Iangoa te bwai ae riki aei: Ngke e takaakaro Tim ma raoraona ao e a teke naba kiraatin ana kaa kaain rarikia ngke e kare n te booro.

Ngke arona bwa Tim ngkoe, tera ae ko na karaoia?

AANGA AIKA TENUA AKE KO KONA NI KARAOI:

1. Birinako.

2. Bukina temanna.

3. Tuanga kaain rarikim te baere riki, ao kaotia ae ko tauraoi ni kaboomwi.

Ko kona ni kaririaki nakon A. Ma n taai nako, a bati bukina aika raraoi ae ko na kaotii iai am kairua n aki ongeia bwa kiraatin te kaa ae uruaki ke te bwai teuana riki.

1. Bon te bwai ae eti.

   E kangai te Baibara: “Ti kani bwabwaina te koaua ni bwaai ni kabane.”—Ebera 13:18.

2. Aomata a kai kabwarai riki aia bure naake a kaotii aia kairua.

   E kangai te Baibara: “Ane e karabai ana bure ao e na aki nakoraoi arona, ma ane e kaotii ma ni kitan ao e na nanoangaaki.”—Taeka N Rabakau 28:13.

3. Ae moan te kakawaki riki, e kukurei iai te Atua.

   E kangai te Baibara: “E riribaa te aomata ae mwamwanaa te aba Iehova, ma e kaan Ana iraorao ma akana raoiroi.”—Taeka N Rabakau 3:32.

E kataia Karina ae 20 ana ririki ni karabaa mairoun tamana beeban tuuaana ni kabuubuti. Ma e aki kona n teimatoa ni karabaa. E taku Karina, “Tao teuana te ririki imwina ao tamau e a nora arau n te tuuaa ibukin te kabuubuti. I a reke n te kangaanga ae buburakaei!”

Tera te reirei iai? E taku Karina: “E kakorakoraa riki te kangaanga karabaan am kairua. Ko na boni katuuaaeaki iai imwina riki!”

E kangai te Baibara: “Ti bane ni kakaraoa ae kairua n taai aika bati.” (Iakobo 3:2, kabwarabwara mai nano) Ao n aron ae ti a tia n noria, ko kaotia bwa ko nanorinano ao ko a ikawai ngkana ko kaotii am kairua, ao ko karaoa anne ngkekei naba.

Are imwina boni karekean reireiam man am kairua. E taku te teinnaine ae Vera: “I kataia n tarai au kairua nako bwa reireiau ae e na buokai ni karikai bwa te aomata ae tamaroa riki, ao ni karaoa ae kaokoro ni kanakoraoa riki te kangaanga ngkana e a manga riki.” Ti na noria bwa ko na kangaa ni karaoa anne.

Ko tangoa ana rebwerebwe tamam ao ko urua. Tera ae ko na karaoia imwina?

• Tai kaokaotia ao ni kantaningaia bwa e na aki noria.

• Tuangnga raoi te baere riki.

• Tuangnga te baere riki ma ko bukina temanna.

Ko aki bwaati n am ukeuke bwa ko aki kamatebwai. Tera ae ko na karaoia imwina?

• Bukina te ukeuke.

• Butimwaea bukinam ngkai e aki bwaati am bwi.

• Bukina te tia reirei bwa iai aki kukureina iroum.

 Manga tarai baikana riki akana uoua akanne, ao iangoia bwa aongkoa ngkoe (1) tamam ao (2) am tia reirei. Tera aia iango ibukim tamam ao am tia reirei ngkana ko tauraoi ni kaotii am kairua? Tera aia iango ibukim ngkana ko karabai am kairua?

Iangoa ngkai te kairua ae ko karaoia n te ririki ae nako ao kaekai titiraki aikai.

Tera te kairua anne? Tera arom nakon am kairua anne?

• I karabaa.

• I bukina temanna.

• I tauraoi ni kaotia.

Ngke ko aki kaota am kairua, tera am namakin imwina?

• I kukurei bwa I aki katuuaaeaki!

• I uringaaba bwa I bon riai n taekina te koaua.

Tera arom ni kanakoraoia riki?

Tera reireiam man am kairua?

E aera ngkai a aki kaotii aia kairua aomata tabeman?

Tera aia iango aomata ibukim ngkana ko kataia ni karabai am kairua n taai nako, ma tera aia iango ibukim ngkana ko kaotii?—Ruka 16:10.