Aaafee afii 3500 nɛ, be ni eshwɛ fioo ni Israelbii lɛ baabote Shiwoo Shikpɔŋ lɛ nɔ lɛ, Nyɔŋmɔ kɛɛ akɛ ebaabu amɛhe kɛje “helai ni yɔɔ gbeyei” ni amɛle yɛ Ejipt lɛ ahe. (5 Mose 7:15) Gbɛ kome ni etsɔ nɔ efee enɛ ji, ehã amɛ gbɛtsɔɔmɔi ni yɔɔ fitsofitso ni kɔɔ falefalefeemɔ kɛ bɔ ni amɛaafee amɛhi shi ni helai akamɔmɔ amɛ lɛ he. Akɛ nɔkwɛmɔnɔ:

•   Mla ni ekɛhã amɛ lɛ bi ni amɛju amɛhe, ni amɛfɔ amɛtadei hu ahe.​—3 Mose 15:4-27.

•   Yɛ wamɔ loo tiafi gbɛfaŋ lɛ, Nyɔŋmɔ kɛɛ akɛ: “Ato he ko banee kɛhã niiasɛɛyaa yɛ nsara lɛ sɛɛ, ní oya jɛmɛ. Hiɛmɔ sɔsɔo ofata odɛŋdadei lɛ ahe. Kɛ́ oyasɔ̃ shi yɛ nsara lɛ sɛɛ lɛ, okɛtsa shi, ni no sɛɛ lɛ, otsĩ owamɔ lɛ nɔ.”​—5 Mose 23:12, 13.

•   Atsĩ mɛi ni yeɔ tsɛŋemɔ helai lɛ anaa koni amɛkaya mɛi ateŋ kɛyashi be ko. Kɛ́ mɔ ko hela tee loo ehe wa lɛ lɛ, dani abaabu lɛ akɛ ‘ehe tse’ koni eku esɛɛ kɛya mɛi ateŋ lɛ, esa akɛ efɔ etadei lɛ ahe, ni ekɛ nu aju ehe.​—3 Mose 14:8, 9.

•   Mɔ fɛɛ mɔ ni taa nɔ ko ni egbo he lɛ, ajieɔ lɛ kɛjeɔ maŋbii lɛ ateŋ.​—3 Mose 5:2, 3; 4 Mose 19:16.

 Mlai ni Nyɔŋmɔ kɛhã Israelbii lɛ ni kɔɔ helatsamɔ kɛ falefalefeemɔ he lɛ ahe yɛ sɛɛnamɔ lolo ŋmɛnɛ.

 Maji krokomɛi amli bii ahe tseee. Akɛ nɔkwɛmɔnɔ lɛ:

•   Atsiɔ jwɛi ashwieɔ he fɛɛ he kɛkɛ. Nu ni mli ewo muji, niyenii ni efite, kɛ nibii krokomɛi ni ehiii hã helai mɔmɔ mɛi pii, ni gbekɛbii babaoo hu gboi.

•   Datrɛfoi ni hi shi yɛ blema lɛ leee muawai ahe nɔ ko tsɔ. Ejiptbii kɛ nibii tamɔ odaakɛlɛo lá, duguma fee, kwakwe ni egbo, shamɔ, kɛ blodo ni efu tsuɔ nii akɛ amɛkɛmiitsa helai, shi nibii nɛɛ hãa helai lɛ amli woɔ wu moŋ. Agbɛnɛ hu, amɛkɛ gbɔmɛi kɛ kooloi afee tsuɔ nii akɛ amɛkɛmiitsa mɛi.

•   Muawai srɔtoi ni yɔɔ Nilo Faa lɛ kɛ nujɔi ni agbala yɛ ehewɔŋ lɛ amli lɛ hã helai mɔmɔ blema Ejiptbii lɛ. Kɛfata he lɛ, niyenii ni muawai yɔɔ mli hã musuŋtsɔmɔ hela kɛ helai krokomɛi ni tamɔ nakai gbe gbekɛbii babaoo yɛ Ejipt.

 Nɔ ni tamɔɔɔ nakai lɛ, akɛni Israelbii lɛ kɛ Mla ni Nyɔŋmɔ kɛhã amɛ lɛ tsu nii hewɔ lɛ, amɛná he sɛɛ ni amɛná gbɔmɔtsoŋ hewalɛ kpakpa fe maji krokomɛi anɔ bii.