« TÉMWEN Jéova-ya aji ké bonté ké mo é a sa ki touché mo plis. » A sa Lisa a di asou sa ki bay li anvi konnèt lavérité-a an prémyé. A menm bagaj-a pou Anne. I ka di : « Sa ki bay mo anvi konnèt lavérité-a, a pa sa Témwen Jéova-ya té ka di, mé a zafè yé té janti ké mo. » Jòdla, sa dé sò-ya kontan li Labib-a ké réfléchi asou sa i ka di. Mé yé pa janmen bliyé fason Témwen Jéova-ya aji ké bonté ké yé.

Lò nou ka aji ké bonté, sa ka touché moun-yan. Kouman nou pouvé montré sa kalité bonté-a ? Annou wè dé fason pou fè sa : ké sa nou ka di épi ké sa nou ka fè. Apré sa, nou ké wè ké kimoun nou divèt aji ké bonté.

Proverbes chapit 31 ka palé di roun fanm djòk. I ka di ki « lò i ka ansényé, i ka palé ké bonté » (Prov. 31:26). A bonté-a ki dèyè tousa i ka di ké fason i ka di l’. Papa-ya osi divèt palé ké bonté. Papa ké manman-yan savé ki si yé ka di yé timoun bagaj ki méchan, sa pa bon pou yé timoun, é yé ka riské pa kouté sa yé ka di yé. Parkont, si yé ka palé pou yé ké bonté, yé ké anvi obéyi.

Ki nou gen timoun, ki nou pa gen timoun, kisa nou pouvé fè pou nou toujou palé ké bonté ? Prémyé parti Proverbes 31:26 ka idé nou savé sa nou pouvé fè. Nou ka li : « Lò [fanm djòk-a] ka louvri so bouch, i ka palé ké sajès. » Dapré sa vèrsé-a, a pou nou byen chwazi sa nou ké di ké fason nou ké di l’. Pou fè sa, nou pouvé doumandé nou kò : « Ès sa mo ké di ké fè moun-an kòlè ouben ès sa ké ranjé sitiasyon-an ? » (Prov. 15:1). Sa byen pou nou réfléchi anvan nou palé.

Rounòt proverbe ka di : « Lò roun moun ka palé san réfléchi, a kousidiré i ka bay kout sab » (Prov. 12:18). Annou sonjé ki sa nou ka di ké fason nou ka di l’ pouvé fè ròt-ya lapenn. Konsa, sa ké pi fasil pou nou kontrolé sa ki ka soti di nou bouch. Si nou toujou ka palé ké « bonté », nou pa ké di bagaj ki méchan, é nou pa ké palé rèd bay moun-yan (Éph. 4:31, 32). Nou pa ké sonjé di bagaj ki pa ankourajan, nou ké palé ké bonté é nou ké palé jantiman ké yé. Jéova montré nou kouman pou nou fè annan fason i rasiré so sèrvitèr Éli ki té pè. Zanj-a ki té ka réprézanté l’ palé pou Éli ké roun « ti vwa kalm ké dous » (1 Rois 19:12). Mé a pa ké nou bouch rounso nou ka montré ki nou gen bonté. Nou divèt fè bagaj osi pou montré ki nou ka aji ké bonté.

Nou ka imité Jéova lò nou ka palé ké bonté é osi lò nou ka aji ké bonté (Éph. 4:32 ; 5:1, 2). Lisa, nou ja palé anvan, ka rakonté kouman Témwen-yan aji ké bonté ké li : « Lò mo ké mo fanmi nou anprann ki nou té divèt lésé kaz-a vitman, dé frè ké yé madanm annan asanblé-a pran plizyèr jou konjé  pou idé nou déménajé. A sa moman-an, mo patékò menm ka étidyé Labib-a ! » A sa kalité bagaj-ya ki fè si Lisa koumansé anvi konnèt lavérité-a.

Anne, nou ja palé anvan, té gen osi bokou rékonésans paské Témwen-yan aji ké bonté ké li. I ka èspliké : « Monn-an koté nou ka viv jòdla tèlman mové ki mo té vin pè tout moun. Mo pa té ka rivé fè moun konfyans. » Mé i ka di osi : « O koumansman, lò mo kontré ké Témwen Jéova-ya, mo pa té ka djè fè yé konfyans. Mo té ka doumandé mo kò poukisa yé té ka gadé pou mo. Mé mo wè ki sò-a ki té ka étidyé Labib-a ké mo pa té ka fè sanblan aji ké bonté ké mo. É a konsa mo rivé fè li konfyans. » Kisa sa idé Anne fè ? Anne ka di : « Mo rivé mété mo lidé asou sa mo té ka anprann. »

Sa ki vréman touché Lisa ké Anne, a ki frè ké sò-ya aji ké lanmou ké bonté ké yé. É a sa ki fè yé anvi anprann lavérité-a. Sa idé yé fè Jéova ké so pèp konfyans.

Parapòrta fason yé lévé nou ouben koté nou ka rété-a, pitèt sa fasil pou nou souri é pou nou palé jantiman. É a roun bon bagaj. Mé sa pa lé di ki a sa kalité bonté-a Jéova lé nou gen (gadé Actes 28:2).

Vré bonté-a, a roun kalité annan frwi lèspri sen-an ka bay (Gal. 5:22, 23). Pou nou rivé gen sa kalité-a, a pou nou lésé lèspri sen-an aji asou nou. Lò nou ka fè sa, nou ka imité Jéova ké Jézi. Anplis di sa, kou nou krétyen, nou ka vréman gadé pou ròt-ya. Donk a nou lanmou pou Jéova ké nou lanmou pou nou konpanyen ki ka pousé nou aji ké bonté. Atò, nou bonté ka divini roun kalité ki fò, roun kalité ki ka vini di nou tchò, roun kalité ki ka fè Jéova kontan nou.

Pitèt pou nou, sa nòrmal pou nou aji ké bonté ké sa-ya ki janti ké nou ouben ké moun nou konnèt (2 Sam. 2:6). Roun fason nou pouvé fè sa, a di yé mèrsi pou sa yé ka fè pou nou (Col. 3:15). Mé si aprézan nou ka pansé ki roun moun pa mérité nou aji ké bonté ké li ?

Annou sonjé sa : Jéova montré pi bon èkzanp i pouvé gen annan zafè aji ké bonté. É so Paròl ka anprann roun bagaj enpòrtan asou fason nou divèt montré sa kalité-a. Annan Ékritir grèk krétyen-yan, yé ka palé roun patché fwa di bonté Jéova-a. Yé ka di ki a so « favèr nou pa mérité-a ». Kouman Jéova ka aji ké bonté ké nou ?

Jéova aji ké bonté ké tout moun asou latè-a. I bay yé tousa yé té bézwen pou yé viv (Mat. 5:45). Anfèt, i aji ké bonté ké yé menm si yé pa té konnèt li (Éph. 2:4, 5, 8). Parèkzanp, i bay sa ki té gen plis valò pou li, so sèl Pitit, pou tout moun. A pou sa apot Pòl di ki Jéova bay ranson-an « soulon so gran favèr nou pa mérité-a » (Éph. 1:7). Anplis di sa, menm si nou ka fè péché, é menm si nou ka fè li lapenn, i ka kontinyé gidé nou ké ansényé nou. So ansèyman ké so paròl « kou ti lapli » (Deut. 32:2). So bonté pou nou gran tèlman ki nou pa ké janmen pouvé péyé li pou sa. Anplis di sa, san so bonté, nou pa té ké gen pyès èspwar (gadé 1 Pierre 1:13).

Asiré pa pitèt, bonté Jéova-a ka bay nou anvi vini òbò li é sa ka bay nou anvi aji. Donk, pasé nou aji ké bonté ké roun ran moun sèlman, annou imité Jéova, é annou aji ké bonté touléjou ké tout moun (1 Thess. 5:15). Konsa, nou ké kou roun bèl difé pou ròt-ya roun jou i ka fè frèt. Nou ké ankourajé nou fanmi, nou frè ké sò-ya, nou kolèg travay, nou kanmarad lékòl ké nou vwazen.

Ès i gen roun moun annan to asanblé ouben annan to fanmi ki té ké byen kontan to palé ké bonté ké li ouben ki to aji ké bonté ké li ? Pitèt roun moun annan to asanblé bézwen èspésyalman to idé l’ pou ranjé so kaz, fè so jarden ouben fè komisyon pou li. Ouben pitèt to pouvé fè roun bagaj pou idé roun moun to jwenn an prédikasyon.

Wi, annou imité Jéova, é annou toujou palé ké aji ké « bonté » !