“Kerikaakini marurungin aia iango rooro n rikirake bon te kangaanga ae riai ni waekoa ni buokaki, ao ti kakoauaa bwa te waaki n reitaki n te intanete boni ngaia naba bukin rikin te kangaanga aei.”​—Dr. Vivek Murthy, te mataniwi n te botaki ni kuakua i Amerika, New York Times, Tun 17, 2024.

 A na kangaa kaaro ni kamanoia natiia mani karuanikain te waaki n rereitaki n te intanete? E anga taeka n reirei aika manena te Baibara.

 Iangoi ana boto n reirei te Baibara aikai.

 “E iaiangoa raoi nakonakona te aomata ae ataibwai.”​—Taeka N Rabakau 14:15.

 Ko aki riai ni kairoroaki bwa ko na kariaia natim bwa e na kabongana te intanete n reitaki iai ngkai ko a ataia bwa e kona n ruanikai iai maiuna. Imwain ae ko kariaia bwa e na kabongana te intanete n reitaki iai, taraia raoi bwa e bwaati n ataa tianakin ana tai ni kabongana, iai raoraona aika raraoi aroaroia, ao e kakararoaa man taraakini baika bubuaka.

•   Ibukini kaotaam riki, wareki kaongora aikai “Should My Child Use Social Media?” ao “Teaching Your Teenager Social Media Safety.”

 “Kabonganai raoi ami tai ni kabane.”​—I-Ebeto 5:16.

 Ngkana ko kariaia natim bwa e na reitaki i aon te intanete, katea tuana ao katerea nakoina ae e kona ni buokaki ao ni kamanoaki ngkana e iri nanon tuua akanne. Kamatairikiko ni bitakin aroaron natim ake a kona ni katerea nakoim bwa ko a riai ni kauarerekea ana tai n reitaki i aon te intanete.

•   Kabongana te korotaamnei ae maiu ae Kawanawanako ni Kamanenaan te Intanete ni buoka iai natim bwa e na ataa riaini kauarerekean ana tai n te intanete.

 E taekinna te Baibara bwa ti a maeka n “taai aika okoro aika karuanikai.” (2 Timoteo 3:​1-5) Ma e ngae n anne, e anganira naba taeka n reirei aika manena ibukini buokara ni kaaitarai kangaanga. E raka i aon 20 rinanin kaongora aika boto i aon te Baibara, ake a kona kaaro ma ataei ni karekei ibukin te kaongora aei ae marurungin aia iango ataei aika tebwi tabun te ririki.