Yɛ afi 1985 mli beni miye afii nyɔŋma lɛ, gbekɛbii komɛi jɛ Cambodia ba wɔskul lɛ yɛ Columbus yɛ Ohio yɛ U.S.A. Gbekɛbii hii lɛ ateŋ mɔ kome nuɔ Blɔfo fioo. Etɛŋ mfonirii kɛtsɔɔ mi bɔ ni agbeɔ mɛi, afeɔ mɛi niseniianii, kɛ bɔ ni mɛi joɔ foi kɛbaa amɛwala yi yɛ jɛmɛ. Bei pii kɛ́ shɛ gbɛkɛ ni misusu gbekɛbii nɛɛ ahe lɛ, mifóɔ. Miitao magba amɛ Paradeiso kɛ gbohiiashitee lɛ he sane, shi amɛnuuu miwiemɔ lɛ. Eyɛ mli akɛ no mli lɛ midako moŋ, shi mikpɛ miyiŋ akɛ makase Cambodian koni manyɛ magba miskulbii lɛ Yehowa he sane. No mli lɛ, misusuuu kwraa akɛ yiŋkpɛɛ nɛɛ baasa nɔ ni mafee wɔsɛɛ lɛ he.

Mináaa Cambodian kasemɔ mlɛo. Mika shii enyɔ sɔŋŋ akɛ makpa wiemɔ nɛɛ kasemɔ, shi Yehowa tsɔ mifɔlɔi anɔ ewo mi hewalɛ. Sɛɛ mli lɛ, miskul tsɔɔlɔi kɛ minanemɛi skulbii lɛ wo mi hewalɛ koni miyakase nɔ ko ni baaha maná nitsumɔ ni abaawo mi nyɔmɔ babaoo. Shi no mli lɛ, miitao matsɔ gbɛgbalɔ, ni no hewɔ lɛ, mihala sɛkɛndre skul nikasemɔ ni baaye abua mi ni maná nitsumɔ ni akɛ be fã tsuɔ, bɔni afee ni mashɛ oti ni mikɛma mihiɛ lɛ he. Beni migbe skul naa lɛ, bei komɛi lɛ, mikɛ gbɛgbalɔi komɛi yaa shiɛmɔ. Agbɛnɛ hu, miye mibua skulbii ni miikase Blɔfo kɛmiifata amɛwiemɔ he lɛ, ni enɛ ye ebua mi yɛ mishihilɛ mli sɛɛ mli.

Beni miye afii 16 lɛ, minu akɛ atse kuu ko ni wieɔ Cambodian yɛ Long Beach yɛ California yɛ U.S.A. Mitee jɛmɛ, ni miyakase bɔ ni akaneɔ Cambodian. Beni migbe skul naa nɔŋŋ lɛ, mitsɔ gbɛgbalɔ, ni mitee nɔ mishiɛ miha mikutsoŋbii ni wieɔ Cambodian lɛ. Beni miná afii 18 lɛ, mikpɛ miyiŋ akɛ mafã kɛya Cambodia. No mli fɛɛ lɛ, jɛi shihilɛ bɛ shweshweeshwe, shi mile akɛ mɛi akpekpei nyɔŋma ni yɔɔ jɛi lɛ ateŋ mɛi fioo ko pɛ enu Maŋtsɛyeli lɛ he sane kpakpa lɛ. Nakai beaŋ lɛ, asafo kome pɛ yɔɔ maŋ muu lɛ fɛɛ mli, ni shiɛlɔi 13 pɛ yɔɔ mli. Beni miná afii 19 lɛ, mitee Cambodia klɛŋklɛŋ kwraa. No sɛɛ afii enyɔ lɛ, mikpɛ miyiŋ akɛ mafã kɛya jɛmɛ kwraa. Miná be fã nitsumɔ ko ni mikɛkwɛɔ mihe. Nɔ ni mitsuɔ ji, mitsɔɔ Blɔfo shishi ni mitsɔɔ mɛi Blɔfo hu. Sɛɛ mli lɛ, miná yoo ko ni mi kɛ lɛ fɛɛ lɛ, oti kome ma wɔhiɛ, ni mikɛ lɛ hi shi. Mikɛ lɛ fɛɛ eye ebua Cambodiabii babaoo ni amɛjɔɔ amɛwala nɔ amɛha Nyɔŋmɔ.

Yehowa eha mi ‘nɔ ni mitsui taoɔ lɛ.’ (Lala 37:4) Shiɛmɔ nitsumɔ lɛ ji nitsumɔ ni haa mɔ tsui nyɔɔ emli fe nitsumɔi fɛɛ. Yɛ afii 16 ni mikɛhi Cambodia lɛ mli, asafo ni shiɛlɔi 13 pɛ yɔɔ mli lɛ eshwere kɛyashɛ asafoi 12 kɛ kui 4 ni yɔɔ hei ni etse amɛhe banee!—Mɔ ni gba ji Jason Blackwell.