“Misusuko he pɛŋ akɛ manyɛ mikɛ mibe fɛɛ asɔmɔ Yehowa.” Nɛkɛ ji bɔ ni yoo ko ni atsɛɔ lɛ Gwen, ni jɛ England, ni yasɔmɔ yɛ Albania he ni hiamɔ lɛ da yɛ lɛ, tsɔɔ bɔ ni enu he ehã lɛ mli. a

 Gwen fata Yehowa Odasefoi pii ni amɛfã kɛtee Albania koni amɛyawa ni abua “jeŋmaji lɛ fɛɛ anibii ni jara wala lɛ” anaa lɛ ahe. (Hagai 2:7) Mɛni tsirɛɔ shiɛlɔi nɛɛ ni amɛfeɔ nakai? Mɛɛ tsakemɔi ehe bahiaa ni amɛfee koni amɛnyɛ amɛfã? Ni mɛni eye ebua amɛ ni amɛnyɛ amɛfi shi yɛ naagbai ni amɛkɛkpeɔ lɛ fɛɛ sɛɛ?

 Shiɛlɔi fɛɛ ni fãa kɛbaa Albania ni amɛbaye amɛbua lɛ hiɛ yiŋtoo kome too lɛ nɔŋŋ: Amɛsumɔɔ Yehowa, ni amɛmiisumɔ ni amɛye amɛbua mɛi krokomɛi hu koni amɛbale lɛ.

 Dani amɛbaafã lɛ, amɛfee tsakemɔi ni baahã amɛsɔmɔ Yehowa yɛ gbɛ ni da nɔ, ni enɛ ye ebua amɛ koni amɛnyɛ amɛkpee shihilɛi hei ni amɛkɛbaakpe yɛ maŋ kroko nɔ lɛ anaa. Gwen wie akɛ: “Klɛŋklɛŋ lɛ, miyafata Albania wiemɔ kuu ko ni yɔɔ mimaŋ lɛ mli lɛ he. No sɛɛ lɛ, mitee kpokpaa wulu nɔ kpee yɛ Albania. Sɛɛ mli lɛ, miku misɛɛ miyahi jɛmɛ be fioo koni manyɛ makase wiemɔ lɛ jogbaŋŋ.”

 Be ni Manuela ye afii 23 lɛ, efã kɛtee kpokpaa kroko nɔ yɛ emaŋ Italy nɔŋŋ koni eyaye ebua asafo ko ni mli bii faaa. Ewie akɛ: “Misɔmɔ yɛ jɛmɛ afii ejwɛ. Kɛkɛ ni miná mile akɛ shiɛlɔi ahe miihia yɛ Albania. No hewɔ lɛ, mito gbɛjianɔ koni mikɛ nyɔji fioo atsu gbɛgbamɔ nitsumɔ lɛ yɛ jɛmɛ.”

 Be ni Federica eye afii kpawo pɛ lɛ, enu Albania shiɛmɔ nitsumɔ lɛ he amaniɛbɔɔ ko yɛ kpokpaa wulu nɔ kpee ko shishi. Ewie akɛ: “Nyɛmi nuu ni kane amaniɛbɔɔ lɛ wie akɛ, shiɛlɔi ni yɔɔ Albania lɛ eje Biblia mli nikasemɔi babaoo ashishi, ni mɛi ni yɔɔ wiemɔ lɛ he miishɛɛ lɛ baa asafoŋ kpeei. Mibɔi mifɔlɔi kɛɛmɔ akɛ, miitao maya Albania. Shwelɛ ni miná nɛɛ fee amɛ naakpɛɛ waa, shi mipapa kɛɛ mi akɛ, ‘Sɔlemɔ yɛ he, ni kɛ́ Yehowa miisumɔ lɛ, ebaabo toi.’ Nyɔji fioo komɛi asɛɛ lɛ, afɔ̃ wɔweku lɛ nine ni wɔyasɔmɔ yɛ Albania!” Afii pii eho, ni amrɔ nɛɛ Federica kɛ Orges ebote gbalashihilɛ mli. Amɛmiisɔmɔ akɛ be fɛɛ sɔɔlɔi yɛ Albania.

 Be ni Gianpiero ba pɛnshɛŋ lɛ, ekɛ eŋa Gloria fã kɛtee Albania. Ewie akɛ: “Wɔtsɔse wɔbihii enumɔ lɛ yɛ Italy. Amɛteŋ mɛi etɛ fã kɛtee maŋsɛɛ amɛyasɔmɔ yɛ he ni hiamɔ lɛ da yɛ. Be ni wɔkase sane ko ni je kpo yɛ Buu-Mɔɔ lɛ mli ni yitso ji, ‘Ani Obaanyɛ Oya Makedonia?’ lɛ, ewo wɔ hewalɛ waa. Enɛ hã wɔsusu bɔ ni wɔbaafee wɔkɛ mipɛnshɛŋ shika lɛ ayasɔmɔ yɛ Albania lɛ he.”

 Esa akɛ mɛi ni miitao amɛyasɔmɔ yɛ hei ni shiɛlɔi ahe miihia yɛ lɛ, atsɔ hiɛ ato gbɛjianɔ jogbaŋŋ, ni amɛfee tsakemɔi ni he baahia bɔ ni afee ni amɛnyɛ amɛfã kɛya. (Luka 14:28) Nibii ni esa akɛ amɛsusu he lɛ eko ji, bɔ ni amɛ diɛŋtsɛ amɛbaafee amɛkwɛ amɛhe yɛ shika gbɛfaŋ. Be ni Gwen, ni wɔtsĩ etã kɛtsɔ hiɛ lɛ yɔɔ England lɛ, nɔ ni efee klɛŋklɛŋ ji, ekɛ enyɛmi yoo onukpa yahi he kome bɔ ni afee ni enyɛ ebua shika naa. Sophia kɛ Christopher ni amɛjɛ England lɛ hu wie akɛ: “Wɔhɔ̃ɔ wɔlɔle kɛ wɔtsu mli nibii komɛi. No mli lɛ, wɔgbɛkpamɔ ji akɛ, kɛ́ hooo kwraa lɛ wɔbaaye afi kome yɛ Albania.” Miishɛɛ sane ji akɛ, amɛnyɛ amɛye fe nakai yɛ jɛmɛ.

 Nɔ ni shiɛlɔi komɛi feɔ ji, kɛ́ amɛshiɛ yɛ Albania nyɔji fioo lɛ, amɛkuɔ amɛsɛɛ kɛyaa amɛmaŋ ni amɛyatsuɔ nii kɛbuaa shika naa, kɛkɛ lɛ amɛsaa amɛba Albania ekoŋŋ amɛbashiɛ. Nakai pɛpɛɛpɛ Eliseo kɛ Miriam fee. Eliseo tsɔɔ mli akɛ: “He ni Miriam jɛ yɛ Italy lɛ, gbɔi fɔɔ jɛmɛ baa kɛhã hiɛtserɛjiemɔ, no hewɔ lɛ, ewaaa akɛ obaaná nitsumɔ ni akɛ be fã tsuɔ. Kɛ́ eshɛ latsa beiaŋ lɛ, wɔyaa jɛmɛ wɔyatsuɔ nii nyɔji etɛ, ni wɔkɛ shika ni wɔnáa lɛ yakwɛɔ wɔhe kɛtsuɔ shiɛmɔ nitsumɔ yɛ Albania nyɔji nɛɛhu lɛ ni eshwɛ lɛ. Wɔfee nakai afii enumɔ sɔŋŋ.”

 Ehe bahiaa ni mɛi ni yasɔmɔɔ yɛ hei ni hiamɔ lɛ da yɛ lɛ atsake amɛhe amɛwo shihilɛi ni yɔɔ jɛmɛ lɛ amli, shi nyɛmimɛi Odasefoi ni yɔɔ jɛmɛ lɛ aŋaawoi kɛ amɛnɔkwɛmɔnɔ lɛ yeɔ ebuaa amɛ ni amɛnyɛɔ amɛkpeɔ shihilɛi lɛ anaa. Sophia, ni atsĩ etã kɛtsɔ hiɛ lɛ wie akɛ: “Kɛ́ eshɛ fɛ̃i be yɛ Albania lɛ, shĩai amli jɔɔ ŋanii waa fe bɔ ni eji yɛ mimaŋ, he ni mijɛ lɛ. Mibɔi mihe saamɔ tamɔ bɔ ni nyɛmimɛi yei ni yɔɔ jɛmɛ lɛ saa amɛhe lɛ.” Grzegorz kɛ eŋa Sona jɛ Poland amɛbaye amɛbua kɛshiɛ yɛ Prizren maŋ fɛfɛo ni yɔɔ Kosovo lɛ. b Grzegorz wie akɛ: “Shiɛlɔi ni yɔɔ biɛ lɛ baa amɛhe shi waa, amɛmli jɔ, ni amɛtoɔ amɛtsui shi! Amɛmiiye amɛmiibua wɔ koni wɔkase wiemɔ lɛ, ni amɛmiitsɔɔ wɔ nibii krokomɛi hu feemɔ. Akɛ nɔkwɛmɔnɔ lɛ, amɛtsɔɔ wɔ shwapoi ni nibii ajara waaa tsɔ yɛ jɛmɛ, kɛ bɔ ni wɔbaafee wɔyaye jara yɛ amɛjaji lɛ anɔ.”

 Nyɛmimɛi ni fãa kɛyaa maji krokomɛi anɔ amɛyashiɛɔ yɛ jɛmɛ lɛ náa nanemɛi yɛ Odasefoi ni yɔɔ jɛmɛ lɛ ateŋ, ni amɛleɔ amɛ jogbaŋŋ. Sona tsɔɔ mli akɛ: “Ena bɔ ni Yehowa suɔmɔ lɛ baanyɛ atsake mɛi ashihilɛ. Nyɛmimɛi lɛ waje mihemɔkɛyeli lɛ waa, ejaakɛ minaa bɔ ni kɛ́ amɛkase Yehowa he nii ni amɛbale lɛ lɛ, amɛŋmɛɔ amɛtsutsu hemɔkɛyeli lɛ he, ni amɛtsakeɔ amɛshihilɛ kwraa lɛ. Wɔyɔse akɛ wɔhe miihia amɛ, ni wɔna bɔ ni wɔbaafee wɔye wɔbua. Nyɛmimɛi hii kɛ yei ni wɔkɛ amɛ sɔmɔɔ lɛ ebatsɔmɔ wɔnanemɛi.” (Marko 10:29, 30) Gloria kɛɛ akɛ: “Mile nyɛmimɛi yei pii ni mɛi ni sumɔɔɔ Yehowa Odasefoi asane lɛ wa amɛyi, shi fɛɛ sɛɛ lɛ amɛfĩ shi. Bɔ ni amɛsumɔɔ Yehowa lɛ woɔ mi hewalɛ.”

 Mɛi ni yasɔmɔɔ yɛ hei ni hiamɔ lɛ da yɛ lɛ náa hegbɛ kɛkaseɔ nibii komɛi ni ekolɛ amɛkaseee yɛ amɛmaŋ. Akɛ nɔkwɛmɔnɔ lɛ, amɛnaa akɛ kɛ́ mɔ ko náaa nɔ ko feemɔ mlɛo, shi emia ehiɛ efee koni enyɛ esɔmɔ Yehowa kɛ etsui fɛɛ lɛ, mɔ lɛ náa miishɛɛ waa. Stefano kɛɛ akɛ: “Yɛ mimaŋ lɛ mli lɛ, intercom nɔ titri wɔtsɔɔ wɔshiɛɔ wɔhãa mɛi, ni wɔfeɔ wɔshiɛmɔ wiemɔi kuku. Shi Albaniabii lɛ sumɔɔ ni amɛgba sane kakadaŋŋ, titri lɛ be ni amɛtara shi ni amɛmiinu kɔfi. Miji mɔ ko ni hiɛ gboɔ waa, hewɔ lɛ shishijee lɛ mináaa lɛ mlɛo kwraa, ni minaaa nɔ ni makɛɛ. Shi be ni be shwie mli lɛ, mikɛ mijwɛŋmɔ maa mɛi lɛ anɔ titri, ni amrɔ nɛɛ minyɛɔ mikɛ mɛi gbaa sane bei saŋŋ. Mimii shɛɔ mihe waa yɛ shiɛmɔ nitsumɔ lɛ mli amrɔ nɛɛ fe tsutsu lɛ.”

 Leah kɛ ewu William fã kɛjɛ United States kɛtee Albania. Ewie akɛ: “Biɛ ni wɔsɔmɔɔ yɛ lɛ egbele wɔjwɛŋmɔ mli, ni ehã wɔtsake wɔsusumɔi yɛ nibii komɛi ahe kɛ bɔ ni wɔhiɔ shi wɔhãa. Wɔkase nibii babao yɛ gbɔfeemɔ, bɔ ni ajieɔ bulɛ kpo, kɛ naanyobɔɔ he! Wɔbale gbɛi krokomɛi ni atsɔɔ nɔ ashiɛɔ, akɛ mɛi susuɔ Ŋmalɛi lɛ ahe, kɛ bɔ ni wɔbaafee wɔkɛ mɛi aje sanegbaa shishi.” William kɛɛ akɛ: “Mɛi ni basaraa Albania lɛ ateŋ mɛi pii sumɔɔ bɔ ni jɛmɛ ŋshɔi lɛ anaa yɔɔ fɛo hã lɛ waa. Mi lɛ misumɔɔ ni mayashara shi yɛ Albania gɔji ni nɔ yɔɔ tɛitɛi lɛ anɔ. Shi nɔ titri ni ehã mihiɛ emɛ biɛ ji, bɔ ni Albaniabii lɛ sumɔɔ mɔ ni amɛfeɔ gbɔ lɛ! Akrowai babaoo yɛ wɔshikpɔŋ kuku lɛ mli ni ja aafã shiɛmɔ nitsumɔ lɛ he tã krɛdɛɛ ko dani ayashiɛɔ yɛ jɛmɛ. Kɛ́ wɔtee jɛmɛ lɛ, bei komɛi lɛ wɔyeɔ gbi muu fɛɛ yɛ jɛmɛ ni wɔkɛ wekui enyɔoo ko kɛkɛ egba sane.”

 Nɔ titri ni hãa mɛi ni yasɔmɔɔ yɛ hei ni hiamɔ lɛ da yɛ lɛ amii shɛɔ amɛhe fe fɛɛ ji, bɔ ni mɛi boɔ sane kpakpa lɛ toi lɛ. (1 Tesalonikabii 2:19, 20) Laura ni fã kɛtee Albania be ni eji oblayoo ni boteko gbalashihilɛ mli lɛ kɛɛ akɛ: “Miyaye bei fioo kɛshiɛ yɛ Fier. Yɛ afii enyɔ pɛ mli lɛ, mɛi 120 batsɔmɔ shiɛlɔi ni abaptisiko amɛ! Mikɛ amɛteŋ mɛi 16 kaseɔ Biblia lɛ!” Nyɛmi yoo kroko ni atsɛɔ lɛ Sandra lɛ kɛɛ akɛ: “Miye yoo ko ni miitsu nii yɛ jara ko nɔ lɛ odase. Ebatsɔ Odasefonyo ni efã kɛtee ekrowa lɛ. Be ko ni mi kɛ lɛ gba sane lɛ, ekɛɛ mi akɛ eyɛ Biblia kaselɔi 15 sɔŋŋ!”

 Mɛi ni fã kɛtee Albania afii komɛi nɛ koni amɛyashiɛ yɛ jɛmɛ lɛ ateŋ mɛi komɛi yɛ jɛmɛ lolo, ni amɛmiiná miishɛɛ waa yɛ shiɛmɔ nitsumɔ lɛ mli. Bei komɛi lɛ, amɛnaa akɛ mɛi komɛi ni amɛshiɛ amɛhã amɛ afii komɛi ni eho lɛ ebatsɔmɔ Yehowa Odasefoi, ni enɛ hãa amɛnáa kpɛɔ amɛhe waa. (Jajelɔ 11:6) Christopher, ni atsĩ etã mra mli lɛ kɛɛ akɛ: “Mikɛ nuu ko ni mikɛ lɛ bɔi Biblia lɛ kasemɔ be ni miba Albania klɛŋklɛŋ kwraa lɛ kpe. Be ni mi kɛ lɛ gbaa sane lɛ, ekɛɛ mi saji ni mikɛ lɛ gba yɛ Biblia lɛ mli lɛ fitsofitso, ni eta mitsui mli waa. Amrɔ nɛɛ abaptisi ekɛ eŋa fɛɛ akɛ Yehowa Odasefoi.” Federica, ni atsĩ etã kɛtsɔ hiɛ wie akɛ: “Yɛ asafo ko mli lɛ, nyɛmi yoo ko babi mi kɛji mikaiɔ lɛ lo. Ekɛɛ mi akɛ afii nɛɛhu ni eho lɛ, mishiɛ mihã lɛ. Be ni mifã kɛtee maŋ kroko nɔ sɛɛ lɛ, mɔ ko kɛ lɛ bɔi Biblia lɛ kasemɔ, etee hiɛ yɛ nikasemɔ lɛ mli, ni sɛɛ mli lɛ abaptisi lɛ. Kulɛ, misusuɔ akɛ klɛŋklɛŋ afii ni wɔkɛshiɛ yɛ Albania lɛ wooo yibii ko kwraa. Asomoaŋ lɛ, jeee nakai!”

 Kɛ́ nyɛmimɛi yei kɛ hii ni fã kɛtee Albania loo Kosovo lɛ na bɔ ni Yehowa ejɔɔ amɛmɔdɛŋbɔi lɛ anɔ, ni ehã amɛná miishɛɛ lɛ, amɛdaa lɛ shi. Naa nɔ ni Eliseo ekpa shi ena yɛ afii pii ni ekɛsɔmɔ yɛ Albania lɛ mli, ewie akɛ: “Ewaaa akɛ wɔbaalaka wɔhe kɛsusumɔ lɛ akɛ, kɛ́ wɔhi shi bɔ ni je lɛ taoɔ akɛ wɔhi shi lɛ, no baahã wɔshihilɛ ahi ni wɔtsui anyɔ wɔmli. Shi enɛ jeee anɔkwale kwraa. Moŋ lɛ, Yehowa shishitoo mlai ni wɔhiɔ shi yɛ naa lɛ ji nɔ ni hãa wɔshihilɛ hiɔ, ni wɔfeɔ shweshweeshwe. Miisɔmɔ yɛ he ni hiamɔ lɛ da yɛ, ni no maa anɔkwa sane nɛɛ nɔ mi ehãa mi. Minuɔ he akɛ sɛɛnamɔ yɛ mihe, ni nɔ ni mitsuɔ lɛ he hiaa waa. Miyɛ nanemɛi kpakpai ni mikɛbɔɔ, ni oti kome too lɛ nɔŋŋ ma wɔ fɛɛ wɔhiɛ.” Sandra kɛ lɛ kpãa gbee, ekɛɛ akɛ: “Be ni mifã kɛtee he ni hiamɔ lɛ da yɛ lɛ, minu he akɛ Yehowa ehã mi hegbɛ koni mafee nɔ ni mishwe be kpalaŋ akɛ mafee lɛ, no ji, ni masɔmɔ akɛ maŋsɛɛ sɔɔlɔ. Mishwako mihe kɔkɔɔkɔ akɛ mifã kɛba Albania. Mimii shɛko mihe nɛkɛ pɛŋ.”