Zakaria 2:1-13
2 Ni miwó mihiɛ nɔ mikwɛ, ni mina nuu ko ni hiɛ susumɔ kpãa+ yɛ edɛŋ.
2 No hewɔ lɛ, mibi akɛ: “Nɛgbɛ oyaa?”
Ehã hetoo akɛ: “Miiya miyasusu Yerusalem, koni mana elɛɛmɔ kɛ ekɛlɛ.”+
3 Ni naa! ŋwɛibɔfo lɛ ni kɛ mi wieɔ lɛ je kpo, ni ŋwɛibɔfo kroko kɛ lɛ bakpe.
4 Ni ekɛɛ lɛ akɛ: “Joo foi kɛya jɛmɛ, ní oyakɛɛ nakai oblanyo lɛ akɛ, ‘“Mɛi baahi Yerusalem+ tamɔ akrowa ni he kã efolo,* yɛ gbɔmɛi kɛ kooloi fɛɛ ni yɔɔ emli lɛ hewɔ.+
5 Ni matsɔ la gbogbo mawo ehe fɛɛ kɛaakpe,”+ Yehowa kɛɛ, “ni matsɔ anunyam yɛ emli.”’”+
6 “Nyɛbaa! Nyɛbaa! Nyɛjoa foi kɛjɛa kooyigbɛ shikpɔŋ lɛ nɔ kɛbaa,”+ Yehowa kɛɛ.
“Ejaakɛ migbɛ nyɛ mishwã ŋwɛi kɔɔyɔi ejwɛ lɛ amli,”+ Yehowa kɛɛ.
7 “Zion, ba! Joo foi, bo mɔ ni okɛ Babilon biyoo lɛ yɔɔ.+
8 Ejaakɛ nɔ ni Yehowa, taiatsɛ lɛ, mɔ ni be ni awo ehiɛ nyam sɛɛ lɛ,* etsu mi kɛtee jeŋmaji ni shɔ̃ɔ nyɛnibii lɛ aŋɔɔ lɛ kɛɛ nɛ:+ ‘Mɔ fɛɛ mɔ ni taa nyɛhe lɛ, eeta mihiŋmɛi mli ajaŋmalaatɛ he.+
9 Ejaakɛ agbɛnɛ, mahoso minine mawo amɛ, ni amɛbaatsɔmɔ ta mli nii amɛhã amɛ diɛŋtsɛ amɛnyɔji lɛ.’+ Ni bɔ fɛɛ bɔ ni fee lɛ, nyɛbaaná nyɛle akɛ Yehowa, taiatsɛ lɛ, ji mɔ ni tsu mi.
10 “Zion biyoo, nya waa;+ ejaakɛ miiba,+ ni mabahi oteŋ,”+ Yehowa kɛɛ.
11 “Nakai gbi lɛ nɔ lɛ, jeŋmaji babaoo kɛ amɛhe baakpɛtɛ Yehowa he,+ ni amɛbaatsɔ mimaŋ; ni mahi oteŋ.” Ni obaaná ole akɛ, Yehowa, taiatsɛ lɛ, ji mɔ ni tsu mi oŋɔɔ.
12 Yehowa baaŋɔ Yuda akɛ egbɛfaŋnɔ yɛ shikpɔŋ krɔŋkrɔŋ lɛ nɔ, ni ebaahala Yerusalem ekoŋŋ.+
13 Heloo* fɛɛ afee diŋŋ yɛ Yehowa hiɛ, ejaakɛ eetsu saji ahe nii kɛmiijɛ eshihilɛhe krɔŋkrɔŋ lɛ.
Shishigbɛ Niŋmaa
^ Ni tsɔɔ akɛ, atswako gbogbo awoko he.
^ Hebri sht. ŋm., “mɔ ni yɛ anunyam lɛ sɛɛ lɛ.”
^ Loo “Adesai.”
