Roun sèrman, a roun bagaj nou ka di ouben roun promès nou ka fè, é souvan nou ka di ki a Bondjé ki témwen sa promès-a. Nou pouvé di l’ ouben marké l’ roun koté.

Roun ran pouvé pansé ki nou pa divèt prété sèrman paské Jézi di : « Pa di “janmen Bondjé” [ké roun sèrman] [...]. A pou lò zòt ka di “wi” a wi, é lò zòt ka di “non”, a non ; paské tousa zòt ka di anplis di sa ka vini di méchan-an » (Mat. 5:33-37). Mé Jézi té savé ki Lalwa Bondjé té bay Moyiz té ka di Israyélit-ya prété sèrman annan sèrten sitiasyon é ki roun ran adoratèr Jéova ki té fidèl té ja prété sèrman (Gen. 14:22, 23 ; Ex. 22:10, 11). I té savé osi ki Jéova li menm té ja fè sa annan sèrten sitiasyon (Héb. 6:13-17). Donk i pa té lé di ki nou pa té jen divèt prété sèrman. I té lé di ki nou pa divèt di « janmen Bondjé » pou dé bagaj ki pa enpòrtan. Lò nou ka prété sèrman, a douvan Bondjé nou ka fè l’. Donk nou divèt tchenbé nou paròl.

Mé kisa to divèt fè si yé ka doumandé to fè roun sèrman ? Pou koumansé, doumandé to kò si to ké pouvé rèspèkté l’. Si to pa sir ki to ké pouvé fè l’, miyò to pa fè sèrman. Paròl Bondjé-a ka di nou : « Miyò to pa fè pyès vé pasé to fè roun é to pa ka tchenbé l’ » (Eccl. 5:5). Réfléchi osi asou prensip-ya ki ka alé ké sitiasyon-an. Épi apré sa, aji soulon sa to konsyans ki fòrmé gras a Labib-a ka di to fè. Ki prensip to divèt gadé ?

Sèrten sèrman ka alé ké volonté Bondjé. Parèkzanp, promès Témwen Jéova-ya ka fè lò yé ka maryé. Promès yé ka fè sa jou-a, a roun sèrman. Mouché ké madanm ka promèt kontan yé konpanyen douvan Bondjé ké douvan plizyèr témwen é yé ka promèt pran swen ké rèspèkté yé konpanyen pannan ‘tout tan yé ké vivan’. (Sèrten mouché ké madanm pa ka sèrvi menm mo-ya mé a roun promès yé ka fè douvan Bondjé kanmenm.) A sa moman-an, yé ka divini mouché ké madanm, é yé divèt rété maryé pou tout yé lavi (Gen. 2:24 ; 1 Cor. 7:39). Sa kalité vé-ya bon, korèk é i ka alé ké sitiasyon-an épi ké volonté Bondjé.

Sèrten sèrman pa ka alé ké volonté Bondjé. Parèkzanp, vré krétyen-yan pa ka promèt pran zarm pou défann yé péyi ouben arété adoré Bondjé. Si yé té ka fè sa, yé té ké dézobéyi roun koumannman Bondjé. Krétyen-yan pa divèt « fè parti di monn-an ». Donk yé pa pouvé alé briga pou sa monn-an (Jean 15:19 ; Is. 2:4 ; Jacq. 1:27).

 Sèrten sèrman ka dépann di nou konsyans. Détan, anvan roun krétyen désidé si i ké fè roun sèrman, i ké divèt pran tan byen gadé konsèy Jézi ki ka doumandé nou « bay Sézar sa ki di Sézar, mé bay Bondjé sa ki di Bondjé » (Luc 20:25).

Annou imajiné ki roun krétyen gen pou doumandé nasyonalité roun péyi ouben roun paspòr, é i ka anprann ki yé ké doumandé li fè sa yé ka aplé roun serment d’allégeance. Si sa sèrman-an lé di ki i ké fè roun bagaj ki pa ka alé ké lalwa Bondjé, so konsyans pa ké pèrmèt li fè sa. Mé pitèt gouvèrnman-an ké pèrmèt li chanjé sa ki annan sa sèrman-an pou sa pa jennen so konsyans.

Si i ka désidé fè sa, sa pouvé alé ké prensip nou ka trouvé annan Romains 13:1 : « Tout moun divèt obéyi sa-ya ki gen otorité. » Donk pitèt roun krétyen pouvé désidé ki i pouvé promèt fè roun bagaj Bondjé lé nou tout fè.

Sa enpòrtan pou nou tchenbé kont di nou konsyans si yé ka doumandé nou prété sèrman asou roun bagaj ouben fè roun jès pou prété sèrman. Tan-lontan, Romen-yan ké Sit-ya té ka sèrvi yé zépé pou promèt roun bagaj. Lò yé té ka fè sa, yé té ka promèt douvan roun bondjé lagèr ki yé pa té ka manti. Grèk-ya yé menm té ka lévé lanmen laro syèl-a. Lò yé té ka fè sa, yé té ka rékonnèt ki i té gen roun bondjé ki té pwisan é ki té ka gadé sa moun té ka di é té ka fè asou latè-a é ki yé té gen kont pou randé l’.

Roun moun ki ka adoré Jéova pa ké pran pyès senbòl ki ka réprézanté roun péyi ouben ki gen roun lyen ké fo rélijyon-an pou fè pyès promès. Mé kisa to divèt fè si to k’alé annan roun tribinal épi yé ka doumandé to pozé to lanmen asou Labib-a épi promèt ki to ké di lavérité ? Annan sa sitiasyon-an, to pouvé désidé fè l’ paské Labib-a ka palé di plizyèr sèrvitèr fidèl tan-lontan ki fè roun jès pou fè roun sèrman (Gen. 24:2, 3, 9 ; 47:29-31). Sa enpòrtan pou to sonjé ki, lò to ka fè sa sèrman-an, a douvan Bondjé to ka promèt di lavérité. To divèt paré pou di lavérité pou chak késyon yé ké pozé to.

Nou lanmityé ké Jéova gen bokou valò pou nou. Anvan nou fè roun sèrman nou divèt priyè l’ épi réfléchi pou nou sir ki sa sèrman-an pa ka jennen nou konsyans é ki i ka alé ké prensip-ya ki annan Labib-a. É si nou ka désidé prété sèrman, a pou nou tchenbé nou paròl ! (1 Pierre 2:12).