Lalai 22:1-31
Kɛhã lalatsɔɔlɔ lɛ; akɛfɔ̃ “Leebi Maŋkpa Adowa Yoo Lɛ.”* Lala ni David fo.
22 Mi-Nyɔŋmɔ, mi-Nyɔŋmɔ, mɛni hewɔ okwa mi?+
Mɛni hewɔ okɛ miyiwalaheremɔ teŋ ejekɛ,Ni okɛ bolɔmɔi ni mibolɔɔ yɛ mitsuiaŋ dɔlɛ lɛ hewɔ lɛ teŋ ejekɛ nɛkɛ?+
2 Mi-Nyɔŋmɔ, miyaa nɔ mibolɔɔ mitsɛɔ bo jetsɛremɔ fɛɛ, shi ohereee mi nɔ;+Ni nyɔɔŋ hu lɛ, mifeee diŋŋ.
3 Shi oyɛ krɔŋkrɔŋ,+Israel yijiemɔ lɛ ebɔle bo.*
4 Bo onɔ wɔtsɛmɛi lɛ kɛ amɛhiɛ fɔ̃;+Amɛkɛ amɛhiɛ fɔ̃ onɔ, ni otee nɔ ojie amɛ.+
5 Bo amɛbolɔ amɛtsɛ, ni ohere amɛ;Amɛkɛ amɛhiɛ fɔ̃ onɔ; ni amɛhiɛ gboiii.*+
6 Shi mi lɛ, gɔgɔmi kɛkɛ ji mi, ni mijeee gbɔmɔ,Gbɔmɛi nyaŋeɔ mi* ni amɛkɛ mi efeee nɔ ko.+
7 Mɛi ni naa mi lɛ fɛɛ yeɔ mihe fɛo;+Amɛtswaa amɛdaaŋ ni amɛhosoɔ amɛyitso amɛkɛɔ akɛ:+
8 “Ekɛ ehiɛ efɔ̃ Yehowa nɔ. Hã Nyɔŋmɔ ajie lɛ!
Hã Nyɔŋmɔ ajie lɛ, ejaakɛ Nyɔŋmɔ shwɛɛɛ ehe!”+
9 Bo ji mɔ ni jie mi kɛje musu mli,+Mɔ ni bu mihe be ni mikã minyɛ fufɔi anaa lɛ.
10 Mifɔmɔ mli beebe akɛ mi wo odɛŋ;*Bo ji mi-Nyɔŋmɔ kɛjɛ minyɛ musuŋ tɔ̃ɔ.
11 Okɛ mi teŋ akajekɛ, ejaakɛ sane fɔŋ ebɛŋkɛ mi+Ni mibɛ yelikɛbualɔ ko yɛ osɛɛ.+
12 Tsinahii* babaoo bɔle mi;+Bashan tsinahii ni he wala lɛ bɔle mi.+
13 Amɛgbɛɔ amɛdaaŋ hatoo amɛwoɔ mi,+Tamɔ jata ni miihũu ni tserɛɔ kooloo ni emɔ lɛ mli.+
14 Atsi mi ashwie tamɔ nu;Miwui lɛ fɛɛ eje amɛtalɔi lɛ anɔ.
Mitsui etsɔ tamɔ wo agbaku;*+Esereɔ yɛ mimli tɔ̃ɔ.+
15 Mihewalɛ egbi tamɔ sũ nii koikoi;+Mililɛi ekpɛtɛ midaaŋ;+Okɛ mi miikpeleke shi kɛmiiya gbele mulu mli.+
16 Ejaakɛ gbei ebɔle mi;+Amɛke kɛba minɔ tamɔ efɔŋfeelɔi akuu,+Amɛyɛ miniji kɛ minaji ahe tamɔ jata.+
17 Manyɛ makane miwui lɛ fɛɛ.+
Amɛtsu amɛhiŋmɛi amɛshwie minɔ, ni amɛmiikwɛ mi gãa.
18 Amɛjara mitadei lɛ amli amɛhã amɛhe,Ni amɛfɔ̃ mitade lɛ nɔ oshiki.+
19 Shi bo, Yehowa, kaahi sɛɛ shɔŋŋ.+
Bo ji mihewalɛ; feemɔ oya ni obaye obua mi.+
20 Heremɔ mi* kɛje klante lɛ naa,Heremɔ miwala ni jara wa* lɛ kɛje gbei lɛ adɛŋ;+
21 Heremɔ mi kɛje jata+ lɛ daaŋ kɛ ŋaŋ tsinahii lɛ akolontoi lɛ amli;Bo mi toi ni ohere mi.
22 Majaje ogbɛ́i lɛ matsɔɔ minyɛmimɛi* lɛ;+Majie oyi yɛ asafo lɛ teŋ.+
23 Nyɛ mɛi ni nyɛsheɔ Yehowa gbeyei, nyɛjiea eyi!
Nyɛ Yakob seshibii* lɛ fɛɛ, nyɛwoa ehiɛ nyam!+
Nyɛ Israel seshibii* lɛ fɛɛ, nyɛtea shi ni nyɛkɛ woo ahãa lɛ.
24 Ejaakɛ enyaŋeko mɔ ni awaa lɛ yi lɛ nɔnaa lɛ, ni ekuko ehiɛ efɔ̃ko nɔ hu;+Ekɛ ehiɛ eteko lɛ.+
Be ni ebo etsɛ lɛ koni eye ebua lɛ lɛ, enu.+
25 Majie oyi yɛ asafo babaoo lɛ teŋ;+Maye mishiwoi lɛ anɔ yɛ mɛi ni sheɔ lɛ gbeyei lɛ ahiɛ.
26 Mɛi ni he jɔ* lɛ baaye nii ni amɛbaatɔrɔ;+Mɛi ni taoɔ Yehowa sɛɛ gbɛ lɛ baajie eyi.+
Nyɛhia shi kɛyaa naanɔ yɛ miishɛɛ mli.*
27 Shikpɔŋ lɛ naagbeehei lɛ fɛɛ baakai, ni amɛbaatsɔ amɛhe kɛya Yehowa ŋɔɔ.
Jeŋmaji lɛ awekui lɛ fɛɛ baakoto shi yɛ ohiɛ.+
28 Ejaakɛ maŋtsɛyeli lɛ, Yehowa nɔ ni;+Lɛ eyeɔ jeŋmaji lɛ anɔ.
29 Shikpɔŋ lɛ nɔ gbɔmɛi wuji* lɛ fɛɛ baaye nii, ni amɛbaakoto shi;Mɛi fɛɛ ni kpelekeɔ shi kɛyaa sũ* mli lɛ baabakula shi yɛ ehiɛ;Amɛteŋ mɔ ko mɔ ko nyɛŋ ebaa ewala* yi.
30 Amɛseshibii* lɛ baasɔmɔ lɛ;Abaagba yinɔ ni baaba lɛ Yehowa he sane.
31 Amɛbaaba ni amɛbawie ejalɛ lɛ he.
Amɛbaakɛɛ mɛi ni anáko afɔ amɛ lɛ nɔ ni efee.
Shishigbɛ Niŋmaa
^ Eeenyɛ efee akɛ, eji gbee ko loo gbɛ ko ni atsɔɔ nɔ aláa.
^ Loo “Otaa Israel yijiemɔ lɛ mli; Otaa Israel yijiemɔ lɛ yiteŋ.”
^ Loo “ni owooo amɛ hiɛgbele.”
^ Loo “Gbɔmɛi bɔɔ mi ahora.”
^ Hebri sht. ŋm., “ashɛ mi afɔ̃ onɔ.”
^ Loo “Tsina oblahii.”
^ Eeenyɛ efee akɛ, aawie nɔ ko ni wobii feɔ ni amɛkɛ wo toɔ mli ni nyɛɔ esereɔ lɛ he.
^ Hebri sht. ŋm., “minɔ kome too,” eewie esusuma, loo ewala he.
^ Loo “misusuma.”
^ Loo “minyɛmimɛi hii.”
^ Hebri sht. ŋm., “dumɔwu.”
^ Hebri sht. ŋm., “dumɔwu.”
^ Loo “Heshibalɔi.”
^ Loo “Nyɛyi anáa wala kɛyaa naanɔ.” Hebri sht. ŋm., “Nyɛtsui ahia shi kɛyaa naanɔ.”
^ Hebri sht. ŋm., “gbɔmɛi ni ewo fɔ.”
^ Hebri sht. ŋm., “mulu.”
^ Loo “esusuma.”
^ Hebri sht. ŋm., “Amɛdumɔwu.”
