Areru 52:1-9
Ke kaetieti nakon te mataniwi n te anene. Matikiera.* Ana areru Tawita ngke e roko Toeka are tibun Etom, n tuanga Tauro bwa e roko Tawita n ana auti Aimereka.+
52 E aera ngkai ko kamoamoai am mwakuri aika bubuaka, ngkoe ae ko korakora?+
E teimatoa ana tangira ae koaua* te Atua ni kabongnga.+
2 E kakang newem n aron te mwariro,+Ao e bairea te bwai ae karuanikai ao e mwamwakuri ni mwamwanaa te aba.+
3 Ko tangira riki te bwai ae buakaka nakon te bwai ae raoiroiAo te kewe nakon taekinan te bwai ae eti. (Tiera)
4 Ko tangiri taeka nako aika karuanikai,Ngkoe te newe ae te tia mwamwanaa te aba!
5 Anne bukina ae e nangi boni katikiko iai ni kabwakako n aki toki te Atua,+E na raweiko ma ni buritikonako man am umwanrianna,+E na taeki wakaam mai abaia akana maiu.+ (Tiera)
6 Ane a na nora anne akana raoiroi ao a na taonaki n te maaku,+Ao a na ngareakina teuanne.+
7 “Noria, ao aei te mwaane ae aki karika te Atua bwa ana tabo ni kamanomano,*+Ma e onimakini kaubwaina aika rangi ni bati,+Ao e mwiokoi* oin ana babaire aika buakaka.”*
8 Ma N na riki bwa ai aron te aroka ae te oriwa ae manguroro n ana auti te Atua,I onimakina ana tangira ae koaua* te Atua,+ n aki totoki.
9 N na karaoiroiko n aki toki ibukini mwakuri aika ko karaoi,+N na kabotoa au kantaninga i aon aram i mataia am aomata aika kakaonimaki ni koaua,+Ibukina bwa e raoiroi te baere ko karaoia.
Taiani Kabwarabwara Mai Nano
^ Nora Nanon Taeka.
^ Ke, “tangira ae kona n onimakinaki.”
^ Ke, “tabo ni kamaiu.”
^ Ke, “katanna n.”
^ Ebera, “rawawata ake e karikii.”
^ Ke, “tangira ae kona n onimakinaki.”
