Ani Nyɔŋmɔ Susuɔ Wɔhe?

ANI onaa ohe akɛ otere henumɔŋ jatsu ko yɛ oweku lɛ mli naagbai ahewɔ, yɛ gbɔmɔtsoŋ hewalɛnamɔ he naagbai ahewɔ, yɛ nitsumɔ mli naagbai ahewɔ, loo yɛ gbɛnaa nii krokomɛi ni tsii ni jwere onɔ lɛ ahewɔ? Mɛi babaoo naa amɛhe nakai. Ni namɔ kwraa yɔɔ ŋmɛnɛ ni baanyɛ akɛɛ akɛ jalɛ sane ni ayeee, awuiyeli, kɛ basabasafeemɔ esaaa ehe? Yɛ anɔkwale mli lɛ, etamɔ bɔ pɛ ni Biblia lɛ kɛɔ lɛ, akɛ: “Bɔɔ nii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔ̃mɔɔ kɛbashi ŋmɛnɛŋmɛnɛ.” (Romabii 8:22) Ebɛ naakpɛɛ mɔ akɛ mɛi pii biɔ akɛ: ‘Ani Nyɔŋmɔ susuɔ wɔhe? Ani ebaaye ebua wɔ?’

Nilelɔ Maŋtsɛ Salomo kɛɛ Nyɔŋmɔ yɛ sɔlemɔ mli akɛ: “Bo okome too ole gbɔmɛi abii atsuiiaŋ.” Salomo hé ye akɛ jeee akɛ Nyɔŋmɔ le wɔ kɛkɛ, shi moŋ akɛ esusuɔ wɔhe akɛ aŋkroaŋkroi hu. Enyɛ ebi Nyɔŋmɔ koni “ebo toi yɛ ŋwɛi” ni ebo mɔ fɛɛ mɔ ni sheɔ Nyɔŋmɔ gbeyei ni jajeɔ “lɛ diɛŋtsɛ ehaomɔ kɛ emanehulu” lɛ etsɔɔ Nyɔŋmɔ lɛ sɔlemɔ toi.—2 Kronika 6:29, 30.

Ŋmɛnɛ, Yehowa Nyɔŋmɔ yaa nɔ esusuɔ wɔhe ni efɔ̃ɔ wɔ nine koni wɔbo wɔtsɛ́ lɛ yɛ sɔlemɔ mli. (Lala 50:15) Ewoɔ shi akɛ ebaabo sɔlemɔi ni jɛ tsuiiaŋ ni kɛ esuɔmɔnaa nii kpãa gbee lɛ atoi. (Lala 55:17, 23; Luka 11:5-13; 2 Korintobii 4:7) Hɛɛ, Yehowa boɔ “sɔlemɔ fɛɛ sɔlemɔ kɛ faikpamɔ fɛɛ faikpamɔ ní mɔ ko loo [e]maŋ fɛɛ aaakpa” lɛ toi. Ni no hewɔ lɛ, kɛji akɛ wɔkɛ wɔhe fɔ̃ Nyɔŋmɔ nɔ, wɔsɔle kɛha edɛŋ yelikɛbuamɔ, ni wɔtsi wɔbɛŋkɛ lɛ lɛ, wɔnine baashɛ esuɔmɔ kwɛmɔ kɛ gbɛtsɔɔmɔ nɔ. (Abɛi 3:5, 6) Biblia ŋmalɔ Yakobo maa nɔ mi ehaa wɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—Yakobo 4:8.