Ezra 7:1-28
7 Nibii nɛɛ asɛɛ, yɛ Persia maŋtsɛ Artashasta nɔyeli beiaŋ lɛ,+ Ezra*+ ku esɛɛ kɛba. Epapa ji Seraia,+ ni Seraia hu papa ji Azaria, ni Azaria hu papa ji Hilkia,+
2 Hilkia hu papa ji Shalum, ni Shalum hu papa ji Zadok, ni Zadok hu papa ji Ahitub,
3 ni Ahitub hu papa ji Amaria, ni Amaria hu papa ji Azaria,+ ni Azaria hu papa ji Meraiot,
4 ni Meraiot hu papa ji Zerahia, ni Zerahia hu papa ji Uzi, ni Uzi hu papa ji Buki,
5 ni Buki hu papa ji Abishua, ni Abishua hu papa ji Finehas,+ ni Finehas hu papa ji Eleazar,+ ni Eleazar hu papa ji Aaron,+ osɔfonukpa lɛ.
6 Ezra nɛɛ kwɔ kɛjɛ Babilon kɛba. Eji woloŋmalɔ ni le Mose Mla+ ni Yehowa, Israel Nyɔŋmɔ lɛ kɛhã Israelbii lɛ mli jogbaŋŋ.* Maŋtsɛ lɛ fee nɔ fɛɛ nɔ ni Ezra taoɔ lɛ ehã lɛ, ejaakɛ Yehowa, e-Nyɔŋmɔ lɛ nine yɛ enɔ.
7 Yɛ Maŋtsɛ Artashasta nɔyeli afi ni ji kpawo lɛ mli lɛ, Israelbii lɛ, kɛ osɔfoi lɛ, kɛ Levibii+ lɛ, kɛ lalɔi+ lɛ, kɛ agbonaakwɛlɔi+ lɛ, kɛ sɔlemɔ shĩa sɔɔlɔi*+ lɛ ekomɛi kwɔ kɛtee Yerusalem.
8 Ni Ezra ba Yerusalem yɛ nyɔɔŋ ni ji enumɔ lɛ mli, yɛ maŋtsɛ lɛ nɔyeli afi ni ji kpawo lɛ mli.
9 Eshi Babilon yɛ klɛŋklɛŋ nyɔɔŋ lɛ nɔ klɛŋklɛŋ gbi lɛ nɔ, ni ebashɛ Yerusalem yɛ nyɔɔŋ ni ji enumɔ lɛ nɔ klɛŋklɛŋ gbi lɛ nɔ, ejaakɛ e-Nyɔŋmɔ lɛ nine ni hi lɛ yɛ enɔ.+
10 No mli lɛ, Ezra esaa etsui akɛ* ebaakase Yehowa Mla lɛ, ni ekɛtsu nii,+ ni etsɔɔ mɛi taomɔ nii kɛ kojomɔi ni yɔɔ mli lɛ yɛ Israel.+
11 Wolo ni Maŋtsɛ Artashasta ŋma ni ekɛhã osɔfo Ezra, ni ji woloŋmalɔ, ni kaseɔ Yehowa kitãi kɛ etaomɔ nii ni ekɛhã Israel lɛ jogbaŋŋ* lɛ mli sane nɛ:
12 * “Artashasta,+ maŋtsɛmɛi amaŋtsɛ lɛ, ŋma kɛhã osɔfo Ezra, ni ji ŋwɛi Nyɔŋmɔ lɛ Mla lɛ woloŋmalɔ lɛ: Toiŋjɔlɛ babaoo ahã bo. Ni naa,
13 miiwo kitã akɛ, mɔ fɛɛ mɔ ni yɔɔ mimaŋtsɛyeli lɛ mli ni ji Israelnyo kɛ Israel osɔfoi lɛ kɛ Levibii lɛ ateŋ mɛi ni miisumɔ ni amɛfata ohe kɛya Yerusalem lɛ aya.+
14 Ejaakɛ maŋtsɛ lɛ kɛ eŋaawolɔi kpawo lɛ etsu bo koni oyakwɛ akɛ, akɛ o-Nyɔŋmɔ lɛ Mla lɛ ni yɔɔ odɛŋ lɛ miitsu nii yɛ Yuda kɛ Yerusalem lo,
15 koni agbɛnɛ hu, oŋɔ jwiɛtɛi kɛ shika tsuru ni maŋtsɛ lɛ kɛ eŋaawolɔi lɛ ejɛ amɛsuɔmɔ mli amɛkɛhã Israel Nyɔŋmɔ lɛ ni shĩa yɔɔ Yerusalem lɛ,
16 kɛ jwiɛtɛi kɛ shika tsuru fɛɛ ni onine shɛ nɔ* yɛ Babilon kpokpaa lɛ nɔ fɛɛ lɛ, kɛ nikeenii ni maŋbii lɛ kɛ osɔfoi lɛ jɛ amɛsuɔmɔ mli amɛkɛhã yɛ amɛ-Nyɔŋmɔ lɛ shĩa ni yɔɔ Yerusalem lɛ hewɔ lɛ kɛya.+
17 Ni okɛ shika nɛɛ ahé tsinahii,+ kɛ gwantɛŋhii,+ kɛ gwantɛŋbii,+ kɛ amɛhe ŋmaa* afɔlei+ lɛ kɛ amɛhe dãa afɔlei+ lɛ amrɔ nɔŋŋ, ni okɛyashã afɔle yɛ nyɛ-Nyɔŋmɔ lɛ shĩa lɛ afɔleshaa latɛ ni yɔɔ Yerusalem lɛ nɔ.
18 “Ni nɔ fɛɛ nɔ ni sa bo kɛ onyɛmimɛi lɛ ahiɛ akɛ nyɛfee yɛ nyɛ-Nyɔŋmɔ lɛ suɔmɔ naa lɛ, nyɛbaanyɛ nyɛkɛ jwiɛtɛi kɛ shika tsuru ni baashwɛ lɛ afee.
19 Ni nibii fɛɛ ni akɛhã bo kɛhã sɔɔmɔ yɛ nyɛ-Nyɔŋmɔ lɛ shĩa lɛ, kɛyashwie nyɛ-Nyɔŋmɔ lɛ hiɛ yɛ Yerusalem.+
20 Ni nibii krokomɛi fɛɛ ni he baahia akɛ okɛhã ni akɛtsu nii yɛ nyɛ-Nyɔŋmɔ lɛ shĩa lɛ, jɛɛ maŋtsɛ jwetritoohe lɛ mli okɛhã.+
21 “Mi, Maŋtsɛ Artashasta, miiwo kitã akɛ, jwetri nɔkwɛlɔi fɛɛ ni yɔɔ kpokpaa ni yɔɔ Faa Lɛ Sɛɛ* lɛ nɔ lɛ kɛ nɔ fɛɛ nɔ ni osɔfo Ezra,+ ŋwɛi Nyɔŋmɔ lɛ Mla lɛ woloŋmalɔ lɛ baabi yɛ amɛdɛŋ lɛ ahã lɛ amrɔ nɔŋŋ,
22 kɛyashi jwiɛtɛi talɛntai* 100, kɛ wiiti kor* susumɔnii 100, kɛ wain bat* susumɔnii 100,+ kɛ mu bat susumɔnii 100,+ kɛ ŋoo+ babaoo ni anyɛɛɛ naa abu.
23 Nɔ fɛɛ nɔ ni ŋwɛi Nyɔŋmɔ lɛ efã yɛ eshĩa lɛ hewɔ lɛ, atsu he nii kɛ hiɛdɔɔ koni ŋwɛi Nyɔŋmɔ+ lɛ mli akafu maŋtsɛ lɛ shishibii lɛ kɛ maŋtsɛ lɛ bii lɛ.+
24 Ni miihã nyɛle hu akɛ, nyɛkahea too, loo jatsu too,+ loo gbɛjegbɛ too yɛ osɔfoi lɛ, kɛ Levibii lɛ, kɛ lalatsɛmɛi+ lɛ, kɛ agbonaakwɛlɔi lɛ, kɛ sɔlemɔ shĩa sɔɔlɔi*+ lɛ, kɛ Nyɔŋmɔ shĩa nɛɛ he nitsulɔi lɛ ateŋ mɔ ko mɔ ko dɛŋ.
25 “Ni bo, Ezra, jɛɛ hiɛshikamɔ ni o-Nyɔŋmɔ lɛ ehã oná lɛ mli ohala* saneyelɔi kɛ kojolɔi koni amɛkojo mɛi fɛɛ ni yɔɔ kpokpaa ni yɔɔ Faa Lɛ Sɛɛ lɛ nɔ lɛ, mɛi fɛɛ ni le o-Nyɔŋmɔ lɛ mlai lɛ; ni otsɔɔ mɔ fɛɛ mɔ ni leee mlai nɛɛ.+
26 Ni mɔ fɛɛ mɔ ni yeee o-Nyɔŋmɔ lɛ Mla lɛ kɛ maŋtsɛ lɛ mla lɛ nɔ lɛ, akojo lɛ ni akɛ toigbalamɔ ni sa lɛ lɛ ahã lɛ amrɔ nɔŋŋ, kɛ́ ebiɔ ni agbe lɛ jio, ashwie lɛ kɛje maŋ lɛ mli jio, ahã ewo shika pɔtɛɛ ko jio, awo lɛ tsuŋ jio.”
27 Ajie Yehowa, wɔtsɛmɛi a-Nyɔŋmɔ lɛ yi, mɔ ni kɛ nɛkɛ nɔ ko ewo maŋtsɛ lɛ tsui mli koni ewula Yehowa shĩa ni yɔɔ Yerusalem lɛ fɛfɛo lɛ!+
28 Ni ejie suɔmɔ ni tsakeee kpo etsɔɔ mi yɛ maŋtsɛ lɛ kɛ eŋaawolɔi+ lɛ, kɛ maŋtsɛ lɛ lumɛi wuji lɛ ahiɛ.+ No hewɔ lɛ, mifee ekãa* ejaakɛ Yehowa, mi-Nyɔŋmɔ lɛ nine yɛ minɔ, ni mibua Israel onukpai* lɛ anaa koni amɛkɛ mi akwɔ kɛya.
Shishigbɛ Niŋmaa
^ Eshishi ji, “Yelikɛbuamɔ.”
^ Loo “Eji Mose Mla ni Yehowa, Israel Nyɔŋmɔ lɛ kɛhã lɛ woloŋmalɔ ni he esa jogbaŋŋ.”
^ Loo “Netinim.” Hebri sht. ŋm., “mɛi ni akɛhã.”
^ Loo “ekpɛ mli yɛ etsui mli akɛ.”
^ Loo “ni ji woloŋmalɔ, Yehowa kitãi kɛ emlai ni ekɛhã Israel lɛ woloŋmalɔ.”
^ Aŋma Ezr 7:12 kɛyashi 7:26 lɛ yɛ Aramaik mli klɛŋklɛŋ.
^ Aramaik sht. ŋm., “ni oná.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “Yufrate Faa Lɛ Sɛɛ.”
^ Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
^ Kor kome feɔ litai 220 (kwat 200). Kwɛmɔ Saji Krokomɛi B14 lɛ.
^ Bat kome feɔ litai 22 (galɔn 5.81). Kwɛmɔ Saji Krokomɛi B14 lɛ.
^ Loo “Netinim.” Hebri sht. ŋm., “mɛi ni akɛhã.”
^ Aramaik sht. ŋm., “Ezra, yɛ o-Nyɔŋmɔ lɛ hiɛshikamɔ ni yɔɔ odɛŋ lɛ naa lɛ, halamɔ.”
^ Loo “miwaje mihe.”
^ Hebri sht. ŋm., “yitsei.”
