Ani hela ko ni mli wa emɔ bo be kukuoo ko pɛŋ? Ekolɛ ohe wa bo oya aahu akɛ, amrɔ nɛɛ ohiɛ ekpa nɔ ni fee bo lɛ nɔ. Shi jeee nakai eji yɛ awerɛhoyeli gbɛfaŋ. Dr. Alan Wolfelt ŋma yɛ wolo ko (Healing a Spouse’s Grieving Heart) mli akɛ, ‘Anyɛŋ akpa awerɛhoyeli.’ Shi ekɛfata he akɛ: ‘Be ni be shwieɔ mli, ni mɛi krokomɛi yeɔ amɛbuaa lɛ, awerɛhoyeli lɛ naa baaba shi.’

Akɛ nɔkwɛmɔnɔ lɛ, susu bɔ ni Abraham fee enii ehã be ni eŋa Sara gbo lɛ he okwɛ. Biblia kɛɛ akɛ, “Abraham baye Sara he ŋkɔmɔ ni ebafó lɛ.” Wiemɔ ni atsɔɔ shishi akɛ “baye” yɛ biɛ lɛ tsɔɔ akɛ, ehe be dani Abraham nyɛ ekpa eŋa gbele lɛ he awerɛhoyeli. * Mɔ kroko hu ni ye awerɛho yɛ esuɔlɔ gbele he ji Yakob, be ni alaka lɛ akɛ kooloo awuiyelɔ ko egbe ebi Yosef lɛ. Eye awerɛho “gbii pii,” ni ewekumɛi lɛ nyɛɛɛ ashɛje emii. Afii pii asɛɛ po lɛ, Yosef gbele lɛ kã he egba Yakob naa.​—1 Mose 23:2; 37:34, 35; 42:36; 45:28.

Nakai nɔŋŋ eji ŋmɛnɛ yɛ mɛi babaoo ni yeɔ amɛsuɔlɔi ni egbo lɛ he awerɛho lɛ hu agbɛfaŋ. Susumɔ nɔkwɛmɔnii enyɔ ni nyiɛ sɛɛ nɛɛ he okwɛ.

• “Miwu Robert gbo yɛ July 9, 2008 yɛ tsɔne oshara mli. Nakai gbi lɛ leebi lɛ, nɔ ko etsɔɔɔ akɛ nɔ ko tamɔ nakai baaba. Be ni wɔye nii wɔta ni ebaashi kɛya nitsumɔ lɛ, wɔshɔ wɔnaa, wɔfua wɔhe ni ekɛɛ mii akɛ ‘miisumɔ bo’ ni mi hu mikɛɛ lɛ nakai taakɛ wɔfeɔ daa gbi lɛ. Eyɛ mli akɛ afii ekpaa eho moŋ, shi miinu dɔlɛ lɛ he lolo. Miheee miyeee akɛ mihiɛ baakpa Rob gbele lɛ nɔ kɔkɔɔkɔ.”​—Gail, eye afii 60.

• “Eyɛ mli akɛ miŋa gbo nɔ ni fe afii 18 nɛ moŋ, shi mihiɛ tseɔ lɛ ni miyeɔ egbele lɛ he ŋkɔmɔ lolo. Be fɛɛ be ni mana nɔ ko ni yɔɔ fɛo lɛ, mikaiɔ lɛ, ni misusuɔ bɔ ni kulɛ ebaaná miishɛɛ ehã kɛji lɛ hu eekwɛ eko lɛ he.”​—Etienne, eye afii 84.

Eyɛ faŋŋ akɛ, ejeee tɔmɔ akɛ abaanu dɔlɛ ni tamɔ nɛkɛ he be kpalaŋŋ. Mɔ fɛɛ mɔ kɛ bɔ ni eyeɔ awerɛho ehãa, no hewɔ lɛ nilee bɛ mli akɛ wɔbaawie wɔshi mɔ ko yɛ bɔ ni efeɔ enii kɛ́ agbo yɛ enɔ lɛ he. Yɛ nakai beiaŋ nɔŋŋ lɛ, esaaa akɛ wɔbuɔ wɔhe fɔ kɛ́ wɔnu he tamɔ nɔ ni wɔmiiye awerɛho fe nine. Belɛ te wɔɔfee tɛŋŋ wɔkpee awerɛhoyeli naa lɛ?