ANNAN lépòk Labib-a, lò dé moun té ka désidé maryé, fanmi madanm-an té ka rousouvwè sa yé té ka aplé roun dòt. Annan dòt-a, i té pouvé gen bagaj ki té gen bokou valò, zannimo ouben soumaké. Yé té pouvé travay osi pou péyé sa dòt-a. Parèkzanp, Jakòb asèpté travay sèt lannen pou moun-an ki té ké divini so bopè pou i té pouvé maryé ké Rachèl (Gen. 29:17, 18, 20). Poukisa yé té ka swiv sa tradisyon-an ?

Carol Meyers, roun èspésyalis Labib-a ka di : « Dòt-a té pouvé péyé fanmi-a pou sa yé té ké pédi kou yé tifi pa té ké travay pou yé ankò. Sa té enpòrtan pou fanmi-ya [ki té ka travay latè] *. » Kou yé pitit té ka maryé, dé fanmi-ya té ka fè rounsèl fanmi aprézan. É dòt-a té pouvé idé yé vin pi pròch. Si yé té ka jwenn problèm, yé té pouvé idé yé konpanyen. Lò yé té ka péyé sa dòt-a, sa té ka montré ki jennfi-a té fiyansé aprézan, é ki lò i té ké maryé, a pa so papa ki té ké pou okipé di li ankò, mé a so mari ki té ké gen pou okipé di li épi protéjé l’.

Lò yé té ka péyé dòt-a, sa pa té lé di ki yé té ka wè madanm-an kou roun bagaj yé té pouvé achté ouben vandé. Liv Les institutions de l’Ancien Testament ka di : « Lò nou ka gadé dòt-a konsa, pitèt nou pouvé pansé ki maryaj Israyélit-ya, a té kousidiré to té ka achté roun bagaj. Mé yé pa té ka wè [dòt-a] kou bagaj yé té ka bay pou achté roun madanm mé pito bagaj yé té ka bay fanmi-a pou ranplasé sa i té ka pédi *. »

Jòdla, annan sèrten péyi, yé ka péyé dòt-a toujou. Lò papa ké manman ki krétyen ka doumandé roun dòt, yé pa ka doumandé roun patché bagaj, konsa ‘tout moun ka wè ki yé rézonab’ (Phil. 4:5 ; 1 Cor. 10:32, 33). Konsa yé ké montré ki yé pa ni « kontan soumaké », ni voras (2 Tim. 3:2). Anplis di sa, frè-a ki pou maryé pa ké divèt antann jistan i gen asé soumaké pou i pouvé péyé dòt-a. I pa ké oblijé lésé sèrvis pyonyé-a non plis pou i travay a plen tan pou i pouvé péyé roun dòt ki chè pasé kisa.

Annan sèrten péyi, a lalwa ki ka désidé valò dòt-a. Papa ké manman krétyen ké divèt obéyi sa lalwa-a ka di. Poukisa ? Paské Paròl Bondjé-a ka doumandé krétyen-yan « obéyi sa-ya ki gen otorité » é obéyi lalwa ki pa kont lalwa Bondjé (Rom. 13:1 ; Actes 5:29).