Winston, te fee tɛŋŋ obale anɔkwale lɛ?

Mida yɛ Queensland, yɛ Australia. Wɔshĩa lɛ yɛ ŋmɔ ko ni etse ehe banee mli. No hewɔ lɛ, miweku lɛ titri ji mɛi ni mikɛshara, ni wɔteŋ mɔ ko mɔ ko eyaaa sɔlemɔ. Mibɔi Nyɔŋmɔ sɛɛ gbɛ taomɔ kɛjɛ be ni miye aaafee afii 12. Misɔle mibi lɛ ni ehã male lɛ jogbaŋŋ. Sɛɛ mli lɛ, mishi ŋmɔ lɛ mli ni miyaná nitsumɔ yɛ Adelaide, yɛ Australia Wuoyigbɛ. Be ko be ni mitee shisharamɔ yɛ Sydney lɛ, mikɛ Pam kpe, ni ekɛ mi wie jamɔ kuu ko he sane. No mli lɛ, miye afii 21. Jamɔ kuu nɛɛ mli bii lɛ heɔ amɛyeɔ akɛ Britainbii lɛ ji Israel wekui nyɔŋma maŋtsɛyeli ni aŋɔ amɛ nom yɛ afi 740 D.Ŋ.B. lɛ aseshibii. Be ni miku misɛɛ kɛtee Adelaide lɛ, mikɛ nuu ko ni mikɛtsuɔ nii ni Yehowa Odasefoi kɛ lɛ ebɔi Biblia lɛ kasemɔ lɛ gba jamɔ kuu nɛɛ he sane. Ŋmɛlɛtswai fioo ko pɛ wɔgba sane, ni wɔsanegbaa lɛ kɔ Odasefoi lɛ ahe titri. Mina akɛ Yehowa miihã sɔlemɔ ni misɔle yɛ migbekɛbiiashi lɛ hetoo. Mibale anɔkwale ni kɔɔ mɔ ni bɔ mi lɛ kɛ e-Maŋtsɛyeli lɛ he. Nɛkɛ ji bɔ ni fee ni mina “adiagba kome ni jara wa lɛ.”​—Mat. 13:45, 46.

Pam, bo hu obale anɔkwale lɛ yɛ ogbekɛbiiashi. Te eba lɛ tɛŋŋ?

Mida yɛ Coffs Harbour, yɛ New South Wales, yɛ Australia. Mifɔlɔi, kɛ minii kɛ minaa kɛ amɛhe dɔmɔ jamɔ kuu ni heɔ amɛyeɔ akɛ Britainbii lɛ ji Israel wekui lɛ aseshibii. No hewɔ lɛ, amɛtsɔse mi, minyɛmi nuu fioo lɛ, minyɛmi yoo onukpa lɛ, kɛ wɔnyɛkwɛ bii lɛ ateŋ mɛi pii yɛ nakai jamɔ lɛ mli, ni amɛhã wɔhe wɔye akɛ mɛi ni jɛ Britain lɛ ji mɛi ni Nyɔŋmɔ kpɛlɛɔ amɛnɔ. Shi tsɔɔmɔ nɛɛ hooo mimli kwraa, ni ehãaa manyɛ mikɛ Nyɔŋmɔ abɔ naanyo. Be ni miye afii 14 lɛ, mitee Anglican, Baptist, SDA, kɛ sɔlemɔi krokomɛi, shi amɛteŋ eko kwraa yeee ebuaaa mi ni male Nyɔŋmɔ.

 Sɛɛ mli lɛ, miweku lɛ fã kɛyahi Sydney, ni jɛmɛ mikɛ Winston kpe yɛ lɛ. No mli lɛ, eba shisharamɔ. Tamɔ bɔ ni ewie lɛ, jamɔ kuu lɛ he sane ni mikɛ lɛ gba lɛ ji nɔ ni hã sɛɛ mli lɛ, ehã Odasefoi lɛ kɛ lɛ bɔi Biblia lɛ kasemɔ lɛ. Be ni akɛ lɛ bɔi Biblia lɛ kasemɔ lɛ, kɛ́ eŋma mi wolo lɛ, ŋmalɛi sɔŋŋ yɔɔ mli! Anɔkwa, shishijee lɛ, egba minaa, ni mimli fu lɛ po. Shi fiofio lɛ, mibana akɛ nibii ni ewieɔ lɛ ji anɔkwale.

Yɛ afi 1962, be ni miye afii 18 lɛ, mifã kɛtee Adelaide koni mabɛŋkɛ Winston. Eto gbɛjianɔ koni miyahi nyɛmi nuu ko ni atsɛɔ lɛ Thomas Sloman lɛ kɛ eŋa Janice ŋɔɔ. Odasefoi nɛɛ sɔmɔ akɛ maŋsɛɛ sɔɔlɔi yɛ Papua New Guinea. Amɛjie mlihilɛ kpo amɛtsɔɔ mi waa, ni amɛye amɛbua mi koni male Yehowa jogbaŋŋ. No hewɔ lɛ, mi hu mihã akɛ mi bɔi Biblia lɛ kasemɔ, ni etsɛɛɛ ni mibana akɛ mina anɔkwale lɛ. Be ni mikɛ Winston bote gbalashihilɛ mli nɔŋŋ lɛ, wɔkpɛ wɔyiŋ akɛ wɔkɛ wɔhe baawo be fɛɛ sɔɔmɔ nitsumɔ lɛ mli. Eyɛ mli akɛ wɔkɛ naagbai komɛi ekpe moŋ, shi wɔtsui enyɔ wɔmli yɛ yiŋ nɛɛ ni wɔkpɛ lɛ hewɔ, ni ehã wɔhiɛ esɔ adiagba ni jara wa ni wɔnine eshɛ nɔ lɛ waa.

Winston, te nibii tee lɛ tɛŋŋ be ni nyɛbɔi Yehowa sɔɔmɔ lɛ?

Be ni mikɛ Pam bote gbalashihilɛ mli lɛ sɛɛ etsɛɛɛ lɛ, Yehowa gbele ‘shinai wuji’ pii ehã wɔ koni wɔnyɛ wɔtsu babaoo yɛ esɔɔmɔ lɛ mli. (1 Kor. 16:9) Klɛŋklɛŋ shinaa ni egbele ehã wɔ ji, gbɛgbamɔ nitsumɔ lɛ. Nyɛminuu Jack Porter, ni no mli lɛ, esɔmɔɔ wɔsafo bibioo lɛ akɛ kpokpaa nɔkwɛlɔ lɛ kɛ eŋa, Roslyn, ji mɛi ni wo wɔ hewalɛ ni wɔkɛ wɔhe awo gbɛgbamɔ nitsumɔ lɛ mli. (Amrɔ nɛɛ, mi kɛ Jack fɛɛ sɔmɔɔ akɛ Australasia Nitsumɔhe Nine Ajinafoi Akuu lɛ mli bii.) Mi kɛ Pam sɔmɔ akɛ gbɛgbalɔi afii enumɔ, ni wɔná miishɛɛ waa. Be ni miye afii 29 lɛ, ahã misɔmɔ akɛ kpokpaa nɔkwɛlɔ, ni wɔyasɔmɔ yɛ Pasifik Wuoyigbɛ Ŋshɔkpɔi lɛ anɔ. Ŋshɔkpɔi nɛɛ ji, American Samoa, Samoa, Kiribati, Nauru, Niue, Tokelau, Tonga, Tuvalu, kɛ Vanuatu. No mli lɛ, Fiji nitsumɔhe nine lɛ ni kwɛɔ shiɛmɔ nitsumɔ lɛ nɔ yɛ ŋshɔkpɔi nɛɛ anɔ.

Nakai beiaŋ lɛ, mɛi ni yɔɔ ŋshɔkpɔi ni etse amɛhe banee waa lɛ ateŋ ekomɛi anɔ lɛ ehiɛɛɛ Yehowa Odasefoi ahe jwɛŋmɔ kpakpa, no hewɔ lɛ, ehe bahia ni wɔkwɛ wɔhe nɔ jogbaŋŋ, ni wɔkɛ hiɛshikamɔ atsu nii. (Mat. 10:16) No mli lɛ, asafoi ni yɔɔ jɛmɛ lɛ daraaa, ni akrowai komɛi po yɛ ni kɛ́ wɔtee lɛ, nyɛmimɛi lɛ náaa he ko amɛhã wɔ ni wɔto. Shi kɛ́ eba lɛ nakai lɛ, wɔbiɔ mɛi ni yɔɔ akrowa lɛ mli lɛ kɛji amɛbaaná he ko amɛhã wɔ wɔto, ni be fɛɛ be lɛ, wɔnáa mɔ ko kɛ̃ hãa wɔ he ko wɔtoɔ.

Winston, onyaa nitsumɔ ni wiemɔ shishitsɔɔlɔi tsuɔ lɛ he waa. Te fee tɛŋŋ ni obanya nitsumɔ nɛɛ he waa nakai?

No mli lɛ, asafo lɛ woji kɛ tratii fioo ko pɛ ayɔɔ yɛ Tongan, ni ji wiemɔ ko ni awieɔ yɛ Tonga lɛ mli. No hewɔ lɛ, kɛ́ nyɛmimɛi lɛ tee shiɛmɔ lɛ, amɛkɛ wolo ni akɛ mɛi kaseɔ yɛ nakai beiaŋ, ni ji Anɔkwale Ni Kɛ Mɔ Yaa Naanɔ Wala Mli Lɛ, Blɔfo nɔ lɛ ni tsuɔ nii. Be ni afee onukpai askul ko ni he otsii ejwɛ lɛ, asafoŋ onukpai etɛ komɛi ni ba skul lɛ eko lɛ kpɛlɛ akɛ amɛbaatsɔɔ wolo nɛɛ shishi kɛya Tongan mli, eyɛ mli akɛ amɛ-Blɔfo shɛɛɛ shɔŋŋ moŋ. Pam tswa nɔ ni amɛtsɔɔ shishi lɛ fɛɛ, ni wɔkɛmaje United States nitsumɔhe nine lɛ koni amɛkala amɛhã wɔ. Nitsumɔ muu lɛ fɛɛ he otsii kpaanyɔ. Eyɛ mli akɛ, amɛshishitsɔɔmɔ lɛ bɛ lɛ ekpakpa tsɔ moŋ, shi eye ebua mɛi ni wieɔ Tongan lɛ ateŋ mɛi babaoo ni amɛbale anɔkwale lɛ. Mi kɛ Pam fɛɛ jeee wiemɔ shishitsɔɔlɔi, shi niiashikpamɔ nɛɛ hã wɔbanya amɛnitsumɔ lɛ he waa.

Pam, kɛ́ okɛ ŋshɔkpɔi lɛ anɔ shihilɛ to Australia shihilɛ he lɛ, te onaa lɛ tɛŋŋ?

Esoro ŋshɔkpɔi lɛ anɔ shihilɛ kwraa! He fɛɛ he kɛ naagbai ni wɔkɛkpe; hei komɛi lɛ, tɔŋtɔŋi kpe wɔ waa, ni hei komɛi hu dɔɔ waa diɛŋtsɛ. Obishii hu gba wɔnaa yɛ hei komɛi, dani soro helai ni mɔmɔ wɔ hu. Agbɛnɛ hu, bei komɛi lɛ, wɔnáaa niyenii ni fa bɔ ni sa wɔye. Kɛ̃lɛ, nibii komɛi ye amɛbua wɔ ni wɔjie wɔjwɛŋmɔ yɛ naagbai nɛɛ anɔ. Yɛ hei nɛɛ pii lɛ, ayɛ tsũi ni tamɔ agba ni akɛ jwɛi ewo yiteŋ. Atsɛɔ tsũi ni tamɔ nakai lɛ yɛ Samoan mli akɛ fale. Daa  gbɛkɛ lɛ, wɔyajɔɔ wɔhe yɛ tsũi nɛɛ eko mli, ni kɛ́ oyɛ jɛmɛ ni okwɛ ŋshɔ lɛ, eyɛ fɛo waa diɛŋtsɛ, ni ehãa mɔ náa miishɛɛ waa. Kɛ́ nyɔɔŋtsere lɛ miikpɛ waa lɛ, onaa akooshi tsei lɛ, ni kɛ́ okwɛ bɔ ni nyɔɔŋtsere lɛ kpɛɔ yɛ ŋshɔ lɛ nɔ lɛ, eyɛ fɛo waa. Nibii fɛfɛji tamɔ nakai ni wɔna lɛ hã wɔjwɛŋ nii anɔ ni wɔsɔle, ni enɛ hãaa wɔkɛ wɔjwɛŋmɔ aya naagbai ni wɔkɛkpeɔ lɛ anɔ.

Gbekɛbii lɛ ahe yɛ miishɛɛ waa, ni wɔbasumɔ amɛsane. Akɛni wɔfee blɔfomɛi hewɔ lɛ, kɛ́ amɛna wɔ lɛ, amɛnyaa wɔhe waa. Be ko be ni wɔtee Niue lɛ, gbekɛ nuu fioo ko kɛ enine shwishwia Winston nine he, ni ewie akɛ, “Misumɔɔ otsɛji lɛ.” Winston niji ahe yɛ tsɔi, ni etamɔ nɔ ni gbekɛ lɛ enako mɔ ko ni niji ahe yɔɔ tsɔi nakai dã. No hewɔ ewie akɛ Winston yɛ tsɛji lɛ.

Ŋshɔkpɔi lɛ anɔ yɛ fɛo waa. Shi mɛi ni yɔɔ jɛmɛ lɛ ateŋ mɛi pii miiye ohia, ni amɛnáaa shihilɛ mlɛo kwraa. Amɛbɛ helatsamɔhei kpakpai, ni nu kpakpa namɔ hu wa. Anɔkwa, amɛnii fee wɔ mɔbɔ. Shi etamɔ nɔ ni egbaaa nyɛmimɛi lɛ anaa tsɔ, ejaakɛ amɛhi mli aahu amɛle. Amɛnu he akɛ, bei abɔ ni amɛ kɛ amɛweku lɛ mli bii yɔɔ he kome, amɛyɔɔ he ko ni amɛbaajá Yehowa yɛ, ni agbɛnɛ hu, amɛná hegbɛ akɛ amɛbaajie eyi lɛ, sane ko kwraa bɛ dɔŋŋ. Enɛ fee nɔkwɛmɔnɔ kpakpa kɛhã wɔ, ni eye ebua wɔ koni wɔkɛ wɔjwɛŋmɔ ama nibii ni he hiaa titri lɛ anɔ, ni wɔkagba wɔhe naa tsɔ yɛ heloonaa nibii ahe.

Pam, wɔle akɛ bei komɛi lɛ ehe bahia ni oya faaŋ ni oshɛre la kɛhoo nii. Te ofee lɛ tɛŋŋ?

Kɛ́ miyɛ shidaa ko lɛ, mikɛbaahã mipapa. Etsɔɔ mi nibii pii, tamɔ bɔ ni ashɛreɔ la kɛhoɔ nii, kɛ bɔ ni afeɔ atsakeɔ he awoɔ shihilɛ fɛɛ shihilɛ mli. Be ko be ni wɔtee Kiribati lɛ, wɔyato shĩa bibioo ko mli. Bɔ ni shĩa lɛ yɔɔ nɛ: akɛ pamplo ma, ni akɛ tɛi komɛi ni anáa yɛ ŋshɔ lɛ mli ni atsɛɔ lɛ koral lɛ ewo shikpɔŋ lɛ fɛɛ, ni akɛ jwɛi ewo yiteŋ. Mitsa bu yɛ shikpɔŋ lɛ ni mikɛ akooshi he totoi wo mli kɛshɛre la kɛhoo nii. Be ni wɔyɔɔ jɛmɛ lɛ, mi kɛ maŋ lɛ mli yei lɛ toɔ lai kɛyayɛɔ nu yɛ nubu ko mli. Tso kakadaŋŋ ko amɛkɛyɛɔ nu lɛ. Tso lɛ kɛlɛ aaafee nanetalɔi ekpaa, ni akɛ kpãa hwiaa ko efĩ tsɛnsi yɛ naa, tamɔ kpoŋ. Bɔ ni amɛfeɔ lɛ ji, amɛfɔ̃ɔ tsɛnsi lɛ kɛ kpãa lɛ, kɛkɛ lɛ kɛ́ eshwɛ fioo ni ebaagbee nu lɛ mli lɛ, amɛsha kpãa bɔ ni tsɛnsi lɛ baakpa ni eyɛ nu lɛ, kɛkɛ lɛ, amɛgbala kɛba. Kɛ́ odamɔ sɛɛ ookwɛ lɛ, etamɔ nɔ ni efeemɔ waaa kwraa, ni nakai misusu. Kɛkɛ ni ebashɛ minɔ ni mayɛ nu lɛ. Mifɔ̃ kpãa lɛ, shi tsɛnsi lɛ yatswa nu lɛ hiɛ, ni mináaa nu lɛ eko kwraa yɛ mli! Mika shii abɔ, shi miyeee omanye. Yei lɛ ŋmɔ mi saŋŋ, kɛkɛ ni amɛteŋ mɔ kome ye ebua mi. Anɔkwa, jɛmɛ bii lɛ amli hi, ni amɛye amɛbua wɔ waa.

Wɔle akɛ nyɛyi enyɔ fɛɛ nyɛnya sɔɔmɔ ni nyɛsɔmɔ yɛ ŋshɔkpɔi lɛ anɔ lɛ he waa. Ani nyɛbaasumɔ ni nyɛgba wɔ nibii ni tee nɔ yɛ jɛmɛ ni nyɛhiɛ kpaŋ nɔ kɔkɔɔkɔ lɛ ekomɛi?

Winston: Ehe wɔ be fioo dani wɔle bɔ ni amɛfeɔ amɛnii amɛhãa yɛ jɛmɛ. Akɛ nɔkwɛmɔnɔ lɛ, yɛ jɛmɛ lɛ, kɛ́ oná gbɔ lɛ, esa akɛ okɛ niyenii fɛɛ ni oyɔɔ lɛ abama ehiɛ. Akpaa gbɛ akɛ gbɔ lɛ baaye ni eshi eko ehã shĩabii lɛ. Shi wɔleee lɛ nakai. No hewɔ lɛ, kɛ́ nyɛmimɛi lɛ kɛ niyenii lɛ ba lɛ, wɔyeɔ fɛɛ ni etãa! Sɛɛ mli be ni wɔna akɛ niyenii fɛɛ ni amɛyɔɔ lɛ amɛkɛbamaa wɔhiɛ lɛ, kɛ́ wɔye lɛ, wɔshiɔ eko. Nyɛmimɛi lɛ ná wɔhe tsui waa, ni daa nyɔji ekpaa loo nɔ kɛ́ wɔyasara amɛ lɛ, amɛmii shɛɔ amɛhe pam. Yɛ no beiaŋ lɛ, amɛnáaa hegbɛ amɛkɛ Odasefoi ni jɛ hei krokomɛi ashara, akɛ ja wɔ pɛ.

Mɛi ni yɔɔ jɛmɛ lɛ ateŋ mɛi pii susu akɛ amɛkrowai lɛ amli pɛ Yehowa Odasefoi yɔɔ. Shi nyɛmimɛi lɛ kɛɔ amɛ akɛ wɔyɛ jeŋ fɛɛ. No hewɔ lɛ, be ni amɛna akɛ mɛi ejɛ maŋsɛɛ amɛbasara Odasefoi ni yɔɔ jɛmɛ lɛ, efee amɛ naakpɛɛ waa, ni enɛ bafee odaseyeli kpele kɛhã amɛ. Ehã amɛna akɛ, jeee amɛ-ŋshɔkpɔi lɛ pɛ anɔ Odasefoi yɔɔ, shi moŋ amɛyɛ hei krokomɛi hu.

Pam: Sane kome ko ni mihiɛ kpaŋ nɔ kɔkɔɔkɔ ji nɔ ko ni ba be ko be ni wɔtee Kiribati lɛ. Nyɛmimɛi fioo pɛ yɔɔ asafo ni yɔɔ jɛmɛ lɛ mli, ni amɛyɛ asafoŋ onukpa kome pɛ. Atsɛɔ lɛ Itinikai Matera, ni ebɔ wɔhe mɔdɛŋ waa. Gbi ko lɛ, eba wɔshĩa lɛ ni ehiɛ kɛntɛŋ ni wuɔ wɔlɔ kome kã mli. Ekɛɛ wɔ akɛ: “Mikɛbahã nyɛ.” Nakai beiaŋ lɛ, ekpakpa ko dani wɔnáa wuɔ wɔlɔ wɔyeɔ.  Eyɛ mli akɛ nɔ ni ebahã wɔ lɛ jeee nɔ ko agbo moŋ, shi wɔhiɛ sɔ waa diɛŋtsɛ.

Pam, oná musu ni efite. Mɛni ye ebua bo ni onyɛ okpee shihilɛ nɛɛ naa?

Yɛ afi 1973, be ni wɔyɔɔ Pasifik Wuoyigbɛ Ŋshɔkpɔi lɛ anɔ lɛ, miná musu. No hewɔ lɛ, wɔku wɔsɛɛ kɛtee Australia, shi nyɔji ejwɛ sɛɛ lɛ, musu lɛ fite. Edɔ mi waa, shi jeee mi pɛ. Edɔ Winston hu waa. Be ni be shwie mli lɛ, dɔlɛ ni minuɔ he lɛ naa ba shi. Shi nɔ ni hã mitsɛ mitsui miŋmɛ mimli agbɛnɛ ji, “Sanebimɔi Ni Jɛ Kanelɔi Adɛŋ” ni je kpo yɛ April 15, 2009 Buu-Mɔɔ lɛ mli, ni kɛɔ akɛ “Ani gbohiiashitee he hiɛnɔkamɔ yɛ hã bi ni gbo yɛ enyɛ musuŋ dani afɔ lɛ lɛ?” Awie yɛ nakai sane lɛ mli akɛ, kɛ́ abaatee bii ni tamɔ nɛkɛ lɛ ashi jio, ateŋ amɛshi jio, fɛɛ yɛ Yehowa, mɔ ni feɔ nɔ ni ja be fɛɛ be lɛ dɛŋ. Awie hu akɛ, eyɛ mli akɛ jeŋ fɔŋ nɛɛ kɛ wɔ etswia shi moŋ, shi Yehowa baajɛ suɔmɔ mli etsɔ e-Bi lɛ nɔ ‘efite Satan nitsumɔi lɛ,’ ni eshɛje wɔmii. (1 Yoh. 3:8) Buu-Mɔɔ nɛɛ hã wɔhiɛ sɔ anɔkwale lɛ, ni ji “adiagba” ni jara wa ni wɔnine eshɛ nɔ lɛ, waa fe tsutsu lɛ po. Anɔkwa, eji wɔbɛ hiɛnɔkamɔ ko kwraa kɛhã wɔsɛɛ kulɛ, wɔnii baafee mɔbɔ waa.

Be ni wɔbi lɛ gbo sɛɛ lɛ, wɔkɛ wɔhe wo be fɛɛ sɔɔmɔ lɛ mli ekoŋŋ. Wɔsɔmɔ yɛ Australia Betel nyɔji komɛi, ni sɛɛ mli lɛ, ahã Winston bɔi sɔɔmɔ ekoŋŋ akɛ kpokpaa nɔkwɛlɔ. Yɛ afi 1981, be ni wɔkɛ afii ejwɛ esɔmɔ yɛ New South Wales akrowai lɛ kɛ Sydney lɛ, afɔ̃ wɔ nine ni wɔbasɔmɔ yɛ Australia Betel (amrɔ nɛɛ atsɛɔ lɛ Australasia Betel) ekoŋŋ, ni jɛmɛ wɔsɔmɔ yɛ kɛbashi bianɛ.

Winston, ani sɔɔmɔ ni oyasɔmɔ yɛ Pasifik Wuoyigbɛ Ŋshɔkpɔi lɛ anɔ lɛ eye ebua bo ni onyɛ otsu onitsumɔ akɛ Australasia Nitsumɔhe Nine Ajinafoi Akuu lɛ mli nyo lɛ jogbaŋŋ?

Hɛɛ, eye ebua mi yɛ gbɛi pii anɔ. Klɛŋklɛŋ lɛ, abi ni Australia nitsumɔhe nine lɛ akwɛ nyɛmimɛi ni yɔɔ American Samoa kɛ Samoa lɛ anɔ. Kɛkɛ ni sɛɛ mli lɛ, afee New Zealand Betel kɛ Australia Betel ekome. Amrɔ nɛɛ, Australasia nitsumɔhe nine lɛ kwɛɔ sɔɔmɔ nitsumɔ lɛ nɔ yɛ Australia, American Samoa kɛ Samoa, Cook Islands, New Zealand, Niue, Timor-Leste, Tokelau, kɛ Tonga. Miná hegbɛ misɔmɔ maji nɛɛ babaoo akɛ nitsumɔhe nine najiaŋdamɔlɔ. Ekome ni mikɛ nyɛmimɛi anɔkwafoi ni yɔɔ ŋshɔkpɔi lɛ anɔ lɛ fee kɛtsu nii lɛ eye ebua mi waa yɛ nitsumɔ ni mitsuɔ akɛ Nitsumɔhe Nine Ajinafoi Akuu lɛ mli nyo lɛ mli.

Nɔ ko fioo ni masumɔ ni mawie kɛmu wɔsanegbaa nɛɛ naa ji akɛ, mi kɛ Pam fɛɛ ena akɛ jeee onukpai pɛ ni miisumɔ ni amɛkase Nyɔŋmɔ he nii, loo kɛ́ wɔɔwie lɛ, amɛnine ashɛ “adiagba kome ni jara wa lɛ” nɔ. Oblahii kɛ oblayei hu miisumɔ ni amɛkase Biblia lɛ, kɛji amɛwekumɛi nyaaa he po. (2 Maŋ. 5:2, 3; 2 Kro. 34:1-3) Yehowa sumɔɔ onukpai kɛ gbekɛbii fɛɛ asane, ni eesumɔ ni amɛná wala.

Be ni mi kɛ Pam fɛɛ bɔi Biblia lɛ kasemɔ nɔ ni fe afii 50 ni eho nɛ lɛ, wɔleee kwraa akɛ wɔbaaná jɔɔmɔi pii nɛkɛ. Wɔbaanyɛ wɔwie kɛ nɔmimaa akɛ, anɔkwale lɛ ji adiagba ni jara wa waa diɛŋtsɛ! Wɔtswa wɔfai shi akɛ, wɔbaafee nɔ fɛɛ nɔ ni wɔbaanyɛ koni adiagba nɛɛ akaje wɔdɛŋ!