Ezekiel 34:1-31
34 Yehowa kɛɛ mi ekoŋŋ akɛ:
2 “Gbɔmɔ bi,* gbaa oshi Israel tookwɛlɔi lɛ. Gbaa ni okɛɛ tookwɛlɔi lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Kpoo hã Israel tookwɛlɔi lɛ,+ mɛi ni lɛɔ amɛhe lɛ! Ani jeee tooku lɛ moŋ esa akɛ tookwɛlɔi lɛ alɛ?+
3 Nyɛyeɔ fɔ lɛ, ni nyɛkɛ too hetsɔi lɛ haa nyɛhe, ni nyɛgbeɔ kooloi lɛ ateŋ nɔ ni eshwi fe fɛɛ lɛ,+ shi nyɛlɛɛɛ tooku lɛ.+
4 Nyɛwajeee nɔ ni egbɔjɔ lɛ, ni nɔ ni bɛ hewalɛ lɛ hu nyɛtsaaa lɛ, ni nɔ ni epila lɛ hu, nyɛfimɔɔɔ epilamɔ lɛ nɔ, ni nyɛkɛ nɔ ni edu gbɛ lɛ hu ekuuu sɛɛ kɛbaaa, ni nɔ ni elaaje lɛ hu, nyɛyataooo;+ shi moŋ, nyɛye amɛnɔ kɛ yitsoŋwalɛ ni nyɛwa amɛ yi.+
5 No hewɔ lɛ, amɛgbɛ amɛshwã ejaakɛ tookwɛlɔ ko bɛ;+ amɛgbɛ amɛshwã ni amɛtsɔ niyenii amɛhã ŋa mli kooloi fɛɛ.
6 Migwantɛŋi lɛ du gbɛ kɛyanyiɛ gɔŋ fɛɛ gɔŋ kɛ gɔŋkpɔ fɛɛ gɔŋkpɔ nɔ; migwantɛŋi lɛ gbɛ amɛshwã shikpɔŋ lɛ nɔ fɛɛ, ni mɔ ko mɔ ko bɛ ni taoɔ amɛsɛɛ gbɛ loo ediɔ amɛsɛɛ.
7 “‘“No hewɔ lɛ, nyɛ tookwɛlɔi, nyɛboa Yehowa wiemɔ toi:
8 ‘“Gbii abɔ ni mihiɛ kã nɛɛ,” Nuŋtsɔ Ofe Yehowa kɛɛ, “akɛni migwantɛŋi lɛ etsɔ loo, ni ji niyenii amɛhã ŋa mli kooloi fɛɛ, yɛ tookwɛlɔi ni bɛ lɛ hewɔ, ni mitookwɛlɔi lɛ hu taooo amɛsɛɛ gbɛ; shi moŋ, amɛyaa nɔ amɛlɛɔ amɛ diɛŋtsɛ amɛhe, ni amɛlɛɛɛ migwantɛŋi lɛ hewɔ lɛ,”’
9 nyɛ tookwɛlɔi, nyɛboa Yehowa wiemɔ toi.
10 Nɔ ni Nuŋtsɔ Ofe Yehowa kɛɛ nɛ: ‘Mikɛ tookwɛlɔi lɛ ená, ni mabi migwantɛŋi lɛ ashi yɛ amɛdɛŋ, ni mihãŋ amɛlɛ* migwantɛŋi lɛ dɔŋŋ,+ ni tookwɛlɔi lɛ elɛŋ amɛ diɛŋtsɛ amɛhe dɔŋŋ. Majie migwantɛŋi lɛ yɛ amɛdaaŋ, ni amɛtsɔŋ niyenii kɛhãŋ amɛ dɔŋŋ.’”
11 “‘Ejaakɛ nɔ ni Nuŋtsɔ Ofe Yehowa kɛɛ nɛ: “Naa mi, mi diɛŋtsɛ matao migwantɛŋi lɛ, ni makwɛ amɛnɔ.+
12 Makwɛ migwantɛŋi lɛ anɔ tamɔ tookwɛlɔ ni ena egwantɛŋi ni egbɛ eshwã ni eelɛ amɛ.+ Majie amɛ kɛjɛ hei fɛɛ ni amɛgbɛ amɛshwã yɛ atatu kɛ duŋ kpii gbi nɔ lɛ.+
13 Majie amɛ kɛje majimaji lɛ ateŋ, ni mabua amɛnaa kɛje shikpɔji lɛ anɔ ni mikɛ amɛ baaba amɛshikpɔŋ lɛ nɔ, ni malɛ amɛ yɛ Israel gɔji lɛ anɔ,+ yɛ fai lɛ ahe kɛ hei fɛɛ ni ahiɔ yɛ shikpɔŋ lɛ nɔ lɛ.
14 Malɛ amɛ yɛ lɛɛhe kpakpa, ni Israel gɔji lɛ anɔ ji shikpɔŋ lɛ nɔ he ni amɛbaaye nii yɛ.+ Amɛbaabumɔ shi yɛ jɛmɛ yɛ lɛɛhe kpakpa,+ ni amɛbaaye nii yɛ lɛɛhei kpakpai yɛ Israel gɔji lɛ anɔ.”
15 “‘“Mi diɛŋtsɛ malɛ amɛ,+ ni mi diɛŋtsɛ mahã amɛbumɔ shi,”+ Nuŋtsɔ Ofe Yehowa kɛɛ.
16 “Nɔ ni elaaje lɛ, mayatao,+ ni nɔ ni edu gbɛ lɛ, mayamɔ lɛ kɛba, nɔ ni epila lɛ, mafi epilamɔ lɛ nɔ, ni nɔ ni egbɔjɔ lɛ, mawaje lɛ; shi nɔ ni eshwi kɛ nɔ ni yɔɔ hewalɛ lɛ, makpãtã amɛhiɛ. Malɛ amɛ kɛ kojomɔ.”
17 “‘Shi nyɛ, migwantɛŋi, nɔ ni Nuŋtsɔ Ofe Yehowa kɛɛ nɛ: “Miiba mibakojo gwantɛŋ kɛ gwantɛŋ teŋ, gwantɛŋhii kɛ abotiahii ateŋ.+
18 Ani lɛɛhei kpakpai ni nyɛyeɔ nii yɛ lɛ esaaa nyɛhiɛ lo? Ani esa akɛ nyɛkɛ nyɛnaji anaanaa nyɛlɛɛhei ni eshwɛ lɛ hu anɔ? Ni be ni nyɛnu nu ni mli tse lɛ nyɛgbe naa lɛ, ani esa akɛ nyɛkɛ nyɛnaji anaanaa nu lɛ mli kɛwo mli muji?
19 Ani esa akɛ migwantɛŋi lɛ aye nii yɛ lɛɛhe ni nyɛkɛ nyɛnaji enaanaa nɔ lɛ, ni amɛnu nu ni nyɛkɛ nyɛnaji enaanaa mli kɛwo mli muji lɛ?”
20 “‘No hewɔ lɛ, nɔ ni Nuŋtsɔ Ofe Yehowa kɛɔ amɛ nɛ: “Naa mi, mi diɛŋtsɛ makojo gwantɛŋ ni eshwi kɛ gwantɛŋ ni etã loo teŋ,
21 ejaakɛ nyɛkɛ nyɛŋmawui kɛ nyɛkɔɔji tsiɔ mɛi ni bɛ hewalɛ lɛ, ni nyɛkɛ nyɛkolontoi shilɛɔ amɛ aahu kɛyashiɔ nyɛgbɛɔ amɛ nyɛshwãa kɛyaa shɔŋŋ.
22 Ni mahere migwantɛŋi lɛ ni amɛtsɔŋ loo amɛhãŋ nyɛ dɔŋŋ;+ ni makojo gwantɛŋ kɛ gwantɛŋ teŋ.
23 Mawó tookwɛlɔ kome mato amɛnɔ,+ mitsulɔ David,+ ni ebaalɛ amɛ. Lɛ diɛŋtsɛ ebaalɛ amɛ ni ebaakwɛ amɛ akɛ tookwɛlɔ.+
24 Ni mi, Yehowa, matsɔ amɛ-Nyɔŋmɔ,+ ni mitsulɔ David baatsɔ lumɔ yɛ amɛteŋ.+ Mi, Yehowa, mi diɛŋtsɛ miwie.
25 “‘“Ni mikɛ amɛ baakpaŋ toiŋjɔlɛ kpaŋmɔ,+ ni majie ŋa mli kooloi awuiyelɔi kɛje shikpɔŋ lɛ nɔ,+ koni amɛhi shi yɛ ŋa lɛ nɔ ni efɔŋ ko ninaaa amɛ, ni amɛwɔ yɛ koi lɛ amli.+
26 Mahã amɛ kɛ he ni yɔɔ migɔŋkpɔ lɛ he lɛ atsɔ jɔɔmɔ,+ ni mahã nugbɔ anɛ yɛ be ni sa mli. Jɔɔmɔi baanɛ ashwie shi tamɔ nugbɔ.+
27 Ŋa nɔ tsei lɛ baawo yibii, ni sũ lɛ baaba nii,+ ni amɛbaahi shi yɛ shikpɔŋ lɛ nɔ ni efɔŋ ko ninaaa amɛ. Ni kɛ́ mikumɔ amɛkɔɔŋtsei lɛ ni mijie amɛ kɛje mɛi ni yeɔ amɛ nyɔŋ lɛ adɛŋ lɛ, amɛbaaná amɛle akɛ miji Yehowa.+
28 Amɛtsɔŋ loo amɛhãŋ jeŋmaji lɛ dɔŋŋ, ni shikpɔŋ lɛ nɔ ŋa mli kooloi lɛ yeŋ amɛ, ni amɛbaahi shi ni efɔŋ ko ninaaa amɛ, ni mɔ ko mɔ ko woŋ amɛhe gbeyei.+
29 “‘“Mafee ŋmɔ ni baahe gbɛ́i* mahã amɛ, ni hɔmɔ egbeŋ amɛ yɛ shikpɔŋ lɛ nɔ dɔŋŋ,+ ni jeŋmaji lɛ eshwieŋ amɛhiɛ shi dɔŋŋ.+
30 ‘Kɛkɛ lɛ, amɛbaaná amɛle akɛ mi, Yehowa, amɛ-Nyɔŋmɔ lɛ, mikɛ amɛ yɛ, ni amɛ, Israel shĩa lɛ, amɛji mimaŋ,’+ Nuŋtsɔ Ofe Yehowa kɛɛ.”’
31 “‘Ni nyɛ, migwantɛŋi,+ gwantɛŋi ni mikwɛɔ, gbɔmɛi ji nyɛ, ni miji nyɛ-Nyɔŋmɔ,’ Nuŋtsɔ Ofe Yehowa kɛɛ.”
