Hiob Wo Yehowa Gbɛi Lɛ Hiɛ Nyam
Hiob Wo Yehowa Gbɛi Lɛ Hiɛ Nyam
“Aaajie Yehowa gbɛi lɛ yi kɛ̃!”—HIOB 1:21.
1. Namɔ eeenyɛ efee akɛ lɛ eŋma Hiob wolo lɛ, ni mɛɛ be eŋma?
MOSE eye aaafee afii 40 beni ejo foi kɛshi Mizraim ní eyahi Midian koni Farao akagbe lɛ lɛ. (Bɔf. 7:23) Beni eyɔɔ Midian lɛ, eeenyɛ efee akɛ ená ele kaai ni Hiob kɛkpeɔ lɛ ahe sane, ejaakɛ no mli lɛ Hiob yɛ Uz shikpɔŋ lɛ nɔ, ni jɛmɛ kɛ Midian jekɛɛɛ. Afii komɛi asɛɛ beni eshwɛ fioo ni Mose kɛ Israelbii lɛ baashɛ Shiwoo Shikpɔŋ lɛ nɔ, ní amɛyɔɔ he ko ni bɛŋkɛ Uz lɛ, eeenyɛ efee akɛ ená ele nibii ni tee nɔ yɛ Hiob wala shihilɛ naagbee afii lɛ amli. Yudafoi lɛ susuɔ akɛ Mose ŋma Hiob wolo lɛ yɛ Hiob gbele sɛɛ.
2. Mɛɛ gbɛ̀i anɔ Hiob wolo lɛ woɔ Yehowa tsuji ni yɔɔ ŋmɛnɛŋmɛnɛ lɛ ahewalɛ?
2 Hiob wolo lɛ wajeɔ Nyɔŋmɔ tsuji ni yɔɔ ŋmɛnɛ lɛ ahemɔkɛyeli. Yɛ mɛɛ gbɛ̀i anɔ? Emli saji lɛ haa wɔleɔ nibii komɛi ni he hiaa waa ni tee nɔ yɛ ŋwɛi, ni emaa sane ni he hiaa fe fɛɛ ni kɔɔ jeŋ muu fɛɛ maŋtsɛ ni Nyɔŋmɔ ji lɛ he lɛ nɔ mi. Hiob wolo lɛ hu haa wɔnuɔ nɔ ni anɔkwayeli biɔ lɛ shishi jogbaŋŋ, ni ewaa wɔ koni wɔnu nɔ hewɔ ni bei komɛi lɛ Yehowa ŋmɛɔ gbɛ koni etsuji lɛ ana amanehulu lɛ shishi. Kɛfata he lɛ, Hiob wolo lɛ haa wɔleɔ akɛ Yehowa Henyɛlɔ kpeteŋkpele kɛ adesai hu ahenyɛlɔ ji Satan Abonsam. Hiob wolo lɛ haa wɔleɔ hu akɛ adesai ni yeee emuu baanyɛ aye Yehowa anɔkwa yɛ kaai ni naa wa ni amɛkɛkpeɔ lɛ fɛɛ sɛɛ taakɛ Hiob fee lɛ. Nyɛhaa wɔpɛia nibii komɛi ni awie he yɛ Hiob wolo lɛ mli lɛ amli wɔkwɛa.
Satan Ka Hiob
3. Mɛɛ gbɔmɔ nɛkɛ Hiob ji, ni mɛni hewɔ Satan jie ehiɛ eka lɛ lɛ?
3 Hiob ji niiatsɛ, gbɔmɔ wulu, kɛ weku yitso ni yɔɔ jeŋba kpakpa. Ekã shi faŋŋ akɛ abuɔ lɛ akɛ ŋaawolɔ kpakpa ní yeɔ ebuaa ohiafoi. Nɔ ni fe fɛɛ lɛ, Hiob sheɔ Nyɔŋmɔ gbeyei. Awie Hiob he akɛ nuu ni “kpá ko bɛ ehe ni eja, ni esheɔ Nyɔŋmɔ gbeyei, ni esɔleɔ ehe yɛ efɔŋ he.” Jeee niiatsɛ kɛ gbɔmɔ wulu ni Hiob ji lɛ hewɔ Satan Abonsam jie ehiɛ eka lɛ lɛ, shi moŋ ehe ní etuu eha Nyɔŋmɔ lɛ hewɔ.—Hiob 1:1; 29:7-16; 31:1.
4. Mɛni ji anɔkwayeli?
4 Shishijee nibii ni awie he yɛ Hiob wolo lɛ mli lɛ tsɔɔ akɛ be ko lɛ, ŋwɛi bɔfoi lɛ babua amɛhe naa yɛ Yehowa hiɛ yɛ ŋwɛi. Satan hu fata amɛhe, ni efolɔ Hiob naa. (Nyɛkanea Hiob 1:6-11.) Eyɛ mli akɛ Satan tsĩ nii ni Hiob yɔɔ lɛ tã moŋ, shi ewie eshi Hiob anɔkwayeli lɛ titri. Wiemɔ ni ji “anɔkwayeli” lɛ tsɔɔ jalɛ nifeemɔ, bemyeli, loo nɔ ni kpa bɛ he. Taakɛ akɛtsu nii yɛ Biblia lɛ mli lɛ, kɛ́ mɔ ko yeɔ anɔkwa lɛ, no tsɔɔ akɛ ejɛ etsui muu fɛɛ mli etuu ehe eha Yehowa.
5. Mɛni Satan wie yɛ Hiob he?
5 Satan tsɔɔ akɛ jeee anɔkwayeli hewɔ Hiob jáa Nyɔŋmɔ lɛ, shi moŋ nii ni enáa kɛjɛɔ Nyɔŋmɔ dɛŋ lɛ hewɔ. Satan wie akɛ ja Nyɔŋmɔ miijɔɔ Hiob ní eebu ehe daa dani ebaaye Yehowa anɔkwa. Bɔni afee ni ana sane ni Satan wie eshi Hiob lɛ naa lɛ, Yehowa ŋmɛ lɛ gbɛ koni etutua nuu anɔkwafo lɛ. No hewɔ lɛ, yɛ gbi kome pɛ mli lɛ, abakɛɛ Hiob akɛ aju ekooloi lɛ ekomɛi ni ekrokomɛi hu egboi, agbe etsuji lɛ, ni ebii nyɔŋma lɛ hu egboi. (Hiob 1:13-19) Ani Satan tutuamɔ lɛ ha Hiob kwa Nyɔŋmɔ? Sane ni ajɛ mumɔŋ aŋma lɛ tsɔɔ bɔ ni Hiob fee enii eha yɛ haomɔ ni ekɛkpe lɛ he lɛ mli akɛ: “Yehowa ŋɔha, ni Yehowa ebaŋɔ kɛtee; aaajie Yehowa gbɛi lɛ yi kɛ̃!”—Hiob 1:21.
6. (a) Mɛni ba beni abɔ gwa ekoŋŋ yɛ ŋwɛi lɛ? (b) Namɛi yɔɔ Satan jwɛŋmɔ mli beni ewie eshi anɔkwa ni Hiob yeɔ Yehowa lɛ?
6 Sɛɛ mli lɛ, abɔ gwa ekoŋŋ yɛ ŋwɛi. Satan saa efolɔ Hiob naa ekoŋŋ akɛ: “Akɛ hewolo haa yɛ hewolo najiaŋ, ni nɔ fɛɛ nɔ ní mɔ ko yɔɔ lɛ eŋɔhaa yɛ ewala hewɔ! Shi agbɛnɛ kpã onine mli, ní ota eheloo kɛ ewu he, akɛ ekwaŋo yɛ ohiɛ lo!” Kadimɔ akɛ jeee Hiob pɛ naa Satan folɔ. Kɛɛmɔ ni Abonsam kɛɛ akɛ, ‘Nɔ fɛɛ nɔ ní mɔ ko yɔɔ lɛ eŋɔhaa yɛ ewala hewɔ’ lɛ tsɔɔ akɛ ewie eshi anɔkwa ni ‘mɔ fɛɛ mɔ’ ni jáa Yehowa lɛ yeɔ lɛ, shi jeee Hiob nɔ̃ lɛ pɛ kɛkɛ. No sɛɛ lɛ, Nyɔŋmɔ ŋmɛ gbɛ ni Satan ha hela ni jaraa mɔ Hiob. (Hiob 2:1-8) Shi jeee kaai ni Hiob kɛkpe lɛ fɛɛ nɛ.
Nɔ ni Wɔkaseɔ Kɛjɛɔ Hiob He
7. Mɛɛ gbɛ̀i anɔ Hiob ŋa lɛ kɛ enanemɛi lɛ hao lɛ?
7 Shishijee lɛ, Hiob kɛ eŋa lɛ fɛɛ na amanehulu kome. Amɛbii ni gboi kɛ amɛweku lɛ nii ahiɛ ni kpãta lɛ ha yoo lɛ tsui kumɔ. Ekã shi faŋŋ akɛ ehao beni ena ni hela ni jaraa emɔ ewu lɛ. Ekɛɛ Hiob akɛ: “Ohiɛ onɔkwayeli nɛɛ mli kpɛŋŋ lolo lo? Kwá Nyɔŋmɔ ní ogbo!” No sɛɛ lɛ, Elifaz, Bildad, kɛ Zofar ba amɛkɛɛ amɛbaashɛje Hiob mii. Yɛ no najiaŋ lɛ, amɛtsɔɔ saji anaa yɛ gbɛ ni ejaaa nɔ, ni amɛfee amɛhe “miishɛjelɔi gbohii.” Ákɛ nɔkwɛmɔnɔ lɛ, Bildad wie akɛ Hiob bii lɛ fee efɔŋ, ni no hewɔ amɛgboi lɛ. Elifaz tsɔɔ akɛ eshai ni Hiob efee kɛho lɛ ahewɔ enaa amanehulu lɛ. Ewie po akɛ mɛi ni yeɔ anɔkwa lɛ ahe bɛ sɛɛnamɔ ko kwraa ha Nyɔŋmɔ! (Hiob 2:9, 11; 4:8; 8:4; 16:2; 22:2, 3) Hiob tee nɔ eye anɔkwa yɛ haomɔ ni naa wa waa nɛɛ fɛɛ sɛɛ. Eji anɔkwale akɛ, etɔ̃ akɛ “ebu ehe jalɔ fe Nyɔŋmɔ.” (Hiob 32:2) Ni kɛlɛ, enɛ fɛɛ mli lɛ, etee nɔ eye anɔkwa.
8. Mɛɛ nɔkwɛmɔnɔ kpakpa Elihu fee eha mɛi ni woɔ mɛi aŋaa ŋmɛnɛ lɛ?
8 Enɛ sɛɛ lɛ, Ŋmalɛ lɛ tsĩ Elihu hu ní ebasara Hiob lɛ tã. Klɛŋklɛŋ lɛ, Elihu bo saji ni Hiob kɛ enanemɛi etɛ lɛ wie lɛ atoi. Eyɛ mli akɛ mɛi ejwɛ lɛ fɛɛ ye Elihu onukpa moŋ, shi ekɛ nilee tsu nii fe amɛ. Ekɛ Hiob wie kɛ bulɛ. Elihu jie Hiob yi yɛ enɔkwayeli lɛ hewɔ. Shi ekɛɛ hu akɛ Hiob miitsɛ ehe jalɔ tuutu. No sɛɛ lɛ, Elihu ha Hiob le akɛ sɛɛnamɔ yɛ he daa akɛ aaasɔmɔ Nyɔŋmɔ yɛ anɔkwayeli mli. (Nyɛkanea Hiob 36:1, 11.) Eji nɔkwɛmɔnɔ kpakpa kɛha mɛi ni ehe baahia akɛ amɛwo mɛi aŋaa ŋmɛnɛ lɛ! Elihu to etsui shi, ebo Hiob toi jogbaŋŋ, ejie eyi yɛ nibii komɛi ahe, ni ewo lɛ ŋaa kpakpa.—Hiob 32:6; 33:32.
9. Mɛɛ gbɛ nɔ Yehowa tsɔ eye ebua Hiob?
9 Yɛ naagbee lɛ, Yehowa diɛŋtsɛ kɛ Hiob wie! Ŋmalɛ lɛ kɛɔ akɛ: “Yehowa to he ehã Hiob kɛjɛ ahum mli.” Yehowa jɛ mlihilɛ mli ebi Hiob saji srɔtoi kɛye ebua lɛ koni ejaje esusumɔ. Hiob jɛ etsui mli ekpɛlɛ kãmɔ ni Yehowa kã lɛ lɛ nɔ, ni ekpɛlɛ nɔ akɛ: “Naa, mijeee mɔ ko . . . Miishwa mihe yɛ sũ kɛ lamulu mli!” Beni Yehowa kɛ Hiob ewie egbe naa lɛ, ekã Hiob nanemɛi etɛ lɛ ahiɛ akɛni ‘amɛwieee bɔ ni ja’ lɛ hewɔ. Abi ni Hiob asɔle eha amɛ. No sɛɛ lɛ, “Yehowa jie Hiob kɛjɛ tsuŋwoo lɛ mli, beni ekpaa fai ehaa enanemɛi lɛ; ni Yehowa ku nii fɛɛ ní Hiob yɔɔ sá lɛ ebɔ he toi enyɔ eha lɛ.”—Hiob 38:1; 40:4; 42:6-10.
Ani Wɔsumɔɔ Yehowa Kɛ Wɔtsui Muu Fɛɛ?
10. Mɛni hewɔ Yehowa ekuuu ehiɛ efɔɔɔ Satan naafolɔmɔi lɛ anɔ loo ekpãta ehiɛ lɛ?
10 Yehowa ji jeŋ muu fɛɛ Bɔlɔ, adebɔɔ nibii fɛɛ a-Nɔyelɔ. Mɛni hewɔ ekuuu ehiɛ efɔɔɔ Abonsam naafolɔmɔi lɛ anɔ lɛ? Nyɔŋmɔ le akɛ jeee ehiɛ ni eeku efɔ Satan naafolɔmɔi lɛ anɔ loo ehiɛ ni eeekpata lɛ baaha ana sane lɛ naa. Abonsam wie akɛ Hiob ni ji Yehowa tsulɔ ni kpa ko bɛ ehe lɛ baakwa Nyɔŋmɔ kɛ́ edɛŋ fɛɛ kpala. Hiob tee nɔ eye anɔkwa yɛ kaa ni ekɛkpe lɛ mli. No sɛɛ lɛ, Satan wie akɛ adesa fɛɛ adesa baakwa Nyɔŋmɔ kɛ́ eepiŋ yɛ gbɔmɔtsoŋ. Hiob piŋ, shi etee nɔ eye anɔkwa kɛwula shi. No hewɔ lɛ, nuu anɔkwafo ni yeee emuu nɛɛ ha ana Satan akɛ amalelɔ. Ni Nyɔŋmɔ jálɔi krokomɛi hu?
11. Mɛɛ gbɛ nɔ Yesu tsɔ eha ana faŋŋ akɛ Satan ji amalelɔ?
11 Kɛ́ Nyɔŋmɔ tsulɔ ko tee nɔ eye anɔkwa ekɔɔɔ he eko nɔ̃ shihilɛ ni Satan kɛbaaba enɔ lɛ, ehaa anaa akɛ nakai henyɛlɔ ni yi wa lɛ naafolɔmɔi lɛ ji amale. Beni Yesu ba shikpɔŋ lɛ nɔ lɛ, eha ana faŋŋ akɛ Satan ji amalelɔ. No mli lɛ Yesu ji adesa ni eye emuu tamɔ Adam ni ji adesai fɛɛ atsɛ lɛ. Anɔkwa ni Yesu ye kɛtee gbele mli lɛ fee lɛ faŋŋ diɛŋtsɛ akɛ Satan ji amalelɔ, ni akɛ enaafolɔmɔi lɛ ji amale.—Kpoj. 12:10.
12. Mɛɛ hegbɛ kɛ gbɛnaa nii Yehowa tsulɔ fɛɛ Yehowa tsulɔ yɔɔ?
12 Ni kɛlɛ, Satan kã he eeka Yehowa jálɔi. Wɔteŋ mɔ fɛɛ mɔ ená hegbɛ ni wɔkɛaatsɔɔ akɛ jeee nibii ni wɔtaoɔ kɛjɛɔ Yehowa dɛŋ lɛ hewɔ wɔyaa nɔ wɔsɔmɔɔ lɛ lɛ, shi moŋ suɔmɔ ni wɔyɔɔ kɛha lɛ lɛ hewɔ—ni eji wɔgbɛnaa nii akɛ wɔfee nakai. Te wɔbuɔ nakai gbɛnaa nii lɛ wɔhaa tɛŋŋ? Wɔnaa lɛ akɛ eji hegbɛ ni wɔná akɛ wɔɔye Yehowa anɔkwa. Eshɛjeɔ wɔmii hu akɛ wɔɔle akɛ Yehowa wajeɔ wɔ koni wɔnyɛ wɔdamɔ kaai ni wɔkɛ kpeɔ lɛ anaa, ni taakɛ ebalɛ yɛ Hiob gbɛfaŋ lɛ, ehaŋ aka wɔ fe bɔ ni wɔɔnyɛ.—1 Kor. 10:13.
Satan Ji Henyɛlɔ Kuɛŋtilɔ kɛ Hemɔkɛyeli Kwalɔ
13. Mɛɛ saji Hiob wolo lɛ haa wɔleɔ yɛ Satan he?
13 Hebri Ŋmalɛi lɛ haa wɔleɔ gbɛ fɔŋ ni Satan tsɔ nɔ kɛte shi eshi Yehowa kɛ bɔ ni elaka adesai lɛ he sane fitsofitso. Kristofoi a-Hela Ŋmalɛi lɛ haa wɔleɔ shi ni Satan te ewo Yehowa lɛ he saji babaoo, ni Kpojiemɔ wolo lɛ haa wɔleɔ akɛ abaabu jeŋ muu fɛɛ maŋtsɛ ni Yehowa ji lɛ bem, ni abaakpãta Satan hiɛ kwrakwra. Hiob wolo lɛ haa wɔleɔ Satan atuatsemɔ gbɛ lɛ he saji krokomɛi wɔfataa he. Jeee Yehowa yijiemɔ Satan tee beni abɔ gwa yɛ ŋwɛi ní eyapue yɛ jɛmɛ lɛ. Abonsam ehiɛɛɛ jwɛŋmɔ kpakpa, etee jɛmɛ koni eyagbe Hiob he guɔ. Beni Satan folɔ Hiob naa ní aŋmɛ lɛ gbɛ koni eyaka lɛ lɛ, “Satan je Yehowa hiɛ etee.”—Hiob 1:12; 2:7.
14. Te Satan kɛ Hiob ye eha tɛŋŋ?
14 No hewɔ lɛ, Hiob wolo lɛ haa wɔleɔ akɛ Satan ji adesai ahenyɛlɔ ni yitsoŋ wa. Atsɔɔɔ be falɛ ni kã gwa ni abɔ yɛ ŋwɛi ni awie he yɛ Hiob 1:6 lɛ kɛ nɔ ni awie he yɛ Hiob 2:1 lɛ teŋ, shi yɛ nakai be falɛ lɛ mli lɛ, Satan ka Hiob waa. Anɔkwa ni Hiob ye lɛ ha Yehowa kɛɛ Satan akɛ: “[Hiob] hiɛ enɔkwayeli lɛ mli kpɛŋŋ lolo, tsɛ oha mite shi miwo lɛ ni mikpata ehiɛ yakatswaa!” Shi Satan ekpɛlɛɛɛ nɔ akɛ enaafolɔmɔi lɛ ji amale. Yɛ no najiaŋ lɛ, ebi koni aha ekɛ kaa kroko ni naa wa aba Hiob nɔ. No hewɔ lɛ, Abonsam ka Hiob beni eji niiatsɛ kɛ beni eji ohiafo fɛɛ. Eyɛ faŋŋ akɛ, Satan bɛ musuŋtsɔlɛ kɛha ohiafoi loo mɛi ni miina nɔ. Enyɛ̃ɔ mɛi ni yeɔ anɔkwa. (Hiob 2:3-5) Ni kɛlɛ, anɔkwa ni Hiob ye lɛ ha ana Satan amalelɔ.
15. Mɛɛ gbɛ nɔ hemɔkɛyeli kwalɔi ni yɔɔ ŋmɛnɛ lɛ feɔ amɛnii tamɔ Satan pɛpɛɛpɛ?
15 Satan ji bɔɔ nii lɛ ateŋ klɛŋklɛŋ mɔ ni batsɔ hemɔkɛyeli kwalɔ. Hemɔkɛyeli kwalɔi ni yɔɔ ŋmɛnɛ lɛ feɔ amɛnii tamɔ Abonsam pɛpɛɛpɛ. Ekolɛ amɛbaawie amɛshi aŋkroaŋkroi ni yɔɔ asafo lɛ mli lɛ, asafoŋ onukpai lɛ, loo Nɔyeli Kuu lɛ nyanyaanya, ni no baaha amɛná jwɛŋmɔ ni ejaaa. Hemɔkɛyeli kwalɔi komɛi kɛɔ akɛ esaaa ákɛ akɛ Nyɔŋmɔ gbɛi ni ji Yehowa lɛ tsuɔ nii. Amɛsumɔɔɔ akɛ amɛkaseɔ Yehowa he nii loo ni amɛsɔmɔ lɛ. Hemɔkɛyeli kwalɔi jieɔ amɛhiɛ amɛkaa anɔkwafoi, tamɔ bɔ ni amɛtsɛ Satan feɔ lɛ pɛpɛɛpɛ. (Yoh. 8:44) No hewɔ ni esaaa akɛ Yehowa tsuji kɛ amɛ bɔɔ kwraa lɛ!—2 Yoh. 10, 11.
Hiob Wo Yehowa Gbɛi lɛ Hiɛ Nyam
16. Te Hiob fee enii yɛ Yehowa he eha tɛŋŋ?
16 Hiob kɛ Yehowa gbɛi lɛ tsu nii, ni ewo hiɛ nyam hu. Beni Hiob tsui kumɔ yɛ ebii lɛ agbele hewɔ po lɛ, ekɛ sane gbonyo ko shwaaa Nyɔŋmɔ. Eyɛ mli akɛ Hiob susu yɛ gbɛ ni ejaaa nɔ akɛ Nyɔŋmɔ ji mɔ ni kpãta enibii lɛ ahiɛ moŋ, shi fɛɛ sɛɛ lɛ, ewo Yehowa gbɛi lɛ hiɛ nyam. Sɛɛ mli lɛ, Hiob jaje yɛ ebɛbuai lɛ ateŋ ekome mli akɛ: “Naa, Nuŋtsɔ [Yehowa] gbeyeishemɔ lɛ, no ji nilee, ni efɔŋ he jee ji jwɛŋmɔ!”—Hiob 28:28.
17. Mɛni ye ebua Hiob ni etee nɔ eye anɔkwa lɛ?
17 Mɛni ye ebua Hiob ni etee nɔ eye anɔkwa lɛ? Ekã shi faŋŋ akɛ ená ekɛ Yehowa teŋ wekukpaa kpakpa momo dani ekɛ amanehului lɛ kpe. Wɔbɛ odaseyeli ko ni tsɔɔ akɛ Hiob le akɛ Satan etswa Yehowa mpoa, shi kɛlɛ etswa efai shi akɛ ebaaye anɔkwa. Ekɛɛ akɛ: “Mibemyeli lɛ miŋmɛŋ he kɛyashi beyinɔ ní magbo.” (Hiob 27:5) Te Hiob fee tɛŋŋ ená ekɛ Nyɔŋmɔ teŋ wekukpaa kpakpa lɛ? Ŋwanejee ko bɛ he akɛ ehiɛ sɔ saji ni enu, ní tsɔɔ bɔ ni Nyɔŋmɔ kɛ ewekumɛi ni ji Abraham, Isak, kɛ Yakob ye eha lɛ. Hiob kwɛ adebɔɔ nii, ni enyɛ eyɔse sui babaoo ni Yehowa yɔɔ lɛ hu.—Nyɛkanea Hiob 12:7-9, 13, 16.
18. (a) Mɛɛ gbɛ nɔ Hiob ha ana akɛ etuu ehe eha Yehowa? (b) Mɛɛ gbɛ̀i anɔ wɔɔtsɔ wɔkase Hiob nɔkwɛmɔnɔ kpakpa lɛ?
18 Nibii ni Hiob kase lɛ ha eshwe akɛ efee nɔ ni sa Yehowa hiɛ. Eshãa afɔlei daa ejaakɛ ekolɛ eweku lɛ mli bii lɛ efee nɔ ko ni esaaa Nyɔŋmɔ hiɛ loo “amɛkwa Nyɔŋmɔ yɛ amɛtsuiaŋ.” (Hiob 1:5) Beni Hiob kɛ kaa ni naa wa waa kpeɔ po lɛ, ewie Yehowa he ekpakpa. (Hiob 10:12) Mɛɛ nɔkwɛmɔnɔ kpakpa po nɛ! Esa akɛ wɔ hu wɔná Yehowa kɛ eyiŋtoi ahe anɔkwa nilee daa. Esa akɛ wɔfee nibii ni baawaje wɔ yɛ mumɔŋ daa, tamɔ nikasemɔ, kpeeiyaa, sɔlemɔ, kɛ sanekpakpa lɛ shiɛmɔ. Kɛfata he lɛ, esa akɛ wɔkɛ wɔhewalɛ fɛɛ atsu nii ni wɔkɛha ale Yehowa gbɛi lɛ. Ni taakɛ Hiob anɔkwayeli lɛ ha Yehowa ná miishɛɛ lɛ, nakai nɔŋŋ etsui nyɔɔ emli kɛ́ etsuji ni yɔɔ ŋmɛnɛ lɛ ye anɔkwa lɛ. Abaasusu sane nɛɛ he yɛ nikasemɔ ni nyiɛ sɛɛ lɛ mli.
Ani Okaiɔ?
• Mɛni hewɔ Satan Abonsam gbala ejwɛŋmɔ kɛtee Hiob nɔ lɛ?
• Mɛɛ kaai Hiob kɛkpe, ni te efee enii eha tɛŋŋ?
• Mɛni baaye abua wɔ koni wɔya nɔ wɔye anɔkwa taakɛ Hiob fee lɛ?
• Mɛni Hiob wolo lɛ haa wɔleɔ yɛ Satan he?
[Nikasemɔ lɛ he Sanebimɔi]
[Mfoniri ni yɔɔ baafa 4]
Hiob wolo lɛ mli saji haa wɔleɔ sane ni he hiaa fe fɛɛ ni kɔɔ jeŋ muu fɛɛ maŋtsɛ ni Nyɔŋmɔ ji lɛ he lɛ
[Mfoniri ni yɔɔ baafa 6]
Mɛɛ shihilɛi amli abaanyɛ aka onɔkwayeli lɛ akwɛ?