1. Mɛni hewɔ wɔbaanyɛ wɔkɛɛ akɛ nibii fɛɛ lɛ, Yehowa nɔ ni lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

NIBII fɛɛ lɛ, Yehowa nɔ ni! Ŋwɛi lɛ, Yehowa nɔ ni, ni “ŋwɛii amli ŋwɛii tete po, kɛ shikpɔŋ lɛ kɛ emli nibii fɛɛ lɛ, enɔ ni.” (5 Mo. 10:14; Kpo. 4:11) Yehowa ni bɔ adesai, no hewɔ lɛ, Yehowa nii ji gbɔmɛi fɛɛ. (Lala 100:3) Shi kɛjɛ blema aahu kɛbashi ŋmɛnɛ lɛ, Nyɔŋmɔ halaa mɛi komɛi akɛ enii ni eshwɛɛɛ he kwraa.

2. Namɛi awie amɛhe yɛ Biblia lɛ mli akɛ amɛji Yehowa nii ni eshwɛɛɛ he?

² Akɛ nɔkwɛmɔnɔ lɛ, yɛ Lala 135 lɛ, atsɛ Yehowa tsuji anɔkwafoi ni hi shi yɛ blema Israel lɛ akɛ ‘enii ni eshwɛɛɛ he kwraa.’ (Lala 135:4) Agbɛnɛ hu, yɛ Hosea wolo lɛ mli lɛ, agba akɛ mɛi komɛi ni jeee Israelbii lɛ baabatsɔmɔ Yehowa webii. (Hos. 2:23) Gbalɛ nɛɛ ba mli be ni Yehowa bɔi mɛi ni jeee Yudafoi hu halamɔ akɛ mɛi ni baafata Kristo he kɛye nɔ. (Bɔf. 10:45; Rom. 9:23-26) Yehowa kɛ mumɔ krɔŋkrɔŋ lɛ efɔ mɛi ni kɛ Yesu baaye nɔ lɛ mu. Amɛji “jeŋmaŋ krɔŋkrɔŋ,” ni Yehowa kɛ amɛ efee “enii ni eshwɛɛɛ he.” (1 Pet. 2:9, 10) Ni Kristofoi anɔkwafoi ni yɔɔ hiɛnɔkamɔ akɛ amɛbaahi shi yɛ shikpɔŋ lɛ nɔ kɛya naanɔ lɛ hu? Yehowa tsɛɔ amɛ hu akɛ ‘emaŋ’ kɛ ‘emɛi ni ehala.’​—Yes. 65:22.

3. (a) Ŋmɛnɛ lɛ, namɛi ni wekukpaa krɛdɛɛ yɔɔ amɛ kɛ Yehowa teŋ? (b) Mɛni he wɔbaasusu yɛ nikasemɔ nɛɛ mli?

 ³ Ŋmɛnɛ lɛ, “tooku bibioo” lɛ ni yɔɔ hiɛnɔkamɔ akɛ amɛbaaya ŋwɛi lɛ, kɛ “gwantɛŋi krokomɛi” ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ efee ekome kɛmiijá Yehowa akɛ “tooku kome.” (Luka 12:32; Yoh. 10:16) Wɔmiisumɔ ni wɔhã Yehowa ana akɛ wɔhiɛ sɔɔ hegbɛ ni nɔ bɛ ni ekɛhã wɔ akɛ ewebii lɛ. Yɛ nikasemɔ nɛɛ mli lɛ, wɔbaakwɛ gbɛi srɔtoi ni wɔbaanyɛ wɔtsɔ nɔ wɔhã Yehowa ana akɛ wɔhiɛ sɔɔ hegbɛ krɛdɛɛ ni ekɛhã wɔ lɛ.

4. Mɛni wɔbaanyɛ wɔfee kɛda Yehowa shi akɛ ehã wɔ hegbɛ ni wɔbatsɔmɔ enanemɛi? Ni mɛni Yesu hu fee ni tamɔ nakai?

⁴ Kɛ́ wɔjɛ wɔtsuiŋ fɛɛ wɔjɔɔ wɔhe nɔ wɔhã Yehowa ni abaptisi wɔ lɛ, no tsɔɔ akɛ wɔhiɛ sɔɔ hegbɛ krɛdɛɛ ni ekɛhã wɔ akɛ etsuji lɛ. Agbɛnɛ hu, no tsɔɔ akɛ, wɔmiisumɔ ni mɛi fɛɛ ale akɛ Yehowa nii ji wɔ, ni wɔmiisumɔ ni wɔjɛ wɔtsuiŋ fɛɛ wɔba wɔhe shi wɔhã lɛ. (Heb. 12:9) Yesu hu fee nɔ ko ni tamɔ nakai. Be ni ehã abaptisi lɛ lɛ, yɛ gbɛ ko nɔ lɛ, ekɛɛ Yehowa akɛ: “Ao mi-Nyɔŋmɔ, miishwe akɛ mafee osuɔmɔnaa nii.” (Lala 40:7, 8, shn.) Yesu kɛ ehe hã Yehowa kwraa akɛ ebaafee esuɔmɔnaa nii eyɛ mli akɛ no mli lɛ, efata maŋ ko ni Nyɔŋmɔ eŋɔ akɛ enɔ lɛ he.

5, 6. (a) Be ni abaptisi Yesu lɛ, te Yehowa nu he ehã tɛŋŋ? (b) Gbaa nɔkwɛmɔnɔ ko ni tsɔɔ nɔ hewɔ ni Yehowa náa miishɛɛ kɛ́ wɔjɔɔ wɔhe nɔ wɔhã lɛ lɛ.

⁵ Be ni abaptisi Yesu lɛ, te Yehowa nu he ehã tɛŋŋ? Biblia lɛ kɛɔ akɛ: “Be ni abaptisi Yesu agbe naa lɛ, amrɔ nɔŋŋ ni ewó ehe nɔ kɛje nu lɛ mli; ni naa! ŋwɛi naa gbele, ni ena Nyɔŋmɔ mumɔ lɛ miikpeleke shi tamɔ okpo, ni eeba enɔ. Agbɛnɛ hu, naa! gbee ko jɛ ŋwɛi kɛɛ: ‘Mɔ nɛ ji mi-Bi ni misumɔɔ lɛ lɛ, mɔ ni miná ehe miishɛɛ lɛ.’” (Mat. 3:16, 17) Eyɛ mli akɛ no mli lɛ, Yehowa nii ji Yesu momo moŋ, shi Yehowa ná miishɛɛ be ni ena akɛ e-Bi lɛ yɛ he miishɛɛ akɛ ebaafee e-Tsɛ lɛ pɛ suɔmɔnaa nii lɛ. Kɛ́ wɔ hu wɔjɔɔ wɔhe nɔ wɔhã Yehowa lɛ, ebaaná miishɛɛ, ni ebaajɔɔ wɔ.​—Lala 149:4.

⁶ Yehowa nii ji wɔ. No hewɔ lɛ, mɛni hewɔ kɛ́ wɔjɔɔ wɔwala nɔ wɔhã lɛ lɛ, enáa miishɛɛ lɛ? Susumɔ nɔkwɛmɔnɔ nɛɛ he okwɛ. Ŋɔɔ lɛ akɛ, nuu ko efee abɔɔ ni edu fɔfɔii fɛfɛji babaoo yɛ mli. Gbi ko lɛ, ebiyoo fioo lɛ yatse fɔfɔii nɛɛ eko ni ekɛbake lɛ. Te nuu nɛɛ baanu he ehã tɛŋŋ? Eyɛ mli akɛ fɔfɔi lɛ ji enɔ momo moŋ, shi ebaaná miishɛɛ. Mɛni hewɔ? Ejaakɛ nɔ ni ebiyoo lɛ efee lɛ tsɔɔ akɛ esumɔɔ esane. Eyɛ mli akɛ eyɛ fɔfɔii babaoo yɛ ebɔɔ lɛ mli moŋ, shi eshwɛŋ fɔfɔi ni ebiyoo lɛ kɛhã lɛ lɛ he kwraa. Nakai nɔŋŋ Yehowa náa miishɛɛ kɛ́ wɔjɛ wɔtsuiŋ wɔjɔɔ wɔwala nɔ wɔhã lɛ.​—2 Mo. 34:14.

7. Mɛni Maleaki wie ni hãa wɔnaa bɔ ni Yehowa nuɔ he ehãa yɛ mɛi ni jɛɔ amɛsuɔmɔ mli amɛsɔmɔɔ lɛ lɛ ahe?

⁷ Kanemɔ Maleaki 3:16. Mɛni hewɔ ehe miihia waa ni ojɔɔ ohe nɔ ohã Yehowa ni ohã abaptisi bo lɛ? Eyɛ mli akɛ kɛjɛ be ni aŋɔ bo hɔ beebe lɛ, Yehowa nii ji bo moŋ, shi kɛ́ ojɔɔ ohe nɔ ohã lɛ ni ofee lɛ pɛ esuɔmɔnaa nii lɛ, no hãa anaa akɛ ofiɔ enɔyeli lɛ sɛɛ, ni enɛ hãa enáa miishɛɛ waa. (Abɛi 23:15) Yehowa le mɛi ni jɛɔ amɛtsuiŋ amɛsɔmɔɔ lɛ lɛ, ni ebaaŋma amɛgbɛ́i yɛ ‘ekaimɔ wolo’ lɛ mli.

8, 9. Mɛni Yehowa biɔ ni mɛi ni aŋmala amɛgbɛ́ii yɛ ‘ekaimɔ wolo’ lɛ mli lɛ afee?

 ⁸ Kɛ́ wɔmiisumɔ ni wɔgbɛ́i aya nɔ ahi Yehowa “kaimɔ wolo” lɛ mli lɛ, nibii komɛi yɛ ni esa akɛ wɔfee. Maleaki wie akɛ, esa akɛ ‘wɔshe Yehowa gbeyei ni wɔjwɛŋ egbɛ́i lɛ nɔ.’ Kɛ́ wɔjá mɔ ko loo nɔ kroko lɛ, Yehowa baajie wɔgbɛ́i kɛje “wala wolo” lɛ mli.​—2 Mo. 32:33; Lala 69:28, shn.

⁹ No hewɔ lɛ, eyɛ mli akɛ ehe miihia ni wɔjɔɔ wɔhe nɔ wɔhã Yehowa ni wɔhã abaptisi wɔ moŋ, shi no pɛ kɛkɛ faaa. Nifeemɔi nɛɛ ji nifeemɔi ni wɔfeɔ shi kome pɛ, shi jamɔ ni wɔjáa Yehowa lɛ ji nɔ ko ni wɔfeɔ daa. Be fɛɛ be ni je baatsɛre wɔ lɛ, esa akɛ wɔkɛ wɔnifeemɔi atsɔɔ akɛ wɔboɔ Yehowa toi.​—1 Pet. 4:1, 2.

10. Mɛni baahã ana mɛi ni jáa Yehowa kɛ mɛi ni jáaa lɛ?

¹⁰ Yɛ nikasemɔ ni tsɔ hiɛ lɛ mli lɛ, wɔbana akɛ, eyɛ mli akɛ Kain, Solomon, kɛ Israelbii lɛ kɛɛ amɛmiisɔmɔ Yehowa moŋ, shi amɛyeee lɛ anɔkwa. Be ni wɔsusu amɛsaji lɛ ahe lɛ, wɔna akɛ kɛ́ wɔkɛɛ Yehowa gbɛfaŋ wɔyɔɔ lɛ, belɛ esa akɛ wɔnyɛ efɔŋ ni wɔsumɔ ekpakpa. (Rom. 12:9) No hewɔ lɛ, ebɛ naakpɛɛ akɛ Yehowa wie akɛ ‘abaana srɔto ni yɔɔ jalɔ kɛ mɔ fɔŋ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ lɛ teŋ.’​—Mal. 3:18.

11. Mɛni hewɔ esaaa akɛ ewaa kwraa akɛ mɛi baana akɛ wɔjɔɔ wɔhe nɔ wɔhã Yehowa?

¹¹ Gbɛ kroko ni wɔbaanyɛ wɔtsɔ nɔ wɔtsɔɔ akɛ wɔhiɛ sɔɔ hegbɛ ni Yehowa kɛhã wɔ akɛ ewebii lɛ ji, ni wɔbaahã ‘mɛi fɛɛ ana wɔhiɛyaa lɛ faŋŋ.’ (1 Tim. 4:15; Mat. 5:16) Bi ohe akɛ: ‘Ani mɛi krokomɛi naa faŋŋ akɛ mijɔɔ mihe nɔ kwraa mihã Yehowa? Ani mishashaoɔ shi akɛ mahã mɛi ale akɛ Yehowa Odasefonyo ji mi?’ Kɛ́ Yehowa na akɛ eefee wɔ hiɛgbele akɛ wɔbaahã mɛi ale akɛ edasefoi ji wɔ lɛ, ebaadɔ lɛ waa.​—Lala 119:46; kanemɔ Marko 8:38.

12, 13. Mɛɛ gbɛ nɔ nyɛmimɛi komɛi ehã ewa akɛ mɛi baana akɛ Yehowa Odasefoi ji amɛ?

¹² Mɔbɔ sane ji akɛ, ŋmɛnɛ lɛ, Odasefoi  komɛi ehã je lɛ mumɔ lɛ miikudɔ amɛ. Enɛ hewɔ lɛ, anaaa srɔto ni yɔɔ amɛ kɛ mɛi ni jáaa Yehowa lɛ teŋ. (1 Kor. 2:12) Je lɛ mumɔ lɛ hãa mɛi feɔ ‘nibii ni heloo lɛ shweɔ.’ (Efe. 2:3) Akɛ nɔkwɛmɔnɔ lɛ, eyɛ mli akɛ awo wɔ ŋaa shii abɔ yɛ wɔtadewoo kɛ wɔhesaamɔ he moŋ, shi nyɛmimɛi komɛi kã he amɛmiiwo atadei ni bɛ hiŋmɛi nɔ. Amɛwoɔ atadei ni mɔmɔɔ amɛ pampii loo ni hãa anaa amɛgbɔmɔtso lɛ hei komɛi ni esaaa akɛ anaa lɛ, ni bei komɛi lɛ, amɛwoɔ atadei nɛɛ kɛyaa Kristofoi akpeei ashishi po! Amɛteŋ mɛi komɛi hu yɛ ni yi ni amɛku loo yitsɔi ni amɛfee lɛ bɛ hiŋmɛi nɔ kwraa loo ehãa mɛi ahiɛ feɔ amɛ yaa. (1 Tim. 2:9, 10) Enɛ hewɔ lɛ, kɛ́ amɛyɛ mɛi ateŋ lɛ, anaaa nɔ ko kwraa ni tsɔɔ akɛ Yehowa Odasefoi ji amɛ.​—Yak. 4:4.

¹³ Nyɛmimɛi komɛi hu feɔ nibii krokomɛi ni hãaa esoro amɛ yɛ je lɛ he. Akɛ nɔkwɛmɔnɔ lɛ, kɛ́ amɛtee henaabuamɔi ashishi lɛ, joi ni amɛjoɔ, kɛ nibii krokomɛi ni amɛfeɔ lɛ esaaa Kristofoi. Nyɛmimɛi komɛi hu yɛ ni kɛ́ okwɛ amɛ diɛŋtsɛ amɛhe mfonirii ni amɛsha kɛwo Intanɛt lɛ nɔ kɛ saji ni amɛŋmala yɛ nɔ lɛ, onaa faŋŋ akɛ wekukpaa kpakpa bɛ amɛ kɛ Yehowa teŋ. Ekolɛ amɛyafeko esha ko ni yɔɔ hiɛdɔɔ ni ebaabi ni ajaje amɛ loo ashwie amɛ kɛje asafo lɛ mli, shi amɛbaanyɛ amɛná nyɛmimɛi ni miibɔ mɔdɛŋ koni amɛhã esoro amɛ yɛ je lɛ he lɛ anɔ hewalɛ gbonyo.​—Kanemɔ 1 Petro 2:11, 12.

14. Mɛni esa akɛ wɔfee koni wɔkafite wekukpaa krɛdɛɛ ni yɔɔ wɔ kɛ Yehowa teŋ lɛ?

¹⁴ Aje gbɛ ato nibii fɛɛ ni yɔɔ je lɛ mli lɛ ahe gbɛjianɔ koni amɛhã wɔkɛ wɔjwɛŋmɔ ama “nɔ ni heloo lɛ shweɔ lɛ kɛ nɔ ni hiŋmɛii lɛ shweɔ lɛ” nɔ, ni wɔkɛ ‘nii ni wɔyɔɔ lɛ ashwã.’ (1 Yoh. 2:16) Shi akɛni Yehowa nii ji wɔ hewɔ lɛ, Biblia lɛ kɛɔ wɔ akɛ “wɔtsi wɔhe kɛje bu ni abuuu Nyɔŋmɔ kɛ je lɛŋ akɔnɔi ahe, ni wɔkɛ hiɛshikamɔ kɛ jalɛ kɛ Nyɔŋmɔjamɔ ahi shi yɛ jeŋ ni yɔɔ amrɔ nɛɛ mli.” (Tito 2:12) Esa akɛ wɔwiemɔ, wɔniyeli kɛ wɔninumɔ, wɔtadewoo kɛ wɔhesaamɔ, bɔ ni wɔtsuɔ nii wɔhãa, kɛ nibii krokomɛi fɛɛ  ni wɔfeɔ lɛ ahã mɛi ana akɛ, Yehowa nii ji wɔ.​—Kanemɔ 1 Korintobii 10:31, 32.

15. Mɛni hewɔ esa akɛ wɔkɛ wɔnyɛmimɛi Kristofoi lɛ aye yɛ mlihilɛ kɛ suɔmɔ mli be fɛɛ be lɛ?

¹⁵ Bɔ ni wɔkɛ wɔnyɛmimɛi Kristofoi lɛ yeɔ hãa lɛ hu tsɔɔ kɛji wɔhiɛ sɔɔ wekukpaa krɛdɛɛ ni kã wɔ kɛ Yehowa teŋ lɛ. Yehowa nii ji amɛ hu. Kɛ́ wɔhã sane nɛɛ hi wɔjwɛŋmɔ mli lɛ, no baahã wɔkɛ wɔnyɛmimɛi Kristofoi lɛ aye yɛ mlihilɛ kɛ suɔmɔ mli be fɛɛ be. (1 Tes. 5:15) Enɛ he miihia waa, ejaakɛ Yesu kɛɛ esɛɛnyiɛlɔi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.”​—Yoh. 13:35.

16. Mɛni awie yɛ Mose Mla lɛ mli ni hãa wɔnaa bɔ ni Yehowa nuɔ he ehãa yɛ ewebii lɛ ahe?

¹⁶ Nɔ ko ni awie yɛ Mose Mla lɛ mli lɛ hãa wɔnaa bɔ ni esa akɛ wɔkɛ wɔnyɛmimɛi Kristofoi lɛ aye ahã. Akɛ tsɛnsii kɛ nibii krokomɛi ni yɔɔ Yehowa sɔlemɔ shĩa lɛ tsu nii yɛ Yehowa jamɔ pɛ mli. Mose Mla lɛ tsɔɔ bɔ ni akwɛ nibii nɛɛ anɔ ahã, ni awie yɛ Mla lɛ mli akɛ kɛ́ mɔ ko kɛ gbɛtsɔɔmɔi nɛɛ tsuuu nii lɛ, agbe lɛ. (4 Mo. 1:50, 51) Kɛ́ Yehowa hã ehiɛ hi tsɛnsii kɛ nibii krokomɛi ni wala bɛ amɛmli ni akɛtsuɔ nii yɛ ejamɔ mli lɛ ahe lɛ, ani ehãŋ ehiɛ ahi bɔ ni akɛ etsuji anɔkwafoi ni ejɔɔ amɛhe nɔ amɛhã lɛ lɛ yeɔ hãa lɛ he? Be ko lɛ, Yehowa kɛɛ ewebii lɛ akɛ: “Mɔ fɛɛ mɔ ni taa nyɛhe lɛ, eeta mihiŋmɛi mli ajaŋmalaatɛ he.”​—Zak. 2:8.

17. Yehowa hiɛ yɛ mɛni nɔ?

¹⁷ Maleaki wie akɛ, Yehowa hiɛ yɛ bɔ ni ewebii lɛ kɛ amɛhe yeɔ hãa lɛ he. (Mal. 3:16) Anɔkwa, “Yehowa le mɛi ni ji enii lɛ.” (2 Tim. 2:19) Enaa nɔ fɛɛ nɔ ni wɔfeɔ, ni enuɔ nɔ fɛɛ nɔ ni wɔwieɔ. (Heb. 4:13) Kɛ́ wɔkɛ wɔnyɛmimɛi Kristofoi lɛ yeee jogbaŋŋ lɛ, Yehowa naa. Kɛ́ wɔfee amɛ gbɔ, wɔke amɛ nii, wɔkɛ amɛhe ke amɛ, ni wɔmli hi yɛ amɛnɔ lɛ, bɔ fɛɛ bɔ ni fee lɛ, Yehowa baana no hu.​—Heb. 13:16; 1 Pet. 4:8, 9.

18. Mɛni kɛ mɛni wɔbaanyɛ wɔfee kɛtsɔɔ akɛ wɔhiɛ sɔɔ hegbɛ ni wɔná akɛ Yehowa webii ji wɔ lɛ?

¹⁸ Wɔmiisumɔ ni wɔhã Yehowa ana akɛ, wɔhiɛ sɔɔ hegbɛ ni ehã wɔ akɛ ewebii lɛ. Wɔle akɛ, nilee yɛ mli akɛ wɔjɛ wɔtsuiŋ wɔjɔɔ wɔhe nɔ wɔhã lɛ, ejaakɛ enii ji wɔ. Ni eyɛ mli akɛ, wɔyɛ “yinɔ kɔɔdɔŋ ni bɛ eŋɛlɛ nɔ nɛɛ teŋ” moŋ, shi wɔbaanyɛ wɔhi shi akɛ “mɛi ni shwamɔ ko bɛ amɛhe,” ni ‘wɔfee krɔŋŋ, ni wɔtso akɛ kanei yɛ je lɛ mli.’ (Fip. 2:15) Wɔtswa wɔfai shi akɛ wɔfeŋ nibii ni esaaa Yehowa hiɛ. (Yak. 4:7) Agbɛnɛ hu, wɔsumɔɔ wɔnyɛmimɛi Kristofoi lɛ ni wɔjieɔ bulɛ kpo wɔtsɔɔ amɛ, ejaakɛ amɛ hu Yehowa nii ji amɛ.​—Rom. 12:10.

19. Mɛɛ gbɛ nɔ Yehowa jɔɔ mɛi ni ji enii lɛ?

¹⁹ Biblia lɛ kɛɔ akɛ: “Yehowa shiŋ ewebii lɛ.” (Lala 94:14) Wɔle akɛ bɔ fɛɛ bɔ ni fee lɛ, Yehowa baaye shiwoo nɛɛ nɔ, ni kɛ́ wɔgboi tete lɛ, ehiɛ kpaŋ wɔnɔ. (Rom. 8:38, 39) “Kɛ́ wɔhiɛ kã lɛ, wɔhiɛ kã koni wɔkɛwo Yehowa hiɛnyam, ni kɛ́ wɔgboi hu lɛ, wɔgboi koni wɔkɛwo Yehowa hiɛnyam. No hewɔ lɛ, kɛ́ wɔhiɛ kã jio, wɔgboi jio, Yehowa nii ji wɔ.” (Rom. 14:8) Wɔkɛ miishɛɛ miikpa be ni Yehowa baatee enanemɛi anɔkwafoi ni egboi lɛ fɛɛ ashi kɛba wala mli ekoŋŋ lɛ gbɛ waa. (Mat. 22:32) Amrɔ nɛɛ po lɛ, Yehowa miijɔɔ wɔ waa. Nɔ ni Biblia lɛ wie lɛ ji anɔkwale, akɛ: “Jeŋmaŋ ni Yehowa ji e-Nyɔŋmɔ lɛ yɛ miishɛɛ, maŋ ni ehala akɛ lɛ diɛŋtsɛ enii lɛ.”​—Lala 33:12.