Sanebimɔi ni Jɛ Kanelɔi Adɛŋ

Te esa akɛ wɔnu yibɔi ni yɔɔ daa afi sɔɔmɔ akɔntaabuu lɛ mli lɛ shishi wɔha tɛŋŋ?

Daa afi lɛ, akɛ sɔɔmɔ nitsumɔ lɛ he akɔntaabuu woɔ Yearbook lɛ mli. Kɛ́ wɔna nɔ ni Yehowa webii lɛ enyɛ amɛtsu akɛ kuu yɛ Maŋtsɛyeli shiɛmɔ kɛ nitsɔɔmɔ nitsumɔ lɛ mli yɛ jeŋ fɛɛ lɛ, wɔmii shɛɔ wɔhe naakpa. Shi bɔni afee ni wɔnu nɔ ni akɔntaabuu lɛ tsɔɔ lɛ shishi jogbaŋŋ lɛ, esa akɛ wɔnu saji ni yɔɔ mli lɛ ashishi jogbaŋŋ ni wɔná susumɔ ni ja hu yɛ emli yibɔi lɛ ahe. Nyɛhaa wɔsusua nɔkwɛmɔnii fioo komɛi ahe wɔkwɛa.

Sɔɔmɔ afi. Sɔɔmɔ afi lɛ jeɔ shishi kɛjɛɔ September kɛyashi August yɛ afi ni nyiɛ sɛɛ lɛ nɔ. Sɔɔmɔ afi ni eho lɛ mli akɔntaabuu ji nɔ ni akɛwoɔ Yearbook lɛ mli. Ákɛ nɔkwɛmɔnɔ lɛ, 2010 sɔɔmɔ afi, ni je shishi kɛjɛ September 1, 2009, kɛyashi August 31, 2010 lɛ he akɔntaabuu ni yɔɔ 2011 Yearbook lɛ mli lɛ.

Shiɛlɔi ayifalɛ ni fe fɛɛ kɛ shiɛlɔi amlijaa. “Shiɛlɔi” lɛ ji Yehowa Odasefoi ni abaptisi amɛ kɛ mɛi ni abaptisiko amɛ ni akpɛlɛ amɛnɔ akɛ Maŋtsɛyeli shiɛlɔi lɛ. Anáa “shiɛlɔi ayifalɛ ni fe fɛɛ” lɛ kɛjɛɔ nyɔɔŋ ni mɛi ayifalɛ ni fe fɛɛ bu amɛshiɛmɔ nitsumɔ lɛ he akɔntaa yɛ sɔɔmɔ afi lɛ mli lɛ nɔ, ni bei komɛi lɛ mɛi ni amɛshiɛmɔ nitsumɔ lɛ he akɔntaabuu lɛ kpe sɛɛ yɛ nyɔɔŋ ni tsɔ hiɛ lɛ nɔ lɛ hu anɔ lɛ fata yibɔ nɛɛ he. Enɛ haa bei komɛi lɛ, akaneɔ shiɛlɔi komɛi shii enyɔ. Shi shiɛlɔi ni tee shiɛmɔ shi amɛhiɛ kpa nɔ akɛ amɛaabu amɛshiɛmɔ nitsumɔ lɛ he akɔntaa lɛ fataaa yibɔ ni fe fɛɛ nɛɛ he. Enɛ haa wɔnaa bɔ ni ehe hiaa ni shiɛlɔ fɛɛ shiɛlɔ kɛ eshiɛmɔ nitsumɔ lɛ he akɔntaabuu aha kɛ́ nyɔɔŋ lɛ gbo nɔŋŋ. “Shiɛlɔi amlijaa” ji shiɛlɔi ni buɔ amɛshiɛmɔ nitsumɔ lɛ he akɔntaa yɛ nyɔɔŋ fɛɛ nyɔɔŋ nɔ.

Ŋmɛlɛtswai falɛ. Taakɛ 2011 Yearbook lɛ tsɔɔ lɛ, Yehowa Odasefoi kɛ ŋmɛlɛtswai ni fa fe akpekpe toi akpe 1.6 tsu shiɛmɔ nitsumɔ lɛ. Shi yibɔ falɛ nɛɛ etsɔɔɔ ŋmɛlɛtswai fɛɛ ni wɔyeɔ yɛ wɔjamɔ mli, ejaakɛ ŋmɛlɛtswai ni wɔkɛtsuɔ nibii komɛi tamɔ saramɔ nitsumɔ lɛ, kpeeiyaa, kɛ be ni wɔkɛfeɔ aŋkro Biblia mli nikasemɔ kɛ niianɔjwɛŋmɔ daa lɛ fataaa he.

Shika ní afite. Yɛ 2010 sɔɔmɔ afi lɛ mli lɛ, Yehowa Odasefoi fite shika ni fa fe dɔlai akpekpei 155 ni akɛkwɛ gbɛgbalɔi krɛdɛɛi, maŋsɛɛ sanekpakpa shiɛlɔi, kɛ nɔkwɛlɔi gbɛfalɔi yɛ amɛsɔɔmɔ nitsumɔ lɛ mli. Shi shika ni akɛkalaa wɔ-Biblia kasemɔ woji lɛ fataaa yibɔ nɛɛ he; asaŋ shika ni akɛkwɛɔ nitsulɔi ni fa fe 20,000 ni etuu amɛhe amɛha ni tsuɔ nii yɛ Betel shĩai ni yɔɔ jeŋ fɛɛ lɛ amli lɛ fataaa he.

Mɛi ni ye Kaimɔ nibii lɛ eko. Yibɔ nɛɛ ji aŋkroaŋkroi ni abaptisi amɛ ni yeɔ Kaimɔ nibii lɛ eko yɛ jeŋ fɛɛ. Ani enɛ ji mɛi ni afɔ amɛ mu ni yɔɔ shikpɔŋ lɛ nɔ lɛ ayibɔ diɛŋtsɛ? Jeee nakai doo. Nibii pii—mɔ tsutsu jamɔŋ hemɔkɛyelii loo jwɛŋmɔŋ loo henumɔŋ naagba po—baanyɛ aha mɔ ko asusu yɛ gbɛ ni ejaaa nɔ akɛ ená ŋwɛi tsɛmɔ lɛ eko. No hewɔ lɛ, wɔnyɛŋ wɔle mɛi ni afɔ amɛ mu ni yɔɔ shikpɔŋ lɛ nɔ lɛ ayibɔ tuuntu; asaŋ ehe ehiaaa ni wɔle. Nɔyeli Kuu lɛ ŋmalaaa mɛi fɛɛ ni yeɔ okadi nibii lɛ eko yɛ jeŋ fɛɛ lɛ agbɛ́i eshwieee shi. *

Nɔ ni wɔle ji akɛ, “wɔ-Nyɔŋmɔ lɛ tsuji” ni afɔ amɛ mu lɛ ateŋ mɛi komɛi baahi shikpɔŋ lɛ nɔ beni amanehulu kpeteŋkpele lɛ baafɛ lɛ. (Kpoj. 7:1-3) Kɛyashi nakai be lɛ aaashɛ lɛ, mɛi ni afɔ amɛ mu lɛ baaya nɔ anyiɛ nitsumɔ ni fe fɛɛ yɛ adesai ayinɔsane mli, ni ji shiɛmɔ kɛ nitsɔɔmɔ nitsumɔ lɛ ni wɔdaa afi sɔɔmɔ akɔntaabuu lɛ bɔɔ he amaniɛ lɛ hiɛ.

[Shishigbɛ niŋmaa]