Teutana te tai imwaini maten Iesu ao e karekea ana tai ni maroro ae okoro ma taan rimwina ake aman aika Betero, Iakobo, Ioane ao Anterea. Ngke e taetae ni burabetini kanikinaean okina Iesu ni kabaneani boong, e a tabeka te titiraki ae kakawaki ae kangai: “Antai raoi te toro ae kakaonimaki ma ni wanawana, are e mwiokoia ana toka i aoia ana tabonibai bwa e na angangania kanaia n te tai ae riai?” (Mataio 24:3, 45; Mareko 13:3, 4) E karau nanoia taan rimwina Iesu bwa ngkai aia “toka” ngaia, e na rineia te koraki ake a na teimatoa ni katauraoi amwarake n taamnei ibukia taan rimwina n tain te toki. E aki nanonaki te taeka ae te “toro” bwa te aomata ae tii temanna ma bon te kurubu n aomata. Antai ngkanne te toro aei?

Bon taan rimwin Iesu aika kabiraki aika karako mwaitiia. E kinaaki raoi te “toro” bwa e irekereke ma te Rabwata n Tautaeka Ibukia Ana Tia Kakoaua Iehova. A katauraoi amwarake n taamnei n taia aika riai nakoia raoia n taromauria Iehova. Ti onimakina te toro ae kakaonimaki bwa e na teimatoa n anganira “te amwarake ae tau ibukini [kainnanora], n te tai ae riai.”—Ruka 12:42.

E tararuaa batan te Atua. (1 Timoteo 3:15) E anganaki te toro aei mwiokoana ae kakawaki iroun Iesu bwa e na kaira te mwakuri ibukin ana botaki Iehova i aon te aba n aron tararuaan ana bwai nako, waakinan aron te mwakuri n uarongorongo, ao reiakinara rinanon ara ekaretia nako. Ibukini katauraoani baika ti tangiri n taai ake ti kainnanoi iai, e a tibwatibwai amwarake n taamnei “te toro ae kakaonimaki ma ni wanawana” rinanoni booki ake ti kabonganai n ara mwakuri ni minita, n ikotaki naba ma kaetieti ake a kakaraoaki n ara bobotaki ao n ruunga.

E kakaonimaki te toro aei nakoni koaua man te Baibara ao te mwioko iai ae tataekinan te rongorongo ae raoiroi, ao e wanawana n arona n tararuai raoi ana bwai nako Kristo i aon te aba. (Mwakuri 10:42) E kakabwaiaaki ana mwakuri iroun Iehova ni karikirakeani mwaitiia taani kakoaua ao katauraoan amwarake n taamnei aika rangi ni bati.—Itaia 60:22; 65:13.

• Antai ae mwiokoaki iroun Iesu bwa e na kakaamwarakeia taan rimwina ni bwaai n taamnei?

• N aaro raa ae e kakaonimaki ma ni wanawana iai te toro aei?