BIBLIA MLI SHISHITOO MLA: “Kɛ́ mɔ ko yɛ sane ko eshi mɔ kroko po lɛ, nyɛyaa nɔ . . . nyɛkɛfafaa nyɛhe tswaa. Bɔ ni Yehowa kɛfa nyɛ tswaa lɛ, esa akɛ nyɛ hu nyɛfee nakai nɔŋŋ.”—Kolosebii 3:13.

Mɛni etsɔɔ? Yɛ Biblia lɛ mli lɛ, akɛ esha toɔ nyɔmɔ he, ni akɛ eshaifaa toɔ nyɔmɔ ni awoɔ he. (Luka 11:4) Wolo ko tsɔɔ mli akɛ, yɛ Ŋmalɛi amli lɛ, Hela wiemɔ ni atsɔɔ shishi akɛ ‘kɛfa’ lɛ shishi ji, “ni akɛ nyɔmɔ ake ní abiii dɔŋŋ.” No hewɔ lɛ, kɛ́ wɔkpɛ mli akɛ wɔkɛ mɔ ko ni etɔ wɔnɔ lɛ he baake lɛ lɛ, wɔkpaaa nɔ ko gbɛ yɛ mɔ lɛ dɛŋ. Wɔsuɔmɔ mli ni wɔjɛɔ wɔkɛ tɔmɔ lɛ keɔ lɛ etsɔɔɔ akɛ wɔmiikpɛlɛ tɔmɔ lɛ nɔ, loo wɔmiiku wɔhiɛ wɔmiishwie awui ni aye wɔ lɛ nɔ. Moŋ lɛ, wɔkpɛɔ mli akɛ wɔbaaŋmɛɛ mlifu lɛ he, eyɛ mli akɛ ekolɛ ‘wɔyɛ sane ko wɔshi mɔ lɛ.’

Ani ehe yɛ sɛɛnamɔ ŋmɛnɛ? Akɛni wɔyeee emuu hewɔ lɛ, wɔ fɛɛ wɔfeɔ esha. (Romabii 3:23) No hewɔ lɛ, nilee yɛ mli akɛ wɔkɛ mɛi krokomɛi atɔmɔi baake amɛ, ejaakɛ wɔ hu wɔbaanyɛ wɔtɔ̃ mɛi komɛi anɔ, ni ebaabi ni amɛkɛke wɔ. Kɛfata he lɛ, kɛ́ wɔkɛ mɛi atɔmɔi ke amɛ lɛ, wɔnáa he sɛɛ. Yɛ mɛɛ gbɛ?

Kɛ́ wɔkɛ mlifu kɛ mlila wo wɔmli—ni wɔkɛ tɔmɔi ekeee lɛ—wɔyeɔ wɔhe awui. Enɛ baanyɛ afite wɔmiishɛɛ, ehã wɔfee kpɛŋŋ, ni ehã wɔhao. Ebaanyɛ ehã wɔná hela ko ni naa wa. Datrɛfonyo Yoichi Chida kɛ Woloŋlelɔ kpanaa, Andrew Steptoe, ni kaseɔ adesai ajwɛŋmɔ lɛ kɛ amɛnifeemɔ he nii lɛ tsɔɔ mli yɛ sane ko ni amɛŋma amɛwo wolo ko (Journal of the American College of Cardiology) mli lɛ mli akɛ: ‘Nibii ni akpa shi ana nyɛsɛɛ nɛɛ tsɔɔ akɛ, tsakpaa ko yɛ mlifu, hetsɛ̃ kɛ tsui hela teŋ.’

Shi susumɔ sɛɛnamɔ ni yɔɔ tɔmɔi ni akɛaake lɛ he okwɛ. Kɛ́ wɔkɛ mɛi ahe ke amɛ tswaa lɛ, wɔbaa ekomefeemɔ kɛ toiŋjɔlɛ yi, ni naanyobɔɔ hiɔ wɔ kɛ amɛ teŋ. Nɔ ni fe fɛɛ lɛ, kɛ́ wɔfee nakai lɛ, etsɔɔ akɛ wɔmiikase Nyɔŋmɔ, mɔ ni kɛ eshai faa tswaa, ní ekpaa gbɛ akɛ wɔ hu wɔbaafee nakai nɔŋŋ lɛ.—Marko 11:25; Efesobii 4:32; 5:1.