Lalai 89:1-52
Maskil.* Etan,+ Ezrahinyo lɛ nɔ.
89 Malá nibii ni Yehowa efee kɛjie suɔmɔ ni tsakeee kpo lɛ ahe lala kɛya naanɔ.
Mikɛ minaabu baahã mɛi ale onɔkwayeli lɛ kɛya yinɔi fɛɛ amli.
2 Ejaakɛ mikɛɛ akɛ: “Abaatswa suɔmɔ ni tsakeee ama shi* kɛya naanɔ,+Ni otswa onɔkwayeli lɛ oma shi shiŋŋ yɛ ŋwɛi.”
3 “Mikɛ mɔ ni mihala lɛ efee kpaŋmɔ;+Mikã mitsulɔ David kitã akɛ:+
4 ‘Mahã oseshi*+ lɛ adamɔ shi shiŋŋ kɛya naanɔ,Ni matswa omaŋtsɛ sɛi lɛ mama shi kɛya yinɔi fɛɛ amli.’”+ (Sela)
5 Ao Yehowa, ŋwɛi jieɔ onaakpɛɛ nii lɛ ayi,Lɛɛlɛŋ, onɔkwayeli lɛ hu yɛ mɛi krɔŋkrɔŋi lɛ asafo lɛ mli.
6 Namɔ yɔɔ ŋwɛiniiaŋ* ni abaanyɛ akɛ lɛ ato Yehowa he?+
Nyɔŋmɔ bii*+ lɛ ateŋ namɔ tamɔ Yehowa?
7 Asheɔ Nyɔŋmɔ gbeyei yɛ mɛi krɔŋkrɔŋi lɛ ahenaabuamɔ* lɛ mli;+Eje agbo ni ehe yɛ gbeyei yɛ mɛi fɛɛ ni ebɔle lɛ lɛ ahiɛ.+
8 Ao Yehowa Nyɔŋmɔ, taiatsɛ,Ao Yah, namɔ yɔɔ hewalɛ tamɔ bo?+
Onɔkwayeli lɛ ebɔle bo kɛkpe.+
9 Bo oyeɔ ŋshɔ ni efee hamahama lɛ nɔ;+Kɛ́ ŋshɔkei lɛ wó amɛhe nɔ lɛ, bo ojɔɔ amɛhe.+
10 Bo okumɔ Rahab+ tamɔ mɔ ko ni agbe lɛ.+
Okɛ onineshiwalɛ lɛ gbɛ ohenyɛlɔi lɛ oshwã.+
11 Ŋwɛi lɛ onɔ ni, ni shikpɔŋ lɛ hu onɔ ni;+Shikpɔŋ lɛ kɛ enɔ nibii lɛ fɛɛ lɛ,+ bo oto amɛshishi.
12 Kooyi kɛ wuoyi fɛɛ lɛ, bo obɔ amɛ;Tabor+ kɛ Hermon+ kɛ miishɛɛ jieɔ ogbɛ́i lɛ yi.
13 Onineshi wa;+Okɔɔjiaŋ wa;+Awó oninejurɔ nɔ gojoo.+
14 Jalɛ nifeemɔ kɛ jalɛsaneyeli akɛto omaŋtsɛ sɛi lɛ shishi;+Suɔmɔ ni tsakeee kɛ anɔkwayeli damɔ ohiɛ.+
15 Mɛi ni le nyamɔ lala lɛ yɛ miishɛɛ.+
Ao Yehowa, amɛnyiɛɔ yɛ ohiɛ la lɛ mli.
16 Gbi muu fɛɛ lɛ, amɛnyaa yɛ ogbɛ́i lɛ hewɔ,Ni awó amɛnɔ yɛ ojalɛ nifeemɔ lɛ hewɔ.
17 Ejaakɛ bo ji amɛhewalɛ lɛ nyam,+Ni akɛni onáa wɔhe miishɛɛ hewɔ lɛ, awó wɔhewalɛ* lɛ nɔ.+
18 Ejaakɛ wɔtsɛŋ lɛ, Yehowa nɔ ni,Wɔmaŋtsɛ lɛ, Israel Mɔ Krɔŋkrɔŋ lɛ nɔ ji lɛ.+
19 Nakai gbi lɛ nɔ lɛ, okɛ onɔkwafoi lɛ wie yɛ ninaa mli ni okɛɛ akɛ:
“Mihã kãkãlɔ ko hewalɛ;+Miwó mɔ ni ahala lɛ kɛjɛ maŋbii lɛ ateŋ lɛ nɔ.+
20 Mina mitsulɔ David;+Mikɛ mimu krɔŋkrɔŋ lɛ efɔ lɛ mu.+
21 Minine baahiɛ emli,+Minineshi baawaje lɛ.
22 Henyɛlɔ ko biŋ ni ewo too ko,Ni mɔ ko ni efeee jalɛ nii waŋ lɛ yi.+
23 Majwara ehenyɛlɔi lɛ dukuduku kɛje ehiɛ+Ni matswia mɛi ni nyɛɔ lɛ lɛ nii ni amɛgboi.+
24 Minɔkwayeli lɛ kɛ misuɔmɔ ni tsakeee lɛ kɛ lɛ baahi shi,+Ni abaawó ehewalɛ* lɛ nɔ yɛ migbɛ́i lɛ mli.
25 Mikɛ enine baafɔ̃* ŋshɔ lɛ nɔNi mikɛ eninejurɔ baafɔ̃ fai lɛ anɔ.+
26 Ebaabo etsɛ mi akɛ: ‘Bo ji mi-Tsɛ,Mi-Nyɔŋmɔ kɛ miyiwalaheremɔ Tɛsaa.’+
27 Ni mikɛ lɛ baafee mikromɔbi,+Shikpɔŋ lɛ nɔ maŋtsɛmɛi lɛ ateŋ mɔ ni nɔ kwɔ fe fɛɛ.+
28 Mahã misuɔmɔ ni tsakeee lɛ ahi enɔ kɛya naanɔ,+Ni kpaŋmɔ ni mi kɛ lɛ ekpaŋ lɛ efeŋ efolo.+
29 Mahã eseshi* lɛ ahi shi kɛya naanɔ,Ni mahã emaŋtsɛ sɛi lɛ ahi shi daa tamɔ ŋwɛi.+
30 Kɛ́ ebii* lɛ kwa mimla lɛNi amɛnyiɛɛɛ yɛ mifamɔi* lɛ anaa,
31 Ni amɛyeee mimlai lɛ anɔ,Ni amɛyeee mikitãi lɛ hu anɔ lɛ,
32 No lɛ, mikɛ tso baagbala amɛtoi yɛ amɛtoigbele* lɛ hewɔ+Ni matswa amɛ kpãa yɛ amɛtɔmɔ lɛ hewɔ.
33 Shi mihãŋ misuɔmɔ ni tsakeee lɛ aje enɔ kɔkɔɔkɔ+Ni milakaŋ lɛ yɛ shi ni miwo lɛ lɛ he.*
34 Mikuŋ mikpaŋmɔ lɛ mli+Ni mitsakeŋ nɔ ni minaabu ewie lɛ.+
35 Mikɛ mikrɔŋkrɔŋfeemɔ lɛ ekã kitã shi kome nyɔŋlo;Milakaŋ David.+
36 Eseshi* lɛ baahi shi kɛya naanɔ;+Emaŋtsɛ sɛi lɛ baahi shi daa tamɔ hulu yɛ mihiɛ.+
37 Bɔ ni nyɔɔŋtsere lɛ ji odasefonyo anɔkwafo yɛ ŋwɛiniiaŋ* lɛ,Nakai ebaahi shi kɛya naanɔ.” (Sela)
38 Shi bo diɛŋtsɛ oshɛ lɛ ofɔ̃, ni okwa lɛ;+Omli ewo la ewo mɔ ni ofɔ lɛ mu lɛ.
39 Onyaŋe kpaŋmɔ ni okɛ otsulɔ lɛ ekpaŋ lɛ;Oshɛ emaŋtsɛ fai* lɛ ofɔ̃ shikpɔŋ kɛbule fai lɛ.
40 Okumɔ egbogboi ni akɛ tɛ tswa* lɛ fɛɛ oshwie shi;Ohã emɔji lɛ fɛɛ efee koikoi.
41 Mɛi fɛɛ ni hoɔ lɛ loɔ enibii;Etsɔ nyaŋemɔ nii kɛhã maji ni bɔle lɛ lɛ.+
42 Ohã mɛi ni nyɛɔ lɛ lɛ eye kunim;*+Ohã ehenyɛlɔi lɛ fɛɛ miinya.
43 Ogbala eklante lɛ hu sɛɛ,Ni ohãaa enyɛ edamɔ shi yɛ ta lɛ mli.
44 Ohã enunyam lɛ etãNi otsi emaŋtsɛ sɛi lɛ otswa shi.
45 Ofo eblahiiaŋ gbii lɛ asɛɛ kuku;Okɛ hiɛgbele ebu lɛ mama. (Sela)
46 Ao Yehowa, mɛɛ be nɔŋŋ okɛ ohe baatee kɛyashi? Kɛyashi naanɔ lo?+
Ani omlifu lɛ baakã he atso tamɔ la?
47 Kaimɔ akɛ miwala sɛɛ etsɛɛɛ!+
Ani obɔ gbɔmɛi efolo ni yiŋtoo ko bɛ sɛɛ?
48 Mɛɛ gbɔmɔ baahi shi ni enaŋ gbele kɔkɔɔkɔ?+
Ani ebaanyɛ ehere lɛ diɛŋtsɛ ehe* kɛje Gbonyobu lɛ dɛŋ?* (Sela)
49 Ao Yehowa, nɛgbɛ nibii ni ofee yɛ blema kɛjie suɔmɔ ni tsakeee kpo,Ni okã David kitã yɛ he yɛ onɔkwayeli lɛ mli lɛ yɔɔ?+
50 Ao Yehowa, kaimɔ wiemɔi ni awieɔ ashiɔ otsuji lɛ;Bɔ ni mitere wiemɔi ni majimaji lɛ fɛɛ wieɔ amɛshiɔ otsuji lɛ;*
51 Ao Yehowa, bɔ ni ohenyɛlɔi lɛ eloo jɛmɔi amɛshwie mɔ ni ofɔ lɛ mu lɛ nɔ lɛ,Bɔ ni amɛjɛɔ enajifaamɔi fɛɛ lɛ.
52 Ajie Yehowa yi kɛya naanɔ. Amen, Amen.+
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Loo “Suɔmɔ ni tsakeee baahi shi.”
^ Hebri sht. ŋm., “odumɔwu.”
^ Loo “atatui lɛ amli.”
^ Hebri sht. ŋm., “bihii.”
^ Loo “agwabɔɔ.”
^ Hebri sht. ŋm., “wɔkolonto.”
^ Hebri sht. ŋm., “ekolonto.”
^ Loo “Mahã lɛ hegbɛ yɛ.”
^ Hebri sht. ŋm., “edumɔwu.”
^ Hebri sht. ŋm., “ebihii.”
^ Loo “mikojomɔi.”
^ Loo “amɛtuatsemɔ.”
^ Hebri sht. ŋm., “Ni mihãŋ minɔkwayeli lɛ atsɔ amale.”
^ Hebri sht. ŋm., “Edumɔwu.”
^ Loo “atatui lɛ amli.”
^ Loo “ekekre.”
^ Loo “Okumɔ eshihilɛhei ni akɛ tɛ tswa.”
^ Hebri sht. ŋm., “Owó ehenyɛlɔi lɛ aninejurɔ nɔ.”
^ Loo “esusuma.”
^ Hebri sht. ŋm., “Sheol dɛŋ,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “Bɔ ni wiemɔi ni majimaji lɛ fɛɛ wieɔ amɛshiɔ otsuji lɛ jwere mimiinaa lɛ.”
