Wala Shihilɛ He Sane

Ni Aaasɔmɔ Kɛ Susuma Muu Fɛɛ yɛ Kaai Fɛɛ Sɛɛ

TAAKƐ RODOLFO LOZANO GBA

Afɔ́ mi yɛ Mexico, yɛ Gómez Palacio maŋtiase lɛ mli, yɛ Durango State, yɛ September 17, 1917. No mli lɛ Mexico Maŋ Hiɛtsakemɔ lɛ miiya nɔ waa diɛŋtsɛ. Eyɛ mli akɛ maŋ hiɛtsakemɔ lɛ ba naagbee yɛ afi 1920 lɛ mli moŋ, shi yɛ afii komɛi asɛɛ lɛ, basabasafeemɔ tee nɔ lolo yɛ he ni wɔyɔɔ lɛ, ni eha shihilɛ bafee nɔ ni wa waa.

GBI ko beni Awo ná ele akɛ atuatselɔi lɛ kɛ asraafoi lɛ miiba amɛbanɔ lɛ, eha mi kɛ minyɛmimɛi hii etɛ kɛ minyɛmimɛi yei enyɔ lɛ hi shia gbii saŋŋ. Niyenii fioo pɛ yɔɔ ni wɔbaaye, ni mikaiɔ akɛ mi kɛ minyɛmiyoo fioo lɛ yatee yɛ saatso lɛ shishi. No sɛɛ lɛ, Awo kpɛ eyiŋ akɛ ekɛ wɔ, ni ji gbekɛbii lɛ baaya United States, he ni ataa baaba ebafata wɔhe yɛ sɛɛ mli yɛ lɛ.

Wɔyashɛ California yɛ afi 1926 mli, no sɛɛ etsɛɛɛ nɔŋŋ ni Great Depression (Ohia Shihilɛ ni Mli Wa) lɛ ba United States lɛ. Wɔkpa shi kɛtee he fɛɛ he ni wɔbaanyɛ wɔná nitsumɔ yɛ, wɔtee hei tamɔ San Joaquin Valley, Santa Clara, Salinas, kɛ King City. Wɔkase ŋmɔ mli nitsumɔi, ni wɔkpaa aduawai kɛ kwɛɛnii srɔtoisrɔtoi. Eyɛ mli akɛ mitsu nii waa diɛŋtsɛ yɛ miblahiaŋ beaŋ moŋ, shi minya shihilɛ lɛ he waa diɛŋtsɛ.

Akɛ Biblia Mli Anɔkwale lɛ Banina Mi

Yɛ afi 1928 March nyɔŋ lɛ mli lɛ, Biblia Kaselɔ ko, taakɛ atsɛɔ Yehowa Odasefoi yɛ nakai beaŋ lɛ basara wɔ. Eji nuu onukpa ko ni wieɔ Spain wiemɔ ni atsɛɔ lɛ Esteban Rivera. Wolo bibioo ni eshi eha mi lɛ saneyitso ni ji, “Where Are the Dead?” (Nɛgbɛ Gbohii lɛ Yɔɔ?) lɛ ná minɔ hewalɛ waa, tamɔ bɔ ni emli saji lɛ ná minɔ hewalɛ lɛ. Eyɛ mli akɛ no mli lɛ midako moŋ, shi mikase Biblia lɛ, ni mikɛ Biblia Kaselɔi lɛ bɔ. Yɛ be ni sa  mli lɛ, awo kɛ minyɛmiyoo Aurora hu batsɔmɔ Yehowa yijielɔi ni yɔɔ ekãa.

Yɛ afi 1930 afii lɛ teŋgbɛ lɛ, ama Maŋtsɛyeli Asa ko yɛ San Jose kɛha asafo ní wieɔ Blɔfo lɛ. Akɛni mɛi ni wieɔ Spain wiemɔ lɛ ateŋ mɛi babaoo tsuɔ nii yɛ ŋmɔji ni yɔɔ jɛmɛ lɛ amli hewɔ lɛ, wɔbɔi shiɛmɔ kɛ amɛ hamɔ, ni wɔfeɔ Buu-Mɔɔ Nikasemɔ lɛ hu. Odasefoi ni wieɔ Spain wiemɔ ni jɛ San Francisco ni kɛ jɛmɛ jɛkɛmɔ shɛɔ kilomitai 80 lɛ ye bua wɔ ni wɔfee enɛ. Yɛ be ni sa mli lɛ, wɔná mɛi aaafee 60 ni baa kpeei ni awieɔ Spain wiemɔ yɛ shishi yɛ San Jose Maŋtsɛyeli Asa lɛ nɔ.

Yɛ naagbee lɛ, mikɛ nu mli baptisimɔ fee mihenɔjɔɔmɔ kɛha Yehowa lɛ he okadi yɛ kpee ni afee yɛ San Jose yɛ February 28, 1940 lɛ shishi. Yɛ afi ni nyiɛ sɛɛ lɛ mli lɛ, ahala mi akɛ gbɛgbalɔ, Yehowa Odasefoi be-fɛɛ sɔɔlɔi lɛ atɛŋ mɔ kome. Kɛkɛ ni yɛ April 1943 mli lɛ, afɔ̃ mi nine koni mafa kɛya Stockton, ni ji maŋtiase ko ni kɛ he ni miyɔɔ lɛ jɛkɛmɔ shɛɔ kilomitai 130, koni miyato Spain wiemɔ Asafo shishi. No mli lɛ, miisɔmɔ akɛ onukpai asɛinɔtalɔ yɛ Blɔfo asafo ni yɔɔ San Jose lɛ mli, ni mi nɔŋŋ miikwɛ Odasefoi ni wieɔ Spain lɛ hu nɔ yɛ jɛmɛ. Beni mito gbɛjianɔ koni mɛi krokomɛi akwɛ nɛkɛ gbɛnaa nii nɛɛ anɔ sɛɛ lɛ, mishi kɛtee Stockton.

Aka Emuuyeli Mli ni Mihiɛ lɛ Akwɛ

Kɛjɛ afi 1940 lɛ kɛbaa lɛ, akɛ mi tee onukpai akuu ni haa mɛi asraafoi anitsumɔ lɛ ahiɛ shii abɔ, shi be fɛɛ be lɛ, amɛjieɔ bulɛ kpo amɛhaa mishidaamɔ ni damɔ henilee nɔ lɛ. Shi no sɛɛ etsɛɛɛ beni United States kɛ amɛhe wo jeŋ ta ni ji enyɔ lɛ mli yɛ December 1941 lɛ, nɔnyɛɛ ni onukpai akuu ni haa mɛi asraafoi anitsumɔ lɛ kɛbaa lɛ mli bawa waa. Yɛ naagbee lɛ, awo mi tsuŋ yɛ afi 1944 lɛ mli. Be mli ni mimɛɔ koni akojo mi lɛ, akɛ mi yafata awuiyelɔi ahe yɛ tsũ ko shishi. Akɛni amɛná amɛle akɛ Yehowa Odasefoi lɛ ateŋ mɔ kome ji mi hewɔ lɛ, amɛteŋ mɛi pii bibii mi saji ni kɔɔ bɔ ni nibii fɔji ní amɛfee lɛ baasa amɛshidaamɔ yɛ Nyɔŋmɔ hiɛ lɛ he.

Odasefoi ni yɔɔ San Jose lɛ wo nyɔmɔ koni anyɛ aŋmɛɛ mihe fioo dani be ni akɛbaaye sane lɛ ashɛ. Mlalelɔ ko ni yɔɔ Los Angeles ni wieɔ haa hegbɛi ni maŋbii yɔɔ kɛfeɔ nɔ ko lɛ kpɛlɛ nɔ akɛ ebaaye ebua mi kɛye misane lɛ ni eheee mi nɔ ko nɔ ko. Kojolɔ lɛ kpɛ eyiŋ akɛ ebaaŋmɛɛ mihe kɛji mikpɛlɛ nɔ akɛ makpa gbɛgbamɔ nitsumɔ lɛ ni mayatsu heloonaa nitsumɔ, koni nyɔŋ fɛɛ nyɔŋ nɔ lɛ mikɛ mihe ayatsɔɔ hegbɛi ni yeɔ saji lɛ. Mikpɛlɛɛɛ nakai yiŋkpɛɛ lɛ nɔ, no hewɔ lɛ, ayawo mi tsuŋ afii enyɔ yɛ McNeil Ŋshɔkpɔ tsuŋwoohe lɛ mli yɛ Washington State. Mikɛ be ni miye yɛ jɛmɛ lɛ kase Biblia lɛ waa diɛŋtsɛ. Mikase bɔ ni ataipiɔ hu. Eshɛɛɛ afii enyɔ ni ajie mi yɛ  jeŋba kpakpa kpo ni mijie lɛ hewɔ. Mito gbɛjianɔ amrɔ nɔŋŋ koni matsa gbɛgbamɔ sɔɔmɔ nitsumɔ lɛ nɔ.

Nitsumɔ lɛ Mlilɛɛmɔ

Yɛ afi 1947 fɛibe lɛ mli lɛ, aha mi nitsumɔ ni mayafata mɛi ni wieɔ Spain wiemɔ ni yɔɔ Colorado City ni yɔɔ Texas lɛ ahe, ni aha gbɛgbalɔ kroko fata mihe. Shi fɛi miiye yɛ jɛmɛ tsɔ, no hewɔ lɛ wɔtee San Antonio koni wɔkɛjo fɛi ni yeɔ lɛ naa foi fioo. Shi kɛlɛ, nugbɔ nɛ yɛ jɛmɛ hu aahu akɛ efite wɔshia-kɛ-shia sɔɔmɔ nitsumɔ lɛ. Etsɛɛɛ ni wɔshika fɛɛ ta. Wɔhi shi otsii abɔ ni shwiebaa ni akɛwo bodobodo mli wɔyeɔ ni wɔnuɔ tii. Mɔ ni fata mihe lɛ shi kɛtee shia, shi mihi jɛmɛ. Beni Odasefoi ni wieɔ Blɔfo lɛ bale bɔ ni ehia mi yɛ heloonaa gbɛfaŋ lɛ, amɛkɛ yelikɛbuamɔ bɔi mi hamɔ.

Yɛ fɛibe ni nyiɛ sɛɛ lɛ mli lɛ, miku sɛɛ kɛtee minitsumɔ lɛ mli yɛ Colorado City lɛ, ni yɛ naagbee lɛ ato Spain wiemɔ asafo bibioo ko shishi. No sɛɛ lɛ mishi kɛtee Sweetwater, yɛ Texas, ni miye mibua ni ato Spain wiemɔ asafo kroko hu shishi yɛ jɛmɛ. Beni miyɔɔ Sweetwater lɛ, minine shɛ wolo ni miifɔ̃ mi nine kɛmiiya Buu-Mɔɔ Biblia Gilead Skul klas ni ji 15 lɛ nɔ, skul ni afeɔ ahaa maŋsɛɛ sanekpakpa shiɛlɔi ni baaje shishi yɛ February 22, 1950 gbi lɛ nɔ lɛ. Beni skul lɛ ba naagbee yɛ latsaa be lɛ mli yɛ majimaji ateŋ kpee ni afee yɛ New York City Yankee Stadium lɛ sɛɛ lɛ, mikɛ nyɔji etɛ hi Yehowa Odasefoi ajeŋ fɛɛ nitsumɔhe yitso ni yɔɔ Brooklyn lɛ mli. Jɛmɛ ji he ni atsɔse mi yɛ, yɛ Mexico nitsumɔhe nine lɛ kɛha nitsumɔ ni akɛwo midɛŋ lɛ tsumɔ.

Nii ni Mitsu yɛ Mexico

Miyashɛ Mexico City lɛ yɛ October 20, 1950 gbi lɛ nɔ. Aaafee otsii enyɔ sɛɛ lɛ, ahala mi akɛ nitsumɔhe nine lɛ nɔkwɛlɔ, nitsumɔ ni mikɛ afii ejwɛ kɛ fã tsu. Niiashikpamɔ ni miná yɛ gbɛgbamɔ sɔɔmɔ nitsumɔ lɛ mli, yɛ tsuŋwoo mli, yɛ Gilead, kɛ agbɛnɛ hu yɛ Brooklyn lɛ he ba sɛɛnamɔ waa. Beni miyashɛ Mexico lɛ, mina bɔ ni ehe hiaa ni atswa wɔnyɛmimɛi hii kɛ yei lɛ ama shi yɛ Mexicobii lɛ amumɔŋ shweremɔ mli lɛ oya. Ehe bahia waa ni aye abua amɛ ni amɛhiɛ Nyɔŋmɔ Wiemɔ lɛ mli jeŋba he tɛi ni nɔ kwɔlɔ lɛ amli kpɛŋŋ.

Yɛ Latin America maji anɔ ni Mexico fata he lɛ, no mli lɛ eji kusum nifeemɔ akɛ hefatalɔi enyɔ aaahi shi yɛ he kome ni amɛboteko gbalashihilɛ mli. Kristendom jamɔi, titri Roma Katolik Sɔlemɔ lɛ eŋmɛ gbɛ ni nɛkɛ nifeemɔ ni ŋmalɛ fĩii sɛɛ nɛɛ etee nɔ. (Hebribii 13:4) Enɛ hewɔ lɛ mɛi komɛi ebatsɔmɔ Yehowa Odasefoi asafoi lɛ amli bii tsɛbelɛ amɛkɛ amɛgbalashihilɛ lɛ woko mla shishi. Agbɛnɛ ato gbɛjianɔ bɔni afee ni aha mɛi ni tamɔ nakai lɛ nyɔji ekpaa ni amɛkɛjaje amɛgbalashihilɛi lɛ. Kɛ jeee nakai lɛ, akpɛlɛŋ amɛnɔ akɛ Yehowa Odasefoi dɔŋŋ.

Kɛha amɛteŋ mɛi pii lɛ, amɛshihilɛ jajemɔ lɛ jeee nɔ ko ni wa kɛha amɛ. Nɔ ni he hiaa amɛ nɔŋŋ ji ni amɛkɛ wekukpaa ni yɔɔ amɛshihilɛ mli lɛ awo mla shishi kɛtsɔ gbalashihilɛ mli ni amɛaabote lɛ nɔ. Amɛteŋ mɛi krokomɛi lɛ ashihilɛ lɛ mli wa waa. Ákɛ nɔkwɛmɔnɔ lɛ, amɛteŋ mɛi komɛi kɛ amɛhe ewo gbalashihilɛ mli shii enyɔ, mɛi komɛi lɛ, shii etɛ po, ni amɛbiii gbalamlitsemɔ yɛ mla naa kwraa po. Beni yɛ naagbee lɛ, aha Yehowa webii lɛ ha amɛkɛ amɛ gbalashihilɛ mli shihilɛ kɛ Nyɔŋmɔ Wiemɔ tsɔɔmɔi lɛ kpã gbee lɛ, asafoi lɛ ná mumɔŋ jɔɔmɔi amli ŋɔɔmɔ waa.—1 Korintobii 6:9-11.

Yɛ nakai bei amli lɛ, skul woloŋlee naa waaa yɛ Mexico. Dani miyashɛ jɛmɛ yɛ afi 1950 mli po lɛ, no mli lɛ, nitsumɔhe nine lɛ eje shishi eto nikanemɔ kɛ niŋmaa skul he gbɛjianɔ yɛ asafoi lɛ amli. Agbɛnɛ asaa ato klasii nɛɛ ahe gbɛjianɔ ekoŋŋ, ni ato gbɛjianɔ koni akɛwo nɔyeli lɛ mla shishi. Kɛjɛ afi 1946 kɛbaa nɛɛ lɛ, ní aje shishi abɔi akɔntaabuu lɛ, ana akɛ mɛi ni yi fa fe 143,000 yɛ Mexico ni atsɔɔ amɛ nikanemɔ kɛ niŋmaa yɛ klasii ni Odasefoi kwɛɔ nɔ lɛ amli!

Mlai ni kɔɔ jamɔ he ni yɔɔ Mexico lɛ yɛ kpɛŋŋ diɛŋtsɛ. Shi yɛ nyɛsɛɛ afii nɛɛ amli lɛ, tsakemɔi ni he hiaa waa eba yɛ enɛ gbɛfaŋ. Yɛ afi 1992 mli lɛ, akɛ jamɔ he mla hee ko ha, no hewɔ lɛ, yɛ afi 1993 mli lɛ Yehowa Odasefoi ni yɔɔ Mexico lɛ kɛ amɛjamɔ gbɛjianɔtoo lɛ wo mla shishi.

Kɛha mi lɛ nɛkɛ tsakemɔi nɛɛ ebafee nɔ ni haa mináa miishɛɛ waa, ni ji nɔ ko ni kulɛ masusu  akɛ anyɛŋ afee yɛ mra be ni tsɔ hiɛ lɛ mli. Miyapue yɛ nɔyelɔi lɛ ahiɛ shii abɔ yɛ afii abɔ ni eho lɛ amli, ni amɛjieee su kpakpa kpo amɛtsɔɔɔ mi. Shi kɛlɛ, eyɛ miishɛɛ akɛ aaana bɔ ni Legal Departmemt (Mla Nitsumɔhe) ni yɔɔ wɔ nitsumɔhe nine lɛ tsu saji nɛɛ ahe nii amɛha lɛ, ni enɛ ha wɔhe jɔ wɔ fioo yɛ shiɛmɔ nitsumɔ lɛ mli.

Maŋsɛɛ Sanekpakpa Shiɛlɔ Hefatalɔ ni Mikɛ Sɔmɔ

Beni miyashɛ Mexico lɛ, no mli lɛ, mɛi babaoo yɛ jɛmɛ ni amɛgbe Gilead skul srɔtoi ni tsɔ hiɛ lɛ naa momo. Mɛnɛɛmɛi ateŋ mɔ kome ji Esther Vartanian ni ji Odasefonyo ni jɛ Armenia ni ebaje gbɛgbamɔ nitsumɔ lɛ shishi yɛ Vallejo, California, yɛ afi 1942 mli lɛ. Wɔbote gbalashihilɛ mli yɛ July 30, 1955, ni no sɛɛ lɛ wɔtsa wɔnitsumɔ lɛ nɔ yɛ Mexico. Esther tee nɔ etsu nii lolo akɛ maŋsɛɛ sanekpakpa shiɛlɔ yɛ Mexico City lɛ mli, ni wɔhi nitsumɔhe nine lɛ, he ni mitee nɔ misɔmɔ yɛ lɛ.

Yɛ afi 1947 mli lɛ Esther yashɛ he klɛŋklɛŋ ni aha lɛ nitsumɔ yɛ lɛ yɛ Monterrey, Nuevo León, yɛ Mexico. No mli lɛ asafo kome pɛ ni Odasefoi 40 yɔɔ mli yɔɔ Monterrey, shi beni atsake lɛ kɛtee Mexico City lɛ yɛ afi 1950, no mli lɛ aná asafoi ejwɛ. Amrɔ nɛɛ, wekui ni Esther kɛ amɛ kase Biblia lɛ beni esɔmɔɔ yɛ Monterrey lɛ amli bii enyɔ ni darako lɛ miisɔmɔ yɛ wɔ nitsumɔhe nine lɛ yɛ Mexico City lɛ.

Yɛ afi 1950 mli lɛ, no mli lɛ shikpɔŋkuku lɛ mli nii ni maŋsɛɛ sanekpakpa shiɛlɔi lɛ tsuɔ yɛ Mexico City lɛ yaa shɔŋŋ kɛboteɔ maŋtiase lɛŋ hei srɔtoi babaoo. Amɛnyiɛɔ aloo amɛtaa bɔɔs memeji srɔtoi ni mli eyi obɔ kɛ gbɔmɛi amli kɛtsɔɔ maŋtiase lɛ mli fɛɛ kɛtsuɔ amɛsɔɔmɔ lɛ he nii. Yɛ afi 1950 naagbee gbɛ beni miyashɛ jɛmɛ lɛ, no mli lɛ asafoi kpawo yɔɔ jɛmɛ. Amrɔ nɛɛ enɛ efa kɛyashɛ aaafee 1,600 kɛ emli Maŋtsɛyeli shiɛlɔi ni yi fa fe 90,000 yɛ Mexico City, ni yɛ nyɛsɛɛ afi lɛ, mɛi ni yi fa fe 250,000 tee Kristo gbele lɛ Kaimɔ lɛ shishi yɛ jɛmɛ! Yɛ afii ni eho lɛ amli lɛ, Esther kɛ mi ná hegbɛ lɛ ni wɔkɛsɔmɔ asafoi nɛɛ ateŋ babaoo.

 Kɛ́ Esther kɛ mi kɛ mɔ ko je Biblia mli nikasemɔ shishi lɛ, be fɛɛ be lɛ, wɔbɔɔ mɔdɛŋ koni wɔha tsɛ ni yɔɔ weku lɛ mli lɛ aná nɔ ni wɔfeɔ lɛ he miishɛɛ, bɔni afee ni weku muu lɛ fɛɛ kɛ amɛhe awo mli. Enɛ hewɔ lɛ, wɔna akɛ wekui ni dara pii basɔmɔ Yehowa. Miheɔ miyeɔ akɛ, yiŋtoi ni eha anɔkwale jamɔ lɛ shwereɔ oyayaayai yɛ Mexico lɛ ateŋ ekome ji yɛ bei babaoo mli lɛ, weku muu fɛɛ ni feɔ ekome yɛ anɔkwale jamɔ mli lɛ hewɔ.

Yehowa Ejɔɔ Nitsumɔ lɛ Nɔ

Kɛjɛ afi 1950 kɛbaa nɛɛ lɛ, hiɛyaa ni aná yɛ nii ni atsu yɛ Mexico maŋ lɛ mli lɛ sa kadimɔ, nibii ni kɔɔ yifalɛ kɛ gbɛjianɔtoo lɛ tsakemɔi ahe. Eji miishɛɛ diɛŋtsɛ akɛ miná shweremɔ ni ba nɛɛ mli gbɛfaŋnɔ fioo, ni mikɛ gbɔfeelɔi ni yɔɔ miishɛɛ tamɔ nɛkɛ tsu nii.

Karl Klein, ni sɔmɔɔ akɛ Yehowa Odasefoi a-Nɔyeli Kuu lɛ mlinyo lɛ kɛ eŋa Margaret basara wɔ afii komɛi ni eho nɛ beni amɛba hejɔɔmɔ fioo lɛ. Shi akɛni Nɛminuu Klein miisumɔ ni ena bɔ ni nitsumɔ lɛ yɔɔ jogbaŋŋ yɛ wɔshikpɔŋkuku ni yɔɔ Mexico lɛ hewɔ lɛ, ekɛ Margaret ba San Juan Tezontla Asafo lɛ mli, he ni no mli lɛ, wɔyaa jɛmɛ nikasemɔ, ní bɛŋkɛ Mexico City lɛ. Asa lɛ edaaa, elɛɛmɔ aaashɛ mitai 4.5, ni ekɛlɛ shɛɔ mitai 5.5 hu. Beni wɔyashɛ lɛ, no mli lɛ mɛi 70 yɛ jɛmɛ momo, ni nanemaahe ko kwraa bɛ jɛmɛ. Mɛi ni edara lɛ tara sɛii anɔ, ni oblahii kɛ oblayei lɛ tara sɛii kakadaji anɔ, ni gbekɛbii kwraa lɛ tara shikpɔŋ aloo blɔkii anɔ.

Nyɛminuu Klein mii shɛ ehe waa ejaakɛ gbekɛbii lɛ fɛɛ hiɛ amɛ Bibliai ni amɛfee klalo, ni amɛgbeleɔ ŋmalɛi ni wielɔ lɛ tsɛɔ yisɛɛ kɛjɛɔ Biblia lɛ mli lɛ. Beni aha maŋshiɛmɔ lɛ agbe naa lɛ, Nyɛminuu Klein wie Mateo 13:19-23 he, ni ekɛɛ akɛ, “shikpɔŋ kpakpa” ni Yesu tsĩ tã lɛ pii yɛ Mexico. Amrɔ nɛɛ lɛ, gbekɛbii ni ba kpee lɛ nakai gbi lɛ ateŋ mɛi kpawo fata mɛi ni tsuɔ nitsumɔ wulu yɛ wɔnitsumɔhe nine ni bɛŋkɛ Mexico City lɛ koni akɛlɛɛ mli lɛ ahe. Mɔ kroko hu miisɔmɔ yɛ Betel, ni amɛteŋ mɛi pii miisɔmɔ akɛ gbɛgbalɔi!

Beni miba Mexico City lɛ, no mli lɛ mɛi 11 pɛ yɔɔ wɔnitsumɔhe nine lɛ. Amrɔ nɛɛ lɛ, wɔyɛ aaashɛ mɛi 1,350 ni miitsu nii yɛ tsumaahe lɛ, ni aaafee amɛteŋ mɛi 250 ji mɛi ni miima tsũ kɛha nitsumɔhe nine lɛ tsũi heei. Kɛ agbe nɛkɛ nitsumɔi nɛɛ fɛɛ naa lɛ, ekolɛ yɛ afi 2002 afi lɛ nɔ lɛ, mɛi aaafee 1,200 krokomɛi hu baanyɛ ahi tsũi ni alɛɛ mli lɛ amli. Yɛ afi 1950 afi lɛ mli lɛ, no mli lɛ Maŋtsɛyeli shiɛlɔi ni yifalɛ shɛɛɛ 7,000 yɛ maŋ lɛ fɛɛ mli, shi amrɔ nɛɛ lɛ wɔyi fa kwraa fe 500,000! Mitsuiŋ miishɛɛ yiɔ kɛtekeɔ nɔ, kɛji akɛ miikwɛ gbɛ ni Yehowa etsɔ nɔ ejɔɔ wɔnyɛmimɛi Mexicobii heshibalɔi ni etsu nii waa koni amɛkɛjie eyi lɛ.

Kaa Wulu ko Naa Daamɔ

Nyɛsɛɛ nɛɛ kaai ni mikɛkpeɔ lɛ ateŋ nɔ ni da fe fɛɛ ji hela. Miji mɔ ko ní yɛ hewalɛ be fɛɛ be. Shi yɛ November 1988 mli lɛ, miye kuumɔ hela ni eye mi awui yɛ gbɔmɔtsoŋ. Yɛ Yehowa yelikɛbuamɔ naa lɛ, kɛtsɔ kpɔiaŋgbɔlemɔ kɛ tsofai krokomɛi anɔ lɛ, miná hewalɛ bɔ ni sa, shi migbɔmɔtso lɛ fai komɛi tsuuu nii tamɔ bɔ ni mitaoɔ akɛ efee. Miifee tsofa lolo koni mikɛtsĩ yitsogbamɔ ni naa wa kɛ nibii krokomɛi ni baanyɛ ajɛ mli aba lolo lɛ anaa.

Eyɛ mli akɛ minyɛɛɛ mafee babaoo taakɛ masumɔ dɔŋŋ moŋ, shi mimii shɛɔ mihe akɛ minyɛ miye mibua mɛi pii ni amɛbale Yehowa yiŋtoi ni amɛbatsɔmɔ etsuji ni amɛjɔɔ amɛhe nɔ amɛha lɛ. Agbɛnɛ hu, mikɛ nyɛmimɛi Kristofoi hii kɛ yei pii gbaa sane kɛ miishɛɛ bɔ ni manyɛ kɛji akɛ amɛbasara wɔ yɛ wɔnitsumɔhe nine lɛ; minuɔ he akɛ wɔkɛ nakai feemɔ wowoɔ wɔhe hewalɛ.

Le ni wɔleɔ akɛ Yehowa hiɛ sɔɔ sɔɔmɔ ni wɔkɛhaa lɛ lɛ, kɛ agbɛnɛ hu ákɛ nibii ni wɔtsu lɛ efeŋ efolo lɛ woɔ mi hewalɛ waa diɛŋtsɛ. (1 Korintobii 15:58) Yɛ nibii babaoo ni minyɛɛɛ mafee kɛ hela ni emɔ mi lɛ fɛɛ sɛɛ lɛ, mikɛ wiemɔi ni yɔɔ Kolosebii 3:23, 24 tsuɔ nii jogbaŋŋ, he ni kɛɔ akɛ: “Ni nɔ fɛɛ nɔ ní nyɛfeɔ lɛ, nyɛjiea nyɛmusuŋ nyɛtsua, taakɛ [Yehowa, NW] nyɛtsuɔ nyɛhaa ni jeee gbɔmɛi, ni nyɛle akɛ [Yehowa, NW] dɛŋ nyɛnine baashɛ gboshinii lɛ anɔ yɛ akɛ nyɛnyɔmɔwoo.” Nɛkɛ ŋaawoo nɛɛ ni mikɛtsu nii hewɔ lɛ, mibale bɔ ni ajɛɔ susuma muu fɛɛ mli asɔmɔɔ Yehowa yɛ kaai fɛɛ sɛɛ.

[Mfoniri ni yɔɔ baafa 24]

Afi 1942 beni miji gbɛgbalɔ lɛ

[Mfoniri ni yɔɔ baafa 24]

Miŋa je emaŋsɛɛ sanekpakpa shiɛmɔ nitsumɔ lɛ shishi yɛ Mexico yɛ afi1947 mli

[Mfoniri ni yɔɔ baafa 24]

Mi kɛ Esther ŋmɛnɛ

[Mfonirii ni yɔɔ baafa 26]

Ŋwɛigbɛ abɛku: Wɔ Mexico Betel weku lɛ yɛ afi 1952 mli ní midamɔ hiɛgbɛ

Yiŋteŋgbɛ: Mɛi ni fa fe 109,000 kpe yɛ nɛkɛ Mexico City stediɔm nɛɛ mli kɛha kpokpaa wulu nɔ kpee yɛ afi 1999 mli

Shishigbɛ abɛku: Wɔ nitsumɔhe nine tsũi heei lɛ ni eshwɛ fioo ni abaagbe naa lɛ