HENOK hi shi aaafee afii 5,000 ni eho nɛ. Eye afii 365 dani egbo​—ni tsɔɔ akɛ, efii lɛ ku bɔ he toi ejwɛ kɛ́ akɛto afii ni wɔyeɔ ŋmɛnɛ dani wɔgboiɔ lɛ he, ni enɛ ji nɔ ko ni ekolɛ ebaawa kɛhã wɔ akɛ wɔbaanu shishi. Shi no mli lɛ, egbɔko tsɔ. Nakai beiaŋ lɛ, gbɔmɛi tsɛɔ yɛ jeŋ kwraa fe bianɛ. Be ni afɔ Henok lɛ, no mli lɛ, Adam, ni ji klɛŋklɛŋ gbɔmɔ lɛ ehi shi nɔ ni fe afii 600, ni esaa ehi shi afii 300 efata he dani egbo! Adam shwiei lɛ ekomɛi po hi shi tsɛ kwraa fe nakai. No hewɔ lɛ, be ni Henok ye afii 365 lɛ, eeenyɛ efee akɛ no mli lɛ eyɛ hewalɛ bɔ ni sa, tamɔ nuu ko ni baanyɛ ahi shi afii babaoo lolo. Shi nibii eyabaaa lɛ nakai.

Etamɔ nɔ ni Henok eyaje oshara kpele ko mli. Bo lɛ feemɔ he mfoniri ni eeejo foi eyatee ehe, ni enyɛɛɛ ejie bɔ ni mɛi ni ejaje Nyɔŋmɔ sane lɛ etsɔɔ lɛ fee amɛnii amɛhã lɛ kɛjɛ ejwɛŋmɔ mli. Amɛmli ewo la naakpa. Amɛtaooo ni amɛbaana ehiɛ. Amɛsumɔɔɔ sane ni ejaje lɛ, ni amɛnyɛɔ Nyɔŋmɔ, mɔ ni tsu lɛ hu. Amɛle akɛ amɛnyɛŋ amɛkɛ amɛnine ata Yehowa, ni ji Henok Nyɔŋmɔ lɛ he, shi Henok lɛ, amɛbaanyɛ lɛ! Ekolɛ Henok shwie eyiŋ kɛji ebaana eweku lɛ ekoŋŋ. Ani esusu eŋa kɛ ebiyei loo ebinuu Metusela loo enabi Lamek he? (1 Mose 5:21-23, 25) Ani enɛ kɛ ewala baaba naagbee?

Henok ji mɔ ko ni aleee ehe sane tsɔ yɛ Biblia lɛ mli. Biblia mli saji etɛ komɛi ni sɛɛ kɛlɛɛɛ amli pɛ awie ehe yɛ. (1 Mose 5:21-24; Hebribii 11:5; Yuda 14, 15) Shi nakai saji lɛ hãa wɔnaa nɔ gbɔmɔ ni nuu ni yɔɔ hemɔkɛyeli kpele nɛɛ ji. Ani oyɛ weku ko ni ookwɛ? Ani ehe ebahia ni okɛ ekãa afã nɔ ko ni ole akɛ eja lɛ he dã? Kɛ́ nakai ni lɛ, obaanyɛ oná Henok hemɔkɛyeli lɛ he sɛɛ waa.

Be ni afɔ Henok lɛ, no mli lɛ, adesai miifee nibii fɔji. Eji yinɔ ni ji kpawo nɔ kɛjɛ Adam nɔ. Nakai beiaŋ lɛ, adesai kɛ emuuyeli ni ŋmɛɛ Adam kɛ Hawa lɛ teŋ jekɛɛɛ. No hewɔ ni mɛi ni hi shi yɛ nakai beiaŋ lɛ awala sɛɛ tsɛɔ waa nakai lɛ. Kɛ̃lɛ, amɛjeŋba ekpɔtɔ kwraa, ni amɛjáaa Nyɔŋmɔ hu. Awuiyeli yɛ he fɛɛ he. Kɛjɛ yinɔ ni ji enyɔ, ni ji be ni Kain gbe enyɛmi Habel lɛ nɔ tɔɔ ni awuiyeli nifeemɔ nɛɛ je shishi. Etamɔ nɔ ni eŋɔɔ Kain seshibii lɛ ateŋ mɔ kome naa akɛ eji awuiyelɔ, ni toɔ mɔ najiaŋ fe Kain! Shi be ni shɛɔ yinɔ ni ji etɛ lɛ nɔ lɛ, efɔŋfeemɔ lɛ mli ewo wu kwraa. Mɛi bɔi Yehowa gbɛ́i lɛ tsɛmɔ, shi jeee kɛ yiŋtoo lɛ akɛ amɛkɛ woo miihã lɛ yɛ jamɔ hewɔ. Eyɛ faŋŋ akɛ, amɛmiibɔ musu yɛ bɔ ni amɛkɛ Nyɔŋmɔ gbɛ́i ni yɔɔ krɔŋkrɔŋ lɛ tsuɔ nii amɛhãa lɛ hewɔ, ni amɛjieee bulɛ ko kpo yɛ he.​—1 Mose 4:8, 23-26.

Eeenyɛ efee akɛ, nakai jamɔ gbonyo lɛ he shi waa yɛ Henok beiaŋ. Hewɔ lɛ be ni Henok daa lɛ, ehe bahia ni ekpɛ eyiŋ jogbaŋŋ. Ani ekɛ ehe baadɔmɔ jamɔ ni mɔ fɛɛ mɔ kɛ ehe woɔ mli lɛ? Aloo ebaatao Yehowa, ni ji anɔkwa Nyɔŋmɔ ni fee ŋwɛi kɛ shikpɔŋ lɛ sɛɛgbɛ? Ekolɛ be ni Henok kase Habel, ní já Yehowa jogbaŋŋ, ní gbo akɛ lá odasefonyo lɛ he nii lɛ, ewo lɛ hewalɛ waa. Henok kpɛ mli akɛ lɛ hu ebaajá Yehowa tamɔ Habel fee lɛ. Hewɔ lɛ 1 Mose 5:22 lɛ kɛɔ wɔ akɛ: “Henok kɛ Nyɔŋmɔ nyiɛ.” Sane ni  sa kadimɔ waa nɛɛ hãa wɔnaa Henok akɛ mɔ ko ni já Nyɔŋmɔ yɛ jeŋ fɔŋ ko mli. Lɛ ji klɛŋklɛŋ mɔ ni Biblia lɛ wie ehe nakai.

Nakai kuku lɛ nɔŋŋ hãa wɔleɔ akɛ, Henok tee nɔ ekɛ Nyɔŋmɔ nyiɛ be ni efɔ ebinuu Metusela sɛɛ. Enɛ hãa wɔnaa akɛ, Henok ná weku be ni eye aaafee afii 65 lɛ. Eyɛ ŋa, shi Biblia lɛ etsĩii egbɛ́i tã, ni eyɛ “bihii kɛ biyei” ni atsɔɔɔ amɛyibɔ hu. Ja tsɛ ko tsɔseɔ ebii, ni ekwɛɔ eweku yɛ gbɛ ni Nyɔŋmɔ kpɛlɛɔ nɔ lɛ nɔ, dani abaanyɛ awie yɛ ehe akɛ ekɛ Nyɔŋmɔ miinyiɛ. Henok na akɛ, Yehowa miikpa lɛ gbɛ akɛ eye eŋa lɛ anɔkwa be fɛɛ be. (1 Mose 2:24) Ni lɛɛlɛŋ, ebɔ mɔdɛŋ fɛɛ ni eeenyɛ kɛtsɔɔ ebiii lɛ Yehowa Nyɔŋmɔ he nii. Mɛni jɛ mli kɛba?

Biblia lɛ etsɔɔɔ bɔ ni nibii tee nɔ hã lɛ mli fitsofitso. Biblia lɛ ewieee nɔ ko nɔ ko yɛ Henok binuu Metusela, mɔ ni ná afii babaoo fe mɔ fɛɛ mɔ ni Biblia lɛ bɔ ehe amaniɛ, ni hi shi dani Nu Afua lɛ ba lɛ he. Kɛ̃lɛ, Metusela fɔ binuu ko, ni ewo lɛ gbɛ́i Lamek. Lamek hi shi ni ena enii Henok nɔ ni fe afii 100. Lamek bada ni ejie hemɔkɛyeli ni sa kadimɔ waa kpo. Yehowa kɛ mumɔ tsirɛ Lamek ni egba kɛkɔ Noa, ni ji ebinuu lɛ he, ni nakai gbalɛ lɛ ba mli yɛ Nu Afua lɛ sɛɛ. Awie yɛ Noa hu he akɛ ekɛ Nyɔŋmɔ nyiɛ, taakɛ enanakaŋsowa Henok fee lɛ. Noa ebaninaaa Henok. Shi Henok fee nɔkwɛmɔnɔ ni nɔ bɛ efɔ̃ shi. Noa baanyɛ akase nɔkwɛmɔnɔ kpakpa ni lɛ diɛŋtsɛ epapa Lamek fee efɔ̃ shi lɛ, loo kɛjɛ enii Metusela loo ekolɛ kɛjɛ Yared, ni ji Henok papa ni gbo be ni no mli lɛ Noa eye afii 366 lɛ dɛŋ.​—1 Mose 5:25-29; 6:9; 9:1.

Susumɔ srɔto ni yɔɔ Henok kɛ Adam teŋ lɛ he okwɛ. Eyɛ mli akɛ Adam eye emuu moŋ, shi etse Yehowa hiɛ atua, ni enɛ hã eshwiei lɛ batsɔmɔ eshafeelɔi, ni enɛ kɛ haomɔi ba amɛnɔ. Yɛ Henok gbɛfaŋ lɛ, eyeee emuu moŋ, shi ekɛ Nyɔŋmɔ nyiɛ, ni efee hemɔkɛyeli he nɔkwɛmɔnɔ efɔ̃ shi ehã eshwiei lɛ. Adam gbo be ni Henok eye afii 308. Ani Adam shwiei lɛ ye amɛblematsɛ nɛɛ, mɔ ni ŋkomeŋfa su eyi lɛ obɔ lɛ he awerɛho be ni egbo lɛ? Wɔleee. Fɛɛ sɛɛ lɛ, Henok “kɛ Nyɔŋmɔ nyiɛ.”​—1 Mose 5:24.

Kɛ́ ookwɛ weku ko lɛ, susumɔ nɔ ni obaanyɛ okase kɛjɛ Henok hemɔkɛyeli lɛ mli lɛ he okwɛ. Eyɛ mli akɛ ehe miihia ni otsu oweku lɛ heloonaa hiamɔ nii ahe nii moŋ, shi nɔ ni he hiaa amɛ fe fɛɛ lɛ ji wekukpaa ni yɔɔ amɛ kɛ Nyɔŋmɔ teŋ lɛ. (1 Timoteo 5:8) Obaanyɛ otsɔ owiemɔ kɛ onifeemɔ nɔ otsu hiamɔ nɛɛ he nii. Kɛ́ ohala akɛ okɛ Nyɔŋmɔ baanyiɛ taakɛ Henok fee lɛ, ni ohã Nyɔŋmɔ shishitoo mlai ni ajɛ mumɔŋ aŋmala lɛ kudɔ bo yɛ oshihilɛ mli lɛ, bo hu obaafee nɔkwɛmɔnɔ kpakpa ohã oweku lɛ ni amɛkase.

Ekolɛ Henok nu shoofeemɔ he akɛni lɛ pɛ ejieɔ hemɔkɛyeli kpo yɛ nakai beiaŋ lɛ hewɔ. Shi ani Yehowa, ni ji e-Nyɔŋmɔ lɛ kadi ehemɔkɛyeli lɛ? Hɛɛ ekadi. Gbi ko lɛ, Yehowa kɛ etsulɔ anɔkwafo nɛɛ gba sane. Nyɔŋmɔ hã Henok sane ko ni eyajaje etsɔɔ mɛi ni yɔɔ ebeiaŋ lɛ. Enɛ hã Henok batsɔ gbalɔ, ni lɛ ji klɛŋklɛŋ gbalɔ ni aŋma esane lɛ yɛ Biblia lɛ mli. Wɔle enɛ, ejaakɛ akɛ mumɔ tsirɛ Yuda, ni ji  Yesu nyɛ bi lɛ lɛ, ni eŋma Henok gbalɛ wiemɔi lɛ efɔ̃ shi yɛ afii babaoo sɛɛ. *

Mɛni Henok gba? Egba akɛ: “Naa! Yehowa kɛ ekrɔŋkrɔŋbii akpei nyɔŋmai abɔ lɛ ba koni ebakojo mɛi fɛɛ, ni ebu mɛi fɛɛ ni ebuuu Nyɔŋmɔ lɛ fɔ yɛ amɛnishaianii fɛɛ ni amɛfee kɛtsɔɔ akɛ amɛsheee Nyɔŋmɔ gbeyei lɛ, kɛ wiemɔi ni wawai fɛɛ ni nɔshafeelɔi ni ebuuu Nyɔŋmɔ lɛ wie amɛshi lɛ lɛ hewɔ.” (Yuda 14, 15) Ekolɛ nɔ klɛŋklɛŋ ni obaakadi ji akɛ, Henok wie tamɔ nɔ ni sane ni ewieɔ lɛ eho momo, oookɛɛ Nyɔŋmɔ etsu gbalɛ lɛ he nii momo. Nɛkɛ ji bɔ ni gbalɛi ni agba kɛnyiɛ sɛɛ lɛ hu pii tee lɛ ehã. Oti lɛ ji akɛ: Gbalɔ lɛ miiwie nɔ ko ni bɔ fɛɛ bɔ ni fee lɛ ebaaba mli lɛ he, no hewɔ lɛ abaanyɛ awie he tamɔ nɔ ni eba mli momo!​—Yesaia 46:10.

Te Henok nu he ehã tɛŋŋ be ni ejaje nakai wiemɔi lɛ, ekolɛ kɛtsɔ shiɛmɔ ni eshiɛ etsɔɔ mɔ fɛɛ mɔ ni baanu lɛ nɔ lɛ? Kadimɔ bɔ ni kɔkɔbɔɔ lɛ yɔɔ hiɛdɔɔ hã​—ekɛ wiemɔi tamɔ, “mɛi fɛɛ ni ebuuu Nyɔŋmɔ,” “amɛnishaianii,” kɛ “amɛsheee Nyɔŋmɔ gbeyei” tsu nii kɛwie eshi gbɔmɛi lɛ, kɛ bɔ ni amɛfeɔ amɛnii amɛhãa lɛ. Belɛ, gbalɛ lɛ bɔ adesai fɛɛ ni hi shi yɛ nakai beiaŋ lɛ kɔkɔ akɛ, shihilɛ mli ni amɛyɔɔ kɛjɛ be ni ashwie Adam kɛ Hawa kɛjɛ Eden trom lɛ mli lɛ sɛɛ lɛ ekpɔtɔ kwraa. Yehowa kɛ “ekrɔŋkrɔŋbii akpei nyɔŋmai abɔ,” ni ji ŋwɛibɔfoi akpei abɔ ni yɔɔ hewalɛ waa ni amɛfee klalo kɛhã ta lɛ baabakpãta jeŋ ni ekpɔtɔ nɛɛ hiɛ kwraa. Henok kome pɛ jaje sane ni jɛ Nyɔŋmɔ ŋɔɔ nɛɛ, ní esheee gbeyei! Eeenyɛ efee akɛ, Lamek, ni no mli lɛ eji oblanyo fioo lɛ naa kpɛ ehe yɛ ekãa ni enii jie lɛ kpo lɛ he. Kɛ́ nakai sane lɛ ji lɛ, wɔbaanyɛ wɔnu lɛ shishi.

Henok hemɔkɛyeli lɛ baanyɛ atsirɛ wɔ ni wɔbi wɔhe kɛji wɔnaa jeŋ ni wɔyɔɔ mli nɛɛ tamɔ bɔ ni Nyɔŋmɔ naa lɛ lɛ. Fɔbuu kojomɔ ni Henok jaje lɛ tsakeko; ekɔɔ jeŋ ni wɔyɔɔ mli nɛɛ he, taakɛ eji yɛ Henok beiaŋ lɛ nɔŋŋ. Yɛ kɔkɔ ni Henok bɔ lɛ naa lɛ, Yehowa kɛ Nu Afua kpata nakai jeŋ fɔŋ lɛ hiɛ yɛ Noa beiaŋ. Shi nakai je lɛ hiɛkpatamɔ lɛ fee hiɛkpatamɔ wulu ko ni baaba lɛ he mfoniri. (Mateo 24:38, 39; 2 Petro 2:4-6) Ŋmɛnɛ lɛ, Nyɔŋmɔ efee klalo akɛ ebaatsɔ ekrɔŋkrɔŋbii akpei nyɔŋmai abɔ lɛ anɔ ekojo jeŋ fɔŋ nɛɛ yɛ jalɛ naa. Esa akɛ wɔteŋ mɔ fɛɛ abo Henok kɔkɔbɔɔ lɛ toi, ni ehã mɛi krokomɛi ale. Ekolɛ wɔwekumɛi kɛ wɔnanemɛi kɛ wɔ kpaŋ gbee. Wɔbaanyɛ wɔnu shoofeemɔ he bei komɛi. Shi Yehowa shiii Henok; ni eshiŋ etsuji anɔkwafoi ni yɔɔ ŋmɛnɛ lɛ hu!

Te Henok shihilɛ lɛ naa yakpa hã tɛŋŋ? Yɛ gbɛ ko nɔ lɛ, gbɛ nɔ ni etsɔ egbo lɛ yɛ naakpɛɛ kwraa fe nibii ni tee nɔ be ni eyɔɔ wala mli lɛ. Sane ni yɔɔ Mose Klɛŋklɛŋ Wolo lɛ kɛɔ kɛkɛ akɛ: “Henok kɛ Nyɔŋmɔ nyiɛ, ni anaaa lɛ, ejaakɛ Nyɔŋmɔ ŋɔ lɛ kɛtee.” (1 Mose 5:24) Mɛɛ gbɛ nɔ Nyɔŋmɔ tsɔ eŋɔ Henok kɛtee? Bɔfo Paulo tsɔɔ mli yɛ sɛɛ mli akɛ: “Hemɔkɛyeli hewɔ ajie Henok kɛtee koni ekana gbele, ni anaaa lɛ yɛ he ko he ko ejaakɛ Nyɔŋmɔ jie lɛ kɛtee; ejaakɛ dani abaajie lɛ kɛya lɛ, aye ehe odase atsɔɔ lɛ akɛ esa Nyɔŋmɔ hiɛ jogbaŋŋ.” (Hebribii 11:5) Mɛni Paulo tsɔɔ lɛ, be ni ekɛɛ “ajie Henok kɛtee koni ekana gbele” lɛ? Biblia shishitsɔɔlɔi komɛi kɛɔ akɛ, Nyɔŋmɔ ŋɔ Henok kɛtee ŋwɛi. Shi enɛ nyɛŋ efee anɔkwale. Biblia lɛ hãa wɔleɔ akɛ, Yesu Kristo ji klɛŋklɛŋ mɔ ni atee lɛ shi kɛtee ŋwɛi.​—Yohane 3:13.

Belɛ, mɛɛ shishinumɔ naa “ajie Henok kɛtee koni ekana gbele” lɛ? Eeenyɛ efee akɛ, Yehowa ŋɔ Henok kɛjɛ wala mli kɛtee gbele mli, koni ekatsɔ piŋmɔ mli dani egbo. Shi dani abaaŋɔ lɛ kɛya lɛ, “aye ehe  odase atsɔɔ lɛ akɛ esa Nyɔŋmɔ hiɛ jogbaŋŋ.” Yɛ mɛɛ gbɛ nɔ? Ekolɛ be ni eshwɛ be fioo ni Henok baagbo lɛ, Nyɔŋmɔ jie ninaa ko kpo etsɔɔ lɛ, ni ena ni shikpɔŋ lɛ etsɔ paradeiso. Be ni Yehowa jie ninaa ni hã Henok na faŋŋ akɛ ekpɛlɛɔ enɔ lɛ etsɔɔ lɛ lɛ sɛɛ lɛ, Henok gbo. Bɔfo Paulo ŋma yɛ Henok kɛ hii kɛ yei anɔkwafoi krokomɛi ahe akɛ: “Hemɔkɛyeli mli mɛnɛɛmɛi fɛɛ gboi yɛ.” (Hebribii 11:13) No sɛɛ lɛ, ekolɛ ehenyɛlɔi lɛ tao egbonyo lɛ, shi ‘amɛnaaa yɛ he ko he ko.’ Eeenyɛ efee akɛ akɛni Yehowa hã egbonyo lɛ laaje hewɔ lɛ, amɛnyɛɛɛ amɛfite lɛ loo ni amɛkɛbaatsu nii yɛ apasa jamɔ mli. *

Belɛ, yɛ nɔ ni Ŋmalɛi lɛ ehã wɔle nɛɛ naa lɛ, hã wɔkwɛ akɛ wɔbaanyɛ wɔfee bɔ ni ekolɛ Henok wala ba naagbee lɛ he mfoniri lo. Feemɔ shihilɛ nɛɛ he mfoniri okwɛ, ni ohã ehi ojwɛŋmɔŋ akɛ, ebaanyɛ efee gbɛ kome nɔ ni Henok tsɔ egbo. Henok miijo ehenyɛlɔi lɛ anaa foi, ni etsui miitswa kpalakpala. Ehenyɛlɔi lɛ miitiu lɛ, ni amɛmli efu naakpa yɛ kojomɔ saji lɛ ahewɔ. Henok tao he ko eta koni ewo etsui fioo, shi ele akɛ enyɛŋ eya nɔ etee ehe. Etamɔ nɔ ni kɛ́ nine gbe lɛ lɛ, abaatserɛ emli basabasa. Be ni ewoɔ etsui lɛ, esɔle ehã e-Nyɔŋmɔ lɛ. Nɔŋŋ kɛkɛ ni ena ninaa ko ni hã etsui nyɔ emli. Ninaa nɛɛ gbala Henok jwɛŋmɔ kɛtee he ko shɔŋŋ, ni enu he tamɔ nɔ ni eyɛ jɛmɛ diɛŋtsɛ.

Feemɔ he mfoniri, ni agbele nɔ ko naa aatsɔɔ lɛ, ni eeena jeŋ ko ni esoro no kwraa yɛ nɔ ni eyɔɔ mli lɛ he. Etamɔ Eden abɔɔ fɛfɛo lɛ nɔŋŋ, shi kerubim bɛ jɛmɛ ni baatsĩ adesai anaa koni amɛkanyɛ amɛbote mli. Ena hii kɛ yei babaoo ní amɛ fɛɛ amɛyɛ gbɔmɔtsoŋ hewalɛ waa. Toiŋjɔlɛ yɛ amɛteŋ. Hetsɛ̃ kɛ jamɔ mli yiwaa ni yaa nɔ yɛ he ni Henok yɔɔ lɛ eko kwraa bɛ jɛmɛ. Henok na akɛ Yehowa fĩ esɛɛ, esumɔɔ lɛ, ni ekpɛlɛɔ enɔ. Ená nɔmimaa akɛ, biɛ nɔŋŋ ji he ni esa akɛ ehi; lɛ diɛŋtsɛ eshĩa nɛ. Be ni Henok nu he akɛ etoiŋ ejɔ lɛ lɛ sɛɛ lɛ, eŋa ehiŋmɛii, ni etsɔ mli ewɔ vii.

Shihilɛ nɛɛ mli eyɔɔ kɛbashi ŋmɛnɛ​—ewɔ yɛ gbele mli, ni eyɛ Yehowa Nyɔŋmɔ kaimɔ mli daa! Taakɛ Yesu wo shi yɛ sɛɛ mli lɛ, gbi ko baaba ni mɛi fɛɛ ni yɔɔ Nyɔŋmɔ kaimɔ mli lɛ baanu Kristo gbee, ni amɛbaaje kpo kɛaajɛ amɛgbohii abui lɛ amli, ni be ni amɛbaagbele amɛhiŋmɛii lɛ, naa jeŋ hee fɛfɛo ko ni toiŋjɔlɛ yɔɔ mli.​—Yohane 5:28, 29.

Ani obaasumɔ ni ohi jɛmɛ? Bo lɛ feemɔ miishɛɛ ni obaaná kɛ́ okɛ Henok kpe lɛ he mfoniri okwɛ. Susumɔ nibii ni yɔɔ miishɛɛ ni wɔbaanyɛ wɔbaakase kɛjɛ edɛŋ lɛ he okwɛ! Ekolɛ ebaahã wɔle kɛji bɔ ni wɔfee bɔ ni eshihilɛ lɛ naa yakpa hã lɛ he mfoniri lɛ ja. Shi nɔ ko yɛ ni he miihia waa ni esa akɛ wɔkase yɛ ehe amrɔ nɛɛ. Be ni Paulo ewie Henok he egbe naa lɛ, etee nɔ ewie akɛ: “Kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ.” (Hebribii 11:6) Hɛɛ, wɔteŋ mɔ fɛɛ mɔ yɛ yiŋtoo kpakpa ni ebaanyɛ edamɔ nɔ ekase Henok hemɔkɛyeli ni mli wa waa lɛ!