Heshibaa tsɔɔ he ní atsiɔ kɛjɛɔ henɔwomɔ loo hepupuumɔ he. Heshibalɔ enaaa mɛi krokomɛi akɛ amɛbaa shi fe lɛ loo enɔ kwɔ fe amɛ. Heshibalɔ le akɛ eyeee emuu, ni ele he ni enyɛmɔ yawaa.

Mose haaa hegbɛ ni ená lɛ aha ewo ehe nɔ. Bei pii lɛ, kɛ́ mɔ ko ná hegbɛ fioo po lɛ, eyeee be ko ni anaa heshibalɔ loo henɔwolɔ ni eji. Robert G. Ingersoll ni eji afi 1800 afii lɛ amli niŋmalɔ ko lɛ kɛba lɛ nɛkɛ: “Mɛi babaoo baanyɛ adamɔ shihilɛi ni mli wawai anaa. Shi kɛ́ ootao ole bɔ ni mɔ ko ji jogbaŋŋ lɛ, bo lɛ okɛ hegbɛ loo gbɛnaa ko awo edɛŋ.” Mose fee heshibaa he nɔkwɛmɔnɔ ni nɔ bɛ kwraa efɔ̃ shi yɛ enɛ gbɛfaŋ. Mɛɛ gbɛ nɔ etsɔ efee nakai?

Mose nine shɛ hegbɛ kpele ko nɔ, no ji, Yehowa fã lɛ ni enyiɛ Israelbii lɛ ahiɛ. Kɛlɛ, nakai hegbɛ lɛ haaa Mose awo ehe nɔ. Akɛ nɔkwɛmɔnɔ lɛ, susumɔ bɔ ni ekɛ heshibaa tsu sane ko ni kɔɔ gboshinii lɛ he nii eha lɛ he. (4 Mose 27:1-11) Sane lɛ tsii jogbaŋŋ, ejaakɛ yiŋ ni ebaakpɛ lɛ baafee nɔ ko ni baakã shi kɛha yinɔi fɛɛ ni baaba yɛ sɛɛ lɛ.

Te Mose baafee tɛŋŋ? Ani ebaashwie eyiŋ akɛ ákɛ Israel hiɛnyiɛlɔ lɛ, ele yiŋ pɔtɛɛ ni esa akɛ ekpɛ yɛ sane lɛ he? Ani ebaamu efɔ̃ enyɛmɔi, niiashikpamɔi ni ená yɛ afii lɛ amli, loo Yehowa susumɔi ahe nilee ni eyɔɔ lɛ anɔ?

Henɔwolɔ ji mɔ ni ekolɛ ebaafee nakai. Shi jeee Mose. Biblia mli amaniɛbɔɔ lɛ kɛɔ wɔ akɛ: “Mose kɛ amɛsane lɛ ba Yehowa hiɛ.” (4 Mose 27:5) Bo lɛ susumɔ he okwɛ! Yɛ aaafee afii 40 ni Mose kɛnyiɛ Israel maŋ lɛ hiɛ lɛ fɛɛ sɛɛ lɛ, emuuu efɔ̃ɔɔ ehe nɔ, moŋ lɛ emu efɔ̃ Yehowa nɔ. Wɔnaa pefee akɛ Mose baa ehe shi waa.

Mose kɛ awuŋayeli ekaaa akɛ ebaabu hegbɛ ni eyɔɔ lɛ he. Beni Yehowa ŋmɛ Israelbii krokomɛi agbɛ koni amɛsɔmɔ akɛ gbalɔi amɛfata Mose he lɛ, ená miishɛɛ pam. (4 Mose 11:24-29) Beni eshaanuu wo lɛ ŋaa akɛ ehala hii koni etuu enitsumɔ lɛ eko ewo amɛdɛŋ lɛ, ejɛ heshibaa mli ekɛ ŋaawoo lɛ tsu nii. (2 Mose 18:13-24) Eyɛ mli akɛ kɛbaa Mose wala shihilɛ naagbee gbɛ lɛ, no mli lɛ eyɛ gbɔmɔtsoŋ hewalɛ moŋ, kɛlɛ ebi Yehowa koni ehala mɔ ko ni baaye esɛɛ. Beni Yehowa hala Yoshua lɛ, Mose jɛ etsuiŋ tɔ̃ɔ eye ebua oblanyo fioo nɛɛ, ewo Israelbii lɛ hewalɛ akɛ amɛba amɛhe shi amɛha Yoshua koni ekɛ amɛ aya Shiwoo Shikpɔŋ lɛ nɔ. (4 Mose 27:15-18; 5 Mose 31:3-6; 34:7) Anɔkwa, Mose na akɛ eji hegbɛ ni ená akɛ enyiɛ Israelbii lɛ ahiɛ yɛ anɔkwa jamɔ mli. Shi ehaaa ehegbɛ lɛ he ahia lɛ fe mɛi krokomɛi ahilɛkɛhamɔ.

Esaaa akɛ wɔhaa hegbɛ, gbɛnaa, loo nyɛmɔ ni wɔyɔɔ lɛ haa wɔwoɔ wɔhe nɔ. Kaimɔ akɛ: Bɔni afee ni Yehowa anyɛ ekɛ wɔ atsu nii lɛ, esa akɛ be fɛɛ be lɛ wɔha wɔheshibaa ateke wɔnyɛmɔ. (1 Samuel 15:17) Kɛ́ wɔbaa wɔhe shi lɛɛlɛŋ lɛ, wɔbaabɔ mɔdɛŋ wɔkɛ Biblia mli ŋaawoo nɛɛ atsu nii, no ji: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ.”—Abɛi 3:5, 6.

Mose nɔkwɛmɔnɔ lɛ hu haa wɔkaseɔ akɛ esaaa akɛ wɔbuɔ gbɛnaa ni wɔhiɛ loo hegbɛ ni wɔyɔɔ lɛ akɛ ehe hiaa fe nɔ fɛɛ nɔ.

Kɛ́ wɔkase Mose heshibaa lɛ, ani wɔbaaná he sɛɛ? Aahu tsɔ! Kɛ́ wɔjieɔ heshibaa diɛŋtsɛ kpo lɛ, ehaa shihilɛ lɛ feɔ mlɛo kɛhaa mɛi ni bɛŋkɛ wɔ lɛ, ni amɛsumɔɔ wɔsane. Nɔ ni fe fɛɛ lɛ, ehaa Yehowa Nyɔŋmɔ, mɔ ni lɛ diɛŋtsɛ hu ejieɔ su kpakpa nɛɛ kpo lɛ sumɔɔ wɔsane. (Lala 18:36) “Nyɔŋmɔ kuɔ hewolɔi [loo henɔwolɔi] anaa, shi heshibalɔi eduroɔ.” (1 Petro 5:5) Belɛ, kwɛ bɔ ni esa jogbaŋŋ mɔ akɛ wɔbaaba wɔhe shi taakɛ Mose fee lɛ!