“Nikeenii kpakpai fɛɛ kɛ nikeenii ni hi kɛwula shi fɛɛ lɛ, ŋwɛi ejɛɔ ekpelekeɔ shi, kɛjɛɔ ŋwɛi lai a-Tsɛ lɛ ŋɔɔ.” (Yakobo 1:17) Ŋmalɛ nɛɛ hãa wɔnaa akɛ, Yehowa Nyɔŋmɔ, ni ji wɔŋwɛi Tsɛ lɛ, mli hi ni efeɔ mɛi ejurɔ. Nyɔŋmɔ edro adesai nibii pii, shi ekome ko yɛ ni fe fɛɛ. Mɛni ji nakai nikeenii lɛ? Yesu wiemɔi ni ale jogbaŋŋ ni yɔɔ Yohane 3:16 lɛ kɛɔ akɛ: “Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.”

Ekã shi faŋŋ akɛ, Nyɔŋmɔ Bi koome lɛ ni ekɛhã adesai lɛ ji nikeenii ni fe fɛɛ ni ekɛhã amɛ, ejaakɛ no hãa wɔyeɔ wɔhe kɛjeɔ esha, gbɔlɛ, kɛ gbele dɛŋ. (Lala 51:7; Yohane 8:34) Wɔ diɛŋtsɛ wɔnyɛŋ wɔkpɔ̃ wɔhe kɛje nibii nɛɛ adɛŋ kɔkɔɔkɔ. Shi akɛni Nyɔŋmɔ yɛ suɔmɔ kple kɛhã wɔ hewɔ lɛ, eto gbɛjianɔ koni wɔná nɔ ni he hiaa ni baahã wɔná nakai heyeli lɛ. Kɛtsɔ Yehowa Nyɔŋmɔ Bi koome, ni ji Yesu Kristo, ni ekɛhã akɛ kpɔmɔnɔ lɛ nɔ lɛ, adesai ni boɔ Nyɔŋmɔ toi lɛ ená hiɛnɔkamɔ akɛ amɛbaahi shi kɛya naanɔ wɔsɛɛ. Shi mɛni tuuntu ji kpɔmɔnɔ? Mɛni hewɔ ehe hiaa? Ni mɛni esa akɛ wɔfee koni wɔná he sɛɛ?

Kpɔmɔnɔ ji nyɔmɔ ni awoɔ bɔ ni afee ni nine ashɛ nɔ ko ni eŋmɛɛ mɔ ko lɛ nɔ ekoŋŋ, loo koni mɔ ko aye ehe. Biblia lɛ tsɔɔ akɛ, be ni Nyɔŋmɔ bɔ Adam kɛ Hawa, ni ji wɔklɛŋklɛŋ fɔlɔi lɛ, esha ko bɛ amɛhe; ni kulɛ amɛ kɛ amɛbii ni amɛbaafɔ sɛɛ mli lɛ baahi shikpɔŋ lɛ nɔ kɛya naanɔ. (1 Mose 1:26-28) Dɔlɛ sane ji akɛ, akɛni amɛgbo Nyɔŋmɔ nɔ toi hewɔ lɛ, amɛbatsɔmɔ eshafeelɔi, ni nibii nɛɛ fɛɛ ŋmɛɛ amɛ. Mɛni jɛ mli kɛba? Biblia lɛ hãa hetoo akɛ: “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Romabii 5:12) Nɔ najiaŋ ni Adam baashi wala ni eye emuu ehã ebii lɛ, eshi esha kɛ gbele moŋ ehã amɛ.

Kɛ́ abaakpɔ̃ mɔ ko loo nɔ ko lɛ, esa akɛ nyɔmɔ ni abaawo lɛ kɛ mɔ loo nɔ ni abaakpɔ̃ lɛ aye egbɔ. Be ni Adam je gbɛ egbo Nyɔŋmɔ nɔ toi lɛ, efee esha, ni nɔ ni jɛ mli kɛba ji akɛ, ewala ni eye emuu lɛ ŋmɛɛ lɛ. Biblia lɛ tsɔɔ akɛ, enɛ hã ebii fɛɛ batsɔmɔ nyɔji kɛhã esha kɛ gbele. Enɛ hewɔ lɛ, ehe bahia ni adesa kroko ni eye emuu kɛ ewala ahã kɛshã afɔle koni ekɛkpɔ̃ adesai kɛje nakai nyɔŋyeli lɛ mli; Yesu ji mɔ ni kɛ ewala hã. (Romabii 5:19; Efesobii 1:7) Suɔmɔ mli ni Nyɔŋmɔ jɛ ekɛ kpɔmɔnɔ lɛ hã lɛ hewɔ adesai ená hiɛnɔkamɔ akɛ, amɛnine baashɛ nɔ ni ŋmɛɛ Adam kɛ Hawa lɛ nɔ ekoŋŋ lɛ, no ji, amɛbaahi shi kɛya naanɔ yɛ paradeiso yɛ shikpɔŋ lɛ nɔ.​—Kpojiemɔ 21:3-5.

Akɛni kpɔmɔnɔ nɛɛ, ni ji nikeenii ni Nyɔŋmɔ kɛdro wɔ lɛ hãa anyɛɔ anáa naanɔ wala hewɔ lɛ, ŋwanejee ko bɛ he akɛ eji nikeenii ni fe nikeenii fɛɛ. Bɔ ni afee ni wɔna akɛ kpɔmɔnɔ lɛ ji “nikeenii ni hi kɛwula shi” lɛ, hã wɔkwɛ bɔ ni enyɛɔ eshɛɔ taomɔnii ejwɛ komɛi ahe; taomɔnii ejwɛ nɛɛ ní hãa nikeenii ko feɔ nɔ ni nɔ bɛ lɛ ji nɔ ni wɔsusu he yɛ sane ni tsɔ hiɛ lɛ mli lɛ.

Ehãa wɔnáa nɔ ni kã wɔtsui nɔ. Bɔ ni abɔ wɔ ahã lɛ hewɔ lɛ, wɔshweɔ akɛ wɔbaahi shi kɛya naanɔ. (Jajelɔ 3:11) Wɔ diɛŋtsɛ wɔnyɛŋ wɔhã shwelɛ nɛɛ aba  mli, shi kɛtsɔ kpɔmɔnɔ lɛ nɔ lɛ, wɔbaanyɛ wɔhi shi kɛya naanɔ. Biblia lɛ kɛɔ akɛ: “Esha dɛŋ nyɔmɔwoo ji gbele, shi nɔkeenɔ ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.”​—Romabii 6:23.

Etsuɔ wɔhiamɔ nii he nii. Adesa ko nyɛŋ ekɛ kpɔmɔnɔ lɛ ahã. Biblia lɛ tsɔɔ akɛ: “Amɛwala he kpɔmɔnɔ lɛ jara wa aahu akɛ amɛnyɛŋ amɛwo kɔkɔɔkɔ.” (Lala 49:8, NWT) Enɛ tsɔɔ akɛ, kɛ́ Nyɔŋmɔ yeee ebuaaa wɔ lɛ, wɔnyɛŋ wɔye wɔhe kɛje esha kɛ gbele dɛŋ. Shi ‘kɛtsɔ kpɔmɔnɔ ni Kristo Yesu wo lɛ nɔ’ lɛ, Nyɔŋmɔ etsu wɔhiamɔ nii nɛɛ he nii ehã wɔ.​—Romabii 3:23, 24.

Akɛhã yɛ be ni sa mli. Biblia lɛ kɛɔ akɛ: “Be ni wɔkã he wɔji eshafeelɔi lɛ, Kristo gbo ehã wɔ.” (Romabii 5:8) Akɛni Nyɔŋmɔ kɛ kpɔmɔnɔ lɛ hã “be ni wɔkã he wɔji eshafeelɔi” hewɔ lɛ, ehãa wɔnáa nɔmimaa akɛ, yɛ eshafeelɔi ni wɔji lɛ fɛɛ sɛɛ lɛ, esumɔɔ wɔ waa. Kɛfata he lɛ, ehãa wɔnáa hiɛnɔkamɔ, eyɛ mli akɛ wɔkã he wɔmiina nɔ akɛ eshafeelɔi lolo.

Akɛhã yɛ yiŋtoo kpakpa hewɔ, ni akɛ nɔ ko shã afɔle hu. Biblia lɛ hãa wɔnaa nɔ ni tsirɛ Nyɔŋmɔ ni ekɛ e-Bi lɛ hã akɛ kpɔmɔnɔ lɛ; Biblia lɛ wie akɛ: “Enɛ nɔ atsɔ ajie Nyɔŋmɔ suɔmɔ lɛ kpo yɛ wɔgbɛfaŋ, no ji akɛ Nyɔŋmɔ tsu e-Bi koome lɛ kɛba je lɛ mli koni wɔtsɔ enɔ wɔná wala. Nɛkɛ ji bɔ ni suɔmɔ lɛ yɔɔ, jeee akɛ wɔ wɔsumɔ Nyɔŋmɔ, shi moŋ akɛ lɛ esumɔ wɔ.”​—1 Yohane 4:9, 10.

Mɛni obaafee kɛtsɔɔ akɛ ohiɛ sɔɔ nikeenii ni fe fɛɛ nɛɛ? Kaimɔ akɛ, Yesu wiemɔi ni yɔɔ Yohane 3:16 lɛ tsɔɔ akɛ, ‘mɛi ni jieɔ hemɔkɛyeli kpo’ yɛ emli lɛ pɛ ayiwala abaahere. Biblia lɛ tsɔɔ akɛ, hemɔkɛyeli ji “nɔmimaa ni akɛkwɛɔ nii ni hiɛ kã nɔ lɛ gbɛ.” (Hebribii 11:1) Dani wɔbaanyɛ wɔná nakai nɔmimaa lɛ, esa akɛ wɔná nilee krɔŋŋ. Enɛ hewɔ lɛ, wɔmiiwo bo hewalɛ ni ohe be kɛkase Yehowa Nyɔŋmɔ, mɔ ni kɛ “nikeenii ni hi kɛwula shi” nɛɛ hã lɛ he nii. Agbɛnɛ hu, hemɔ be kɛkase nɔ ni esa akɛ ofee koni oná naanɔ wala ni Yesu kpɔmɔ afɔleshãa lɛ hãa anáa lɛ mli gbɛfaŋnɔ.

Kɛ́ opɛi saji ni ajɛ Biblia lɛ mli aŋmala ni yɔɔ Intanɛt lɛ nɔ, yɛ www.ps8318.com lɛ mli lɛ, obaanyɛ ole nibii nɛɛ fɛɛ. Yehowa Odasefoi miisumɔ ni amɛye amɛbua bo. Wɔheɔ wɔyeɔ akɛ, be ni okaseɔ nikeenii ni fe fɛɛ nɛɛ he nii babaoo lɛ, ebaatsirɛ bo ni owie akɛ: “Shidaa ahã Nyɔŋmɔ kɛtsɔ Yesu Kristo, wɔ-Nuŋtsɔ lɛ nɔ!”​—Romabii 7:25.