Kɛ́ ootao ole mɔ ko lɛ, ekolɛ nɔ klɛŋklɛŋ ni obaafee ji, obaabi lɛ akɛ, “Te atsɛɔ bo tɛŋŋ?” Kɛ́ oná hegbɛ akɛ obaabi Nyɔŋmɔ nakai lɛ, mɛni ebaakɛɛ?

“Miji Yehowa. Migbɛ́i ji no.”​—Yesaia 42:8.

Gbɛ́i lɛ he hiaa Nyɔŋmɔ. Jeee mɔ ko ni hala gbɛ́i nɛɛ ehã Nyɔŋmɔ; lɛ diɛŋtsɛ ehala ehã ehe. Yehowa wie akɛ: “Enɛ ji migbɛ́i kɛmiiya naanɔ, ni nɛkɛ ji bɔ ni akai mi kɛjɛ yinɔ kome nɔ kɛya yinɔ kroko nɔ.” (2 Mose 3:15) Nyɔŋmɔ gbɛ́i lɛ jeɔ kpo yɛ Biblia lɛ mli fe egbɛnaa gbɛ́i tamɔ Ofe, Tsɛ, Nuŋtsɔ, loo Nyɔŋmɔ, kɛ ekrokomɛi lɛ fɛɛ, ni ejeɔ kpo hu fe gbɛ́ii krokomɛi fɛɛ, tamɔ Abraham, Mose, David, loo Yesu. Agbɛnɛ hu, Yehowa miisumɔ ni mɛi ale egbɛ́i lɛ. Biblia lɛ kɛɔ akɛ: “Hã mɛi ale akɛ, bo ni ogbɛ́i ji Yehowa lɛ, bo okome too ji Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ.”​—Lala 83:18.

Gbɛ́i lɛ he hiaa Yesu. Yesu tsɔɔ esɛɛnyiɛlɔi lɛ yɛ sɔlemɔ ni atsɛɔ lɛ Wɔtsɛ Ni Yɔɔ Ŋwɛi, loo Nuŋtsɔ Lɛ Sɔlemɔ lɛ mli akɛ, amɛkpa Nyɔŋmɔ fai akɛ: “Ogbɛ́i lɛ he atse.” (Mateo 6:9) Yesu diɛŋtsɛ sɔle ehã Nyɔŋmɔ akɛ: “Ataa, wo ogbɛ́i lɛ hiɛ nyam.” (Yohane 12:28) Ehã Nyɔŋmɔ gbɛ́i lɛ hiɛ nyam ni ebaawo lɛ he hia lɛ waa, ni no hewɔ lɛ, ewie yɛ sɔlemɔ mli akɛ: “Mihã amɛle ogbɛ́i lɛ, ni masaa mafee nakai.”​—Yohane 17:26.

Gbɛ́i lɛ he hiaa mɛi ni le Nyɔŋmɔ lɛ. Nyɔŋmɔ webii ni hi shi yɛ blema lɛ le akɛ, kɛ́ Nyɔŋmɔ baabu amɛhe loo ebaahere amɛyiwala lɛ, ebaafee nakai yɛ  egbɛ́i ni yɔɔ srɔto lɛ hewɔ. “Yehowa gbɛ́i lɛ ji mɔɔ ni wa. No mli jalɔ sháa foi kɛyaa, ni abuɔ ehe.” (Abɛi 18:10) “Mɔ fɛɛ mɔ ni boɔ tsɛɔ Yehowa gbɛ́i lɛ, abaahere eyiwala.” (Yoel 2:32) Biblia lɛ hãa wɔnaa akɛ, Nyɔŋmɔ gbɛ́i lɛ baahã ayɔse mɛi ni jáa lɛ lɛ. “Ejaakɛ majimaji lɛ fɛɛ ateŋ mɔ fɛɛ mɔ baanyiɛ yɛ enyɔŋmɔ gbɛ́i mli, shi wɔ lɛ, wɔbaanyiɛ yɛ Yehowa, wɔ-Nyɔŋmɔ lɛ, gbɛ́i mli kɛya naanɔi anaanɔ.”​—Mika 4:5; Bɔfoi 15:14.

Gbɛ́i lɛ hãa anaa mɔ tuuntu ni Nyɔŋmɔ ji. Biblia he nilelɔi pii kɛɛ gbɛ́i Yehowa lɛ shishi ji, “Ehãa Etsɔɔ.” Be ni Yehowa Nyɔŋmɔ kɛ Mose wieɔ lɛ, ehã ana nɔ ni egbɛ́i lɛ shishi ji. Ewie yɛ lɛ diɛŋtsɛ ehe akɛ: “Matsɔ Nɔ Ni Misumɔɔ Ni Matsɔ.” (2 Mose 3:14) No hewɔ lɛ, Nyɔŋmɔ gbɛ́i lɛ hãa anaa akɛ, lɛ ji Bɔlɔ ni hãa nɔ fɛɛ nɔ baa shihilɛ mli. Shi jeee no pɛ egbɛ́i lɛ hãa wɔnaa. Ehãa wɔnaa akɛ, ebaanyɛ etsɔ ehe nɔ fɛɛ nɔ ni he baahia koni eyiŋtoo aba mli, ni ebaanyɛ ehã ebɔɔ nii lɛ atsɔ nɔ fɛɛ nɔ ni he baahia koni eyiŋtoo aba mli. Nyɔŋmɔ gbɛnaa gbɛ́ii lɛ hãa anaa gbɛhe, hegbɛ, kɛ hewalɛ ni eyɔɔ, shi egbɛ́i Yehowa lɛ pɛ hãa anaa mɔ tuuntu ni eji, kɛ nɔ ni ebaanyɛ etsɔ ehe.

Gbɛ́i lɛ hãa anaa akɛ Nyɔŋmɔ jwɛŋɔ wɔhe. Nyɔŋmɔ gbɛ́i lɛ shishi tsɔɔ akɛ, ebɔɔ nii lɛ fɛɛ, ni wɔ hu wɔfata he lɛ, asane kã etsui nɔ be fɛɛ be. Agbɛnɛ hu, le ni Nyɔŋmɔ ehã wɔle egbɛ́i lɛ hãa wɔnaa akɛ, eesumɔ ni wɔle lɛ. Etsɔɔ wɔ egbɛ́i be ni ebako wɔjwɛŋmɔ mli po akɛ wɔbaabi lɛ. No hewɔ lɛ, eyɛ faŋŋ akɛ, Nyɔŋmɔ miisumɔ ni wɔna lɛ akɛ mɔ ko ni yɔɔ diɛŋtsɛ ni wɔbaanyɛ wɔtsi wɔbɛŋkɛ lɛ, shi jeee nyɔŋmɔ ko ni anaaa lɛ, ni kɛ wɔ teŋ jekɛ.​—Lala 73:28.

Kɛ́ wɔkɛ Nyɔŋmɔ gbɛ́i lɛ tsu nii lɛ, etsɔɔ akɛ wɔsumɔɔ lɛ. Ŋɔɔ lɛ akɛ, okɛɛ mɔ ko ni ootao okɛ lɛ abɔ naanyo lɛ akɛ, ekɛ ogbɛ́i atsɛ bo. Kɛji be fɛɛ be lɛ, ekɛ gbɛ́i kroko moŋ tsɛɔ bo lɛ, te obaana lɛ ohã tɛŋŋ? Ekolɛ be ko baashɛ ni obaabi ohe kɛji eesumɔ ni etsɔ onaanyo lɛɛlɛŋ. Nakai nɔŋŋ eji yɛ Nyɔŋmɔ gbɛfaŋ. Yehowa ehã adesai ele egbɛ́i lɛ, ni ekɛɛ wɔkɛtsɛ lɛ. Kɛ́ wɔfee nakai lɛ, wɔhãa Yehowa naa akɛ wɔmiisumɔ ni wɔbɛŋkɛ lɛ. Agbɛnɛ hu, enaa “mɛi ni jwɛŋɔ egbɛ́i lɛ nɔ [loo, “mɛi ni kɛ egbɛ́i lɛ shwɛɛɛ kwraa,” shishigbɛ niŋmaa] lɛ”!​—Maleaki 3:16.

Kɛ́ wɔmiitao wɔle Nyɔŋmɔ lɛ, nɔ klɛŋklɛŋ ni esa akɛ wɔfee ji, ni wɔle egbɛ́i lɛ. Shi esaaa akɛ wɔkɛwaa jɛmɛ. Esa akɛ wɔle mɔ tuuntu ni hiɛ nakai gbɛ́i lɛ. Ehe miihia ni wɔle esui hu.