Areru 25:1-22
Ana areru Tawita.
א [Areba]
25 I rairaki nakoim ngkoe ae Iehova.
ב [Beta]
2 I onimakiniko Atuau,+Tai kariaia bwa N na kamaamaeaki.+
Tai kariaia bwa a na kakatonga akana kairiribai nakoiu ibukin rawawatau.+
ג [Kimera]
3 Ni koauana akea ae e kabotoa ana kantaninga i aom ae e na kamaamaeaki,+Ma e mena te kamaamaeaki imwaia te koraki aika mwamwanaa te aba n akea bukina.+
ד [Tareta]
4 Kaotii kawaim nakoiu Iehova,+Ao reireinai kawaim.+
ה [Ee]
5 Kanakonakoai n am koaua ao reireinai,+Bwa bon Atuau ngkoe ae te tia kamaiuai.
ו [Wau]
I kantaningaiko ni kabongnga.
ז [Taiin]
6 Uringa am nanoanga Iehova, ao am tangira ae koaua,*+Ake ko kaotiotii n taai nako.*+
ח [Eta]
7 Tai uringi au bure ma au kairua ngke te roro n rikirake ngai.
Uringai ni kaineti ma am tangira ae koaua,*+Ibukin am raoiroi, ngkoe ae Iehova.+
ט [Teta]
8 E raoiroi ao e eti Iehova.+
Anne bukina ae e reireinia iai taani bure te kawai nakon te maiu.+
י [Iote]
9 E na kairiia akana nimamannei n te eti,*+Ao e na reireinia akana nimamannei kawaina.+
כ [Kabe]
10 E mena te tangira ae koaua* ao te kakaonimaki ni kawain Iehova ni kabane,Ibukia te koraki ake a kawakin ana berita+ ma ana kauring.+
ל [Rame]
11 Ibukin aram Iehova,+Ao ko na kabwaraa au bure, e ngae ngke e a korakora.
מ [Mem]
12 Antai te aomata ae maaka Iehova?+
Ane e na reireinna te kawai ae e riai n rineia.+
נ [Nun]
13 E* na nora te raoiroi,+Ao a na abana te aba kanoana.*+
ס [Tameka]
14 Bon aia bwai te iraorao ae kaan ma Iehova, te koraki ake a maakua,+Ao e kaota ana berita nakoia.+
ע [Aiin]
15 A tataraa Iehova matau n taai nako,+Bwa e na kainaomatai waeu man te karaun.+
פ [Be]
16 Raira matam nakoiu ao akoai,Bwa I a tiku n tii ngai ao akea korakorau.
צ [Tiate]
17 A rikirake ni mwaiti rawawatan nanou.+
Kainaomataai mani marakiu.
ר [Reti]
18 Nora rawawatau ao au kangaanga,+Ao kabwarai au bure ni kabane.+
19 Nori mwaitiia akana kairiribai nakoiu,Ibukini korakoran ribaakiu irouia, a a kani karaoa ae iowawa nakoiu.
ש [Tiin]
20 Kawakina maiuu* ao kamaiuai.+
Tai kariaia bwa N na kamaamaeaki, bwa I kamanoai iroum.
ת [Tau]
21 Ke a kawakinai etin arou ma au raoiroi,+Bwa I kantaningaiko.+
22 Ngkoe ae te Atua, kamaiua* Iteraera man rawawatana ni kabane.
Taiani Kabwarabwara Mai Nano
^ Ke, “Ake man taai ake ngkoangkoa.”
^ Ke, “tangira ae kona n onimakinaki.”
^ Ke, “tangira ae kona n onimakinaki.”
^ Ebera, “n te motikitaeka.”
^ Ke, “te tangira ae kona n onimakinaki.”
^ Ebera, ne’phesh, nora Nanon Taeka.
^ Ebera, “ana kariki.”
^ Ebera, ne’phesh, nora Nanon Taeka.
^ Ebera, “manga kabooa.”
