awerɛho+ otsii etɛ sɔŋŋ.
3 Miyeee niyenii kpakpa ko, ni loo ko eyaaa midaaŋ, ni wain hu eyaaa midaaŋ, ni mikpaaa mu otsii etɛ sɔŋŋ.
4 Yɛ gbi ni ji 24 yɛ klɛŋklɛŋ nyɔɔŋ lɛ mli lɛ nɔ, be ni miyɔɔ faa kpele lɛ, ni ji Tigris*+ faa lɛ naa lɛ,
5 Miwó mihiɛ nɔ ni mina nuu ko ni wo klala atade,+ ni ekɛ bɛlti ni akɛ Ufaz shika tsuru fee efi ehɛ.
6 Egbɔmɔtso kpɛlɛɔ tamɔ krisolito tɛ,+ ni ehiɛ kpɛlɛɔ tamɔ sarawa, ni ehiŋmɛii tamɔ latsei ni miitso, eniji kɛ enaji tamɔ akɔɔble ni asha he ni kpɛlɛɔ kaŋkaŋ,+ ni ewiemɔi gbɛɔ tamɔ mɛi babaoo agbee.
7 Mi, Daniel, mi pɛ mina ninaa lɛ; hii ni fata mihe lɛ enaaa ninaa lɛ.+ Shi amɛshe gbeyei waa ni amɛjo foi amɛyatee.
8 Kɛkɛ ni eshwɛ mikome pɛ, ni be ni mina ninaa kpele nɛɛ, hewalɛ ko eshwɛɛɛ yɛ mimli, ni mihe fɛo tã, ni mihewalɛ fɛɛ tã.+
9 Kɛkɛ ni minu egbee be ni ewieɔ lɛ; shi be ni minu ehe be ni ewieɔ lɛ, mikɛ mihiɛ bu shi ni miwɔ vii.+
10 Shi nɔŋŋ kɛkɛ ni nine ko ta mihe,+ ni etsirɛ mi koni mite shi yɛ miniji kɛ minakutsei anɔ.
11 Kɛkɛ ni ekɛɛ mi akɛ:
“Ao Daniel, nuu ni ashwɛɛɛ ohe kwraa,*+ bo wiemɔi ni mikɛ bo baawie lɛ toi jogbaŋŋ. Agbɛnɛ tee shi odamɔ shi yɛ he ni oyɔɔ lɛ, ejaakɛ atsu mi kɛba oŋɔɔ.”
Be ni ekɛɛ mi enɛ lɛ, mite shi midamɔ shi ni miikpokpo.
12 Kɛkɛ ni ekɛɛ mi akɛ: “Ao, Daniel, kaashe gbeyei,+ anu owiemɔi lɛ kɛjɛ klɛŋklɛŋ gbi ni okɛ otsui hã koni onu nii ashishi ni oba ohe shi yɛ o-Nyɔŋmɔ lɛ hiɛ lɛ nɔ, ni miba yɛ owiemɔi lɛ ahewɔ.+
13 Shi Persia nɔyeli lɛ nɔ lumɔ+ lɛ tsĩ mi gbɛ gbii 21. Shi Mikael,*+ lumɛi wuji* lɛ ateŋ mɔ kome ba ni ebaye ebua mi; ni mihi jɛmɛ yɛ Persia maŋtsɛmɛi lɛ amasɛi.
14 Miba koni mibahã onu nɔ ni baaba omaŋbii lɛ anɔ yɛ gbii lɛ anaagbee lɛ mli,+ ejaakɛ eji ninaa kɛhã gbii ni baaba lɛ.”+
15 Agbɛnɛ, be ni ekɛ mi wie wiemɔi nɛɛ, mikɛ mihiɛ bu shi ni minyɛɛɛ mawie.
16 Kɛkɛ ni mɔ ko ni tamɔ gbɔmɔ ta minaabu he,+ ni migbɛ midaaŋ ni mikɛɛ mɔ ni damɔ mihiɛ lɛ akɛ: “Minuŋtsɔ, miikpokpo yɛ ninaa lɛ hewɔ, ni mihewalɛ etã.+
17 No hewɔ lɛ, te aaafee tɛŋŋ ni minuŋtsɔ tsulɔ kɛ minuŋtsɔ aaawie lɛ?+ Ejaakɛ mihewalɛ etã, ni mumɔ ni amuɔ ko kwraa bɛ mimli.”+
18 Mɔ ni tamɔ gbɔmɔ lɛ ta mihe ekoŋŋ ni ewo mi hewalɛ.+
19 Kɛkɛ ni ekɛɛ mi akɛ: “Bo nuu ni ashwɛɛɛ ohe kwraa,+ kaashe gbeyei.+ Toiŋjɔlɛ ahã bo.+ Ohe awa, hɛɛ, ohe awa.” Be ni ekɛ mi wieɔ lɛ, miná hewalɛ ni mikɛɛ akɛ: “Minuŋtsɔ awie, ejaakɛ owo mi hewalɛ.”
20 Kɛkɛ ni ekɛɛ: “Ani ole nɔ hewɔ ni miba oŋɔɔ nɛɛ? Agbɛnɛ maku misɛɛ maya ni mikɛ Persia lumɔ lɛ ayanɔ.+ Kɛ́ mishi lɛ, Grees lumɔ lɛ baaba.
21 Shi makɛɛ bo nibii ni aŋma yɛ anɔkwale niŋmai lɛ amli lɛ. Mɔ ko mɔ ko bɛ ni yeɔ ebuaa mi waa yɛ nibii nɛɛ amli fe Mikael,+ nyɛlumɔ lɛ.+
Shishigbɛ Niŋmaa
^ Hebri sht. ŋm., “Hidekel.”
^ Loo “mɔ ko ni asumɔɔ esane waa; mɔ ko ni abuɔ waa.”
^ Loo “lumɛi onukpai.”
^ Eshishi ji, “Namɔ Tamɔ Nyɔŋmɔ?”
