Awaa Amɛyi Shi Amɛyɛ Miishɛɛ
Awaa Amɛyi Shi Amɛyɛ Miishɛɛ
“Miishɛɛ ji nyɛ kɛji ajɛ nyɛ ni awa nyɛyi ni amale awie nyɛhe efɔŋ fɛɛ efɔŋ yɛ mihewɔ lɛ.”—MATEO 5:11, NW.
1. Mɛɛ nɔmimaa ni kɔɔ miishɛɛ kɛ shitee-kɛwoo he Yesu kɛha esɛɛnyiɛlɔi lɛ?
BENI Yesu tsu ebɔfoi lɛ klɛŋklɛŋ kwraa koni amɛyashiɛ Maŋtsɛyeli lɛ, ebɔ amɛ kɔkɔ akɛ amɛkɛ shitee-kɛwoo baakpe. Ekɛɛ amɛ akɛ: “Mɛi fɛɛ aaanyɛ nyɛ yɛ migbɛi lɛ hewɔ.” (Mateo 10:5-18, 22) Shi kɛlɛ, etsɔ hiɛ ema nɔ mi kɛha ebɔfoi lɛ kɛ mɛi krokomɛi yɛ e-Gɔŋ nɔ Shiɛmɔ lɛ mli akɛ shitee-kɛwoo nɛɛ fiteŋ miishɛɛ babaoo ni amɛyɔɔ lɛ diɛŋtsɛ. Yɛ anɔkwale mli lɛ, Yesu tsɔɔ po akɛ shitee-kɛwoo ni baa Kristofoi anɔ lɛ haa amɛnáa miishɛɛ! Te aaafee tɛŋŋ ni shitee-kɛwoo aha aná miishɛɛ lɛ?
Nɔnaa yɛ Jalɛ Hewɔ
2. Taakɛ Yesu kɛ bɔfo Petro tsɔɔ lɛ, mɛɛ nɔnaa haa anáa miishɛɛ?
2 Nɔ ni ji kpaanyɔ ni Yesu tsɔɔ akɛ ehaa anáa miishɛɛ lɛ ji akɛ: “Miishɛɛ ji mɛi ni awaa amɛyi yɛ jalɛ hewɔ lɛ, shi amɛnɔ ji ŋwɛi maŋtsɛyeli lɛ.” (Mateo 5:10, NW) Nɔnaa jeee nɔ ko ni sa. Bɔfo Petro ŋma akɛ: “Kɛ tɔ̃ nyɛtɔ̃ ni ayi nyɛ ni nyɛto nyɛtsui shi yɛ mli lɛ, mɛɛ anunyam yɔɔ mli? Shi kɛ ekpakpa nyɛfee ni nyɛna he amanehulu ni nyɛto nyɛtsui shi yɛ mli lɛ, no ji duromɔ yɛ Nyɔŋmɔ hiɛ.” Etee nɔ ewie akɛ: “Shi nyɛteŋ mɔ ko mɔ ko akana amanehulu akɛ awuiyelɔ loo julɔ loo efɔŋfeelɔ aloo mɔ ko ni kɛ ehe woɔ mɛi krokomɛi asaji amli; shi kɛ́ mɔ ko miina amanehulu akɛ Kristofonyo lɛ, ehiɛ akagbo, shi moŋ ewo Nyɔŋmɔ hiɛ nyam yɛ nɛkɛ gbɛi nɛɛ amli.” (1 Petro 2:20; 4:15, 16) Taakɛ Yesu wiemɔi lɛ tsɔɔ lɛ, kɛ́ ana nɔ̃ yɛ jalɛ hewɔ lɛ, ehaa anáa miishɛɛ.
3. (a) Ákɛ aaawa mɔ ko yi yɛ jalɛ hewɔ lɛ tsɔɔ mɛni? (b) Mɛɛ hewalɛ yiwaa ná yɛ mra be mli Kristofoi lɛ anɔ?
3 Anáa anɔkwa jalɛ kɛtsɔ Nyɔŋmɔ suɔmɔnaa nifeemɔ kɛ emlai anɔyeli nɔ. No hewɔ lɛ, nɔnaa yɛ jalɛ hewɔ tsɔɔ nɔ̃ ni mɔ ko naa akɛni ekpooɔ enɔ ni anyɛɔ koni etɔ̃ Nyɔŋmɔ shishitoo mlai loo taomɔ nii anɔ lɛ hewɔ. Yudafoi ahiɛnyiɛlɔi lɛ wa bɔfoi lɛ ayi akɛni amɛfɔ̃ɔɔ shiɛmɔ yɛ Yesu gbɛi amli lɛ hewɔ. (Bɔfoi lɛ Asaji 4:18-20; 5:27-29, 40) Ani enɛ fite amɛmiishɛɛ loo eha amɛkpa shiɛmɔ? Dabi kwraa! “Amɛje akuashɔŋ lɛ hiɛ amɛtee kɛ miishɛɛ, akɛ egbɛi lɛ ahewɔ lɛ abu amɛ mɛi ni sa akɛ abɔɔ amɛ ahora. Ni amɛfɔ̃ɔɔ nitsɔɔmɔ kɛ Yesu Kristo shiɛmɔ yɛ sɔlemɔwe lɛ kɛ shiai be fɛɛ be.” (Bɔfoi lɛ Asaji 5:41, 42) Yiwaa nɛɛ ha amɛná miishɛɛ ni amɛná ekãa babaoo kɛtsu shiɛmɔ nitsumɔ lɛ. Sɛɛ mli lɛ, Romabii lɛ wa mra be mli Kristofoi lɛ ayi akɛni amɛkpoo akɛ amɛaaja maŋtsɛ lɛ hewɔ.
4. Mɛni ji yiŋtoi komɛi ahewɔ ni awaa Kristofoi ayi lɛ?
4 Áwa Yehowa Odasefoi lɛ ayi yɛ ŋmɛnɛŋmɛnɛ beaŋ akɛni amɛfɔ̃ɔɔ “maŋtsɛyeli lɛ he sanekpakpa nɛɛ” shiɛmɔ lɛ hewɔ. (Mateo 24:14) Kɛ́ agu amɛ akɛ amɛkaya Kristofoi akpeei lɛ, amɛnáa he miishɛɛ akɛ amɛaana nɔ̃ moŋ fe ni amɛaakwa amɛhe naa ni Biblia lɛ efã akɛ amɛbua kutuu lɛ. (Hebribii 10:24, 25) Áwa amɛyi hu yɛ amɛhe ni amɛkɛwooo maŋ saji amli akɛ Kristofoi lɛ kɛ lá ni amɛkpooɔ akɛ amɛkɛaatsu nii yɛ gbɛ fɔŋ nɔ lɛ hewɔ. (Yohane 17:14; Bɔfoi lɛ Asaji 15:28, 29) Shi kɛlɛ, jalɛ nifeemɔ he shidaamɔ ni Nyɔŋmɔ webii kɔɔ nɛɛ haa amɛnáa mligbɛ toiŋjɔlɛ kɛ miishɛɛ babaoo.—1 Petro 3:14.
Aaajɛ Nyɛ yɛ Kristo Hewɔ
5. Mɛni ji yiŋtoo titri hewɔ ni awaa Yehowa webii ayi ŋmɛnɛ lɛ?
5 Nɔ ni ji nɛɛhu ni haa anáa miishɛɛ ni Yesu wie he yɛ e-Gɔŋ nɔ Shiɛmɔ lɛ mli lɛ hu kɔɔ yiwaa he. Ejaje akɛ: “Miishɛɛ ji nyɛ kɛji ajɛ nyɛ ni awa nyɛyi ni amale awie nyɛhe efɔŋ fɛɛ efɔŋ yɛ mihewɔ lɛ.” (Mateo 5:11, NW) Yiŋtoo titri hewɔ ni awaa Yehowa webii ayi ji akɛ amɛjeee nibii agbɛjianɔtoo fɔŋ ni yɔɔ bianɛ lɛ fã. Yesu kɛɛ ekaselɔi lɛ akɛ: “Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛɔ nyɛ lɛ.” (Yohane 15:19) Bɔfo Petro hu jaje nakai nɔŋŋ akɛ: “Nɔ̃ mli ní efeɔ amɛ sane srɔto ko akɛ nyɛkɛ amɛ shaaa foi kɛyaaa nɛkɛ sakasakafeemɔ shɛii nɛɛ nɔŋŋ mli, ni amɛwieɔ musubɔɔ wiemɔ.”—1 Petro 4:4.
6. (a) Mɛni hewɔ ajɛɔ shwɛɛnii lɛ kɛ amɛnanemɛi lɛ ni awaa amɛ yi lɛ? (b) Ani ahorabɔɔ nɛɛ haa miishɛɛ ni wɔyɔɔ lɛ naa baa shi?
6 Wɔna momo akɛ awa mra be mli Kristofoi lɛ ayi akɛni amɛfɔ̃ɔɔ shiɛmɔ yɛ Yesu gbɛi amli lɛ hewɔ. Kristo fã esɛɛnyiɛlɔi lɛ akɛ: “Nyɛaatsɔmɔ midasefoi . . . kɛyashi shikpɔŋ lɛ naagbeehei lɛ.” (Bɔfoi lɛ Asaji 1:8) Kristo nyɛmimɛi ni afɔ amɛ mu ni yeɔ anɔkwa, ní amɛnanemɛi “asafo babaoo” ni yeɔ anɔkwa lɛ yeɔ kɛbuaa amɛ lɛ kɛ ekãa etsu nakai nitsumɔ lɛ he nii. (Kpojiemɔ 7:9) No hewɔ lɛ, Satan kɛ “seshibii ni eshwɛ [“yoo” lɛ seshi, ni ji Nyɔŋmɔ gbɛjianɔtoo lɛ fã ni yɔɔ ŋwɛi] ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ” miiwuu. (Kpojiemɔ 12:9, 17) Ákɛ Yehowa Odasefoi lɛ, wɔyeɔ Yesu ni amrɔ nɛɛ eji Maŋtsɛyeli nɔyeli ni baafite adesai anɔyelii ni tsiɔ Nyɔŋmɔ jalɛ jeŋ hee lɛ gbɛ lɛ nɔ Maŋtsɛ lɛ he odase. (Daniel 2:44; 2 Petro 3:13) Enɛ hewɔ ajɛ́ɔ wɔ ni awaa wɔ yi lɛ, shi wɔyɛ miishɛɛ akɛ wɔɔná nɔ̃ yɛ Kristo gbɛi lɛ hewɔ.—1 Petro 4:14.
7, 8. Mɛɛ amale wiemɔi shitee-kɛ-wolɔi wie kɛshi mra be mli Kristofoi lɛ?
7 Yesu kɛɛ esɛɛnyiɛlɔi lɛ akɛ amɛná miishɛɛ kɛ́ gbɔmɛi ‘male wie amɛhe efɔŋ fɛɛ efɔŋ’ yɛ ehewɔ lɛ. (Mateo 5:11) Enɛ ba mra be mli Kristofoi lɛ anɔ diɛŋtsɛ. Be ni awo bɔfo Paulo tsuŋ yɛ Roma aaafee afi 59-61 Ŋ.B. lɛ, Yudafoi ahiɛnyiɛlɔi ni yɔɔ jɛmɛ lɛ wie Kristofoi lɛ ahe akɛ: “Nɛkɛ kuu fã nɛɛ wɔle akɛ awieɔ he efɔŋ yɛ he fɛɛ he.” (Bɔfoi lɛ Asaji 28:22) Afolɔ Paulo kɛ Sila naa akɛ ‘amɛtsɔ jeŋ hiɛ amɛbu shi’ ni ‘amɛkuɔ Kaisare mla lɛ naa.’—Bɔfoi lɛ Asaji 17:6, 7.
8 Be ni yinɔsaneŋmalɔ K. S. Latourette ŋmaa Kristofoi ni hi shi yɛ Roma Maŋtsɛyeli lɛ shishi lɛ ahe sane lɛ, ekɛɛ akɛ: “Akɛ saji srɔtoi folɔ amɛnaa. Akɛni Kristofoi lɛ kɛ amɛhe wooo wɔŋjamɔ nifeemɔi amli hewɔ lɛ, afolɔ amɛnaa akɛ amɛheee amɛyeee akɛ Nyɔŋmɔ yɛ. Akɛni amɛtsi amɛhe kɛjɛ kwasafo nifeemɔ babaoo—wɔŋjamɔ gbijuji, nibii ni haa maŋbii náa miishɛɛ . . .—ahe hewɔ lɛ, abu amɛ akɛ mɛi ni sumɔɔɔ adesai aweku lɛ. . . . Akɛɛ akɛ Kristofoi yei kɛ hii fɛɛ kpeeɔ kutuu nyɔɔŋ . . . ni amɛkɛ amɛhe woɔ bɔlɛnamɔ nifeemɔi ni esaaa amli. . . . Anɔkwale ni eji akɛ ayeɔ [Kristo gbele lɛ he Kaimɔ] lɛ yɛ heyelilɔi pɛ ateŋ lɛ ha abɔi huhuuhu wiemɔ akɛ Kristofoi gbeɔ abifao ni amɛnuɔ elá, ni amɛyeɔ eheloo lɛ yɛ be kɛ beaŋ.” Kɛfata he lɛ, akɛni mra be mli Kristofoi lɛ jaaa maŋtsɛ lɛ hewɔ lɛ, afolɔ amɛnaa akɛ amɛteɔ shi amɛwoɔ Maŋ lɛ.
9. Te Kristofoi ni hi shi yɛ klɛŋklɛŋ afii 100 lɛ mli lɛ fee amɛnii yɛ amale naafolɔmɔi ni akɛshi amɛ lɛ he amɛha tɛŋŋ, ni te shihilɛ lɛ yɔɔ tɛŋŋ ŋmɛnɛ?
9 Amale naafolɔmɔi nɛɛ etsiii mra be mli Kristofoi lɛ anaa koni amɛkatsu nitsumɔ ni akɛwo amɛdɛŋ akɛ amɛshiɛ Maŋtsɛyeli lɛ he sanekpakpa lɛ. Yɛ afi 60-61 Ŋ.B. lɛ, Paulo nyɛ ewie akɛ “sanekpakpa” lɛ ‘miiwo yibii ni eeshwere,’ ni ákɛ ‘ashiɛ atsɔɔ bɔɔ nii fɛɛ ní yɔɔ ŋwɛi shishi lɛ.’ (Kolosebii 1:5, 6, 23) Nakai nɔŋŋ eyɔɔ lɛ ŋmɛnɛ. Afolɔɔ Yehowa Odasefoi anaa yɛ gbɛ ni ejaaa nɔ tamɔ bɔ ni afolɔ klɛŋklɛŋ afii 100 lɛ mli Kristofoi lɛ anaa lɛ. Ni kɛlɛ, Maŋtsɛyeli shiɛmɔ nitsumɔ lɛ miishwere ŋmɛnɛ, ni ehaa mɛi ni kɛ amɛhe woɔ mli lɛ náa miishɛɛ babaoo.
Wɔyɛ Miishɛɛ akɛ Awaa Wɔ Yi Tamɔ Gbalɔi Lɛ
10, 11. (a) Te Yesu mu nii ni ji nɛɛhu ni haa anáa miishɛɛ lɛ naa eha tɛŋŋ? (b) Mɛni hewɔ awa gbalɔi lɛ ayi lɛ? Okɛ nɔkwɛmɔnii aha.
10 Yesu wie kɛmu nii ni ji nɛɛhu ni haa anáa miishɛɛ lɛ naa akɛ: “Nyɛnyaa . . . , ejaakɛ nakai amɛwa gbalɔi ni tsɔ nyɛhiɛ lɛ ayi.” (Mateo 5:12) Ahereee gbalɔi ni Yehowa tsu amɛ koni amɛyabɔ Israelbii ni yeee anɔkwa lɛ kɔkɔ lɛ hiɛmɛɛ, ni bei pii lɛ awaa amɛyi. (Yeremia 7:25, 26) Bɔfo Paulo ŋma kɛye anɔkwa sane nɛɛ he odase akɛ: ‘Mɛni makɛɛ dɔŋŋ? Ejaakɛ mináŋ mihe dekã bɔ ni mikɛaagba gbalɔi krokomɛi lɛ ahe sane: mɛi ni amɛhemɔkɛyeli hewɔ lɛ aye amɛhe fɛo ni ayi amɛ kpelebii ni awo amɛ gboklɛi ni awo amɛ tsuŋ lɛ he sane.’—Hebribii 11:32-38.
11 Be ni Maŋtsɛ Ahab yiwalɔ lɛ kɛ eŋa Izebel yeɔ nɔ lɛ, akɛ klante gbe Yehowa gbalɔi babaoo. (1 Maŋtsɛmɛi 18:4, 13; 19:10) Abɔ gbalɔ Yeremia apã, ni sɛɛ mli lɛ ashɛ lɛ afɔ̃ bu ko ni ŋmɔtɔ yɔɔ mli lɛ mli. (Yeremia 20:1, 2; 38:6) Ashɛ gbalɔ Daniel hu afɔ̃ jatai abu mli. (Daniel 6:17, 18) Awa gbalɔi nɛɛ fɛɛ ni hi shi dani Kristofoi abe lɛ shɛ lɛ ayi akɛni amɛfã Yehowa jamɔ krɔŋŋ he lɛ hewɔ. Yuda jamɔŋ hiɛnyiɛlɔi lɛ wa gbalɔi babaoo ayi. No hewɔ lɛ Yesu tsɛ woloŋmalɔi lɛ kɛ Farisifoi lɛ akɛ “mɛi ni gbe gbalɔi lɛ abii.”—Mateo 23:31.
12. Ákɛ Yehowa Odasefoi lɛ, mɛni hewɔ kɛ́ aawa wɔ yi tamɔ blema gbalɔi lɛ wɔŋɔɔ lɛ akɛ eji hegbɛ ni wɔná lɛ?
12 Ŋmɛnɛ, akɛni wɔkɛ ekãa shiɛɔ Maŋtsɛyeli sanekpakpa lɛ hewɔ lɛ, afɔɔ wɔ ákɛ Yehowa Odasefoi lɛ yiwaa. Wɔhenyɛlɔi lɛ folɔɔ wɔnaa akɛ wɔkɛ “nɔnyɛɛ gbalaa mɛi kɛwoɔ wɔjamɔ lɛ mli,” shi wɔle akɛ afolɔ Yehowa anɔkwa jálɔi ni tsɔ wɔhiɛ lɛ anaa nakai nɔŋŋ. (Yeremia 11:21; 20:8, 11) Kɛ́ wɔna nɔ̃ yɛ yiŋtoo kometoo ni ha blema gbalɔi lɛ na nɔ̃ lɛ he lɛ, wɔbuɔ lɛ akɛ eji hegbɛ ni wɔná. Kaselɔ Yakobo ŋma akɛ: ‘Minyɛmimɛi, nyɛŋɔa gbalɔi ni wie yɛ Nuŋtsɔ lɛ gbɛi amli lɛ nyɛfea amanehulu kɛ tsuishiŋmɛɛ he okadi. Naa, wɔjajeɔ akɛ mɛi ni ŋmɛɔ amɛtsui shi lɛ yɛ miishɛɛ.’—Yakobo 5:10, 11.
Yiŋtoi Kpakpai ni Haa Anáa Miishɛɛ
13. (a) Mɛni hewɔ yiwaa haaa wɔnijiaŋ aje wui lɛ? (b) Mɛni yeɔ ebuaa wɔ koni wɔdamɔ shi shiŋŋ lɛ, ni mɛni enɛ tsɔɔ?
13 Yɛ nɔ najiaŋ ni yiwaa aaaha wɔnijiaŋ aje wui lɛ, le ni wɔle akɛ wɔnyiɛ gbalɔi lɛ, mra be mli Kristofoi lɛ, kɛ Kristo Yesu diɛŋtsɛ nanemaahei asɛɛ lɛ shɛjeɔ wɔmii. (1 Petro 2:21) Wɔnáa miishɛɛ babaoo kɛjɛɔ Ŋmalɛi lɛ amli, tamɔ bɔfo Petro wiemɔi ni nyiɛ sɛɛ nɛɛ akɛ: “Suɔmɔmɛi, nyɛkahaa amanehulu la ni aŋɔkaa nyɛ lɛ miifee nyɛ sane srɔto ko, tamɔ akɛ nɔ ko srɔto ko feɔ nyɛ lɛ. Kɛ́ Kristo gbɛi ahewɔ ajɛɔ nyɛ lɛ, ajɔɔ nyɛ [“nyɛnáa miishɛɛ,” NW], ejaakɛ anunyam mumɔ kɛ Nyɔŋmɔ Mumɔ lɛ jɔɔ ehe yɛ nyɛnɔ.” (1 Petro 4:12, 14) Niiashikpamɔ eha wɔle akɛ Yehowa mumɔ lɛ ni yɔɔ wɔnɔ ni yeɔ ebuaa wɔ lɛ hewɔ ni wɔnyɛɔ wɔdamɔɔ shi shiŋŋ kɛ́ yiwaa ba wɔnɔ lɛ. Mumɔ krɔŋkrɔŋ lɛ ni fiɔ wɔsɛɛ lɛ tsɔɔ akɛ Yehowa miijɔɔ wɔ, ni enɛ haa wɔnáa miishɛɛ babaoo.—Lala 5:13; Filipibii 1:27-29.
14. Mɛɛ yiŋtoi haa wɔnáa miishɛɛ yɛ yiwaa ni akɛbaa wɔnɔ yɛ jalɛ hewɔ lɛ?
14 Yiŋtoo kroko hewɔ ni shitee-kɛwoo kɛ yi ni awaa wɔ yɛ jalɛ hewɔ lɛ haa wɔnáa miishɛɛ ji akɛ, etsɔɔ akɛ wɔmiihi shi akɛ anɔkwa Kristofoi ni etuu amɛhe amɛha Nyɔŋmɔ. Bɔfo Paulo ŋma akɛ: “Mɛi fɛɛ hu ni taoɔ akɛ amɛaahi shi yɛ Nyɔŋmɔjamɔ naa yɛ Kristo Yesu mli lɛ, aaawa amɛ yi.” (2 Timoteo 3:12) Le ni wɔle akɛ emuuyeli mli ni wɔhiɛɔ yɛ kaai amli lɛ haa anáa hetoo kroko ahaa Satan naafolɔmɔ akɛ pɛsɛmkunya nibii pɛ ahewɔ Yehowa bɔɔ nii fɛɛ sɔmɔɔ Lɛ lɛ haa wɔnáa miishɛɛ waa. (Hiob 1:9-11; 2:3, 4) Eyɛ mli akɛ nɔ ko fioo pɛ wɔnyɛɔ wɔtsuɔ yɛ Yehowa jalɛ nɔyeli lɛ bembuu mli moŋ, shi ehaa wɔnáa miishɛɛ.—Abɛi 27:11.
Nyɛmli Afilia Nyɛ yɛ Nyɔmɔwoo lɛ Hewɔ
15, 16. (a) Mɛɛ yiŋtoo Yesu kɛha akɛ no baaha ‘wɔnya ni wɔmli afili wɔ lɛ’? (b) Mɛɛ nikeenii yɔɔ ŋwɛi kɛha Kristofoi ni afɔ amɛ mu lɛ, ni amɛnanemɛi “tooi krokomɛi” lɛ hu anine baashɛ nikeenii nɔ yɛ mɛɛ gbɛ nɔ?
15 Yesu tsɔɔ yiŋtoo kroko hewɔ ni esa akɛ wɔhe efɔŋ ni awieɔ kɛ yi ni awaa wɔ tamɔ blema gbalɔi lɛ aha wɔná miishɛɛ lɛ. Be ni ekɛ nii ni ji nɛɛhu ni haa anáa miishɛɛ lɛ baa naagbee lɛ, ekɛɛ akɛ: “Nyɛnyaa ni nyɛmli afilia nyɛ; shi nyɛnyɔmɔwoo fá yɛ ŋwɛi.” (Mateo 5:12) Bɔfo Paulo ŋma akɛ: “Esha dɛŋ nyɔmɔwoo lɛ gbele ni; shi Nyɔŋmɔ duromɔ keenɔ lɛ naanɔ walaŋ yɛ Kristo Yesu, wɔ-Nuŋtsɔ lɛ, mli.” (Romabii 6:23) Hɛɛ, wala ji ‘nikeenii ni fe fɛɛ,’ ni ejeee nɔ ko ni wɔbaanyɛ wɔtsu nii kɛná. Eji nikeenii ni akɛhaa yaka. Yesu kɛɛ akɛ nyɔmɔwoo lɛ yɛ “ŋwɛi,” ejaakɛ Yehowa ji mɔ ni kɛhaa.
16 Mɛi ni afɔ amɛ mu lɛ baaná “wala akekere,” ni tsɔɔ akɛ amɛkɛ Kristo baaná wala ni gbele bɛ mli yɛ ŋwɛi. (Yakobo 1:12, 17) Mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ, ni ji “tooi krokomɛi” lɛ, miikpa gbɛ akɛ amɛbaaná naanɔ wala yɛ shikpɔŋ nɔ paradeiso mli. (Yohane 10:16; Kpojiemɔ 21:3-5) ‘Nikeenii’ ni akɛhaa kui enyɔ nɛɛ fɛɛ lɛ jeee nɔ ko ni amɛbaanyɛ amɛtsu nii kɛná. Mɛi ni afɔ amɛ mu lɛ kɛ “tooi krokomɛi” lɛ fɛɛ anine shɛɔ amɛ nikeenii lɛ nɔ yɛ Yehowa ‘duromɔ ni fa kɛteke nɔ’ ni tsirɛ bɔfo Paulo ni ekɛɛ akɛ: “Shi shidaa aha Nyɔŋmɔ yɛ enikeenii ni anyɛŋ agba lɛ hewɔ” lɛ hewɔ.—2 Korintobii 9:14, 15.
17. Mɛni hewɔ wɔbaanyɛ wɔná miishɛɛ ni ‘wɔnya ni wɔmli afili wɔ’ yɛ mfonirifeemɔŋ be ni awaa wɔ yi lɛ?
17 Bɔfo Paulo ŋma kɛyaha Kristofoi ni etsɛŋ ni Nɔyelɔ Nero baawa amɛteŋ mɛi komɛi ayi yɛ gbɛ ni ehiii kwraa nɔ lɛ akɛ: “[Nyɛhaa] wɔshwãa yɛ amanehului amli hu, ejaakɛ wɔle akɛ amanehulu lɛ tsɛ́ɔ tsuishiŋmɛɛ kɛbaa, ni tsuishiŋmɛɛ lɛ hu tsɛ́ɔ niiashikpamɔ kɛbaa; ni niiashikpamɔ lɛ tsɛ́ɔ nɔhiɛkãmɔ kɛbaa; ni nɔhiɛkãmɔ lɛ wooo mɔ hiɛgbele.” Ekɛɛ hu akɛ: “Nyɛnyaa yɛ hiɛnɔkamɔ mli; nyɛmiaa nyɛhiɛ yɛ amanehulu mli.” (Romabii 5:3-5; 12:12) Kɛ́ wɔhiɛnɔkamɔ yɛ ŋwɛi jio, shikpɔŋ lɛ nɔ jio, wɔsaaa nikeenii ni akɛhaa wɔ yɛ anɔkwa ni wɔyeɔ yɛ kaa mli lɛ kwraa. Husu bɛ miishɛɛ ni wɔhiɛnɔkamɔ akɛ wɔbaahi shi kɛya naanɔ koni wɔsɔmɔ, ni wɔjie wɔ-Tsɛ Yehowa ni yɔɔ suɔmɔ lɛ yi yɛ wɔ-Maŋtsɛ Yesu Kristo shishi lɛ he. ‘Wɔnyaa ni wɔmli filiɔ’ wɔ yɛ mfonirifeemɔŋ.
18. Mɛni abaanyɛ akpa gbɛ akɛ jeŋmaji lɛ baafee be ni naagbee lɛ bɛŋkɛɔ lɛ, ni mɛni Yehowa baafee?
18 Awa Yehowa Odasefoi ayi yɛ maji komɛi anɔ, ni akã he aawa amɛyi lolo. Be ni Yesu kɛ gbalɛ ni kɔɔ nibii agbɛjianɔtoo nɛɛ naagbee lɛ he lɛ haa lɛ, ebɔ anɔkwa Kristofoi kɔkɔ akɛ: “Migbɛi lɛ hewɔ lɛ jeŋmaji fɛɛ aaanyɛ nyɛ.” (Mateo 24:9, wɔma efã ko nɔ mi.) Akɛni wɔmiibɛŋkɛ naagbee lɛ hewɔ lɛ, Satan baaha jeŋmaji lɛ anyɛ Yehowa webii. (Ezekiel 38:10-12, 14-16) Enɛ baatsɔɔ be ni Yehowa baafee he nɔ ko. “Mafee mihe agbo, ni mafee mihe krɔŋkrɔŋ, ni maha ale mi yɛ jeŋmaji pii ahiɛ, ni amɛaaná amɛle akɛ mi ji Yehowa lɛ.” (Ezekiel 38:23) Yehowa baatsɔ enɛ nɔ etse egbɛi kpeteŋkpele lɛ he ni ekpɔ̃ ewebii lɛ kɛjɛ yiwaa shishi. No hewɔ lɛ, “ajɔɔ [“miishɛɛ ji,” NW] nuu ni ŋmɛɔ etsui shi . . . lɛ.”—Yakobo 1:12.
19. Mɛni esa akɛ wɔfee be ni wɔmɛɔ ‘Yehowa gbi lɛ’?
19 Be ni ‘Yehowa gbi lɛ’ bɛŋkɛɔ kpaakpa lɛ, nyɛhaa wɔnáa miishɛɛ akɛ ‘abuɔ wɔ mɛi ni sa akɛ abɔɔ amɛ ahora’ yɛ Yesu gbɛi lɛ hewɔ. (2 Petro 3:10-13; Bɔfoi lɛ Asaji 5:41) Taakɛ mra be mli Kristofoi lɛ ji lɛ, nyɛhaa wɔyaa nɔ ‘wɔtsɔɔ ni wɔjaje Kristo’ kɛ e-Maŋtsɛyeli lɛ, be mli ni wɔmɛɔ nikeenii ni akɛbaaha wɔ yɛ Yehowa jalɛ jeŋ hee lɛ mli lɛ.—Bɔfoi lɛ Asaji 5:42; Yakobo 5:11.
Kɛha Emlitii
• Ákɛ aaana nɔ̃ yɛ jalɛ hewɔ lɛ tsɔɔ mɛni?
• Mɛɛ hewalɛ yiwaa ná yɛ mra be mli Kristofoi lɛ anɔ?
• Mɛni hewɔ abaanyɛ akɛɛ akɛ awaa Yehowa Odasefoi ayi tamɔ blema gbalɔi lɛ?
• Mɛni hewɔ wɔbaanyɛ ‘wɔnya ni wɔmli afili wɔ’ be ni awaa wɔ yi lɛ?
[Nikasemɔ lɛ he Sanebimɔi]
[Mfonirii ni yɔɔ baafa 16, 17]
“Miishɛɛ ji nyɛ kɛji ajɛ nyɛ ni awa nyɛyi”
[He ni Sane lɛ Jɛ]
Kuu ni yɔɔ tsuŋwoohe mli: Chicago Herald-American