Nyɔŋmɔ Gbɛ́i lɛ yɛ Jɔɔ Voo ko Mli

ST. MORITZ. Ani onu gbɛ́i nɛɛ dã? Ekolɛ onu dã, ejaakɛ eji hejɔɔmɔhe ko ní ehe gbɛ́i waa ni yɔɔ Switzerland Engadine Jɔɔ lɛ mli. St. Moritz yɛ jɔɔ fɛfɛo ko mli yɛ Alps gɔji ni snoo eha yiteŋ fɛɛ lɛ shishi, yɛ Switzerland wuoyi-bokagbɛ ni bɛŋkɛ Italy lɛ, ni eji hei ni mɛi babaoo sumɔɔ ni amɛyakwɛ yɛ jɔɔ nɛɛ mli lɛ ateŋ ekome kɛkɛ. Swiss National Park lɛ—he ni anaa kooloi kɛ tsei srɔtoi fɛfɛji ni jieɔ Yehowa, wɔ-Bɔlɔ Kpele lɛ yi yɛ lɛ—hu yɛ jɛmɛ. (Lala 148:7-10) Agbɛnɛ hu lɛ, anaa kusum ko ni tee nɔ kɛjɛ aaafee afi 1650 afii lɛ amli lɛ he nɔ ko yɛ jɛmɛ.

Ekolɛ nibii komɛi ni aŋmala yɛ shĩai babaoo ni yɔɔ jɔɔ nɛɛ mli lɛ ahe lɛ baagbala ojwɛŋmɔ. Amrɔ nɛɛ po lɛ, ewaaa akɛ obaana shĩai ni aŋmala Nyɔŋmɔ gbɛ́i lɛ yɛ agbói ni yɔɔ shĩai lɛ ahiɛ lɛ ahe. Afii ohai abɔ ni eho nɛ lɛ, mɛi ni yɔɔ jɛmɛ lɛ ŋmalaa saji komɛi amɛwoɔ amɛshĩai lɛ ahe, loo amɛkpɛɔ  amɛwoɔ tɛi kɛ nibii krokomɛi anɔ ni amɛkɛkpɛtɛɔ amɛshĩai lɛ ahe. Shĩa ko ni yɔɔ Bever akrowa lɛ he mfoniri ji nɔ ni onaa yɛ biɛ nɛɛ lɛ. Nɔ ni aŋma lɛ shishi ji: “Yɛ afi 1715. Yehowa ji shishijee, ni Yehowa ji naagbee. Nyɔŋmɔ baaha onyɛ ofee nɔ fɛɛ nɔ, shi kɛ́ obɛ Nyɔŋmɔ lɛ onyɛŋ ofee nɔ ko nɔ ko.” Hɛɛ, blema niŋmaa nɛɛ tsĩ Nyɔŋmɔ gbɛ́i lɛ tã shii enyɔ sɔŋŋ.

Kɛ́ otee Madulain akrowa lɛ, obaana niŋmaa ko ni etsɛ fe enɛ po. Niŋmaa lɛ kaneɔ akɛ: “Lala 127. Kɛjeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme. Lucius Rumedius. Yɛ afi 1654.”

Mɛni hewɔ aŋmala Nyɔŋmɔ gbɛ́i lɛ faŋŋ yɛ jɔɔ nɛɛ mli lɛ? Yɛ afi 1500 afii lɛ amli beni mɛi komɛi tse amɛhe kɛjɛ Roma Katolik jamɔ lɛ he lɛ, atsɔɔ Biblia lɛ shishi kɛtee Romansh, ni ji wiemɔ ni aná kɛjɛ Latin wiemɔ mli, ni awieɔ yɛ Engadine lɛ mli. Yɛ anɔkwale mli lɛ, no ji klɛŋklɛŋ wolo ni atsɔɔ shishi kɛtee nakai wiemɔ lɛ mli. Akɛni nɔ ni mɛi ni yɔɔ jɛmɛ lɛ ateŋ mɛi babaoo kane yɛ Nyɔŋmɔ Wiemɔ lɛ mli lɛ kanya amɛ hewɔ lɛ, jeee amɛ diɛŋtsɛ amɛgbɛ́i lɛ pɛ kɛkɛ amɛŋmala amɛwo amɛshĩai ahe, shi moŋ amɛŋmala Biblia mli wiemɔi ni Nyɔŋmɔ gbɛ́i yɔɔ mli lɛ hu.

Hɛɛ, kɛbashi ŋmɛnɛ lɛ, niŋmai nɛɛ miitswa Yehowa gbɛ́i lɛ he adafi lolo ni amɛmiijie eyi, eyɛ mli akɛ kɛjɛ beni aŋmala awo shĩai lɛ ahe klɛŋklɛŋ kwraa lɛ, afii ohai abɔ eho. Wɔmiifɔ̃ shisharalɔi kɛ mɛi ni yɔɔ jɔɔ nɛɛ mli lɛ fɛɛ nine, ni amɛbakase Yehowa, naakpɛɛ Nyɔŋmɔ lɛ he nii babaoo, kɛtsɔ saramɔ ni amɛbaayasara tsu kroko ni egbɛ́i kã nɔ—Yehowa Odasefoi a-Maŋtsɛyeli Asa ni yɔɔ Bever lɛ lɛ nɔ.

[He ni Mfoniri ni yɔɔ baafa 7 lɛ Jɛ]

© Stähli Rolf A/age fotostock