Ani Oshweɔ Jeŋ ko ni Gbeyeishemɔ Bɛ Mli?

“Wɔyɛ shihilɛ ko ni ‘naagbai haoɔ mɔ be fɛɛ be ni . . . anyɛɛɛ he nɔ ko afee mli,’ ni enɛɛmɛi fɛɛ baa yɛ ‘osharai ni ewa akɛ aaana ni nyɛɔ efɛ́ɔ be fɛɛ be yɛ gbɛ̀i srɔtoi anɔ ni anaaa amɛhe okadi ko lɛ hewɔ.’”

WIEMƆI nɛɛ ni atsɛ́ yisɛɛ kɛjɛ Newsweek wolo tɛtrɛɛ ni je kpo nyɛsɛɛ afi lɛ mli lɛ mli lɛ jieɔ mɛi babaoo ni yɔɔ jeŋ ni wɔyɔɔ mli ŋmɛnɛ ni mli eyi obɔ̃ kɛ jaramɔ lɛ ahenumɔi akpo. Yesu Kristo ha ale akɛ henumɔi ni tamɔ nɛkɛ lɛ amli baawa yɛ wɔsɛɛ be ni ebɛŋkɛ lɛ mli. Egba be ni jeŋmaji lɛ ahe baafĩ amɛ aahu akɛ amɛleŋ he ni amɛaatsɔ, kɛ nɔ̃ ni aaanyɔnyɔɔ gbɔmɛi anɔ yɛ gbeyei kɛ nibii ní baa je lɛŋ lɛ agbɛkwɛmɔ hewɔ lɛ efɔ̃ shi. Kɛlɛ, ehe ebahiaŋ ni wɔshe gbeyei loo wɔnu he akɛ wɔbɛ yelikɛbuamɔ ko, ejaakɛ Yesu kɛfata he akɛ: “Beni nɛkɛ nibii nɛɛ eje shishi lɛ, nyɛdamɔa shi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.”—Luka 21:25-28.

Beni Yehowa Nyɔŋmɔ wieɔ shihilɛ mli ni ewebii lɛ baahi yɛ amɛkpɔmɔ lɛ sɛɛ lɛ he lɛ, ejaje akɛ: “Mimaŋ lɛ aaahi shi yɛ hejɔlɛ shia, kɛ shihilɛhe ní yɔɔ shweshweeshwe, kɛ hejɔɔmɔhe ní yɔɔ kpoo.” (Yesaia 32:18) Yehowa tsɔ egbalɔ Mika nɔ ekɛɛ akɛ: “Ni mɔ fɛɛ mɔ aaatá eweintso kɛ egbamitso shishi, ni mɔ ko woŋ amɛhe gbeyei.”—Mika 4:4.

Kwɛ bɔ ni shihilɛ nɛɛ yɔɔ srɔto kwraa yɛ shihilɛ ni yɔɔ ŋmɛnɛ lɛ he ha! Adesai kɛ oshara ko ekpeŋ. Yɛ shihilɛ ni naagbai haoɔ mɔ yɛ mli be fɛɛ be ni anyɛɛɛ he nɔ ko afee najiaŋ lɛ, abaahi shi yɛ toiŋjɔlɛ kɛ miishɛɛ mli daa.