Ruta 1:1-22
1 Ao e a riki te rongo i aon te aba, ni boong ake a kairiri iai ma te kaetitaeka ae riai* taani motikitaeka,+ ao e a mwananga mai Betereem+ i Iuta te mwaane temanna bwa e na maeka bwa te ianena n taian tawaana i* Moaba,+ ngaia ma buuna ao natina mwaane aika uoman.
2 Aran te mwaane aei Erimereka,* arani buuna Naomi,* ao araia natina mwaane ake uoman boni Maron* ao Kirion.* Bon I-Eberata mai Betereem i Iuta naakai. Ao a a roko n taian tawaana i Moaba ao n tiku iai.
3 Imwin tabeua te tai ao e a mate Erimereka are buun Naomi, ao e a tiku neiei ma natina mwaane ake uoman.
4 Imwina riki ao a mare mwaane akekei ma aineni Moaba, aran neiere temanna Orebwa ao aran are temanna Ruta.+ A tiku ikekei i nanon tao tebwina te ririki.
5 Ao a a manga mate naati ake uoman ake Maron ao Kirion, ao e a tiku neierei n akea natina ake uoman ao buuna.
6 Mangaia are e a oki rikaaki man taian tawaana ake i Moaba ma aine ake buuia natina, bwa e ongo i Moaba ae e a manga mutiakinia ana aomata Iehova n arona n angania te amwarake.*
7 E kitana te tabo are e a tia ni mamaeka iai ma aine ake uoman ake buuia natina. Ngke a nakonako i nanon te kawai n oki rikaaki nakon te aba ae Iuta,
8 ao e taku Naomi nakoia aine ake uoman ake buuia natina: “Naako oki nakoni mwengaia tinami. E bia kaotiota nakoimi te tangira ae koaua* Iehova,+ n aron are kam a tia ni kaotiotia nakoia mwaane ake a a tia ni mate ao nakoiu.
9 E bia kariaia* Iehova bwa e na reke iroumi n tatabemaningkami te mweraoi* ni mwengaia buumi.”+ Ao e kaboria ma ngaiia, ao a tang n takarua.
10 A teimatoa n taku nakoina: “Tiaki ngaia anne, ma ti na bon iriko nakoia am koraki.”
11 Ma e taku Naomi: “Kam na oki natiu. Bukin tera bwa kam na irai? I kona ni manga bungia riki natiu mwaane aika a na riki bwa buumi?+
12 Kam na oki natiu. Naako, bwa I a aki kona ni mare ma temanna kioina ngkai I a rangi ni kara. E ngae ngkana tao I kona ni kantaningaia bwa e na reke buu n te tairiki aei, ao ni bungia naba natiu mwaane,
13 ma kam kona n teimatoa n tataningaiia ni karokoa ae a ikawai? Kam na tiku n aromi ae akea buumi ibukia? Tiaki ngaia anne natiu, I rangi n nanokawaki ibukimi, bwa e a tia bain Iehova n ekainako.”+
14 A a manga tang riki n takarua, ao imwina e kaboria Orebwa ma tinani buuna ao e nako. Ma Ruta e nimta neiei.
15 Mangaia are e taku Naomi: “Noria! E a okinako buun natiu are temanna nakoia ana koraki ao nakoia atuana. Ko na okinako ma buun natiu arei.”
16 Ma e taku Ruta: “Tai butiiai bwa N na kitaniko, ao n rairaki man irirakim, bwa ike ko nako iai ao N na nako naba iai, ao ike ko tiku iai n te tairiki ao N na tiku naba iai n te tairiki. A na riki am koraki bwa au koraki, ao Atuam bon Atuau.+
17 Ike ko mate iai ao N na mate naba iai, ao N na kaiiaki naba iai. E bia katuuaaeai Iehova ao ni kamwaitia riki, ngkana I kariaia te bwai teuana ae tiaki te mate bwa e na karaureai ma ngkoe.”
18 Ngke e noria Naomi bwa e imanono Ruta ni kan iria, ao e a aki manga kataia ni bita nanona.
19 Ao a uaia n reitaanako kawaia ni karokoa ae a roko i Betereem.+ N te tai are a roko naba iai i Betereem, ao a bane kaain te kaawa ni kakarongoa ibukia, ao a taku aine: “Naomi aio?”
20 Ao e taku nakoia aine: “Tai aranai bwa Naomi.* Aranai bwa Maraa,* bwa e a tia n rangi ni karawawataa maiuu Teuare Moan te Mwaaka.+
21 I onrake ngke I nako, ma e kaokai Iehova n akea uotau. E aera bwa kam na aranai bwa Naomi, ngkana bon Iehova ae kaitaraai ao bon Teuare Moan te Mwaaka ae karawawataai?”+
22 Anne aron okin Naomi man taian tawaana ake i Moaba+ ma buun natina ae Ruta ae te I-Moaba. A roko i Betereem ni moanakin taiakin te baare.+
Taiani Kabwarabwara Mai Nano
^ Ke, “tautaeka.”
^ Ke, “aononi.”
^ Ae nanona, “Atuau Bon te Uea.”
^ Ae nanona, “Kukureiu.”
^ Tao e nako man te taeka n Ebera ae nanona, “rikirake ni mamaara; bwaka n aoraki.”
^ Ae nanona, “te Aomata ae Mamaara; te Aomata ae E a Roko n Tokina.”
^ Ebera, “te kariki.”
^ Ke, “te tangira ae kona n onimakinaki.”
^ Ke, “karaoa te bwaintangira.”
^ Ebera, “tabo ni motirawa.”
^ Ae nanona, “Kukureiu.”
^ Ae nanona, “Rawawata.”
