Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni ji yiŋtoi komɛi ahewɔ ni mɛi feɔ nibii gbohii?

Yiŋtoi titrii lɛ ekomɛi ji, weiyeli ni haa mɛi amli fuɔ, shika suɔmɔ, mla ni akwɛɛɛ ni akɛtsu nii jogbaŋŋ, kɛ kaa ni anyɛɛɛ nɔ aye. (Jaj. 7:7; 8:11; 1 Tim. 6:10; Yak. 1:14, 15)—10/1, baafa 4.

• Mɛni hewɔ ehi akɛ obo onaanyo ko ni he miiye lɛ toi jogbaŋŋ ni onu he oha lɛ lɛ?

Onaanyo ni he yeɔ lɛ miitao mɔ ko ni baajɛ etsuiŋ ebo lɛ toi, shi jeee mɔ ni baaná enaagba lɛ naa tsabaa kɛkɛ. Ekolɛ ebaanu he akɛ esa akɛ egba bo nɔ ni feɔ lɛ lɛ, ni esheee gbeyei akɛ obaabɔ ehiɛ. (Jaj. 3:1, 7; Yak. 1:19)—10/1, baafa 10,11.

• Beni Nyɔŋmɔ jieɔ Israelbii lɛ kɛjɛɔ Mizraim lɛ, mɛɛ ŋwɛi bɔfo etsu kɛnyiɛ amɛhiɛ lɛ? (2 Mose 23:20, 21)

Wɔbaanyɛ wɔmu sane naa akɛ ŋwɛi bɔfo ni ‘Yehowa gbɛ́i yɔɔ emli’ lɛ ji Nyɔŋmɔ kromɔ-Bi, ni sɛɛ mli lɛ abale lɛ akɛ Yesu lɛ.—9/15, baafa 21.

• Mɛni hewɔ esa akɛ wu kɛ ŋa akase bɔ ni afeɔ ekome kɛsusuɔ nii ahe?

Yehowa Nyɔŋmɔ buɔ mɛi ni ebote gbalashihilɛ mli lɛ akɛ “heloo kome.” (Mat. 19:3-6) Bɔni afee ni wekukpaa nɛɛ mli awa lɛ, ehe miihia ni nyɛkɛ nyɛhe agba sane jogbaŋŋ.—10/1, baafa 15.

• Yɛ anɔkwa jamɔ gbɛfaŋ lɛ, mɛni ji naajiemɔi komɛi ni Nyɔŋmɔ ekpɛlɛɛɛ nɔ?

‘Ewa tsɔ. Ebɛ mimli. Mibɛ deka kwraa. Mihe esako. Mɔ ko eye mi sane fɔŋ.’ Enɛɛmɛi jeee naajiemɔi ni ja ni wɔbaanyɛ wɔdamɔ nɔ wɔkpoo akɛ wɔɔye Nyɔŋmɔ fãmɔi anɔ.—10/15, baafa 12-15.

• Mɛɛ gbɛi komɛi obaanyɛ otsɔ nɔ oha Kristofoi akpeei atswa bo kɛ mɛi krokomɛi ama shi?

Tsɔ hiɛ osaa ohe. Kaafolɔ mli. Shɛ jɛmɛ yɛ be naa. Okɛ nɔ fɛɛ nɔ ni he hiaa lɛ aba. Kaafee nibii ni baagbala ojwɛŋmɔ. Okɛ ohe awo mli. Ha ohetoi lɛ afee kuku. Tsu nifeemɔi ni akɛwoɔ odɛŋ lɛ ahe nii. Jiemɔ mɛi ni kɛ amɛhe woɔ mli lɛ ayi. Okɛ mɛi abɔ beni kpeei lɛ ejeko shishi kɛ beni akpa.—10/15, baafa 22.

• Mɛɛ gbɛ nɔ fɔlɔi baanyɛ ‘ato okadi’ amɛha amɛbii lɛ yɛ bɔ ni amɛaafee amɛtsu amɛsɔ̃i ahe nii lɛ he? (Yoh. 13:15)

Taakɛ Yesu fee lɛ, esa akɛ fɔlɔi atsɔɔ amɛbii lɛ nɔ ni sɔ̃ he nii ni aaatsu lɛ tsɔɔ, ni amɛfee he nɔkwɛmɔnɔ hu amɛha amɛ.—10/1, baafa 19.

• Mɛni wɔbaanyɛ wɔkase kɛjɛ Aaron tipɛŋfoi ní eha amɛnyɛ enɔ lɛ mli?

Beni Mose bɛ Israelbii lɛ ateŋ lɛ, amɛbi Aaron koni efee nyɔŋmɔ ko eha amɛ. Eha amɛye enɔ ni efee nakai. Enɛ tsɔɔ akɛ jeee gbekɛbii pɛ amɛtipɛŋfoi náa amɛnɔ hewalɛ. Ebaanyɛ ená mɛi ni edara ni miisumɔ ni amɛfee nɔ ni ja po lɛ anɔ hewalɛ. Esaaa akɛ wɔhaa wɔtipɛŋfoi náa wɔnɔ hewalɛ yɛ gbɛ gbonyo nɔ.—11/15, baafa 8.

• Mɛni ji gbɛi komɛi ni obaanyɛ otsɔ nɔ oná Biblia kanemɔ he sɛɛ?

Okɛ jwɛŋmɔ ni ja akane. (Yak. 1:23-25) Kanemɔ Biblia shishitsɔɔmɔ ni anyɛɔ amuɔ afɔ̃ɔ nɔ. Sɔlemɔ koni Yehowa aye abua bo. (Lala 119:18) Kanemɔ daa gbi. (Yosh. 1:8) Tsakemɔ bɔ ni okaneɔ lɛ ohaa lɛ mli. Jwɛŋmɔ nɔ. (Lala 119:97) Ha aye abua bo. (2 Pet. 3:16)—10/1, baafa 21-23.