“MƐNI hewɔ enɛ ba minɔ? Mɛni hewɔ Nyɔŋmɔ ŋmɛ gbɛ ni enɛ ba mi nɔ?” Enɛɛmɛi ji sanebimɔi ni gba Sidnei ni jɛ Brazil, ní eye afii 24 lɛ naa. Be ko lɛ, ená oshara yɛ nɔ ko ni ayeɔ odi kɛtsɔɔ mli kɛyaboteɔ nu mli (waterslide) lɛ mli, ni epila waa bɔ ni ehã eka shwiili mli kwraa.

Kɛ́ mɔ ko na amanehulu yɛ oshara, hela, suɔlɔ ko gbele, adebɔɔ naa oshara, loo ta hewɔ lɛ, ewaaa akɛ emli baafu Nyɔŋmɔ. Mɛi babaoo ená susumɔ ni tamɔ nɛkɛ pɛŋ. Blematsɛ Hiob kɛ amanehului ni eko nyiɛ eko sɛɛ kpe. Eshwa Nyɔŋmɔ yɛ gbɛ ni ejaaa nɔ, ni ekɛɛ: “Mibolɔɔ mitsɛ́ɔo, shi ohereee mi nɔ; miteɔ shi midamɔɔ shi, ni okwɛɔ mi gãa. Otsake ohe otsɔ yiwalɔ ohã mi, okɛ onineshiwalɛ lɛ miiwa mi yi.”—Hiob 30:20, 21.

No mli lɛ, Hiob leee he ni enaagbai lɛ jɛ, asaŋ eleee nɔ hewɔ ni amɛba enɔ loo nɔ hewɔ ni aŋmɛ gbɛ ni amɛba enɔ. Miishɛɛ sane ji akɛ, Biblia lɛ tsɔɔ wɔ nɔ hewɔ ni nibii tamɔ nɛkɛ baa, kɛ nɔ ni esa akɛ wɔfee kɛ́ eko ba wɔnɔ.

Biblia lɛ hãa wɔleɔ yɛ Nyɔŋmɔ he akɛ: “Enitsumɔi hi pɛ; ejaakɛ egbɛi fɛɛ jalɛ ni. Anɔkwa Mawu ji lɛ, nɔ̃ sha bɛ lɛ; jalɔ ji lɛ ni esa pɛ.” (5 Mose 32:4) Kɛ́ nakai ni lɛ, ani eja gbɛ akɛ Nyɔŋmɔ ni awie yɛ ehe akɛ, “jalɔ ji lɛ ni esa pɛ” lɛ baato eyiŋ akɛ adesai apiŋ, aloo akɛ, ekɛ osharai baaba amɛnɔ ni ekɛgbala amɛtoi loo ekɛtsuu amɛhe?

Nɔ ni tamɔɔɔ nakai lɛ, Biblia lɛ hãa wɔleɔ akɛ: “Kɛ́ mɔ ko kɛ jaramɔ shihilɛ ko miikpe lɛ, ekakɛɛ akɛ: “Nyɔŋmɔ miika mi.” Ejaakɛ anyɛŋ akɛ nibii fɔji aka Nyɔŋmɔ, ni asaŋ lɛ diɛŋtsɛ hu ekaaa mɔ ko.” (Yakobo 1:13) Anɔkwa, wɔkaseɔ yɛ Biblia lɛ mli akɛ, Nyɔŋmɔ to nibii ahe gbɛjianɔ jogbaŋŋ ehã adesai yɛ shishijee mli. Eto shĩa fɛfɛo, shihilɛ mli hiamɔ nibii fɛɛ, kɛ nitsumɔ kpakpa he gbɛjianɔ ehã Adam kɛ Hawa, ni ji klɛŋklɛŋ adesai lɛ. Nyɔŋmɔ kɛɛ amɛ akɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ, ni nyɛnaanaa nɔ.” Adam kɛ Hawa bɛ nɔ ko ni amɛbaadamɔ nɔ amɛmli afu Nyɔŋmɔ.— 1 Mose 1:28.

Shi ŋmɛnɛ lɛ, nibii tamɔɔɔ bɔ ni eji yɛ shishijee lɛ. Anɔkwa, adesai ena nɔ waa yɛ yinɔsane mli fɛɛ. Nɔ ni Biblia lɛ wie nɛɛ ji anɔkwale, akɛ: “Bɔɔ nii lɛ fɛɛ feɔ ekome kɛyaa nɔ amɛkɛ̃mɔɔ ni amɛhe jaraa amɛ kɛbashi amrɔ nɛɛ.” (Romabii 8:22) Mɛni hã eba lɛ nakai?

Bɔ ni afee ni wɔ nu nɔ hewɔ ni wɔnaa amanehulu lɛ shishi lɛ, esa akɛ wɔle nɔ ni ba yɛ shishijee mli. Ŋwɛibɔfo atuatselɔ ni abale lɛ yɛ sɛɛ mli akɛ Satan Abonsam lɛ laka Adam kɛ Hawa ni amɛye “ekpakpa kɛ efɔŋ lee tso lɛ yibii” ni Nyɔŋmɔ egu amɛ yeli lɛ, ni enɛ hã amɛku Nyɔŋmɔ shishitoo mla ni kɔɔ nɔ ni ja kɛ nɔ ni ejaaa he lɛ mli. Abonsam kɛɛ Hawa akɛ kɛ́ amɛgbo Nyɔŋmɔ nɔ toi lɛ amɛgboŋ, ni ekɛ nɔ ni ewie nɛɛ folɔ Nyɔŋmɔ naa akɛ eji amalelɔ. Satan folɔ Nyɔŋmɔ naa hu akɛ, ehãaa mɛi ni eyeɔ amɛnɔ lɛ hegbɛ ni amɛ diɛŋtsɛ amɛkpɛ amɛyiŋ yɛ nɔ ni ja kɛ nɔ ni ejaaa he. (1 Mose 2:17; 3:1-6) Satan tsɔɔ akɛ adesai baanyɛ aná shihilɛ kpakpa ní ehe ehiaaa ni Nyɔŋmɔ aye amɛnɔ. Enɛɛmɛi fɛɛ tee sanebimɔ ko ni he hiaa waa shi, no ji, ani Nyɔŋmɔ ji mɔ ni sa akɛ eye adesai anɔ?

Abonsam tee sane kroko hu shi. Ewie eshi adesai akɛ, amɛjaa Nyɔŋmɔ yɛ nɔ ni amɛnáa kɛjɛɔ edɛŋ lɛ hewɔ. Abonsam kɛɛ Nyɔŋmɔ yɛ anɔkwafo Hiob he akɛ: “Ani jeee afãbaŋ ofo owo ekɛ ewe kɛ nɔ fɛɛ nɔ ní eyɔɔ lɛ he kɛkpe? . . . Shi agbɛnɛ kpã onine mli ní ota enii ní eyɔɔ lɛ fɛɛ he; akɛ ekwaŋo yɛ ohiɛ lo.” (Hiob 1:10, 11) Eyɛ mli akɛ Hiob he Satan wieɔ lɛ moŋ, shi nɔ ni ewie lɛ tsɔɔ akɛ, nibii ni adesai taoɔ kɛjɛɔ Nyɔŋmɔ dɛŋ lɛ hewɔ amɛsɔmɔɔ lɛ lɛ.

Mɛni ji gbɛ ni hi fe fɛɛ ni abaanyɛ atsɔ nɔ atsu sane nɛɛ he nii shi kome nyɔŋlo? Nyɔŋmɔ, ni ji nilelɔ ni fe fɛɛ lɛ le gbɛ ni hi fe fɛɛ ni ebaatsɔ nɔ etsu he nii—gbɛ ni haŋ wɔyiŋ afee wɔ kɔshikɔshi. (Romabii 11:33) Ekpɛ eyiŋ akɛ ebaaŋmɛ adesai gbɛ koni amɛ diɛŋtsɛ amɛye amɛhe nɔ kɛyashi be ko, koni nɔ ni  baajɛ mli kɛba lɛ atsɔɔ mɔ ni hi fe fɛɛ akɛ eyeɔ adesai anɔ.

Bɔ ni shihilɛ lɛ mli eyi kɛ haomɔi sɔŋŋ ŋmɛnɛ lɛ tsɔɔ faŋŋ akɛ adesai nyɛŋ aye amɛhe nɔ kɔkɔɔkɔ. Jeee toiŋjɔlɛ, shweshweeshwe, kɛ miishɛɛ pɛ adesa nɔyelii lɛ nyɛko amɛkɛba, shi amɛfee nibii ni miikpãtã shikpɔŋ lɛ hiɛ hu. Enɛ hãa wɔnáa nɔmimaa akɛ, nɔ ni Biblia lɛ wie yɛ Yeremia 10:23 lɛ ji anɔkwale; jɛmɛ kɛɔ akɛ: “Adesa ní nyiɛ nɛɛ, bɔ ni eeetsɔ ejaje enajifaamɔi ehã lɛ, ebɛ edɛŋ.” Nyɔŋmɔ nɔyeli lɛ pɛ baahã adesai ahi shi yɛ toiŋjɔlɛ mli daa, ni amɛná miishɛɛ kɛ shihilɛ kpakpa, ejaakɛ enɛ ji Nyɔŋmɔ yiŋtoo kɛhã adesai.—Yesaia 45:18.

Mɛɛ gbɛ nɔ Nyɔŋmɔ baatsɔ etsu eyiŋtoo kɛhã adesai lɛ he nii? Kaimɔ akɛ Yesu tsɔɔ ekaselɔi lɛ ni amɛsɔle akɛ: “O-Maŋtsɛyeli lɛ aba. Afee osuɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:10) Hɛɛ, yɛ be ni sa mli lɛ, Nyɔŋmɔ baatsɔ e-Maŋtsɛyeli lɛ nɔ efo nibii fɛɛ ni hãa wɔnaa amanehulu lɛ sɛɛ. (Daniel 2:44) Ohia, hela, kɛ gbele sɛɛ baafo. Biblia lɛ wieɔ nɔ ni Nyɔŋmɔ baafee ehã ohiafoi lɛ; ekɛɔ akɛ, “eeejie ohiafoi ni bolɔɔ lɛ.” (Lala 72:12-14) Biblia lɛ ewo wɔ shi yɛ hela hu he akɛ: “Maŋbii lɛ ateŋ mɔ ko ekɛŋ akɛ: Mihe miiye.” (Yesaia 33:24, Ga Biblia Hee) Yesu wie yɛ gbohii ni yɔɔ Nyɔŋmɔ kaimɔ mli lɛ po ahe akɛ: “Ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ baanu egbee ni amɛbaaje kpo.” (Yohane 5:28, 29) Mɛɛ shiwoi ni hãa mɔtsui nyɔɔ emli po nɛ!

Be ni Sidnei ni atsĩ etã yɛ shishijee lɛ ná oshara lɛ sɛɛ afii 17 lɛ, ewie akɛ: “Mishwaaa Yehowa Nyɔŋmɔ yɛ oshara ni miná lɛ hewɔ, shi yɛ anɔkwale mli lɛ, mimli fu lɛ yɛ shishijee mli. Bei komɛi kɛ́ misusu kpa ni mije lɛ he lɛ, miyeɔ awerɛho, ni mifoɔ po. Shi mikase yɛ Biblia lɛ mli akɛ, oshara ni miná lɛ etsɔɔɔ akɛ Nyɔŋmɔ miigbala mitoi. Biblia lɛ wieɔ akɛ, ‘be kɛ nibii ni aleee ni baa trukaa ninaa wɔ fɛɛ.’ Sɔlemɔ ni misɔleɔ mihãa Yehowa daa kɛ ŋmalɛi pɔtɛɛ komɛi ni mikaneɔ lɛ ehã naanyobɔɔ ni yɔɔ mi kɛ Nyɔŋmɔ teŋ lɛ mli ewa, ni ewo mi hewalɛ waa.”—Jajelɔ 9:11, NW; Lala 145:18; 2 Korintobii 4:8, 9, 16.

Kɛ́ wɔhã yiŋtoi ahewɔ ni Nyɔŋmɔ eŋmɛ amanehulu gbɛ, kɛ bɔ ni etsɛŋ ni ebaatsu he nii lɛ hi wɔjwɛŋmɔ mli lɛ, wɔmli fuŋ Nyɔŋmɔ yɛ gbɛ ko gbɛ ko nɔ. Biblia lɛ hãa wɔleɔ akɛ, Nyɔŋmɔ ji “mɛi ni kɛ hiɛdɔɔ taoɔ esɛɛ gbɛ lɛ ajurolɔ.” Mɔ ko mɔ bɛ ni náa hemɔkɛyeli yɛ Nyɔŋmɔ kɛ e-Bi lɛ mli ni nine baanyɛ shi.—Hebribii 11:6; Romabii 10:11.