1. Mɛni hewɔ ekolɛ wɔnyɛɛɛ wɔto wɔtsui shi dɔŋŋ lɛ?

BENI ato Mesia Maŋtsɛyeli lɛ shishi yɛ afi 1914 lɛ mli nɔŋŋ ni Satan nibii agbɛjianɔtoo lɛ naagbee gbii lɛ hu je shishi. Ta te shi yɛ ŋwɛi, ni Yesu shɛrɛ Abonsam kɛ edaimonioi lɛ eshwie kɛje ŋwɛi koni amɛkanyɛ amɛtee jɛmɛ dɔŋŋ. (Nyɛkanea Kpojiemɔ 12:7-9.) Satan le akɛ “be fioo kɛkɛ eyɔɔ.” (Kpoj. 12:12) Shi “be fioo” nɛɛ ehe nɔ ni miihe ashɛ afii 100, ni ekolɛ mɛi komɛi baasusu akɛ naagbee gbii lɛ asɛɛ etsɛ tsɔ. Beni wɔmɛɔ koni Yehowa atsu saji ahe nii lɛ, ani wɔmiinu he akɛ wɔnyɛɛɛ wɔto wɔtsui shi dɔŋŋ?

2. Mɛɛ sanebimɔi ahe wɔbaasusu yɛ nikasemɔ nɛɛ mli?

² Kɛ́ wɔtooo wɔtsui shi lɛ, ebaanyɛ efite nii waa, ejaakɛ no baanyɛ aha wɔfee nibii komɛi ni wɔsusuuu he. No hewɔ lɛ, mɛni baaye abua wɔ ni wɔkã he wɔmɛ? Nikasemɔ nɛɛ baaye abua wɔ ni wɔfee nakai kɛtsɔ sanebimɔi ni nyiɛ sɛɛ nɛɛ ahetoo ni ebaaha wɔná lɛ nɔ. (1) Mɛni wɔbaanyɛ wɔkase yɛ bɔ ni gbalɔ Mika to etsui shi lɛ mli? (2) Mɛɛ nibii baaha wɔna akɛ naagbee lɛ eshɛ? (3) Te wɔɔfee tɛŋŋ wɔtsɔɔ akɛ wɔhiɛ sɔɔ Yehowa tsuishitoo lɛ?

3. Te Israelbii lɛ fee amɛnii tɛŋŋ yɛ Mika beaŋ?

³ Nyɛkanea Mika 7:2-6. Yehowa gbalɔ Mika na akɛ Israelbii lɛ yeee Yehowa anɔkwa, ni yɛ Maŋtsɛ Ahaz nɔyeli beaŋ lɛ, ena akɛ shihilɛ nɛɛ mli bawo wu. Mika kɛ Israelbii ni yeee anɔkwa lɛ to ŋmei tso ko ni atsɛɔ lɛ “kpitikpiti” lɛ kɛ “ŋmei afabaŋ” he. Taakɛ kpitikpiti loo ŋmei afabaŋ tsurɔɔ mɔ fɛɛ mɔ ni nyiɛɔ mli lɛ, nakai nɔŋŋ Israelbii gbohii lɛ ye mɛi fɛɛ ni amɛkɛshara lɛ awui. Shihilɛ lɛ fite aahu akɛ, weku mli bii po ejieee suɔmɔ kpo amɛtsɔɔɔ amɛhe dɔŋŋ. Akɛni Mika yɔse akɛ enyɛŋ etsu shihilɛ lɛ he nɔ ko hewɔ lɛ, efɔse etsuiŋ eshwie Yehowa hiɛ. No sɛɛ lɛ, eto etsui shi emɛ koni Nyɔŋmɔ atsu sane lɛ he nii.  Mika yɛ nɔmimaa akɛ Yehowa baatsu he nii yɛ Lɛ diɛŋtsɛ ebe naa.

4. Mɛɛ naagbai wɔkɛkpeɔ?

⁴ Ŋmɛnɛ lɛ wɔ hu wɔtamɔ Mika, ejaakɛ wɔyɛ mɛi ni foɔ amɛ pɛ amɛnɔ mli lɛ ateŋ. Mɛi pii ji “trumui, mɛi ni he tseee, mɛi ni edɔɔɔ mɔ he.” (2 Tim. 3:2, 3) Kɛ́ mɛi ni wɔkɛtsuɔ nii, mɛi ni wɔkɛyaa skul, kɛ wɔkutsoŋbii lɛ fo amɛ pɛ amɛnɔ mli lɛ, ebaanyɛ eha shihilɛ lɛ mli awa waa kɛha wɔ. Shi Nyɔŋmɔ tsuji komɛi kɛ naagbai ni mli wala fe no miikpe. Yesu kɛɛ esɛɛnyiɛlɔi lɛ akɛ, amɛwekumɛi baate shi awo amɛ, ni ekɛ wiemɔi ni tamɔ nɔ ni yɔɔ Mika 7:6 lɛ tsu nii. Yesu kɛɛ akɛ: “Ejaakɛ miba ni mabatse mɔ kɛjɛ etsɛ he, kɛ biyoo kɛjɛ enyɛ he, kɛ shaayoo kɛjɛ eshaayoo he. Ni mɔ diɛŋtsɛ shĩa teŋ bii aaatsɔmɔ ehenyɛlɔi.” (Mat. 10:35, 36) Ebɛ mlɛo akɛ mɔ ko aaakpee hefɛoyeli kɛ shiteekɛwoo ni ewekumɛi ni sɔmɔɔɔ Yehowa lɛ kɛbaa enɔ lɛ naa. Kɛ́ wɔkɛ shihilɛ ni tamɔ nɛkɛ miikpe lɛ, esaaa akɛ wɔnijiaŋ jeɔ wui. Moŋ lɛ, esa akɛ wɔya nɔ wɔye Yehowa anɔkwa, ni wɔto wɔtsui shi kɛmɛ lɛ kɛyashi ebaatsu he nii. Kɛ́ wɔtee nɔ wɔbi koni eye ebua wɔ lɛ, ebaaha wɔ hewalɛ kɛ nilee ni he hiaa wɔ lɛ koni wɔnyɛ wɔfĩ shi.

5, 6. Mɛɛ gbɛ nɔ Yehowa jɔɔ Mika, shi mɛni Mika enaaa?

⁵ Yehowa jɔɔ Mika yɛ etsui shi ni eto lɛ hewɔ. Mika na bɔ ni Maŋtsɛ Ahaz ni yitsoŋ wa lɛ kɛ enɔyeli lɛ fɛɛ ba naagbee eha. Ena bɔ ni Ahaz binuu Hezekia batsɔ maŋtsɛ ni eto anɔkwa jamɔ shishi ekoŋŋ. Agbɛnɛ hu, Mika na bɔ ni gbalɛ ni egba kɛkɔ Samariabii lɛ ahe lɛ ba mli beni Ashurbii lɛ yatutua Israel kooyigbɛ maŋtsɛyeli lɛ.—Mika 1:6.

⁶ Shi Mika enaaa nibii fɛɛ ni Yehowa ha egba lɛ amlibaa. Akɛ nɔkwɛmɔnɔ lɛ, Mika ŋma akɛ: “Naagbee gbii lɛ amli lɛ Yehowa we gɔŋ lɛ aaama shi yɛ gɔji lɛ ayiteaŋ, ni aaawó enɔ fe gɔŋkpɔi lɛ; ni majimaji aaaho kɛaaba he; ni jeŋmaji pii aaatee ayakɛɛ akɛ: Nyɛbaa ni wɔyakwɔa Yehowa gɔŋ lɛ.” (Mika 4:1, 2) Mika gbo kwraa dani nakai gbalɛ lɛ ba mli. Fɛɛ sɛɛ lɛ, etswa efai shi akɛ ebaaya nɔ eye Yehowa anɔkwa kɛyashi gbele mli, ekɔɔɔ he eko nɔ ni mɛi ni bɔle lɛ lɛ baafee. No hewɔ lɛ, Mika ŋma akɛ: “Majimaji lɛ fɛɛ ateŋ mɔ fɛɛ mɔ nyiɛɔ yɛ enyɔŋmɔ gbɛ́i amli; shi wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛ́i amli kɛaatee naanɔi anaanɔ!” (Mika 4:5) Mika to etsui shi emɛ Yehowa yɛ jaramɔ shihilɛi amli, ejaakɛ eyɛ hekɛnɔfɔɔ yɛ Yehowa mli akɛ ebaaye E-shiwoi fɛɛ nɔ. Gbalɔ anɔkwafo nɛɛ kɛ ehe fɔ̃ Yehowa nɔ.

7, 8. (a) Mɛni hewɔ esa akɛ wɔkɛ wɔhe afɔ̃ Yehowa nɔ lɛ? (b) Mɛni baaha be lɛ aho oyayaayai yɛ wɔhiɛ?

⁷ Ani wɔ hu wɔyɛ hekɛnɔfɔɔ ni tamɔ nakai nɔŋŋ yɛ Yehowa mli? Wɔyɛ yiŋtoo kpakpa hewɔ ni esa akɛ wɔfee nakai. Wɔna bɔ ni Mika gbalɛ lɛ eba mli eha. Yɛ ‘naagbee gbii nɛɛ amli lɛ,’ mɛi akpekpei abɔ ni jɛ jeŋmaji kɛ akutsei kɛ majianɔ wiemɔi fɛɛ amli lɛ eke yuu kɛba “Yehowa we gɔŋ lɛ” he. Eyɛ mli akɛ mɛi nɛɛ jɛ maji ni kɛ amɛhe wuɔ ta amli moŋ, shi amɛkɛ ‘amɛklantei esɔ̃ kɔii,’ ni amɛtswa amɛfai shi akɛ “amɛkaseŋ tawuu dɔŋŋ!” (Mika 4:3) Eji hegbɛ kpele ni wɔná akɛ wɔfata Yehowa webii ni sumɔɔ toiŋjɔlɛ lɛ ahe!

⁸ Wɔ fɛɛ wɔmiisumɔ ni Yehowa kɛ nibii agbɛjianɔtoo fɔŋ nɛɛ aba naagbee oya. Shi kɛ́ wɔbaanyɛ wɔto wɔtsui shi kɛmɛ lɛ, esa akɛ wɔsusu nii ahe tamɔ bɔ ni Yehowa susuɔ nii ahe lɛ. Eto gbi ni ebaatsɔ Yesu Kristo, ni ji “nuu ni eto lɛ” nɔ ekojo adesai. (Bɔf. 17:31) Shi dani nakai gbi lɛ baashɛ lɛ, Nyɔŋmɔ eha mɛi fɛɛ hegbɛ ni “amɛshɛ anɔkwale lɛ lee mli,” ni amɛkɛ nakai nilee lɛ atsu nii,  koni ahere amɛyiwala. Esa akɛ wɔkai akɛ, mɛi awala yɛ oshara mli. (Nyɛkanea 1 Timoteo 2:3, 4.) Kɛ́ wɔkɛ hiɛdɔɔ ye wɔbua mɛi koni amɛná Nyɔŋmɔ he anɔkwa nilee lɛ, be ni eshwɛ ni Yehowa kojomɔ gbi lɛ baaba lɛ baaho oyayaayai yɛ wɔhiɛ. Etsɛŋ ni nakai be lɛ baashɛ. Kɛ́ be lɛ shɛ lɛ, wɔmii baashɛ wɔhe waa akɛ wɔkɛ hiɛdɔɔ tsu Maŋtsɛyeli shiɛmɔ nitsumɔ lɛ!

9-11. Ani 1 Tesalonikabii 5:3 lɛ eba mli? Tsɔɔmɔ mli.

⁹ Nyɛkanea 1 Tesalonikabii 5:1-3. Etsɛŋ ni jeŋmaji lɛ baakɛɛ akɛ: “Hejɔlɛ yɛ ni wɔyɛ shweshweeshwe!” Kɛ́ wɔtee nɔ ‘wɔshi kpe ni wɔhiɛ kã shi lɛ,’ wiemɔi nɛɛ lakaŋ wɔ. (1 Tes. 5:6) Bɔni afee ni wɔya nɔ wɔshi kpe yɛ mumɔŋ lɛ, nyɛhaa wɔsusua nibii komɛi ni baaha amɛkɛɛ nakai lɛ ahe wɔkwɛa.

¹⁰ Beni jeŋ tai srɔtoi enyɔ lɛ ateŋ eko fɛɛ eko ba naagbee lɛ, jeŋmaji lɛ kɛ amɛnifeemɔi tsɔɔ akɛ amɛmiitao toiŋjɔlɛ waa. Beni jeŋ ta ni ji klɛŋklɛŋ nɔ lɛ ba naagbee lɛ, ato Jeŋmaji Akpaŋmɔ lɛ shishi kɛ hiɛnɔkamɔ lɛ akɛ ekɛ toiŋjɔlɛ baaba. Sɛɛ mli beni jeŋ ta ni ji enyɔ lɛ hu ba naagbee lɛ, ato Jeŋmaji Ekomefeemɔ lɛ shishi, ni mɛi susu akɛ no baanyɛ ekɛ toiŋjɔlɛ aba. Nɔyelɔi kɛ jamɔŋ hiɛnyiɛlɔi kɛ amɛhiɛ efɔ̃ gbɛjianɔtoi enyɔ nɛɛ anɔ akɛ amɛkɛ toiŋjɔlɛ baaba. Akɛ nɔkwɛmɔnɔ lɛ, yɛ afi 1986 lɛ, Jeŋmaji Ekomefeemɔ lɛ wie akɛ nakai afi lɛ baafee Majimaji Ateŋ Toiŋjɔlɛ Afi. Yɛ nakai afi lɛ nɔ lɛ, maŋkwramɔŋ kɛ jamɔŋ hiɛnyiɛlɔi ni jɛ maji srɔtoi anɔ lɛ yafata Katolik Sɔlemɔ lɛ hiɛnyiɛlɔ lɛ he yɛ Assisi ni yɔɔ Italy lɛ, koni amɛsɔle kɛha toiŋjɔlɛ.

¹¹ Shi nɔ ni Jeŋmaji Ekomefeemɔ lɛ wie kɛ wiemɔi krokomɛi ni tamɔ no lɛ jeee gbalɛ ni yɔɔ 1 Tesalonikabii 5:3 ni kɔɔ toiŋjɔlɛ kɛ shweshweeshwe he lɛ mlibaa. Mɛni hewɔ wɔkɛɔ nakai? Ejaakɛ “hiɛkpatamɔ” ni agba akɛ ‘eeebatua amɛ trukaa’ lɛ baaa.

12. Mɛni wɔle yɛ kɛɛmɔ ni abaakɛɛ akɛ “Hejɔlɛ yɛ ni wɔyɛ shweshweeshwe!” lɛ he?

 ¹² Namɔ tuuntu baawie wiemɔi ni sa kadimɔ waa nɛɛ akɛ, “Hejɔlɛ yɛ ni wɔyɛ shweshweeshwe!” lɛ? Mɛɛ gbɛfaŋnɔ Kristendom kɛ jamɔi krokomɛi ahiɛnyiɛlɔi lɛ baaná yɛ enɛ mli? Mɛɛ gbɛfaŋnɔ je lɛŋ nɔyelɔi lɛ hu baaná? Biblia lɛ etsɔɔɔ. Nɔ ni wɔle ji akɛ, ekɔɔɔ he eko gbɛ ni abaatsɔ nɔ awie loo bɔ ni mɛi pii baahe aye aha lɛ, ekɛ toiŋjɔlɛ kɛ shweshweeshwe shihilɛ ko baŋ. Satan baaya nɔ ekudɔ jeŋ fɔŋ nɛɛ. Je lɛ ekpɔtɔ kwraa, ni ebaakã he ehi shi nakai. Ebaafee dɔlɛ sane waa kɛji wɔteŋ mɔ ko hé amale wiemɔ ni Satan baagbɛ eshwa nɛɛ eye, ní ekɛ ehe wo je lɛŋ saji amli.

13. Mɛni hewɔ ŋwɛibɔfoi hiɛ kɔɔyɔi ni kɛ amanehulu kpeteŋkpele lɛ baaba lɛ amli lɛ?

¹³ Nyɛkanea Kpojiemɔ 7:1-4. Beni wɔmɛɔ be ni 1 Tesalonikabii 5:3 lɛ baaba mli lɛ, ŋwɛibɔfoi hewalɔi komɛi hiɛ kɔɔyɔi ni kɛ amanehulu kpeteŋkpele lɛ baaba lɛ amli. Mɛni amɛmɛɔ? Bɔfo Yohane wie nɔ ni amɛmɛɔ lɛ ateŋ ekome he—no ji “wɔ-Nyɔŋmɔ lɛ tsuji” ni afɔ amɛ mu lɛ anaasɔomɔ ni ji naagbee nɔ kwraa lɛ. * Kɛ́ nifeemɔ ni he hiaa waa nɛɛ ba naagbee lɛ, ŋwɛibɔfoi lɛ baaŋmɛɛ kɔɔyɔi ni kɛ amanehulu kpeteŋkpele lɛ baaba lɛ ahe. Kɛkɛ lɛ, mɛni baanyiɛ sɛɛ?

14. Mɛni tsɔɔ akɛ etsɛŋ ni abaakpata Babilon Kpeteŋkpele lɛ hiɛ?

¹⁴ Abaakpata Babilon Kpeteŋkpele lɛ, ni ji apasa jamɔi fɛɛ ni yɔɔ je lɛŋ lɛ hiɛ kwraa. Amrɔ nɛɛ po lɛ, wɔmiina nibii ni tsɔɔ akɛ etsɛŋ ni abaakpata ehiɛ. “Maji kɛ asafoi kɛ jeŋmaji kɛ majianɔwiemɔi” lɛ nyɛŋ amɛye amɛbua lɛ. (Kpoj. 16:12; 17:15-18; 18:7, 8, 21) Agbɛnɛ hu lɛ, wɔnaa bɔ ni adafitswaa nitsumɔhei tswaa jamɔi kɛ amɛhiɛnyiɛlɔi lɛ asɛɛ. Fɛɛ sɛɛ lɛ, jamɔŋ hiɛnyiɛlɔi lɛ nuɔ he akɛ oshara ko baŋ amɛnɔ. Shi amɛmiilaka amɛhe kwraa! Kɛ́ awie akɛ “Hejɔlɛ yɛ ni wɔyɛ shweshweeshwe!” lɛ sɛɛ lɛ, nɔyelɔi ni yɔɔ Satan je lɛ mli lɛ baatutua apasa jamɔ, ni amɛbaakpata ehiɛ kwraa. Anaŋ Babilon Kpeteŋkpele lɛ dɔŋŋ! Belɛ ehi jogbaŋŋ akɛ wɔɔto wɔtsui shi kɛmɛ kɛyashi be ni nibii ni sa kadimɔ waa nɛɛ fɛɛ baaba mli.—Kpoj. 18:8, 10.

15. Mɛni hewɔ Yehowa eto etsui shi lɛ?

¹⁵ Yɛ heguɔgbee ni akɛba Nyɔŋmɔ gbɛ́i Yehowa lɛ nɔ lɛ fɛɛ sɛɛ lɛ, eeya nɔ eemɛ kɛyashi be ni sa koni etsu he nii. Yehowa sumɔɔɔ ni ekpata mɛi ni hiɛ tsui kpakpa lɛ ateŋ mɔ ko mɔ ko hiɛ. (2 Pet. 3:9, 10) Ani wɔ hu wɔnuɔ he nakai nɔŋŋ? Dani Yehowa gbi lɛ aaashɛ lɛ, gbɛi pii yɛ ni wɔbaanyɛ wɔtsɔ nɔ wɔtsɔɔ akɛ wɔhiɛ sɔɔ etsuishitoo lɛ.

16, 17. (a) Mɛni hewɔ esa akɛ wɔye wɔbua mɛi ni ekpa Yehowa sɔɔmɔ lɛ? (b) Mɛni hewɔ ehe hiaa waa ni mɛi ni ekpa Yehowa sɔɔmɔ lɛ aku amɛsɛɛ kɛba eŋɔɔ lɛ?

¹⁶ Ye obua mɛi ni ekpa Yehowa sɔɔmɔ lɛ. Yesu wie akɛ, kɛ́ too kome laaje ni ana lɛ lɛ, miishɛɛ baa ŋwɛi. (Mat. 18:14; Luka 15:3-7) Enɛ tsɔɔ faŋŋ akɛ Yehowa susuɔ mɛi fɛɛ ni sumɔɔ egbɛ́i lɛ ahe waa, kɛ́ amɛsɔmɔɔɔ lɛ amrɔ nɛɛ po. Kɛ́ wɔye wɔbua mɛi ni tamɔ nɛkɛ ni amɛku amɛsɛɛ kɛba Yehowa ŋɔɔ lɛ, wɔhaa Yehowa kɛ ŋwɛibɔfoi lɛ amii shɛɔ amɛhe waa.

¹⁷ Ani bo hu amrɔ nɛɛ okpa Nyɔŋmɔ sɔɔmɔ? Ekolɛ asafo lɛ mli nyo ko fee bo nɔ ko ni dɔ bo waa, ni no ha okpa Kristofoi akpeei fɛɛ yaa. Akɛni ekolɛ be eshwie mli hewɔ lɛ, bi ohe akɛ: ‘Ani mishihilɛ ehi amrɔ nɛɛ fe tsutsu lɛ, ni miyɛ miishɛɛ? Ani Yehowa ji mɔ ni fee mi  nidɔɔ nii lɛ, aloo adesa ni yeee emuu? Ani Yehowa Nyɔŋmɔ efee nɔ ko kɛye mi awui dã?’ Anɔkwa, Yehowa kɛwɔ yeɔ jogbaŋŋ be fɛɛ be. Kɛ́ amrɔ nɛɛ ohiii shi yɛ ohenɔjɔɔmɔ lɛ naa po lɛ, ehaa onáa nibii kpakpai ni ekɛhaa lɛ ahe sɛɛ. (Yak. 1:16, 17) Etsɛŋ, Yehowa gbi lɛ baaba. Amrɔ nɛɛ ji be ni esa akɛ oku osɛɛ kɛba wɔŋwɛi Tsɛ ni sumɔɔ wɔ lɛ ŋɔɔ, kɛ asafo lɛ mli—he pɛ ni wɔbaanyɛ wɔhi shi shweshweeshwe yɛ naagbee gbii nɛɛ amli lɛ.—5 Mose 33:27; Heb. 10:24, 25.

18. Mɛni hewɔ esa akɛ wɔbo mɛi ni nyiɛɔ hiɛ lɛ atoi be fɛɛ be lɛ?

¹⁸ Okɛ anɔkwayeli afĩ mɛi ni nyiɛɔ hiɛ lɛ asɛɛ. Yehowa, ni ji Tookwɛlɔ ni yɔɔ suɔmɔ lɛ tsɔɔ wɔ gbɛ ni ebuɔ wɔhe. Ehala e-Bi lɛ akɛ etooi lɛ anɔ Tookwɛlɔ Nukpa. (1 Pet. 5:4) Asafoŋ onukpai ni sɔmɔɔ yɛ asafoi ni fa fe 100,000 mli lɛ kwɛɔ Nyɔŋmɔ tooi lɛ ateŋ eko fɛɛ eko nɔ. (Bɔf. 20:28) Kɛ́ wɔbo mɛi ni nyiɛɔ hiɛ lɛ atoi be fɛɛ be lɛ, wɔkɛ no tsɔɔ akɛ wɔhiɛ sɔɔ nɔ fɛɛ nɔ ni Yehowa kɛ Yesu efee eha wɔ lɛ.

19. Te wɔɔfee tɛŋŋ wɔtsi wɔbɛŋkɛ wɔhe lɛ?

¹⁹ Nyɛtsia nyɛbɛŋkɛa nyɛhe. Mɛni enɛ tsɔɔ? Kɛ́ henyɛlɔ ko yatutua asraafoi akuu ko ni atsɔse amɛ jogbaŋŋ lɛ, asraafoi lɛ buaa amɛhe naa koni gbɛ ko akabakã amɛteŋ. Enɛ haa amɛbɛŋkɛɔ amɛhe bɔ ni anyɛɛɛ atsɔ amɛteŋ kɛho. Satan miimia tutuamɔi ni ekɛbaa Nyɔŋmɔ webii anɔ lɛ mli. Jeee be ni esa akɛ wɔkɛ wɔnyɛmimɛi lɛ atswa nɛ. Amrɔ nɛɛ ji be ni esa akɛ wɔtsi wɔbɛŋkɛ wɔhe, wɔku wɔhiɛ wɔshwie wɔnyɛmimɛi lɛ afatɔi anɔ, ni wɔkɛ wɔhe afɔ̃ Yehowa nɔ kwraa.

20. Mɛni esa akɛ wɔfee amrɔ nɛɛ?

²⁰ Nyɛhaa wɔ fɛɛ wɔhiɛa wekukpaa ni kã wɔ kɛ Yehowa teŋ lɛ mli ni awa, ni wɔya nɔ wɔmɛ. Nyɛhaa wɔtoa wɔtsui shi kɛmɛa be ni jeŋmaji lɛ baakɛɛ akɛ, “Hejɔlɛ yɛ ni wɔyɛ shweshweeshwe!” lɛ, ni wɔmɛ kɛyashi be ni abaasɔo mɛi ni afɔ amɛ mu lɛ anaa naagbee nɔ kwraa lɛ. No sɛɛ lɛ, ŋwɛibɔfoi ejwɛ lɛ baaŋmɛɛ kɔɔyɔi ni kɛ hiɛkpatamɔ baaba lɛ ahe, ni abaakpata Babilon Kpeteŋkpele lɛ hiɛ. Beni wɔmɛɔ ni nibii ni sa kadimɔ nɛɛ aba mli lɛ, nyɛhaa wɔboa gbɛtsɔɔmɔi ni mɛi ni nyiɛɔ hiɛ yɛ Yehowa asafo lɛ mli lɛ kɛhaa wɔ lɛ atoi. Nyɛhaa wɔtsia wɔbɛŋkɛa wɔhe koni wɔte shi wɔwo Abonsam kɛ daimonioi lɛ! Amrɔ nɛɛ ji be ni esa akɛ wɔbo nɔ ni lalatsɛ lɛ wie lɛ toi, akɛ: “Nyɛwajea nyɛhe ni nyɛnaa tsui, nyɛ mɛi fɛɛ ni nyɛkwɛɔ Yehowa gbɛ lɛ!”—Lala 31:25.